បច្ចេកវិទ្យាបើកចំហទិសដៅសន្សំសំចៃអគ្គិសនីប្រកបដោយវៃឆ្លាត

សម្ពាធលើប្រព័ន្ធអគ្គិសនីជាតិកំពុងកើនឡើង ខណៈពេលដែលតម្រូវការអគ្គិសនីបន្តបង្កើតឯកទកម្មថ្មីៗជាបន្តបន្ទាប់ ក្នុងពេលជាមួយគ្នានោះ តម្រូវការអភិវឌ្ឍន៍បៃតង ការកាត់បន្ថយការបំភាយឧស្ម័ន និងការធានាសន្តិសុខថាមពលកាន់តែមានភាពតឹងរ៉ឹងពីមួយថ្ងៃទៅមួយថ្ងៃ។ ក្នុងបរិបទនោះ ការសន្សំសំចៃអគ្គិសនីមិនមែនជាបញ្ហាការកាត់បន្ថយការចំណាយសាមញ្ញទៀតនោះទេ ប៉ុន្តែកំពុងក្លាយជាយុទ្ធសាស្ត្រអភិវឌ្ឍន៍រយៈពេលវែង។ បច្ចេកវិទ្យា ជាពិសេសគឺ AI, IoT និងទិន្នន័យពេលវេលាជាក់ស្តែង ត្រូវបានចាត់ទុកថាជាគន្លឹះដើម្បីឱ្យសហគ្រាសផ្លាស់ប្តូរពីការគិត "សន្សំសំចៃដោយការកាត់បន្ថយ" ទៅជា "ការធ្វើឱ្យប្រសើរឡើងបំផុតដោយការគ្រប់គ្រងប្រកបដោយវៃឆ្លាត"។

លោក Ngo Son Hai អនុអគ្គនាយកសម្ព័ន្ធក្រុមហ៊ុនអគ្គិសនីវៀតណាម (EVN)៖ ប្រសិនបើអាចសន្សំសំចៃបានប្រមាណ ២% នៃអានុភាពប្រើប្រាស់ នោះយើងនឹងមានតម្លៃស្មើនឹងការកាត់បន្ថយតម្រូវការវិនិយោគប្រមាណ ១.០០០ MW។

ថ្លែងមតិនៅក្នុងកិច្ចសន្ទនា "ការសន្សំសំចៃអគ្គិសនីក្នុងរដូវកាលដែលមានការប្រើប្រាស់ខ្ពស់៖ ការទទួលខុសត្រូវ និងដំណោះស្រាយ" ដែលបានប្រព្រឹត្តទៅនាព្រឹកថ្ងៃទី ២២ ខែមិថុនា នៅលើគេហទំព័រព័ត៌មានអេឡិចត្រូនិករបស់រដ្ឋាភិបាល លោក Ngo Son Hai អនុអគ្គនាយកសម្ព័ន្ធក្រុមហ៊ុនអគ្គិសនីវៀតណាម (EVN) បានឲ្យដឹងថា ជាមួយនឹងល្បឿនកំណើននាពេលបច្ចុប្បន្ន ជារៀងរាល់ឆ្នាំប្រព័ន្ធអគ្គិសនីជាតិចាំបាច់ត្រូវបំពេញបន្ថែមអានុភាពថ្មីប្រមាណពី ៤.០០០ ដល់ ៥.០០០ MW។ ទោះជាយ៉ាងណាក៏ដោយ ដើម្បីវិនិយោគលើប្រភពអគ្គិសនីដែលមានទំហំធំ ចាំបាច់ត្រូវមានពេលវេលាច្រើនឆ្នាំដើម្បីរៀបចំ និងអនុវត្តន៍។

លោក Ngo Son Hai បានផ្តល់ព័ត៌មានថា៖ "ប្រសិនបើអាចសន្សំសំចៃបានប្រមាណ ២% នៃអានុភាពប្រើប្រាស់ នោះយើងនឹងមានតម្លៃស្មើនឹងការកាត់បន្ថយតម្រូវការវិនិយោគប្រមាណ ១.០០០ MW"។

ការវាយតម្លៃនេះបានឆ្លុះបញ្ចាំងពីនិន្នាការដែលប្រទេសជាច្រើនកំពុងដេញតាម៖ ចាត់ទុកចំណែកថាមពលអគ្គិសនីដែលសន្សំសំចៃបានជា "ប្រភពអគ្គិសនីដំបូងគេ" - ដែលជាប្រភពថាមពលថ្មីមួយមានតម្លៃចំណាយទាបជាងយ៉ាងខ្លាំងបើប្រៀបធៀបនឹងការសាងសង់រោងចក្រអគ្គិសនី។

