អ្នកប្រាជ្ញ ចិន៖ ដំណើរទស្សនកិច្ចរបស់អគ្គលេខាធិការបក្ស ប្រធានរដ្ឋ To Lam ក្នុងគោលបំណងធ្វើឱ្យជាក់ស្តែងនូវបណ្តាផែនការយុទ្ធសាស្ត្រជារួម

ក្នុងបទវិភាគដែលរៀបចំឡើងជាពិសេសសម្រាប់កាសែត The gioi va Viet Nam អំពីទស្សនវិស័យនៃកិច្ចសហប្រតិបត្តិការរវាង ចិន និង វៀតណាម សាស្ត្រាចារ្យ Hung Ly Luc បានឱ្យដឹងថា បន្ទាប់ពី វៀតណាម បានប្រកាសឯករាជ្យ និងសាធារណរដ្ឋប្រជាមានិត ចិន ត្រូវបានបង្កើតឡើង ប្រទេសទាំងពីរ ចិន និង វៀតណាម បានក្លាយជាប្រទេសដំបូងៗគេដែលបានបង្កើតទំនាក់ទំនងការទូតនៅកម្រិតឯកអគ្គរដ្ឋទូត។

ឆ្នាំ ២០២៥ មិនត្រឹមតែជាការកត់សម្គាល់ខួបលើកទី ៧៥ នៃថ្ងៃបង្កើតទំនាក់ទំនងការទូត ចិន-វៀតណាម ប៉ុណ្ណោះទេ ប៉ុន្តែក៏ជា "ឆ្នាំនៃការផ្លាស់ប្តូរមនុស្សធម៌ ចិន-វៀតណាម" ផងដែរ ដែលបានក្លាយជាដំណាក់កាលដ៏សំខាន់ក្នុងការនាំយកទំនាក់ទំនងនៃប្រទេសទាំងពីរឈានចូលយុគសម័យថ្មីនៃសហគមន៍ចែករំលែកវាសនា ចិន-វៀតណាម ដែលមានអត្ថន័យយុទ្ធសាស្ត្រ។

នាខែឧសភា ឆ្នាំ ២០២៥ អគ្គលេខាធិការបក្ស ប្រធានរដ្ឋ ចិន លោក Tap Can Binh បានអញ្ជើញមកបំពេញទស្សនកិច្ចផ្លូវរដ្ឋនៅ វៀតណាម។

មួយឆ្នាំក្រោយមក ដំណើរទស្សនកិច្ចនៅប្រទេស ចិន របស់អគ្គលេខាធិការបក្ស ប្រធានរដ្ឋ វៀតណាម លោក To Lam ពិតជានឹងនាំមកនូវអត្ថន័យប្រវត្តិសាស្ត្រដ៏ធំធេង។

ការបន្តវេន និងការបន្តនូវយុទ្ធសាស្ត្រ

ដំណើរទស្សនកិច្ចនៅប្រទេស ចិន លើកនេះរបស់អគ្គលេខាធិការបក្ស ប្រធានរដ្ឋ To Lam ប្រព្រឹត្តទៅក្នុងខណៈពេលដ៏សំខាន់ នៅពេលដែលទំនាក់ទំនង ចិន-វៀតណាម កំពុងស្ថិតក្នុងដំណាក់កាលបន្តវេនពីអតីតកាល និងបើកបង្ហាញនូវអនាគត។

កាលពីមួយឆ្នាំមុន ដំណើរទស្សនកិច្ចផ្លូវរដ្ឋរបស់ប្រធានរដ្ឋ ចិន លោក Tap Can Binh មកកាន់ វៀតណាម សម្រេចបាននូវសមិទ្ធផលប្រវត្តិសាស្ត្រ នៅពេលដែលភាគីទាំងពីរបានរួមគ្នាប្រកាសកសាង "សហគមន៍ចែករំលែកវាសនា ចិន-វៀតណាម ដែលមានអត្ថន័យយុទ្ធសាស្ត្រ" ដោយកំណត់នូវនិន្នាការចម្បងសម្រាប់ទំនាក់ទំនងទ្វេភាគីក្នុងយុគសម័យថ្មី។

