វិទ្យាសាស្ត្របច្ចេកវិទ្យា គឺជា «សោរមាស» ដើម្បីធ្វើឱ្យការអភិវឌ្ឍប្រទេសជាតិក្លាយជាការពិត

នាព្រឹកថ្ងៃទី ១៨ ខែឧសភា នៅទីក្រុង Ha Noi នាយករដ្ឋមន្ត្រី លោក Le Minh Hung បានអញ្ជើញចូលរួមក្នុងពិធីអបអរសាទរទិវាវិទ្យាសាស្ត្រ បច្ចេកវិទ្យា និងការបង្កើតថ្មីវៀតណាម ១៨ ឧសភា និងសន្និសីទដាក់ឱ្យអនុវត្តបច្ចេកវិទ្យាយុទ្ធសាស្ត្រ ក្រោមប្រធានបទ «វិទ្យាសាស្ត្រ បច្ចេកវិទ្យា ការបង្កើតថ្មី និងការបំប្លែងជាឌីជីថល - កម្លាំងចលករចម្បងនៃគំរូកំណើនថ្មី»។

អញ្ជើញចូលរួមផងដែរ មានឧបនាយករដ្ឋមន្ត្រី លោក Ho Quoc Dung; រដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យា លោក Vu Hai Quan; តំណាងថ្នាក់ដឹកនាំបណ្ដាគណៈ ក្រសួង វិស័យនៅថ្នាក់មជ្ឈិម និងមូលដ្ឋាន; បណ្ដាអង្គការអន្តរជាតិ, ស្ថាប័នតំណាងបរទេសប្រចាំនៅវៀតណាម; សហគ្រាស, វិទ្យាស្ថាន, សាលារៀន, សហគ្រាសសម្ព័ន្ធសេដ្ឋកិច្ច; បណ្ដាអ្នកវិទ្យាសាស្ត្រទាំងក្នុងនិងក្រៅប្រទេស; ថ្នាក់ដឹកនាំ និងកម្មាភិបាលនៃក្រសួងវិទ្យាសាស្ត្រ និងបច្ចេកវិទ្យាតាមបណ្ដាសម័យកាល។

នាយករដ្ឋមន្ត្រី Le Minh Hung ថ្លែងមតិនៅក្នុងពិធីអបអរសាទរទិវាវិទ្យាសាស្ត្រ បច្ចេកវិទ្យា និងការបង្កើតថ្មីវៀតណាម និងសន្និសីទដាក់ឱ្យអនុវត្តបច្ចេកវិទ្យាយុទ្ធសាស្ត្រ។

ក្នុងបណ្ដាឆ្នាំកន្លងមក វិទ្យាសាស្ត្របច្ចេកវិទ្យា ការបង្កើតថ្មី និងការបំប្លែងជាឌីជីថល បានរួមចំណែកកាន់តែច្បាស់ក្រឡែតទៅក្នុងកំណើនសេដ្ឋកិច្ច, ការលើកកម្ពស់ទិន្នផលពលកម្ម, គុណភាពផលិតផល និងសមត្ថភាពប្រកួតប្រជែងជាតិ។

ក្នុងបរិបទដែលពិភពលោកឈានចូលដំណាក់កាលប្រកួតប្រជែងយុទ្ធសាស្ត្រថ្មី បច្ចេកវិទ្យាកំពុងក្លាយជាកត្តាសម្រេចចិត្តលើសមត្ថភាពប្រកួតប្រជែង, ឋានៈ និងកម្រិតស្វយ័តភាពរបស់ប្រទេសនីមួយៗ។

រាល់ការផ្លាស់ប្តូរដ៏ធំធេងអំពីវិស័យបញ្ញាសិប្បនិម្មិត AI, គ្រឿងពាក់កណ្តាលចម្លង, ទិន្នន័យធំ, បច្ចេកវិទ្យាជីវសាស្ត្រ, បច្ចេកវិទ្យាកង់ទិច និងការផលិតឆ្លាតវៃ កំពុងធ្វើឱ្យផ្លាស់ប្តូរយ៉ាងជ្រាលជ្រៅនូវគំរូអភិវឌ្ឍន៍ប្រពៃណី និងរចនាសម្ព័ន្ធសេដ្ឋកិច្ចសកល។

