ហេដ្ឋារចនាសម្ព័ន្ធថាមពល - មូលដ្ឋានគ្រឹះសម្រាប់ការអភិវឌ្ឍសេដ្ឋកិច្ចសមុទ្រ

ការចែករំលែកទាំងនេះត្រូវបានអនុអគ្គនាយក EVN លោក Nguyen Tai Anh លើកឡើងនៅក្នុងសិក្ខាសាលាថ្នាក់ជាតិ “បំពេញបង្គ្រប់ស្ថាប័ន គោលនយោបាយជំរុញការអភិវឌ្ឍសេដ្ឋកិច្ចសមុទ្រប្រកបដោយចីរភាព” ដែលសហការរៀបចំដោយក្រសួងកសិកម្ម និងបរិស្ថាន រួមជាមួយគណៈកម្មាធិការគោលនយោបាយ យុទ្ធសាស្ត្រមជ្ឈិម និងគណៈកម្មាធិការប្រជាជនខេត្ត Nghe An នាថ្ងៃទី ៥ ខែមិថុនា នៅខេត្ត Nghe An។ នេះគឺជាសកម្មភាពឆ្លើយតបទៅនឹងសប្តាហ៍សមុទ្រ និងកោះវៀតណាម ទិវាមហាសមុទ្រពិភពលោក (ថ្ងៃទី ៨ ខែមិថុនា) និងខែសកម្មភាពដើម្បីបរិស្ថានឆ្នាំ ២០២៦។ អញ្ជើញចូលរួមក្នុងសិក្ខាសាលានេះ មានតំណាងបណ្តាក្រសួង ស្ថាប័នមជ្ឈិម ថ្នាក់ដឹកនាំនៃ ២១ ខេត្ត ក្រុងជាប់ឆ្នេរសមុទ្រ បណ្តាអ្នកជំនាញការ អ្នកវិទ្យាសាស្ត្រ សមាគម និងសហគ្រាស។

នៅក្នុងសិក្ខាសាលា មតិជាច្រើនបានបញ្ជាក់ថា សេដ្ឋកិច្ចសមុទ្រកំពុងក្លាយជាលំហអភិវឌ្ឍន៍យុទ្ធសាស្ត្រដ៏មានសារៈសំខាន់របស់វៀតណាម ដោយមានសក្តានុពលជាច្រើនសម្រាប់ការធ្វើអាជីវកម្ម។ ទន្ទឹមនឹងបណ្តាវិស័យប្រពៃណី បណ្តាវិស័យដែលកំពុងលេចធ្លោថ្មីៗ ដូចជាថាមពលកកើតឡើងវិញនៅក្រៅឆ្នេរសមុទ្រ ឡូជីស្ទីក (logistics) សមុទ្រ សេដ្ឋកិច្ចវិលជុំ និងការចិញ្ចឹមវារីវប្បកម្មបច្ចេកវិទ្យាខ្ពស់ នឹងរួមចំណែកបង្កើតជាកម្លាំងចលករកំណើនថ្មីសម្រាប់ខឿនសេដ្ឋកិច្ច។

សិក្ខាសាលាថ្នាក់ជាតិ 'បំពេញបង្គ្រប់ស្ថាប័ន គោលនយោបាយជំរុញការអភិវឌ្ឍសេដ្ឋកិច្ចសមុទ្រប្រកបដោយចីរភាព' នាថ្ងៃទី ៥ ខែមិថុនា នៅខេត្ត Nghe An។

ទោះជាយ៉ាងណាក៏ដោយ បណ្តាអ្នកជំនាញការក៏បានចង្អុលបង្ហាញនូវការប្រឈមជាច្រើនអំពីស្ថាប័ន ផែនការ និងការគ្រប់គ្រងលំហសមុទ្រ ដូចជាការជាន់គ្នារវាងបណ្តាផែនការ នីតិវិធីវិនិយោគមានភាពស្មុគស្មាញ និងចន្លោះប្រហោងគោលនយោបាយចំពោះបណ្តាវិស័យសេដ្ឋកិច្ចសមុទ្រថ្មីៗ ជាពិសេសគឺថាមពលកកើតឡើងវិញនៅក្រៅឆ្នេរសមុទ្រ។

