យុគសម័យ - នាថ្ងៃទី ០៩ ខែឧសភា ស្នងការដ្ឋាននគរបាលក្រុងហាណូយ បានប្រកាសពីផែនការបែងចែកខ្សែផ្លូវ និងរៀបចំចរាចរណ៍ ដើម្បីបម្រើមហាសន្និបាតតំណាងទូទាំងប្រទេសលើកទី XI នៃរណសិរ្សមាតុភូមិវៀតណាម ដែលនឹងប្រព្រឹត្តទៅចាប់ពីថ្ងៃទី ១១ ដល់ថ្ងៃទី ១៣ ខែឧសភា នៅមជ្ឈមណ្ឌលសន្និបាតជាតិ។
យោងតាមការជូនដំណឹង ក្នុងអំឡុងម៉ោងមមាញឹកដែលបម្រើឱ្យមហាសន្និបាត កម្លាំងមានសមត្ថកិច្ចនឹងផ្អាកជាបណ្តោះអាសន្ននូវរថយន្តដឹកទំនិញដែលមានទម្ងន់សរុបតាមការរចនាចាប់ពី ១,៥ តោនឡើងទៅ និងរថយន្តដឹកអ្នកដំណើរចាប់ពី ១៦ កៅអីឡើងទៅ (លើកលែងតែរថយន្តក្រុងសាធារណៈ រថយន្តប្រមូលសំរាម រថយន្តដោះស្រាយបញ្ហាបច្ចេកទេស រថយន្តដែលមានផ្លាកសញ្ញាការពារ រថយន្តរបស់កម្លាំងនគរបាល កងទ័ព និងមធ្យោបាយអាទិភាពផ្សេងៗទៀតតាមបទបញ្ញត្តិ)។ ទន្ទឹមនឹងនោះ មធ្យោបាយធ្វើដំណើរផ្សេងទៀតក៏ត្រូវបានកម្រិតការធ្វើចរាចរណ៍នៅលើខ្សែផ្លូវសំខាន់ៗជាច្រើននៅភាគខាងលិចទីក្រុងហាណូយផងដែរ។
ជាក់ស្តែង ពេលវេលានៃការបែងចែកខ្សែផ្លូវត្រូវបានអនុវត្តចាប់ពីម៉ោង ១២:០០ ដល់ម៉ោង ១៤:០០ និងចាប់ពីម៉ោង ១៦:០០ ដល់ម៉ោង ១៧:៣០ នាថ្ងៃទី ១១ ខែឧសភា; ចាប់ពីម៉ោង ០៦:៣០ ដល់ម៉ោង ០៨:៣០, ចាប់ពីម៉ោង ១២:៣០ ដល់ម៉ោង ១៤:៣០ និងចាប់ពីម៉ោង ១៦:០០ ដល់ម៉ោង ១៧:៣០ ក្នុងអំឡុងថ្ងៃទី ១២ និងទី ១៣ ខែឧសភា។
បណ្តាខ្សែផ្លូវដែលស្ថិតក្នុងបញ្ជីហាមឃាត់ និងកម្រិតការធ្វើចរាចរណ៍រួមមាន៖ ផ្លូវ Kim Ma, Nguyen Chi Thanh, Tran Duy Hung, Pham Hung (កំណាត់ចាប់ពីផ្លូវ Me Tri ដល់មហាវិថី Thang Long), Do Duc Duc, Mieu Dam, ផ្លូវក្រវាត់ក្រុងលេខ III លើអាកាស (កំណាត់ចាប់ពី Ho Tung Mau ដល់ស្ពាន Thanh Tri និងទិសដៅផ្ទុយមកវិញ), ផ្លូវអមមហាវិថី Thang Long (កំណាត់ចាប់ពីផ្លូវ Pham Hung ដល់ស្ពានអាកាសផ្លូវខេត្តលេខ ៧០)។
ដើម្បីកាត់បន្ថយសម្ពាធចរាចរណ៍នៅតំបន់ដែលប្រព្រឹត្តទៅមហាសន្និបាត ស្នងការដ្ឋាននគរបាលក្រុងហាណូយ ក៏បានណែនាំដល់មធ្យោបាយនានាឱ្យជ្រើសរើសផ្លូវវាងជំនួសវិញ។ យោងតាមនោះ មធ្យោបាយធ្វើដំណើរមកពីបណ្តាខេត្តនៅភាគខាងកើតដូចជា Hai Phong, Hung Yen, Bac Ninh ឆ្ពោះទៅកាន់បណ្តាខេត្តនៅភាគខាងជើង ភាគខាងលិច និងភាគពាយព្យ ត្រូវបានណែនាំឱ្យធ្វើដំណើរតាមខ្សែផ្លូវ៖ ស្ពាន Thanh Tri - ផ្លូវល្បឿនលឿន Ha Noi - Bac Giang - ផ្លូវជាតិលេខ ១៨។
 |
| ទីក្រុងហាណូយ បែងចែកខ្សែផ្លូវចរាចរណ៍ ដើម្បីបម្រើមហាសន្និបាតតំណាងទូទាំងប្រទេសលើកទី XI នៃរណសិរ្សមាតុភូមិវៀតណាម |