សាស្ត្រាចារ្យ Hung Ly Luc វិទ្យាធិការនៃវិទ្យាស្ថានស្រាវជ្រាវជាតិ និងតំបន់ នៃសាកលវិទ្យាល័យពាណិជ្ជកម្មក្រៅប្រទេស Bac Kinh។

ក្នុងបរិបទនោះ ដំណើរទស្សនកិច្ចនាពេលខាងមុខរបស់អគ្គលេខាធិការបក្ស To Lam មិនមែនត្រឹមតែជាដំណើរទស្សនកិច្ចតបស្នងតាមបែបពិធីការប៉ុណ្ណោះទេ ប៉ុន្តែក៏ជាដំណើរដ៏ជាក់ស្តែងមួយ ក្នុងគោលបំណងធ្វើឱ្យជាក់ស្តែងនូវបណ្តាផែនការយុទ្ធសាស្ត្រជារួម។

ទីមួយ គឺការពង្រឹងមូលដ្ឋានគ្រឹះនៃទំនុកចិត្តនយោបាយ។ ក្នុងគោលនយោបាយការបរទេសរបស់ វៀតណាម ការអភិវឌ្ឍទំនាក់ទំនងជាមួយ ចិន ត្រូវបានចាត់ទុកថាជា "ជម្រើសយុទ្ធសាស្ត្រ" និងជា "អាទិភាពចម្បង"។

ចាប់តាំងពីដើមឆ្នាំ ២០២៦ មកទល់ពេលនេះ ស្ថានភាពអន្តរជាតិមានការប្រែប្រួលយ៉ាងខ្លាំង ចាប់ពីអឺរ៉ុប អាមេរិកឡាទីន រហូតដល់មជ្ឈិមបូព៌ា។ ក្នុងខណៈពេលដ៏សំខាន់នេះ អគ្គលេខាធិការបក្ស ប្រធានរដ្ឋ To Lam បានជ្រើសរើសប្រទេស ចិន ជាចំណុចដៅដំបូងគេក្នុងដំណើរទស្សនកិច្ចនៅបរទេស បន្ទាប់ពី វៀតណាម បានបំពេញសព្វគ្រប់នូវតំណែងថ្នាក់ដឹកនាំរដ្ឋ នៅក្នុងសម័យប្រជុំលើកទីមួយ នៃរដ្ឋសភានីតិកាលទី ១៦ ត្រឹមតែរយៈពេលមួយសប្តាហ៍ប៉ុណ្ណោះ។ ចំណុចនេះបានបញ្ជាក់ជាថ្មីម្តងទៀតនូវការយកចិត្តទុកដាក់របស់បក្ស និងរដ្ឋាភិបាល វៀតណាម ចំពោះទំនាក់ទំនង ចិន-វៀតណាម។

អត្ថន័យដ៏ធំធេងនៃដំណើរទស្សនកិច្ចនេះ ក៏ស្ថិតនៅលើការដែលតាមរយៈការផ្លាស់ប្តូរដោយផ្ទាល់នៅកម្រិតខ្ពស់បំផុត ដើម្បីបញ្ជាក់ជាថ្មីនូវការគាំទ្រគ្នាទៅវិញទៅមក និងបញ្ចេញនូវសញ្ញាដ៏ខ្លាំងក្លាអំពីសាមគ្គីភាពរវាងប្រទេសអ្នកជិតខាងសង្គមនិយមទាំងពីរ។

