សន្និសីទវីអិនអិនអាយស៊ី អ៊ីនធឺណិត ឆ្នាំ ២០២៦៖ ជម្រុញការដាក់ឱ្យប្រើប្រាស់ IPv6-Only បង្កើតកម្លាំងចលករអភិវឌ្ឍន៍ហេដ្ឋារចនាសម្ព័ន្ធឌីជីថលជាតិ

នាថ្ងៃទី ១៩ ខែមិថុនា នៅទីក្រុងហូជីមិញ មជ្ឈមណ្ឌលអ៊ីនធឺណិតវៀតណាម (VNNIC - ស្ថិតក្រោមក្រសួងវិទ្យាសាស្ត្រនិងបច្ចេកវិទ្យា) បានរៀបចំសន្និសីទ VNNIC Internet Conference 2026 ក្រោមប្រធានបទ «ការដាក់ឱ្យប្រើប្រាស់ IPv6-Only – កម្លាំងចលករអភិវឌ្ឍន៍ហេដ្ឋារចនាសម្ព័ន្ធឌីជីថលជាតិ»។

ព្រឹត្តិការណ៍នេះមានការអញ្ជើញចូលរួមពីសំណាក់ថ្នាក់ដឹកនាំ អ្នកជំនាញការ តំណាងស្ថាប័នគ្រប់គ្រង អង្គការអ៊ីនធឺណិតអន្តរជាតិ សមាគម និងសហគ្រាសបច្ចេកវិទ្យាក្នុងស្រុកនិងអន្តរជាតិជាង ៤០០ រូប។

ថ្លែងមតិនៅក្នុងសន្និសីទ អនុរដ្ឋមន្ត្រីក្រសួងវិទ្យាសាស្ត្រនិងបច្ចេកវិទ្យា លោក Pham Duc Long បានសង្កត់ធ្ងន់ថា បន្ទាប់ពីការអភិវឌ្ឍអស់រយៈពេលជាង ៣០ ឆ្នាំ អ៊ីនធឺណិតមិនត្រឹមតែជាឧបករណ៍តភ្ជាប់ទៀតនោះទេ ប៉ុន្តែបានក្លាយជាគ្រឹះស្ថាននៃបណ្តាសកម្មភាពសេដ្ឋកិច្ច - សង្គម ការច្នៃប្រឌិតបង្កើតថ្មី ពាណិជ្ជកម្មតាមប្រព័ន្ធអេឡិចត្រូនិក ហិរញ្ញវត្ថុឌីជីថល សេវាសាធារណៈអនឡាញ និងផលិតកម្មឆ្លាតវៃ។

អនុរដ្ឋមន្ត្រីក្រសួងវិទ្យាសាស្ត្រនិងបច្ចេកវិទ្យា លោក Pham Duc Long ថ្លែងមតិនៅក្នុងសន្និសីទ។

ការអភិវឌ្ឍយ៉ាងខ្លាំងក្លានៃបញ្ញាសិប្បនិម្មិត បច្ចេកវិទ្យាខ្លៅ (Cloud Computing) អ៊ីនធឺណិតនៃវត្ថុ (IoT) ទិន្នន័យធំ (Big Data) បណ្តាញ 5G, 6G និងបណ្តាសេវាកម្មឌីជីថល កំពុងដាក់ចេញនូវតម្រូវការថ្មីចំពោះមុខហេដ្ឋារចនាសម្ព័ន្ធអ៊ីនធឺណិត។ អ៊ីនធឺណិតមិនត្រឹមតែត្រូវការបើកទូលាយអំពីទ្រង់ទ្រាយប៉ុណ្ណោះទេ ប៉ុន្តែថែមទាំងត្រូវផ្លាស់ប្តូរថ្មីអំពីស្ថាបត្យកម្ម និងវិធីសាស្ត្រប្រតិបត្តិការផងដែរ។