យោងតាមទិសដៅអភិវឌ្ឍន៍ថ្មី វិទ្យាសាស្ត្របច្ចេកវិទ្យា និងការបង្កើតថ្មី មិនត្រឹមតែជាវិស័យគាំទ្រដល់ការអភិវឌ្ឍប៉ុណ្ណោះទេ ប៉ុន្តែវាកំពុងក្លាយជាគ្រឹះស្ថាននៃកំណើនលឿននិងប្រកបរដោយចីរភាព; ជាលក្ខខណ្ឌដើម្បីធានាបាននូវភាពស្វយ័ត និងភាពខ្លួនទីពឹងខ្លួន ក្នុងបរិបទដែលការប្រកួតប្រជែងបច្ចេកវិទ្យាសកលកាន់តែមានភាពស្រួចស្រាវឡើងៗ។

«សន្និសីទដាក់ឱ្យអនុវត្តបច្ចេកវិទ្យាយុទ្ធសាស្ត្រ» គឺសំដៅធ្វើឱ្យជាក់ស្តែងជាតថភាពនូវសេចក្តីសម្រេចចិត្តលេខ 57-NQ/TW របស់ការិយាល័យនយោបាយ អំពីរបកគំហើញនៃការអភិវឌ្ឍវិទ្យាសាស្ត្រ បច្ចេកវិទ្យា ការបង្កើតថ្មី និងការបំប្លែងជាឌីជីថលជាតិ និងសេចក្តីសម្រេចចិត្តលេខ 21/QĐ-TTg ចុះថ្ងៃទី ៣០ ខែមេសា ឆ្នាំ ២០២៦ របស់នាយករដ្ឋមន្ត្រី អំពីបញ្ជីបច្ចេកវិទ្យាយុទ្ធសាស្ត្រ និងបញ្ជីផលិតផលបច្ចេកវិទ្យាយុទ្ធសាស្ត្រជាតិ។ ផ្ដើមចេញពីហេតុផលនេះ វៀតណាមផ្តល់អាទិភាពដល់ការអភិវឌ្ឍបណ្ដាបច្ចេកវិទ្យាស្នូល, បច្ចេកវិទ្យាគ្រឹះ និងបណ្ដាផលិតផលយុទ្ធសាស្ត្រ ដែលមានលទ្ធភាពបង្កើតនូវរបកគំហើញអំពីកំណើន, សមត្ថភាពប្រកួតប្រជែង និងសមត្ថភាពស្វយ័តភាពជាតិនៅក្នុងដំណាក់កាលថ្មី។

នាយករដ្ឋមន្ត្រី Le Minh Hung និងបណ្ដាប្រតិភូចូលរួមពិធីអបអរសាទរទិវាវិទ្យាសាស្ត្រ បច្ចេកវិទ្យា និងការបង្កើតថ្មីវៀតណាម និងសន្និសីទដាក់ឱ្យអនុវត្តបច្ចេកវិទ្យាយុទ្ធសាស្ត្រ។

នៅក្នុងសន្និសីទ បទអន្តរាគមន៍ជាច្រើនបានផ្តោតលើទិសដៅម្ចាស់ការលើបច្ចេកវិទ្យាស្នូល ការអភិវឌ្ឍបណ្ដាគ្រឹះស្ថានឌីជីថល និងជំរុញការធ្វើពាណិជ្ជកម្មផលិតផលបច្ចេកវិទ្យា Make in Viet Nam នៅក្នុងបណ្ដាវិស័យគណនាក្លោដ សន្តិសុខបណ្តាញ គ្រឿងពាក់កណ្តាលចម្លង AI បច្ចេកវិទ្យាកង់ទិច...