ទីពីរ៖ ធ្វើឱ្យជាក់ស្តែងនូវទិសដៅ "៦ លើស"។ គោលដៅកសាងសហគមន៍ចែករំលែកវាសនាដែលមានអត្ថន័យយុទ្ធសាស្ត្រ រួមមាន៖ ទំនុកចិត្តនយោបាយខ្ពស់ជាងមុន កិច្ចសហប្រតិបត្តិការការពារជាតិ-សន្តិសុខជាក់ស្តែងជាងមុន កិច្ចសហប្រតិបត្តិការជាក់ស្តែងស៊ីជម្រៅជាងមុន មូលដ្ឋានគ្រឹះសង្គមរឹងមាំជាងមុន ការសម្របសម្រួលពហុភាគីជិតស្និទ្ធជាងមុន ការត្រួតពិនិត្យ និងដោះស្រាយការខ្វែងគំនិតគ្នាបានល្អជាងមុន គឺត្រូវការនូវបណ្តាកម្មវិធីសកម្មភាពជាក់ស្តែង។ ក្នុងដំណើរទស្សនកិច្ចនេះ ភាគីទាំងពីររំពឹងថានឹងចុះហត្ថលេខាលើឯកសារសហប្រតិបត្តិការជាច្រើនដែលមានលទ្ធភាពអនុវត្តខ្ពស់ ជាពិសេសគឺការបង្កើតរបកគំហើញក្នុងការតភ្ជាប់ផ្លូវរថភ្លើងឆ្លងដែន ដូចជាខ្សែផ្លូវ Lao Cai - Ha Noi - Hai Phong ខ្នាតស្តង់ដារ និងការបង្កលក្ខណៈងាយស្រួលដល់ការបំពេញបែបបទគយនៅច្រកទ្វារព្រំដែន។

ទីបី៖ ត្រួតពិនិត្យការខ្វែងគំនិតគ្នា រក្សាសន្តិភាពក្នុងតំបន់។ ភាគីទាំងពីរត្រូវបានរំពឹងថានឹងបញ្ជាក់ជាថ្មីនូវការយល់ឃើញរួមអំពីការត្រួតពិនិត្យការខ្វែងគំនិតគ្នា ដោះស្រាយឱ្យបានសមស្របនូវបញ្ហានានាដែលនៅសេសសល់ រួមចំណែកដល់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍក្នុងតំបន់ និងលើពិភពលោក។

ការធ្វើឱ្យប្រសើរឡើងនូវរចនាសម្ព័ន្ធសហប្រតិបត្តិការសេដ្ឋកិច្ច

ក្រឡេកមើលឆ្នាំកន្លងទៅ ក្រោមការណែនាំយុទ្ធសាស្ត្ររបស់ថ្នាក់ដឹកនាំខ្ពស់បំផុតនៃបក្សទាំងពីរ និងរដ្ឋទាំងពីរ ទំនាក់ទំនង ចិន-វៀតណាម បានរក្សានូវសន្ទុះអភិវឌ្ឍន៍យ៉ាងខ្លាំងក្លា និងជាក់ស្តែង។ ក្នុងបរិបទដែលសេដ្ឋកិច្ចសកលងើបឡើងវិញយឺត និងតម្រូវការពីខាងក្រៅធ្លាក់ចុះ កិច្ចសហប្រតិបត្តិការសេដ្ឋកិច្ចពាណិជ្ជកម្មទ្វេភាគី នៅតែបង្ហាញនូវភាពរស់រវើកគួរឱ្យភ្ញាក់ផ្អើល ដោយក្លាយជាចំណុចភ្លឺដែលមានថាមពលបំផុត។

ទិដ្ឋភាពនៃកិច្ចសន្ទនាតាមទូរស័ព្ទរវាងអគ្គលេខាធិការបក្ស To Lam ជាមួយអគ្គលេខាធិការបក្ស ប្រធានរដ្ឋ ចិន លោក Tap Can Binh នាខែមករា ឆ្នាំ ២០២៦។

ទីមួយ៖ ពាណិជ្ជកម្មកើនឡើងផ្ទុយពីនិន្នាការទូទៅ។ ប្រទេស ចិន បន្តជាដៃគូពាណិជ្ជកម្មធំបំផុតរបស់ វៀតណាម ខណៈពេលដែល វៀតណាម រក្សាបាននូវតំណែងជាដៃគូពាណិជ្ជកម្មធំទី ៤ របស់ ចិន នៅលើសកលលោក។ ការនាំចេញកសិផលរបស់ វៀតណាម ដូចជា ធុរេន ស្រកានាគ សំបុកត្រចៀកកាំ... ទៅកាន់ប្រទេស ចិន បានកើនឡើងយ៉ាងខ្លាំងក្លា អរគុណចំពោះកិច្ចខិតខំប្រឹងប្រែងរបស់ប្រទេសទាំងពីរ។