AI, IoT និងទិន្នន័យពេលវេលាជាក់ស្តែងផ្លាស់ប្តូររបៀបប្រើប្រាស់អគ្គិសនី

ប្រសិនបើពីមុនមក ការសន្សំសំចៃអគ្គិសនីជារឿយៗត្រូវបានយល់ថាជាការបិទឧបករណ៍ខ្លះ ឬការកាត់បន្ថយការផលិត នោះនាពេលបច្ចុប្បន្ន វិធីសាស្ត្រចូលទៅជិតបានផ្លាស់ប្តូរយ៉ាងខ្លាំងក្លា។

លោក Dang Nguyen Ngu អគ្គនាយកក្រុមហ៊ុន Schneider Electric ប្រចាំវៀតណាម និងកម្ពុជា បានវាយតម្លៃថា៖ "ការសន្សំសំចៃអគ្គិសនីមិនមែនមានន័យថាជាការបញ្ឈប់ ឬការកាត់បន្ថយការប្រើប្រាស់តាមបែបម៉ាស៊ីននោះទេ"។

យោងតាមលោក Dang Nguyen Ngu ខ្លឹមសារពិតប្រាកដនៃការសន្សំសំចៃថាមពលគឺស្ថិតនៅលើការធ្វើឱ្យប្រសើរឡើងបំផុត ពោលគឺការប្រើប្រាស់អគ្គិសនីប្រកបដោយវៃឆ្លាតជាងមុន និងមានប្រសិទ្ធភាពជាងមុន ប៉ុន្តែនៅតែរក្សាបាននូវទិន្នផល និងគុណភាពនៃសកម្មភាព។ ហើយនៅក្នុងដំណើរការនោះ បញ្ញាសិប្បនិម្មិត (AI) អ៊ីនធឺណិតនៃវត្ថុទាំងពួង (IoT) និងទិន្នន័យពេលវេលាជាក់ស្តែង កំពុងបង្កើតឱ្យមានជំហានផ្លាស់ប្តូរដ៏ធំធេងនៅក្នុងរបៀបគ្រប់គ្រងថាមពលនៅតាមរោងចក្រ អគារ ឬតំបន់ឧស្សាហកម្ម។

លោក Dang Nguyen Ngu អគ្គនាយកក្រុមហ៊ុន Schneider Electric ប្រចាំវៀតណាម និងកម្ពុជា៖ ក្នុងបរិបទដែលតម្រូវការអគ្គិសនីបន្តកើនឡើងយ៉ាងខ្លាំងក្លា ការផ្លាស់ប្តូរឌីជីថល និងការគ្រប់គ្រងថាមពលប្រកបដោយវៃឆ្លាត កំពុងក្លាយជាសមត្ថភាពប្រកួតប្រជែងថ្មីមួយរបស់សហគ្រាស។

AI អនុញ្ញាតឱ្យប្រព័ន្ធវិភាគទិន្នន័យដ៏មហិមាដែលប្រមូលបានពីបណ្តាឧបករណ៍ដំណើរការ ពីទីនោះធ្វើការទស្សន៍ទាយអំពីតម្រូវការអគ្គិសនី ទទួលស្គាល់ភាពមិនប្រក្រតី និងកែសម្រួលអានុភាពប្រើប្រាស់ដោយស្វ័យប្រវត្ត។ ក្នុងពេលជាមួយគ្នានោះ IoT បំពេញតួនាទីដូចជា "សរីរាង្គវិញ្ញាណ" របស់ប្រព័ន្ធ ជាមួយនឹងឧបករណ៍ចាប់សញ្ញារាប់ពាន់ដែលបន្តប្រមូលទិន្នន័យជាប្រចាំអំពីសីតុណ្ហភាព សំណើម កំហាប់ឧស្ម័ន CO2 បន្ទុកអគ្គិសនី ឬស្ថានភាពដំណើរការរបស់ឧបករណ៍។

នៅពេលរួមបញ្ចូលគ្នាជាមួយទិន្នន័យពេលវេលាជាក់ស្តែង ប្រព័ន្ធទាំងនេះអាចធ្វើការសម្រេចចិត្តស្ទើរតែភ្លាមៗ។