នាយករដ្ឋមន្ត្រី លោក Le Minh Hung បានសង្កត់ធ្ងន់ថា ទិវាវិទ្យាសាស្ត្រ បច្ចេកវិទ្យា និងការបង្កើតថ្មីវៀតណាម មិនត្រឹមតែជាឱកាសដើម្បីលើកតម្កើងបណ្ដាអ្នកវិទ្យាសាស្ត្រ បញ្ញវន្ត សហគ្រិន ជាមួយនឹងរាល់ស្នាដៃនៅក្នុងការស្រាវជ្រាវ ការអភិវឌ្ឍ ការដាក់អនុវត្តវិទ្យាសាស្ត្របច្ចេកវិទ្យា និងការបង្កើតថ្មីប៉ុណ្ណោះទេ ប៉ុន្តែថែមទាំងជាឱកាសដ៏សំខាន់បំផុត ដើម្បីដាស់ទឿននូវមោទនភាពអំពីបញ្ញាវៀតណាម ស្មារតីបង្កើតថ្មីនៅក្នុងស្រទាប់ប្រជាជនគ្រប់ជាន់ថ្នាក់ ជាពិសេសគឺជំនាន់វ័យក្មេងវៀតណាម។

នាយករដ្ឋមន្ត្រីបានចាត់ទុកថា តម្រូវការអភិវឌ្ឍន៍ប្រទេសជាតិ ទាមទារឱ្យមានការផ្លាស់ប្តូរថ្មីយ៉ាងខ្លាំងក្លានូវគំរូកំណើន ដែលក្នុងនោះវិទ្យាសាស្ត្របច្ចេកវិទ្យា ការបង្កើតថ្មី និងការបំប្លែងជាឌីជីថល គឺជាគ្រឹះស្ថាន ជាកម្លាំងចលករ និងជាចំណុចរបត់យុទ្ធសាស្ត្រឈានមុខគេ ដើម្បីឈានជើងចូលទៅក្នុងយុគសម័យអភិវឌ្ឍន៍ថ្មីរបស់ប្រទេសជាតិ។

នាយករដ្ឋមន្ត្រីបានចង្អុលបង្ហាញថា ការិយាល័យនយោបាយបានប្រកាសឱ្យប្រើប្រាស់សេចក្តីសម្រេចចិត្តលេខ 57-NQ/TW ចុះថ្ងៃទី ២២ ខែធ្នូ ឆ្នាំ ២០២៤ អំពីរបកគំហើញនៃការអភិវឌ្ឍវិទ្យាសាស្ត្រ បច្ចេកវិទ្យា ការបង្កើតថ្មី និងការបំប្លែងជាឌីជីថលជាតិ។ នេះគឺជាសេចក្តីសម្រេចចិត្តយុទ្ធសាស្ត្រមានសារៈសំខាន់ពិសេស បង្ហាញពីការប្តេជ្ញាចិត្តនយោបាយខ្ពស់ណាស់របស់បក្សយើង ក្នុងការអភិវឌ្ឍវិទ្យាសាស្ត្រ បច្ចេកវិទ្យា ការបង្កើតថ្មី និងការបំប្លែងជាឌីជីថលជាតិ។

នាឱកាសទិវាវិទ្យាសាស្ត្រ បច្ចេកវិទ្យា និងការបង្កើតថ្មីវៀតណាម តំណាងឱ្យថ្នាក់ដឹកនាំបក្ស និងរដ្ឋ នាយករដ្ឋមន្ត្រី លោក Le Minh Hung បានសម្តែងការកោតសរសើរ និងអបអរសាទរយ៉ាងកក់ក្តៅចំពោះបណ្ដាជំនាន់កម្មាភិបាល មន្ត្រីរាជការ បុគ្គលិកដែលបំពេញការងារនៅក្នុងវិស័យវិទ្យាសាស្ត្របច្ចេកវិទ្យា ជាពិសេសគឺរាល់ការលះបង់ ការរួមចំណែកដោយស្ងាត់ស្ងៀម និងការការងារពលកម្មដោយភ្លេចខ្លួន របស់បណ្ដាជំនាន់មនុស្សដែលធ្វើការងារវិទ្យាសាស្ត្របច្ចេកវិទ្យា និងការបង្កើតថ្មីនៅលើគ្រប់ច្រកល្ហកនៃប្រទេសជាតិ និងទាំងនៅបរទេសផងដែរ។