ទីពីរ៖ របកគំហើញនៃការតភ្ជាប់។ ភាគីទាំងពីរបានឯកភាពពន្លឿនការតភ្ជាប់ផែនការផ្លូវរថភ្លើងខ្នាតស្តង់ដារឆ្លងដែន។ ចំពោះ "ការតភ្ជាប់ទន់" គំរូបំពេញបែបបទគយ "ប្រទេសពីរ ចំណុចឈប់មួយ" កំពុងត្រូវបានដាក់ឱ្យអនុវត្តសាកល្បងយ៉ាងសកម្ម; បណ្តាមូលដ្ឋានគ្រឹះទូទាត់ប្រាក់ដូចជា Alipay, WeChat Pay និង QR Code របស់ វៀតណាម ក៏ចាប់ផ្តើមត្រូវបានដាក់ឱ្យប្រើប្រាស់ ដែលបង្កលក្ខណៈងាយស្រួលយ៉ាងខ្លាំងដល់ភ្ញៀវទេសចរ និងអាជីវករ។

ទីបី៖ ការផ្សារភ្ជាប់ខ្សែច្រវាក់ផ្គត់ផ្គង់។ ការវិនិយោគរបស់ ចិន នៅ វៀតណាម បានផ្លាស់ប្តូរយ៉ាងខ្លាំងក្លាទៅកាន់វិស័យបច្ចេកវិទ្យាខ្ពស់ ថាមពលបៃតង និងឧស្សាហកម្មគាំទ្រ ជំនួសឱ្យការផ្តោតតែលើវិស័យដែលប្រើប្រាស់កម្លាំងពលកម្មច្រើនដូចពីមុន។

ទោះជាយ៉ាងណាក៏ដោយ ភាគីទាំងពីរនៅតែត្រូវការខិតខំប្រឹងប្រែងដោះស្រាយបញ្ហាមួយចំនួន ដូចជាការគ្រប់គ្រងហានិភ័យនៃស្ដង់ដារចត្តាឡីស័ក ក៏ដូចជាស្ថានភាពកកស្ទះនៅច្រកទ្វារព្រំដែនក្នុងអំឡុងពេលមមាញឹក។

ឆ្ពោះទៅរកកិច្ចសហប្រតិបត្តិការគុណភាពថ្មី

កិច្ចសហប្រតិបត្តិការនាពេលខាងមុខរវាង ចិន និង វៀតណាម ចាំបាច់ត្រូវផ្លាស់ប្តូរពីគំរូ "វត្ថុធាតុដើម - ការកែច្នៃ" បែបប្រពៃណី ទៅជាទិសដៅ "គុណភាពខ្ពស់ តម្លៃបន្ថែមខ្ពស់ និងការសម្របខ្លួនបានល្អជាមួយហានិភ័យ"។ ខ្ញុំយល់ឃើញថា វិស័យសហប្រតិបត្តិការដែលមានសក្តានុពលទាំងបួន រួមមាន៖

ផ្លែធុរេន វៀតណាម ត្រូវបានដាក់លក់នៅផ្សារ Tan Phat Dia នាទីក្រុង Bac Kinh ប្រទេស ចិន។

ទីមួយ៖ ការតភ្ជាប់ផ្លូវរថភ្លើង និងមជ្ឈមណ្ឌលភស្តុភារកម្ម (Logistics)។ វិស័យនេះត្រូវបានចាត់ទុកថាជា "គម្រោងសំខាន់លេខ ១"។ ការតភ្ជាប់ផ្លូវរថភ្លើងខ្នាតស្តង់ដារនឹងធ្វើឱ្យ វៀតណាម ក្លាយជាស្ពានចម្លងតាមផ្លូវគោកដ៏មានប្រសិទ្ធភាព សម្រាប់ទំនិញ ចិន ក្នុងការជ្រៀតចូលទីផ្សារបណ្តាប្រទេសអាស៊ីអាគ្នេយ៍ និងខ្សែផ្លូវនាវាចរណ៍សកល។