ជាឧទាហរណ៍ នៅតាមអគារពាណិជ្ជកម្ម ប្រព័ន្ធម៉ាស៊ីនត្រជាក់បែបប្រពៃណី ជារឿយៗដំណើរការផ្អែកលើសីតុណ្ហភាពដែលបានកំណត់ថេរ។ ទោះបីជាចំនួនមនុស្សនៅក្នុងបន្ទប់ផ្លាស់ប្តូរក៏ដោយ ក៏ឧបករណ៍នៅតែដំណើរការក្នុងកម្រិតអានុភាពដដែល។

លោក Ha Dang Son ប្រធានមជ្ឈមណ្ឌលស្រាវជ្រាវថាមពល និងកំណើនបៃតង បានឲ្យដឹងថា និន្នាការអន្តរជាតិនាពេលបច្ចុប្បន្ន កំពុងផ្លាស់ប្តូរវិធីសាស្ត្រចូលទៅជិត។

លោក Son បានចែករំលែកថា៖ "ពីមុនមក យើងប្រើតែទិន្នន័យសូចនាករសីតុណ្ហភាពដើម្បីបញ្ជា ប៉ុន្តែនាពេលថ្មីៗនេះ និន្នាការពិភពលោកបែរជាប្រើប្រាស់កំហាប់ឧស្ម័ន CO2 ធ្វើជាទិន្នន័យសូចនាករដំបូងគ្រា ដើម្បីកែសម្រួលប្រព័ន្ធម៉ាស៊ីនត្រជាក់ឱ្យល្អប្រសើរឡើងបំផុត"។

វិធីសាស្ត្រចូលទៅជិតនេះ អនុញ្ញាតឱ្យប្រព័ន្ធស្វែងយល់ដឹងដោយខ្លួនឯងអំពីដង់ស៊ីតេមនុស្សនៅក្នុងលំហប្រើប្រាស់ ដើម្បីកែសម្រួលបរិមាណខ្យល់អាកាសបរិសុទ្ធ អានុភាពធ្វើឱ្យត្រជាក់ និងកម្រិតប្រើប្រាស់អគ្គិសនីឱ្យបានសមស្រប។

នៅតាមបណ្តារោងចក្រ ទិន្នន័យពេលវេលាជាក់ស្តែងជួយឱ្យសហគ្រាសកំណត់បានយ៉ាងច្បាស់លាស់នូវតំបន់ណាដែលកំពុងប្រើប្រាស់ថាមពលមិនប្រក្រតី ខ្សែសង្វាក់ណាដំណើរការមិនទាន់មានប្រសិទ្ធភាព ឬពេលវេលាណាដែលលេចឡើងនូវបន្ទុកអគ្គិសនីខ្ពស់បំផុត ដែលបង្កសម្ពាធលើការចំណាយប្រាក់អគ្គិសនី។

លោក Dang Nguyen Ngu បានឲ្យដឹងថា៖ "នាពេលបច្ចុប្បន្ន យើងអាចគ្រប់គ្រងតាមពេលវេលាជាក់ស្តែងទាំងស្រុង ដើម្បីធ្វើឱ្យប្រព័ន្ធមានភាពល្អប្រសើរឡើងបំផុត"។

នៅក្នុងវិស័យឧស្សាហកម្ម បណ្តាគំរូរោងចក្រវៃឆ្លាត (Smart Factory) កំពុងអនុវត្ត AI ដើម្បីធ្វើឱ្យដំណើរការផលិតកម្មទាំងមូលមានភាពល្អប្រសើរឡើងបំផុត។ ប្រព័ន្ធនេះអាចកែសម្រួលដំណើរការឧបករណ៍ដោយស្វ័យប្រវត្តិ រៀបចំផែនការថែទាំទស្សន៍ទាយ និងរក្សាតុល្យភាពបន្ទុកអគ្គិសនី ដើម្បីកាត់បន្ថយការខូចខាតថាមពលអគ្គិសនី។

នៅក្នុងទំហំធំជាងនេះ បណ្តាតំបន់ឧស្សាហកម្មវៃឆ្លាតក៏ចាប់ផ្តើមអនុវត្តខឿនគ្រប់គ្រងប្រមូលផ្តុំ ដើម្បីត្រួតពិនិត្យថាមពលអគ្គិសនីរបស់រោងចក្រជាច្រើនក្នុងពេលតែមួយ ពីទីនោះចែករំលែកទិន្នន័យ និងធ្វើឱ្យដំណើរការនៃប្រព័ន្ធអេកូឡូស៊ីទាំងមូលមានភាពល្អប្រសើរឡើងបំផុត។