ដោយចង្អុលបង្ហាញត្រង់ៗនូវរាល់ចំណុចនៅសេសសល់ និងការកម្រិត នៅក្នុងសកម្មភាពវិទ្យាសាស្ត្របច្ចេកវិទ្យា និងការបង្កើតថ្មីក្នុងពេលកន្លងមក នាយករដ្ឋមន្ត្រីបានចាត់ទុកថា នៅក្នុងសម័យកាលដែលវិទ្យាសាស្ត្របច្ចេកវិទ្យា និងការបង្កើតថ្មីមានការអភិវឌ្ឍ និងផ្លាស់ប្តូរជារៀងរាល់ថ្ងៃ ព្រមទាំងការប្រកួតប្រជែងសកលកាន់តែកើនឡើងនោះ ប្រទេសណាដែលមានសមត្ថភាពប្រកួតប្រជែងខ្ពស់ នឹងក្តាប់បានឱកាសដើម្បីឈានឡើង អភិវឌ្ឍលឿន និងប្រកបដោយចីរភាព។

នាយករដ្ឋមន្ត្រី Le Minh Hung ថ្លែងមតិនៅក្នុងពិធីអបអរសាទរទិវាវិទ្យាសាស្ត្រ បច្ចេកវិទ្យា និងការបង្កើតថ្មីវៀតណាម និងសន្និសីទដាក់ឱ្យអនុវត្តបច្ចេកវិទ្យាយុទ្ធសាស្ត្រ។

ជាមួយនឹងគោលដៅក្លាយជាប្រទេសឧស្សាហកម្មទំនើបនៅឆ្នាំ ២០៣០ និងជាប្រទេសអភិវឌ្ឍន៍ដែលមានប្រាក់ចំណូលខ្ពស់នៅឆ្នាំ ២០៤៥ នោះ វិទ្យាសាស្ត្របច្ចេកវិទ្យា ការបង្កើតថ្មី និងការបំប្លែងជាឌីជីថល ត្រូវបានកំណត់ថាជាកម្លាំងចលករគន្លឹះ ជា «សោរមាស» និងជាកត្តាស្លាប់រស់ដើម្បីធ្វើឱ្យបំណងប្រាថ្នាអភិវឌ្ឍន៍ប្រទេសជាតិក្លាយជាការពិត។

ក្នុងបរិបទនោះ នាយករដ្ឋមន្ត្រីបានតម្រូវថា ក្នុងពេលខាងមុខ ក្រសួងវិទ្យាសាស្ត្រ និងបច្ចេកវិទ្យាត្រូវដើរតួនាទីជាស្នូលរួមជាមួយបណ្ដាក្រសួង ស្ថាប័ន និងមូលដ្ឋាន ក្នុងការអនុវត្តការអភិវឌ្ឍវិទ្យាសាស្ត្របច្ចេកវិទ្យា ការបង្កើតថ្មី និងការបំប្លែងជាឌីជីថលជាតិ; ការអភិវឌ្ឍបច្ចេកវិទ្យាយុទ្ធសាស្ត្រត្រូវតែបង្កើតឱ្យបាននូវផលិតផលជាក់ស្តែង។ ផលិតផលបច្ចេកវិទ្យាយុទ្ធសាស្ត្រដែលត្រូវបានបង្កើតឡើង ត្រូវតែមានតម្លៃបន្ថែម លក្ខណៈអនុវត្តជាក់ស្តែង ការធ្វើពាណិជ្ជកម្ម និងអត្រាធ្វើជាតូបនីយកម្មក្នុងស្រុកខ្ពស់ ព្រមទាំងត្រូវមានការរួមចំណែកយ៉ាងពិតប្រាកដសម្រាប់ការបង្កើនទិន្នផលពលកម្ម។

