សម្តេចនាយករដ្ឋមន្រ្តី ហ៊ុន សែន ដាស់តឿនមន្រ្តីគ្រប់ជាន់ថ្នាក់ ឲ្យយកចិត្តដាក់លើជីវភាពប្រជាប្រពលរដ្ឋ ពិសេសផ្តោតខ្លាំងលើស្បៀងអាហាររបស់ពួកគាត់។ សម្តេចនាយករដ្ឋមន្រ្តី សង្កត់ធ្ងន់ថា មិនត្រូវឲ្យប្រជាពលរដ្ឋណាម្នាក់ ស្លាប់ដោយមន្រ្តីមិនបានដឹងឬមិនបានដោះស្រាយនោះទេ។
សកម្មភាពមន្រ្តី ចុះចែកស្បៀងដល់ពលរដ្ឋខ្វះខាត
ប្រមុខរដ្ឋាភិបាល បានដាក់បញ្ជាជាថ្មី ឲ្យមន្រ្តីចុះពិនិត្យមើលប្រជាពលរដ្ឋ ដែលខ្វះខាតស្បៀង ហើយត្រូវផ្តល់ស្បៀងអាហារដល់ពួកគាត់ជាបន្ទាន់និងឆាប់បំផុត។ ទំព័រហ្វេសប៊ុករបស់សម្តេចនាយករដ្ឋមន្រ្តី បានបង្ហោះសារ នៅរសៀលថ្ងៃទី៦ ខែមេសា ឆ្នាំ២០២០ ថា៖«កុំឲ្យពួកគាត់ខ្វះស្បៀងអាហារឲ្យសោះ ក្នុងពេលសភាពការណ៍ មានការប្រែប្រួលពីក្រៅប្រទេស និងពីក្នុងប្រទេស គឺត្រូវគ្រប់គ្រងអ្វីៗដែលមានក្នុងប្រទេសរបស់យើង ហើយត្រូវចាត់ចែងធនធានទាំងអស់ ដែលមានក្នុងប្រទេសរបស់យើង សម្រាប់ជួយ និងបម្រើប្រជាពលរដ្ឋរបស់យើងឲ្យទាន់ទាន់ពេល»។
មេដឹកនាំកម្ពុជា ផ្ញើសារជូនមន្រ្តីទៀតថា ត្រូវបន្តចុះជួយអប់រំប្រជាពលរដ្ឋ ពីវិធីទប់ស្កាត់ជំងឺកូវីដ-១៩ ដោយនាំទៅជាមួយនូវម៉ាស ឬក្រមា ទឹកអាល់កុល ជែលសម្លាប់មេរោគ អង្ករ មី និង ត្រីខ ជាដើម ចែកជូនប្រជាពលរដ្ឋក្រីក្រ ទាំងនៅក្នុងរាជធានីភ្នំពេញ និងនៅតាមមូលដ្ឋានទូទាំងប្រទេស។មេដឹកនាំរូបនេះ បញ្ជាក់ថា៖«កុំចាំហៅពួកគាត់ឲ្យមកចូលរួមប្រជុំ តែសូមទៅកាន់ទីកន្លែង ដែលពួកគាត់រស់នៅតែម្តង ជាពិសេសក្នុងស្ថានភាព ដែលយើងទាំងអស់គ្នា កំពុងតែប្រយុទ្ធប្រឆាំងនឹងជំងឺឆ្លងកូវីដ-១៩ នៅពេលនេះ»។
រដ្ឋាភិបាលកម្ពុជា បានផ្អាកនាំចេញអង្ករសនិងស្រូវ រួមទាំងត្រី ទៅក្រៅប្រទេស ដើម្បីទុកផ្គត់ផ្គង់ក្នុងស្រុក។ ចំពោះអង្ករក្រអូប កម្ពុជា នៅតែបន្តនាំចេញទៅក្រៅប្រទេស៕
（ប្រភពព័ត៌មាន: thmey thmey.com）
មតិពីមិត្តអ្នកអាន