ថ្នាក់ដឹកនាំក្រុមហ៊ុន Schneider Electric បានឲ្យដឹងថា នាពេលបច្ចុប្បន្ន ព្រលានយន្តហោះជាច្រើននៅវៀតណាមបានអនុវត្ត IoT ដើម្បីគ្រប់គ្រងប្រព័ន្ធថាមពលតាមពេលវេលាជាក់ស្តែង ដែលជួយបង្កើនប្រសិទ្ធភាពដំណើរការ និងកាត់បន្ថយការប្រើប្រាស់អគ្គិសនី។

លោក Dang Nguyen Ngu បានសង្កត់ធ្ងន់ថា៖ "ពីមុនមក រយៈពេលប្រមូលដើមទុនមកវិញអាចគិតចាប់ពី ៥ ដល់ ១០ ឆ្នាំ ប៉ុន្តែនាពេលបច្ចុប្បន្ន ជាមួយនឹងសមត្ថភាពបច្ចេកវិទ្យានាពេលបច្ចុប្បន្ន រយៈពេលប្រមូលដើមទុនមកវិញត្រូវបានគិតនៅក្នុងកម្រិតប្រមាណ ២ ឆ្នាំតែប៉ុណ្ណោះ"។

ចាំបាច់ត្រូវមាន "អ្នកដឹកនាំក្រុមតន្ត្រី" ដើម្បីជំរុញការវិនិយោគលើការគ្រប់គ្រងថាមពលប្រកបដោយវៃឆ្លាត

ទោះបីជាផលប្រយោជន៍កាន់តែមានភាពច្បាស់លាស់ពីមួយថ្ងៃទៅមួយថ្ងៃក៏ដោយ ប៉ុន្តែល្បឿននៃការអនុវត្តបណ្តាដំណោះស្រាយគ្រប់គ្រងថាមពលប្រកបដោយវៃឆ្លាតនៅវៀតណាម គឺនៅមិនទាន់សមស្របនឹងសក្តានុពលនៅឡើយទេ។

លោក Dang Nguyen Ngu បានមានប្រសាសន៍ថា៖ "បច្ចេកវិទ្យាមិនមែនជាឧបសគ្គនោះទេ ហើយប្រភពដើមទុនក៏មិនមែនជាឧបសគ្គនោះដែរ"។

យោងតាមបណ្តាអ្នកជំនាញ បញ្ហានាពេលបច្ចុប្បន្នគឺការកង្វះយន្តការតភ្ជាប់រវាងសហគ្រាស អង្គភាពហិរញ្ញវត្ថុ និងអ្នកផ្តល់ដំណោះស្រាយ។

សហគ្រាសធុនតូច និងមធ្យមជាច្រើនបានមើលឃើញពីសក្តានុពលនៃការសន្សំសំចៃថាមពល ប៉ុន្តែបានជួបការលំបាកអំពីប្រភពដើមទុនវិនិយោគដំបូងគ្រា កង្វះធនធានមនុស្សដែលមានជំនាញឯកទេស ឬមិនទាន់មានសមត្ថភាពគ្រប់គ្រាន់ក្នុងការវាយតម្លៃប្រសិទ្ធភាពនៃគម្រោង។

ក្នុងពេលជាមួយគ្នានោះ អង្គភាពហិរញ្ញវត្ថុជាច្រើនបែរជាមានតម្រូវការបើកប្រាក់កម្ចីសម្រាប់បណ្តាគម្រោងបៃតង ប៉ុន្តែមិនទាន់ស្វែងរកឃើញគំរូដ៏សមស្របនៅឡើយ។

ដើម្បីជំរុញឱ្យសហគ្រាសវិនិយោគកាន់តែខ្លាំងក្លាថែមទៀតលើការសន្សំសំចៃថាមពល និងការគ្រប់គ្រងថាមពលប្រកបដោយវៃឆ្លាត គឺចាំបាច់ត្រូវមានបណ្តាយន្តការគាំទ្រដោយព្រមៗគ្នាបន្ថែមទៀត។

ជាបឋម ចាំបាច់ត្រូវដាក់ឱ្យដំណើរការមូលនិធិប្រើប្រាស់ថាមពលប្រកបដោយការសន្សំសំចៃ និងប្រសិទ្ធភាពឱ្យបានឆាប់ ដើម្បីគាំទ្រដល់សហគ្រាសអំពីប្រភពដើមទុន អត្រាការប្រាក់អាទិភាព និងការធានាផ្នែកហិរញ្ញវត្ថុសម្រាប់បណ្តាគម្រោងផ្លាស់ប្តូរបច្ចេកវិទ្យា។