ប្រមុខរដ្ឋាភិបាលបានសង្កត់ធ្ងន់ថា សហគ្រាស វិទ្យាស្ថាន សាលារៀនត្រូវតែជាមជ្ឈមណ្ឌលនៃប្រព័ន្ធអេកូឡូស៊ី; បណ្ដាក្រសួង វិស័យដែលត្រូវបាននាយករដ្ឋមន្ត្រីប្រគល់ភារកិច្ច ត្រូវតែប្រញាប់ប្រញាល់កសាងភារកិច្ច បញ្ជាទិញពីសហគ្រាស វិទ្យាស្ថាន សាលារៀន ដើម្បីអភិវឌ្ឍបច្ចេកវិទ្យាស្នូល និងផលិតផលបច្ចេកវិទ្យាយុទ្ធសាស្ត្រ។

យន្តការគោលនយោបាយលើកទឹកចិត្តត្រូវតែមានភាពខ្លាំងក្លាគ្រប់គ្រាន់ និងអាចអនុវត្តបានក្នុងតថភាពជាក់ស្តែង ទន្ទឹមនឹងនោះ ត្រូវបន្ទាន់ត្រួតពិនិត្យ ជម្រះរាល់ «ចំណុចស្ទះ» ពាក់ព័ន្ធនឹងយន្តការហិរញ្ញវត្ថុសម្រាប់វិទ្យាសាស្ត្របច្ចេកវិទ្យា និងការបង្កើតថ្មី; ផ្តល់អាទិភាពធានាប្រភពធនធានសម្រាប់បច្ចេកវិទ្យាយុទ្ធសាស្ត្រ បច្ចេកវិទ្យាស្នូល និងសហគ្រាសបច្ចេកវិទ្យា; ជំរុញការអភិវឌ្ឍទីផ្សារទុនសម្រាប់ការបង្កើតថ្មី មូលនិធិវិនិយោគប្រថុយប្រថាន និងសហគ្រាសចាប់ផ្តើមអាជីវកម្មបង្កើតថ្មី។

រដ្ឋត្រូវតែបំពេញបានល្អនូវតួនាទីណែនាំ ការតភ្ជាប់ ការបញ្ជាទិញ ការគាំទ្រការស្រាវជ្រាវអភិវឌ្ឍន៍ និងដើរតួនាទីជា «អ្នកទិញដំបូងគេ» ចំពោះផលិតផលបច្ចេកវិទ្យាយុទ្ធសាស្ត្រនៅពេលមានលក្ខខណ្ឌគ្រប់គ្រាន់ លើស្មារតីច្បាស់លាស់នូវធនធាន ច្បាស់លាស់នូវផលិតផល ច្បាស់លាស់នូវស្ថាប័នទទួលបន្ទុក ច្បាស់លាស់នូវសហគ្រាសនិងវិទ្យាស្ថានព្រមទាំងសាលារៀនដែលចូលរួម ច្បាស់លាស់នូវប្រភពធនធាន និងច្បាស់លាស់នូវកាលកំណត់។ ផ្តោតលើការម្ចាស់ការលើបច្ចេកវិទ្យា លើកកម្ពស់អត្រាធ្វើជាតូបនីយកម្មក្នុងស្រុក តម្លៃបន្ថែម និងសមត្ថភាពប្រកួតប្រជែងរបស់សហគ្រាសវៀតណាម។

តម្រូវឱ្យកសាងប្រព័ន្ធអេកូឡូស៊ីបង្កើតថ្មីប្រកបដោយប្រសិទ្ធភាព នាយករដ្ឋមន្ត្រីបានអះអាងថារដ្ឋផ្តោតលើការគាំទ្រសហគ្រាសលើកកម្ពស់សមត្ថភាពស្រូបយក ម្ចាស់ការលើបច្ចេកវិទ្យា អភិវឌ្ឍន៍ និងធ្វើពាណិជ្ជកម្មផលិតផលបច្ចេកវិទ្យាយុទ្ធសាស្ត្រ ត្រូវតែបង្កើតឱ្យបាននូវបណ្ដាសហគ្រាសបច្ចេកវិទ្យាវៀតណាមដែលមានសមត្ថភាពប្រកួតប្រជែងអន្តរជាតិ និងនាំមុខនៅក្នុងបណ្ដាវិស័យបច្ចេកវិទ្យាយុទ្ធសាស្ត្រ។