ចំណែកឯមធ្យោបាយមកពីភាគខាងកើតឆ្ពោះទៅកាន់បណ្តាខេត្តនៅភាគខាងលិច និងភាគពាយព្យដូចជា Son La, Dien Bien អាចធ្វើចរាចរណ៍តាមខ្សែផ្លូវ៖ ស្ពាន Thanh Tri - ផ្លូវលេខ ៣ ថ្មី - Ngoc Hoi - Phan Trong Tue - Cau Buou - Phuc La - Van Khe - Le Trong Tan - ផ្លូវជាតិលេខ ៦។
ចំពោះមធ្យោបាយមកពីទិសដៅផ្លូវ Vo Van Kiet, ស្ពាន Thang Long ឆ្ពោះទៅមហាវិថី Thang Long កម្លាំងមានសមត្ថកិច្ចណែនាំឱ្យធ្វើចរាចរណ៍តាមខ្សែផ្លូវ៖ Pham Van Dong - Ho Tung Mau - Cau Dien - ផ្លូវជាតិលេខ ៣២ - ផ្លូវខេត្តលេខ ៧០។
ក្រៅពីនេះ ស្នងការដ្ឋាននគរបាលក្រុងហាណូយ បានស្នើឱ្យមធ្យោបាយដែលចូលរួមចរាចរណ៍ទាំងអស់ អនុវត្តឱ្យបានម៉ឺងម៉ាត់តាមបទបញ្ញត្តិរបស់គណៈកម្មាធិការប្រជាជនក្រុងហាណូយ ស្តីពីសកម្មភាពនៃមធ្យោបាយចរាចរណ៍ផ្លូវគោកក្នុងភូមិសាស្ត្រទីក្រុង ព្រមទាំងបុរេសកម្មជ្រើសរើសផ្លូវធ្វើដំណើរឱ្យបានសមស្របដើម្បីជៀសវាងការកកស្ទះ។
កម្លាំងមានសមត្ថកិច្ចក៏បានសំណូមពរឱ្យប្រជាពលរដ្ឋអនុវត្តតាមការណែនាំបែងចែកខ្សែផ្លូវ ផ្តល់អាទិភាពជូនក្បួនរថយន្តដែលកំពុងបំពេញភារកិច្ច និងសហការជាមួយកម្លាំងនគរបាល ដើម្បីធានាសន្តិសុខ និងសុវត្ថិភាពចរាចរណ៍ក្នុងអំឡុងពេលប្រព្រឹត្តទៅនៃមហាសន្និបាត៕
 ទីក្រុងហាណូយ - គោលដៅទេសចរណ៍មិត្តភាព និងទាក់ទាញសម្រាប់ភ្ញៀវទេសចរឥស្លាម យុគសម័យ - សន្និសីទអន្តរជាតិ “ទស្សនវិស័យសម្រាប់ការអភិវឌ្ឍន៍ទេសចរណ៍ផ្សារភ្ជាប់ជាមួយហាឡាលនៅទីក្រុងហាណូយ” គឺជាសកម្មភាពសំខាន់មួយនៅក្នុងយុទ្ធសាស្ត្រអភិវឌ្ឍន៍ទេសចរណ៍របស់រាជធានី ដែលផ្តោតលើទីផ្សារដ៏មានសក្តានុពលរបស់ប្រជាជនឥស្លាមជាង ១,៩ ពាន់លាននាក់នៅទូទាំងពិភពលោក។ |
 អគ្គលេខាគណៈកម្មាធិការមជ្ឈិមបក្សកុម្មុយនិស្តចិន ប្រធានរដ្ឋនៃសាធារណរដ្ឋប្រជាមានិតចិន លោក Xi Jinping នឹងអញ្ជើញមកបំពេញទស្សនកិច្ចជាផ្លូវរដ្ឋនៅសាធារណរដ្ឋសង តបតាមការអញ្ជើញរបស់លោក To Lam អគ្គលេខាគណៈកម្មាធិការមជ្ឈិមបក្សកុម្មុយនិស្តវៀតណាម និងលោក Luong Cuong ប្រធានរដ្ឋនៃសាធារណរដ្ឋសង្គមនិយមវៀតណាម លោក Xi Jinping អគ្គលេខាគណៈកម្មាធិការមជ្ឈិមបក្សកុម្មុយនិស្តចិន ប្រធានរដ្ឋនៃសាធារណរដ្ឋប្រជាមានិតចិន នឹងអញ្ជើញមកបំពេញទស្សនកិច្ចជាផ្លូវរដ្ឋនៅសាធារណរដ្ឋសង្គមនិយមវៀតណាម ចាប់ពីថ្ងៃទី១៤ ដល់ថ្ងៃទី១៥ ខែមេសា ឆ្នាំ២០២៥។ |
thoidai.com.vn
មតិពីមិត្តអ្នកអាន