ទន្ទឹមនឹងនោះ ចាំបាច់ត្រូវជំរុញយ៉ាងខ្លាំងក្លានូវឥណទានបៃតង សញ្ញាប័ណ្ណបៃតង និងពង្រីកយន្តការហិរញ្ញវត្ថុសម្រាប់បណ្តាគម្រោងសន្សំសំចៃថាមពល។

ដំណោះស្រាយមួយទៀត គឺការអភិវឌ្ឍយ៉ាងខ្លាំងក្លានូវគំរូ ESCO - សហគ្រាសសេវាកម្មថាមពល។ នេះគឺជាគំរូដែលអនុញ្ញាតឱ្យសហគ្រាសអនុវត្តគម្រោងដោយមិនចាំបាច់បញ្ចេញប្រភពដើមទុនវិនិយោគដំបូងឡើយ ហើយតម្លៃចំណាយត្រូវបានទូទាត់សងវិញដោយចំណែកថាមពលដែលសន្សំសំចៃបាននៅក្នុងដំណើរការប្រតិបត្តិការ។

ក្រៅពីការគាំទ្រផ្នែកហិរញ្ញវត្ថុ ការកសាងប្រព័ន្ធស្តង់ដារបច្ចេកទេសក៏មានសារៈសំខាន់ខ្លាំងណាស់ដែរ។

នាពេលបច្ចុប្បន្ន វិស័យជាច្រើនដែលមានការប្រើប្រាស់អគ្គិសនីក្នុងទំហំធំ ដូចជាមជ្ឈមណ្ឌលទិន្នន័យ ម៉ាស៊ីនត្រជាក់ ឬអគារវៃឆ្លាត នៅតែខ្វះខាតបណ្តាស្តង់ដារប្រតិបត្តិការដ៏សមស្របនៅឡើយ។

យោងតាមបណ្តាអ្នកជំនាញ ចាំបាច់ត្រូវមានបណ្តាបទប្បញ្ញត្តិស្តង់ដារថ្មីអំពីប្រសិទ្ធភាពថាមពល ស្តង់ដារគ្រប់គ្រងបន្ទុកអគ្គិសនី និងការណែនាំអំពីការអនុវត្ត AI នៅក្នុងការគ្រប់គ្រងថាមពល។

ទន្ទឹមនឹងនោះ គឺបណ្តាកម្មវិធីសវនកម្មថាមពល ការបណ្តុះបណ្តាលធនធានមនុស្ស និងការកសាងបណ្តាញអ្នកជំនាញដើម្បីគាំទ្រដល់សហគ្រាស។

លោក Dang Hai Dung អនុប្រធាននាយកដ្ឋាននវានុវត្តន៍ ការផ្លាស់ប្តូរបៃតង និងការលើកកម្ពស់ឧស្សាហកម្ម (ក្រសួងឧស្សាហពាណិជ្ជកម្ម) បានឲ្យដឹងថា ស្ថាប័នគ្រប់គ្រងកំពុងស្រាវជ្រាវឧបករណ៍គាំទ្រថ្មីៗជាច្រើន ចាប់ពីឥណទានបៃតង រហូតដល់ការកសាងមូលនិធិគាំទ្រសហគ្រាសក្នុងការផ្លាស់ប្តូរបច្ចេកវិទ្យា។

ក្នុងពេលជាមួយគ្នានោះ លោក Dang Nguyen Ngu បានចាត់ទុកថា ចាំបាច់ត្រូវមានអង្គភាពមួយបំពេញតួនាទីសម្របសម្រួលរួម។

លោក Ngu បានមានប្រសាសន៍ថា៖ "ស្ថាប័នហិរញ្ញវត្ថុជាច្រើនកំពុងស្វែងរកវិធីបើកប្រាក់កម្ចីសម្រាប់បណ្តាគម្រោងបែបនោះ ប៉ុន្តែបែរជាខ្វះខាត 'អ្នកដឹកនាំក្រុមតន្ត្រី' ម្នាក់ទៅវិញ"។

ក្នុងបរិបទដែលតម្រូវការអគ្គិសនីបន្តកើនឡើងយ៉ាងខ្លាំងក្លា ការផ្លាស់ប្តូរឌីជីថល និងការគ្រប់គ្រងថាមពលប្រកបដោយវៃឆ្លាត កំពុងក្លាយជាសមត្ថភាពប្រកួតប្រជែងថ្មីមួយរបស់សហគ្រាស។