ទីពីរ៖ សេដ្ឋកិច្ចឌីជីថល និង AI។ បង្កើនកិច្ចសហប្រតិបត្តិការ ចិន-វៀតណាម ក្នុងការកសាងទីក្រុងឆ្លាតវៃ ការទូទាត់តាមប្រព័ន្ធអេឡិចត្រូនិក និងពាណិជ្ជកម្មតាមប្រព័ន្ធអេឡិចត្រូនិកឆ្លងដែន។

ទីបី៖ សេដ្ឋកិច្ចបៃតង និងថាមពលថ្មី។ ចិន មានប្រៀបខ្លាំងលើវិស័យថាមពលពន្លឺព្រះអាទិត្យ ថាមពលខ្យល់ និងអាគុយឡានអគ្គិសនី ខណៈដែល វៀតណាម មានតម្រូវការផ្លាស់ប្តូរថាមពលយ៉ាងខ្លាំងក្លា។

ទីបួន៖ ទេសចរណ៍ និងការផ្លាស់ប្តូរមនុស្សធម៌។ អភិវឌ្ឍដំណើរកម្សាន្ត "ពណ៌ក្រហម" - តាមដានដានជើងរបស់លោកប្រធាន Ho Chi Minh នៅប្រទេស ចិន ឬដំណើរកម្សាន្តទេសចរណ៍វេជ្ជសាស្ត្រ និងការផ្លាស់ប្តូរការសិក្សាអប់រំ ចិន-វៀតណាម។

ដំណើរទស្សនកិច្ចរបស់អគ្គលេខាធិការបក្ស ប្រធានរដ្ឋ To Lam នឹងក្លាយជាបង្គោលចរប្រវត្តិសាស្ត្រដ៏សំខាន់ថ្មីមួយ ក្នុងប្រវត្តិសាស្ត្រនៃទំនាក់ទំនងរវាងប្រទេសទាំងពីរ។ យើងពិតជាមានមូលដ្ឋានគ្រឹះយ៉ាងពេញលេញ ដើម្បីជឿជាក់ថា ប្រទេស ចិន និង វៀតណាម នឹងបោះជំហានយ៉ាងរឹងមាំជាមួយគ្នានៅលើវិថីនៃទំនុកចិត្តយុទ្ធសាស្ត្រ រួមគ្នាស្ថាបនានូវគំរូបែបបទនៃទំនាក់ទំនងអ្នកជិតខាងសង្គមនិយម ប្រកបដោយសន្តិភាព ស្ថិរភាព និងភាពរុងរឿង៕

លោកអគ្គលេខាបក្ស ប្រធានរដ្ឋ To Lam អញ្ជើញជួបសំណេះសំណាលជាមួយគំរូឆ្នើមនៃចលនា "ធ្វើសេនាធិការល្អ បម្រើល្អ" នាព្រឹកថ្ងៃទី៤ ខែកញ្ញា នៅវិមានប្រធានរដ្ឋ (ទីក្រុងហាណូយ) អគ្គលេខាបក្ស ប្រធានរដ្ឋវៀតណាមលោក តូ ឡឹម បានអញ្ជើញជួបសំណេះសំណាលជាមួយគណៈ ប្រតិភូគំរូនៃចលនាប្រឡងប្រណាំង “ធ្វើសេនាធិការល្អ បម្រើល្អ” ដំណាក់កាល ២០១៩-២០២៤។

ប្រធានរដ្ឋ​វៀតណាម លោក​ To Lam អញ្ជើញ​ទៅទស្សនាមណ្ឌលថែទាំសុខភាពយុទ្ធជនពិការ Thuan Thanh ក្នុងឱកាសរំលឹកខួបលើកទី ៧៧ឆ្នាំ ទិវាយុទ្ធជនពិការយុទ្ធជនពលី (២៧ កក្កដា ១៩៤៧ - ២៧ កក្កដា ២០២៤) នារសៀលថ្ងៃទី ២៤ កក្កដា ប្រធានរដ្ឋវៀតណាម លោក To Lam បានអញ្ជើញទៅសួរសុខទុក្ខ និងជូនអំណោយដល់យុទ្ធជនពិការនៅមណ្ឌលថែទាំសុខភាពយុទ្ធជនពិការ Thuan Thanh នៅឃុំ Ninh Xa ស្រុក ...

ឌឹកអាញ់