បើតាមលោកអនុរដ្ឋមន្ត្រី IPv6-Only គឺជាជំហានអភិវឌ្ឍន៍បន្ទាប់នៃអ៊ីនធឺណិត រួមចំណែកបង្កើតជាហេដ្ឋារចនាសម្ព័ន្ធដែលមានសមត្ថភាពបើកទូលាយធំជាងមុន ប្រតិបត្តិការប្រកបដោយប្រសិទ្ធភាព សុវត្ថិភាព និងត្រៀមលក្ខណៈជាស្រេចដើម្បីឆ្លើយតបទៅនឹងតម្រូវការថ្មីៗ។ ការបំប្លែងទៅជា IPv6-Only មិនត្រឹមតែជាការតម្លើងកម្រិតបច្ចេកទេសប៉ុណ្ណោះទេ ប៉ុន្តែថែមទាំងជាការរៀបចំគ្រឹះស្ថានហេដ្ឋារចនាសម្ព័ន្ធសម្រាប់ដំណាក់កាលអភិវឌ្ឍន៍ថ្មីមួយរបស់ប្រទេសជាតិនៅក្នុងយុគសម័យឌីជីថល។

ប្រធានស្តីទី VNNIC លោក Nguyen Truong Giang ថ្លែងមតិនៅក្នុងសន្និសីទ។

ប្រធានស្តីទី VNNIC លោក Nguyen Truong Giang បានឱ្យដឹងថា ជាង ៦៧% នៃអ្នកប្រើប្រាស់អ៊ីនធឺណិតនៅវៀតណាម នាពេលបច្ចុប្បន្នគឺចូលប្រើប្រាស់តាមរយៈ IPv6 ជាមួយនឹងអ្នកប្រើប្រាស់ជាប្រចាំរាប់សិបលាននាក់ជារៀងរាល់ថ្ងៃ។ ហេដ្ឋារចនាសម្ព័ន្ធអ៊ីនធឺណិត បណ្តាញទូរគមនាគមន៍ សេវាឌីជីថល និងបណ្តាគ្រឹះស្ថានអនឡាញធំៗនៅវៀតណាមបានត្រៀមលក្ខណៈជាស្រេចសម្រាប់ IPv6។

នាថ្ងៃទី ២៧ ខែតុលា ឆ្នាំ ២០២៥ រដ្ឋមន្ត្រីក្រសួងវិទ្យាសាស្ត្រនិងបច្ចេកវិទ្យាបានប្រកាសហត្ថលេខាលើសេចក្តីសម្រេចលេខ 3369/QĐ-BKHCN អនុម័តលើកម្មវិធីជម្រុញការដាក់ឱ្យប្រើប្រាស់ និងបំប្លែងទៅជា IPv6-Only ដំណាក់កាល ២០២៦-២០៣០។ កម្មវិធីនេះតម្រង់ទិសដៅបំប្លែងជាលក្ខណៈសមស្របគ្នានូវហេដ្ឋារចនាសម្ព័ន្ធអ៊ីនធឺណិតជាតិទៅជា IPv6-Only ជម្រុញការច្នៃប្រឌិតបង្កើតថ្មី និងធ្វើសមាហរណកម្មជាមួយប្រព័ន្ធអេកូឡូស៊ីអ៊ីនធឺណិតសកល។

សន្និសីទ VNNIC Internet Conference 2026។

នៅក្នុងសន្និសីទ បណ្តាតំណាងបានអញ្ជើញចូលរួមសម័យប្រជុំពេញអង្គ «ការដាក់ឱ្យប្រើប្រាស់ IPv6-Only - ដំណោះស្រាយបំប្លែងតាមផែនការកំណត់ជាតិ» កិច្ចពិភាក្សាកម្រិតខ្ពស់ និងសម័យប្រជុំឯកទេសស្របគ្នាចំនួនពីរ អំពីផែនការកំណត់ បច្ចេកវិទ្យា និងតថភាពជាក់ស្តែងនៃការដាក់ឱ្យប្រើប្រាស់ ការអភិវឌ្ឍសេវាឌីជីថលភ្ជាប់ជាមួយធនធានអ៊ីនធឺណិតនៅក្នុងយុគសម័យអ៊ីនធឺណិតជំនាន់ថ្មី។