ការសន្សំសំចៃអគ្គិសនីមិនមែនជា រឿងរ៉ាវនៃការបិទភ្លើងខ្លះ ឬការកាត់បន្ថយការប្រើប្រាស់ឧបករណ៍ទៀតនោះទេ ប៉ុន្តែវាគឺជាដំណើរការគ្រប់គ្រងផ្អែកលើទិន្នន័យ បច្ចេកវិទ្យា និងសមត្ថភាពធ្វើឱ្យប្រសើរឡើងបំផុតតាមពេលវេលាជាក់ស្តែង។

រាល់ kWh អគ្គិសនីនីមួយៗដែលត្រូវបានប្រើប្រាស់ប្រកបដោយប្រសិទ្ធភាព មិនត្រឹមតែជួយកាត់បន្ថយការចំណាយសម្រាប់សហគ្រាសប៉ុណ្ណោះទេ ថែមទាំងរួមចំណែកកាត់បន្ថយសម្ពាធវិនិយោគលើប្រព័ន្ធអគ្គិសនីជាតិ លើកកម្ពស់សមត្ថភាពប្រកួតប្រជែង និងឆ្ពោះទៅរកគោលដៅកំណើនបៃតងក្នុងរយៈពេលវែងផងដែរ៕

បង្កើនល្បឿនដាក់ពង្រាយអនុវត្តសេចក្តីសម្រេចចិត្តលេខ ៥៧៖ លទ្ធផលវិជ្ជមានជាច្រើនអំពីវិទ្យាសាស្ត្រ បច្ចេកវិទ្យា និងការផ្លាស់ប្តូរឌីជីថល យុគសម័យ - បន្តដាក់ពង្រាយអនុវត្តយ៉ាងប្តូរផ្តាច់នូវបណ្តាភារកិច្ចតាមស្មារតីនៃសេចក្តីសម្រេចចិត្តលេខ ៥៧-NQ/TW របស់ការិយាល័យនយោបាយ នៅក្នុងខែឧសភា ឆ្នាំ ២០២៦ ក្រសួងវិទ្យាសាស្ត្រ និងបច្ចេកវិទ្យាសម្រេចបានលទ្ធផលវិជ្ជមានជាច្រើននៅលើបណ្តាវិស័យ។ ចាប់ពីការបំពេញលក្ខណៈពេញលេញនៃស្ថាប័ន ការអភិវឌ្ឍប្រព័ន្ធអេកូឡូស៊ីនវានុវត្តន៍ រហូតដល់ការជំរុញការផ្លាស់ប្តូរឌីជីថល និងកិច្ចសហប្រតិបត្តិការអន្តរជាតិ សន្ទស្សន៍សំខាន់ៗជាច្រើនបន្តកត់ត្រានូវកំណើន ដែលរួមចំណែកបង្កើតជាកម្លាំងចលករថ្មីសម្រាប់ព្រឹត្តិការណ៍អភិវឌ្ឍន៍សេដ្ឋកិច្ច-សង្គម។

ការបង្កើតរបកគំហើញក្នុងការទាក់ទាញធនធានមនុស្សវិទ្យាសាស្ត្រ និងបច្ចេកវិទ្យា ក្រោមស្មារតីនៃសេចក្តីសម្រេចចិត្តលេខ ៥៧ យុគសម័យ - យន្តការថ្មីៗជាបន្តបន្ទាប់ស្តីពីប្រាក់បៀវត្ស របបលើកទឹកចិត្ត ស្វ័យភាពនៃការសិក្សា និងការគាំទ្រដល់ការស្រាវជ្រាវ កំពុងត្រូវបានដាក់ឱ្យអនុវត្ត សំដៅបង្កើតកម្លាំងទាក់ទាញកាន់តែខ្លាំងក្លាថែមទៀត ចំពោះជួរធនធានមនុស្សវិទ្យាសាស្ត្រ និងបច្ចេកវិទ្យាប្រកបដោយគុណភាពខ្ពស់។ បញ្ហាដែលកំពុងចោទឡើងនាពេលបច្ចុប្បន្ននេះ មិនមែនស្ថិតនៅលើការខ្វះខាតគោលនយោបាយនោះទេ ប៉ុន្តែគឺការរៀបចំអនុវត្តប្រកបដោយប្រសិទ្ធភាព ដើម្បីនាំយកគោលនយោបាយទាំងនោះចូលទៅក្នុងជីវភាពរស់នៅជាក់ស្តែង។

ឌឹកអាញ់