នាយករដ្ឋមន្ត្រី លោក Le Minh Hung បានកត់សម្គាល់ថា ត្រូវតែបង្កើនកិច្ចសហប្រតិបត្តិការអន្តរជាតិ; មានយន្តការដើម្បីឱ្យបណ្ដាសហគ្រាសបរទេសវិនិយោគនៅវៀតណាមផ្ទេរបច្ចេកវិទ្យា; ឈានជើងចូលរួម និងម្ចាស់ការលើបណ្ដាខ្សែច្រវាក់បច្ចេកវិទ្យាយុទ្ធសាស្ត្រជាបណ្តើរៗ; ពង្រីកឱ្យបានខ្លាំងក្លានូវបណ្ដាញបញ្ញវន្ត និងអ្នកជំនាញការជាប្រជាជនវៀតណាមនៅបរទេស។

បណ្ដាភាគីពាក់ព័ន្ធត្រូវយកចិត្តទុកដាក់ជាពិសេសដល់ការអភិវឌ្ឍប្រភពធនធានមនុស្សមានគុណភាពខ្ពស់; ត្រូវតែមានយន្តការលេចធ្លោដើម្បីស្វែងរក បណ្តុះបណ្តាល ទាក់ទាញ និងប្រើប្រាស់បុគ្គលមានទេពកោសល្យ ជាពិសេសគឺបណ្ដាអ្នកជំនាញការឈានមុខគេ អ្នកវិទ្យាសាស្ត្រវ័យក្មេង និងបុគ្គលមានទេពកោសល្យខាងបច្ចេកវិទ្យា។ បណ្ដាសាកលវិទ្យាល័យ វិទ្យាស្ថានស្រាវជ្រាវ ត្រូវខិតខំប្រឹងប្រែងក្លាយជាមជ្ឈមណ្ឌលស្រាវជ្រាវដ៏ខ្លាំងក្លា មជ្ឈមណ្ឌលបង្កើតថ្មី និងចាប់ផ្តើមអាជីវកម្ម។

នាយករដ្ឋមន្ត្រីបានចាត់ទុកថា ត្រូវតែផ្លាស់ប្តូរយ៉ាងខ្លាំងក្លាពីផ្នត់គំនិត «ធ្វើឱ្យតែមាន» ទៅជាផ្នត់គំនិតបង្កើតចេញនូវផលិតផលជាក់ស្តែង តម្លៃជាក់ស្តែង និងប្រសិទ្ធភាពជាក់ស្តែង។

រាល់កម្មវិធី ភារកិច្ចវិទ្យាសាស្ត្របច្ចេកវិទ្យា និងការបង្កើតថ្មី ត្រូវតែឆ្ពោះទៅរកការដោះស្រាយបណ្ដាបញ្ហាធំៗរបស់ប្រទេសជាតិ បម្រើដោយផ្ទាល់ដល់ប្រជាពលរដ្ឋ សហគ្រាស ដោយយកផលិតផលលទ្ធផល ប្រសិទ្ធភាពជាក់ស្តែង និងកម្រិតនៃការធ្វើពាណិជ្ជកម្មធ្វើជាបន្ទាត់វាស់វែងវាយតម្លៃលទ្ធផលនៃការអនុវត្ត។

នាយករដ្ឋមន្ត្រីបានអះអាងថា ការអភិវឌ្ឍវិទ្យាសាស្ត្របច្ចេកវិទ្យា ការបង្កើតថ្មី ការបំប្លែងជាឌីជីថល និងបច្ចេកវិទ្យាយុទ្ធសាស្ត្រ គឺពិតជាវិថីដើម្បីនាំប្រទេសជាតិអភិវឌ្ឍលឿន និងប្រកបដោយចីរភាពនៅក្នុងយុគសម័យថ្មី។