នៅក្នុងក្របខ័ណ្ឌនៃព្រឹត្តិការណ៍នេះ ក៏មានប្រព្រឹត្តទៅនូវសកម្មភាពពិព័រណ៍ ណែនាំផលិតផល ដំណោះស្រាយបច្ចេកវិទ្យា និងហេដ្ឋារចនាសម្ព័ន្ធអ៊ីនធឺណិតផងដែរ។ VNNIC ក៏បានប្រកាសនូវសំណុំលក្ខវិនិច្ឆ័យវាស់វែងកម្រិតនៃការបំប្លែងទៅជា IPv6-Only ចំពោះមុខបណ្តាស្ថាប័ន អង្គភាព និងសហគ្រាស ដើម្បីធ្វើជាមូលដ្ឋានវាយតម្លៃដំណើរការដាក់ឱ្យប្រើប្រាស់ និងអនុវត្តគោលដៅ IPv6 ជាតិដំណាក់កាល ២០២៦-២០៣០។

មុននោះ នាថ្ងៃទី ១៨ ខែមិថុនា មជ្ឈមណ្ឌលអ៊ីនធឺណិតវៀតណាមបានរៀបចំសន្និសីទបូកសរុបកម្មវិធីជម្រុញ និងគាំទ្រការបំប្លែងទៅជា IPv6 សម្រាប់ស្ថាប័នរដ្ឋដំណាក់កាល ២០២១-២០២៥ និងដាក់ឱ្យដំណើរការកម្មវិធី IPv6-Only ដំណាក់កាល ២០២៦-២០៣០៕

បើកដំណើរការកម្មវិធី Happy Vietnam ២០២៦ ក្រោមប្រធានបទ «សុភមង្គលពីបណ្ដាអ្វីៗដ៏សាមញ្ញ» យុគសម័យ - រង្វាន់សារព័ត៌មានផ្សព្វផ្សាយអំពីសិទ្ធិមនុស្ស «វៀតណាមមានសុភមង្គល - Happy Vietnam ២០២៦» ត្រូវបានបើកដំណើរការ ដោយបន្តផ្សព្វផ្សាយពង្រីកនូវបណ្ដារឿងរ៉ាវនៃជីវភាពរស់នៅដ៏ពិតប្រាកដ រួមចំណែកឆ្លុះបញ្ចាំងពីលក្ខណៈរូបភាពនៃប្រទេស វៀតណាម មួយប្រកបដោយសន្តិភាព, ការអភិវឌ្ឍ និងមានសុភមង្គល។

ប្រាក់សោធននិវត្តន៍ និងការឧបត្ថម្ភធានារ៉ាប់រងសង្គម កើនឡើង ៨% ចាប់ពីថ្ងៃទី ០១ ខែកក្កដា ឆ្នាំ ២០២៦ យុគសម័យ - យោងតាមអនុក្រឹត្យលេខ 162/2026/ND-CP ដែលរដ្ឋាភិបាលទើបតែបានប្រកាសដាក់ឱ្យប្រើប្រាស់ ចាប់ពីថ្ងៃទី ១ ខែកក្កដា ឆ្នាំ ២០២៦ ប្រាក់សោធននិវត្តន៍ និងការឧបត្ថម្ភធានារ៉ាប់រងសង្គម នឹងត្រូវកសាងបង្កើនបន្ថែម ៨%។ ចំពោះករណីមួយចំនួនដែលមានកម្រិតទទួលទាប ក្រោយពេលទទួលបានការបង្កើនជារួមហើយនោះ នឹងត្រូវលើកកម្ពស់កម្រិតប្រាក់សោធននិវត្តន៍ ការឧបត្ថម្ភធានារ៉ាប់រងសង្គម និងការឧបត្ថម្ភប្រចាំខែ រហូតដល់ ៣,៨ លានដុង/ខែ។

ឌឹកអាញ់