តំណាងជាច្រើនបានស្នើថា គឺត្រូវការធ្វើវិសោធនកម្មច្បាប់ធនធាន បរិស្ថានសមុទ្រ និងកោះ តាមទិសដៅបង្កើតជារបៀងគតិយុត្តអំណោយផលជាងមុន ទន្ទឹមនឹងនោះ ធ្វើតុល្យភាពរវាងការអភិវឌ្ឍសេដ្ឋកិច្ច ការការពារបរិស្ថាន ការឆ្លើយតបទៅនឹងការប្រែប្រួលអាកាសធាតុ និងការធានាការពារជាតិ សន្តិសុខសមុទ្រ។

ការរួមចំណែកចូលក្នុងសេដ្ឋកិច្ចសមុទ្រ

ថ្លែងមតិនៅក្នុងសិក្ខាសាលា លោក Nguyen Tai Anh បានឱ្យដឹងថា EVN កំពុងចូលរួមដោយផ្ទាល់ និងដោយប្រយោលនៅក្នុងវិស័យសេដ្ឋកិច្ចសមុទ្រចំនួន ៦៖ ទេសចរណ៍ - សេវាកម្មសមុទ្រ, សេដ្ឋកិច្ចនាវាចរណ៍, ការធ្វើអាជីវកម្មប្រេងកាត និងរ៉ែសមុទ្រ, ការចិញ្ចឹម - ធ្វើអាជីវកម្មវារីសត្វ, ឧស្សាហកម្មតាមបណ្តោយឆ្នេរ និងថាមពលកកើតឡើងវិញ។

EVN ទទួលស្គាល់យ៉ាងច្បាស់ថា ការផ្គត់ផ្គង់អគ្គិសនីសម្រាប់បណ្តាតំបន់សមុទ្រ និងកោះ គឺមិនត្រឹមតែជាភារកិច្ចអាជីវកម្មប៉ុណ្ណោះទេ ប៉ុន្តែថែមទាំងមានលក្ខណៈនយោបាយដ៏មានសារៈសំខាន់ទៀតផង។ ក្នុងបណ្តាឆ្នាំកន្លងទៅ EVN បានវិនិយោគយ៉ាងខ្លាំងក្លានូវបណ្តាគម្រោងផ្គត់ផ្គង់អគ្គិសនីសម្រាប់តំបន់នេះ រួមចំណែកកែលម្អជីវភាពរស់នៅរបស់ប្រជាពលរដ្ឋ ជំរុញសេដ្ឋកិច្ច - សង្គម និងពង្រឹងការពារជាតិ សន្តិសុខ។ គិតមកទល់ពេលនេះ ស្ទើរតែទាំងអស់នៃបណ្តាតំបន់សេដ្ឋកិច្ចពិសេសតាមបណ្តោយឆ្នេរ ត្រូវបានផ្គត់ផ្គង់អគ្គិសនីពីបណ្តាញអគ្គិសនីជាតិ ឬប្រភពអគ្គិសនីមានស្ថិរភាព។

ថ្នាក់ដឹកនាំ EVN បានបញ្ជាក់យ៉ាងមុតមាំថា ចំពោះមុខតម្រូវការអភិវឌ្ឍន៍សេដ្ឋកិច្ចសមុទ្រនៅក្នុងដំណាក់កាលថ្មី តម្រូវការវិនិយោគហេដ្ឋារចនាសម្ព័ន្ធថាមពលសមុទ្រគឺកាន់តែមានភាពបន្ទាន់ខ្លាំងឡើងៗ។