នាយករដ្ឋមន្ត្រីមានជំនឿជាក់ថា ជាមួយនឹងបញ្ញាវៀតណាម ភាពអង់អាចក្លាហានវៀតណាម រួមជាមួយបំណងប្រាថ្នាឈានឡើងរបស់ប្រជាជាតិវៀតណាម យើងប្រាកដជានឹងម្ចាស់ការលើបណ្ដាបច្ចេកវិទ្យាយុទ្ធសាស្ត្រជាបណ្តើរៗ លើកកម្ពស់សមត្ថភាពស្វយ័តភាពជាតិ និងអះអាងនូវឋានៈវៀតណាមនៅក្នុងយុគសម័យឌីជីថល។

នាយករដ្ឋមន្ត្រី លោក Le Minh Hung បានអំពាវនាវដល់ជួរអ្នកបញ្ញវន្ត អ្នកវិទ្យាសាស្ត្រ អ្នកជំនាញការ សហគ្រិន សហគមន៍សហគ្រាសបច្ចេកវិទ្យា និងសង្គមទាំងមូល បន្តពង្រឹងឱ្យបានខ្លាំងក្លានូវស្មារតីស្នេហាជាតិ បំណងប្រាថ្នាលះបង់រួមចំណែក ស្មារតីបង្កើតថ្មី; រួមដៃគ្នាកសាងខឿនវិទ្យាសាស្ត្របច្ចេកវិទ្យា និងការបង្កើតថ្មីវៀតណាមឱ្យមានការអភិវឌ្ឍយ៉ាងខ្លាំងក្លា រួមចំណែកកសាងប្រទេសជាតិវៀតណាមឱ្យមានភាពមានបាន ខ្លាំងក្លា ថ្កុំថ្កើងរុងរឿង វីល័យ និងមានសុភមង្គល៕

ការផ្លាស់ប្តូរទៅជាសេដ្ឋកិច្ចបៃតង»គឺជា«កូនសោរ» សម្រាប់ ការអភិវឌ្ឍប្រកបដោយចីរភាពរបស់ខេត្ត Quang Ninh ការផ្លាស់ប្តូរគំរូកំណើនឆ្ពោះទៅរកសេដ្ឋកិច្ចបៃតងប្រកបដោយចីរភាពគឺជាគោលដៅយុទ្ធសាស្ត្ររបស់ប្រទេសទាំងមូល។ ខេត្ត Quang Ninh គឺជាតំបន់ មួយក្នុងចំណោមមូលដ្ឋានដែលមានលទ្ធផលលេចធ្លោក្នុង ការផ្លាស់ប្តូរពី“ កំណើនសេដ្ឋកិច្ចបៃតង»។ ក្នុងដំណាក់កាលឆ្នាំ ២០២០-២០២៥ និងបណ្តាឆ្នាំបន្តទៀត ខេត្ត Quang Ninh នឹងបន្តប្រកាន់យ៉ាងខ្ជាប់ខ្ជួន តាមទស្សនៈនិងទិសដៅនេះជាមួយគោលដៅខ្ពស់ជាងនេះទៅទៀតផងដែរ។

គម្រោង​ផ្តោត​សំខាន់​លើ​ប្រជាជន ​គឺជា​អាទិភាព​​កំពូល​សម្រាប់​ចៃកា​នៅក្នុង​ព្រះរាជាណាចក្រ​កម្ពុជា គោលដៅ​របស់​រាជរដ្ឋាភិបាល ដើម្បី​ក្លាយជា​ប្រទេស​ដែលមាន​ប្រាក់​ចំណូល​មធ្យម​កម្រិត​ខ្ពស់​ក្នុង​ឆ្នាំ​ ២០៣០ និង​ក្លាយជា​ប្រទេស​មាន​ប្រាក់ចំណូល​ខ្ពស់​នៅក្នុង​ឆ្នាំ​ ២០៥០ អាច​នឹង​ក្លាយជា​ការពិត ខណៈ​កម្ពុជា​បាន​រីករាយ​ចំពោះ​កំណើនសេដ្ឋកិច្ច​ប្រមាណ ៧,៣% ក្នុង​ ១ ​ឆ្នាំ អស់​រយៈពេល​ជាង​ ១ ​ទសវត្សរ៍ ពីមុន​ការរីករាលដាល​នៃ​ជំងឺ​កូវីដ​ ១៩​។

ឌឹកអាញ់

thoidai.com.vn