អនុអគ្គនាយក EVN លោក Nguyen Tai Anh ថ្លែងមតិនៅក្នុងសិក្ខាសាលា។

អនុសាសន៍ស្តីពីការរៀបចំផែនការលំហសមុទ្រ និងការផ្លាស់ប្តូរថាមពល

នៅលើមូលដ្ឋាននៃតថភាពសកម្មភាព EVN បានស្នើឱ្យរដ្ឋាភិបាលបន្តផ្តល់អាទិភាពដល់ប្រភពធនធានសម្រាប់ការអភិវឌ្ឍហេដ្ឋារចនាសម្ព័ន្ធថាមពលសមុទ្រ ក្នុងនោះផ្តោតអារម្មណ៍លើថាមពលខ្យល់នៅក្រៅឆ្នេរសមុទ្រ បណ្តាទម្រង់ថាមពលសមុទ្រថ្មីៗ ប្រព័ន្ធបញ្ជូនអគ្គិសនីតាមបណ្តោយឆ្នេរ និងហេដ្ឋារចនាសម្ព័ន្ធផ្គត់ផ្គង់អគ្គិសនីសម្រាប់បណ្តាតំបន់សមុទ្រ និងកោះ។

អនុអគ្គនាយក EVN មានប្រសាសន៍យល់ឃើញថា ទន្ទឹមនឹងប្រភពធនធានវិនិយោគសាធារណៈ គឺត្រូវការមានយន្តការកៀរគរយ៉ាងខ្លាំងក្លាបន្ថែមទៀតនូវការចូលរួមរបស់វិស័យឯកជន នៅក្នុងការអនុវត្តបណ្តាកម្មវិធីផ្គត់ផ្គង់អគ្គិសនីសម្រាប់បណ្តាកោះឈានមុខ តំបន់ព្រំដែនសមុទ្រ និងបណ្តាមូលដ្ឋានដែលមានការលំបាកជាពិសេស។ នេះមិនត្រឹមតែជាដំណោះស្រាយបម្រើដល់ការអភិវឌ្ឍសេដ្ឋកិច្ចប៉ុណ្ណោះទេ ប៉ុន្តែថែមទាំងរួមចំណែកបង្កើនសមត្ថភាពការពារអធិបតេយ្យភាពជាតិនៅលើសមុទ្រទៀតផង។

EVN បានបញ្ជាក់យ៉ាងមុតមាំជាពិសេសពីតួនាទីនៃការរៀបចំផែនការលំហសមុទ្រ។ លំហនៅលើផ្ទៃសមុទ្រ និងនៅក្រោមបាតសមុទ្រ សុទ្ធតែមានការពាក់ព័ន្ធដោយផ្ទាល់ទៅនឹងបណ្តាគម្រោងថាមពល ដូចជាថាមពលខ្យល់នៅក្រៅឆ្នេរសមុទ្រ ថាមពលរលកធាតុអាកាស បណ្តាទម្រង់ថាមពលសមុទ្រថ្មីៗ និងប្រព័ន្ធខ្សែកាបបញ្ជូនអគ្គិសនី។

ហេតុដូច្នេះ ការរៀបចំផែនការគឺត្រូវការធ្វើឡើងតាមទិសដៅសមាហរណកម្ម ការផ្សារភ្ជាប់គ្នារវាងបណ្តាវិស័យ ដើម្បីប្រើប្រាស់ធនធានប្រកបដោយប្រសិទ្ធភាព កាត់បន្ថយការប៉ះទង្គិចជាអតិបរមា។ ការរៀបចំផែនការក៏ត្រូវតែមានភាពស៊ីសង្វាក់គ្នានូវផលប្រយោជន៍រវាងថាមពលកកើតឡើងវិញ នាវាចរណ៍ ការចិញ្ចឹមវារីវប្បកម្ម ទេសចរណ៍សមុទ្រ និងការអភិរក្សប្រព័ន្ធអេកូឡូស៊ី។

ចំពោះមុខតម្រូវការអភិវឌ្ឍន៍សេដ្ឋកិច្ចសមុទ្រនៅក្នុងដំណាក់កាលថ្មី តម្រូវការវិនិយោគហេដ្ឋារចនាសម្ព័ន្ធថាមពលសមុទ្រគឺកាន់តែមានភាពបន្ទាន់ខ្លាំងឡើងៗ។

លោក Nguyen Tai Anh បានផ្តល់អនុសាសន៍ថា ក្រៅពីផែនការជាតិរួម គឺត្រូវការកសាងផែនការលម្អិតទៅតាមតំបន់សមុទ្រនីមួយៗ និងតំបន់ជាក់លាក់នីមួយៗ ដើម្បីធ្វើជាមូលដ្ឋានគ្រឹះសម្រាប់ការអនុវត្តគម្រោង។

ដើម្បីជួយជ្រោមជ្រែងដល់ការផ្លាស់ប្តូរថាមពល និងការអភិវឌ្ឍសេដ្ឋកិច្ចសមុទ្របៃតង វៀតណាមត្រូវការជំរុញខ្លាំងក្លានូវការស្រាវជ្រាវវិទ្យាសាស្ត្រ នវានុវត្តន៍បច្ចេកវិទ្យា និងការផ្លាស់ប្តូរឌីជីថលនៅក្នុងវិស័យថាមពល។ បណ្តាបច្ចេកវិទ្យាដូចជាបណ្តាញអគ្គិសនីវៃឆ្លាត ការបញ្ជូនអគ្គិសនីអានុភាពធំ ការរក្សាទុកថាមពល និងថាមពលថ្មីៗ នឹងក្លាយជាមូលដ្ឋានគ្រឹះដ៏មានសារៈសំខាន់សម្រាប់ការអភិវឌ្ឍប្រកបដោយចីរភាពនៃបណ្តាវិស័យសេដ្ឋកិច្ចសមុទ្រនាពេលអនាគត៕

មហាសន្និបាតលើកទី ១៤ នៃសហជីពការងារវៀតណាម នឹងបោះឆ្នោតជ្រើសរើសសមាជិកគណៈកម្មាធិការប្រតិបត្តិអាណត្តិថ្មីចំនួន ១៣៥ រូប យុគសម័យ - មហាសន្និបាតលើកទី ១៤ នៃសហជីពការងារវៀតណាម អាណត្តិ ២០២៦-២០៣១ នឹងដំណើរការបោះឆ្នោតជ្រើសរើសសមាជិកគណៈកម្មាធិការប្រតិបត្តិនៃសហព័ន្ធសហជីពការងារទូទាំងវៀតណាម អាណត្តិទី ១៤ ចំនួន ១៣៥ រូប។

ភោជនីយដ្ឋានវៀតណាមប្រមាណ ៣,០០០ កំពុងដំណើរការនៅប្រទេសប៉ូឡូញ យុគសម័យ - នេះគឺជាការចែករំលែករបស់ឯកអគ្គរដ្ឋទូតវៀតណាមប្រចាំនៅប្រទេសប៉ូឡូញ លោក Ha Hoang Hai នៅក្នុងកិច្ចប្រជុំការងារជាមួយលោក Adam Struzik អភិបាលខេត្ត Mazowiecki ដើម្បីផ្លាស់ប្តូរយោបល់អំពីទំនាក់ទំនងសហប្រតិបត្តិការទ្វេភាគីជារួម, សក្តានុពលសហប្រតិបត្តិការរវាងបណ្តាមូលដ្ឋាននៃប្រទេសទាំងពីរដោយឡែក និងវិស័យសហប្រតិបត្តិការជាក់លាក់មួយចំនួន នាថ្ងៃទី ១ ខែមិថុនា។

ឌឹកអាញ់