យុគសម័យ - នាថ្ងៃទី៩ ខែមេសា នៅទីក្រុងហាណូយ សមាគមទេសចរណ៍វៀតណាម បានរៀបចំពិធីបើកកម្មវិធីតភ្ជាប់ពាណិជ្ជកម្មរវាងសហគ្រាសទេសចរណ៍វៀតណាម និងអន្តរជាតិ (B2B)។ នេះគឺជាព្រឹត្តិការណ៍ដ៏សំខាន់មួយ ស្ថិតក្នុងខ្សែសង្វាក់នៃសកម្មភាពនៃពិព័រណ៍ទេសចរណ៍អន្តរជាតិ VITM 2026 ដែលជាពិព័រណ៍ទេសចរណ៍អន្តរជាតិលើកទី១៥ រៀបចំឡើងដោយសមាគមទេសចរណ៍វៀតណាម។
ថ្លែងក្នុងពិធីបើក លោកស្រី Cao Thi Ngoc Lan អនុប្រធានអចិន្ត្រៃយ៍នៃសមាគមទេសចរណ៍វៀតណាម បានមានប្រសាសន៍ថា ឆ្នាំ២០២៥ បានកត់សម្គាល់នូវជំហានអភិវឌ្ឍន៍ដ៏ឆ្នើមនៃវិស័យទេសចរណ៍វៀតណាម នៅពេលដែលសម្រេចបាននូវកំណត់ត្រាក្នុងការទទួល និងបម្រើភ្ញៀវទេសចរអន្តរជាតិជាង ២១,២ លាននាក់ កើនឡើងជាង ២០% បើធៀបនឹងឆ្នាំ២០២៤ និងជាកម្រិតខ្ពស់បំផុតមិនធ្លាប់មានពីមុនមក ព្រមទាំងបម្រើភ្ញៀវទេសចរក្នុងស្រុកបានជាង ១៣៥ លាននាក់ ដោយចំណូលពីវិស័យទេសចរណ៍បានហួសកម្រិត ១ លានលានដុង (៤០ ពាន់លានដុល្លារអាមេរិក)។
ទន្ទឹមនឹងវិស័យទាំងមូល សមាគមទេសចរណ៍វៀតណាម បានដាក់អនុវត្តនូវកម្មវិធីសកម្មភាពជាក់ស្តែងជាច្រើនដូចជា៖ ការរៀបចំដំណើរកម្សាន្តស្វែងយល់ (FAM trip) សិក្ខាសាលាឯកទេស សកម្មភាពជំរុញទេសចរណ៍អន្តរជាតិ ព្រមទាំងគំនិតផ្តួចផ្តើមតភ្ជាប់ជាបន្តបន្ទាប់រវាងសហគ្រាសក្នុង និងក្រៅប្រទេស។
ក្នុងនោះ ចំណុចលេចធ្លោគឺ ពិព័រណ៍ទេសចរណ៍អន្តរជាតិវៀតណាម (VITM) ដែលបានរៀបចំឡើងក្នុងខែមេសា ឆ្នាំ២០២៥ នៅទីក្រុងហាណូយ និងព្រឹត្តិការណ៍ “ទិវាទីភ្នាក់ងារទេសចរណ៍វៀតណាម” ដែលត្រូវបានរៀបចំឡើងជាលើកដំបូងក្នុងខែវិច្ឆិកា ឆ្នាំ២០២៥ នៅខេត្ត Quang Ninh ដែលបង្ហាញពីការប្តេជ្ញាចិត្ត ស្មារតីច្នៃប្រឌិត និងការឯកភាពគ្នានៃសហគមន៍សហគ្រាសទេសចរណ៍ទាំងមូលនៅវៀតណាម។
 |
| លោកស្រី Cao Thi Ngoc Lan អនុប្រធានអចិន្ត្រៃយ៍នៃសមាគមទេសចរណ៍វៀតណាម បានមានប្រសាសន៍ថា ពិព័រណ៍ VITM ២០២៦ នាំមកនូវកិច្ចសហប្រតិបត្តិការ និងការតភ្ជាប់កម្រិតខ្ពស់បំផុតសម្រាប់បណ្តាដៃគូ និងសហគមន៍សហគ្រាស។ |
បន្តបន្ទាប់ពីបណ្តាសកម្មភាពក្នុងឆ្នាំ២០២៥ ស្ថិតក្នុងក្របខ័ណ្ឌនៃពិព័រណ៍ទេសចរណ៍អន្តរជាតិវៀតណាមឆ្នាំ២០២៦ សមាគមទេសចរណ៍វៀតណាម បានរៀបចំកម្មវិធីតភ្ជាប់ពាណិជ្ជកម្មរវាងសហគ្រាសទេសចរណ៍អន្តរជាតិ និងវៀតណាម (B2B)។
ជាមួយនឹងស្មារតីវិជ្ជាជីវៈ ក្រោមការដឹកនាំរបស់សមាគមទេសចរណ៍វៀតណាម សមាគមទីភ្នាក់ងារទេសចរណ៍វៀតណាម បានអញ្ជើញអ្នកទិញអន្តរជាតិជាង ១២០ នាក់ អ្នកទិញក្នុងស្រុកជិត ៣០០ នាក់ និងអ្នកលក់ជាង ៦០០ នាក់ ដែលបង្កើតបានជាវេទិកាផ្សព្វផ្សាយពាណិជ្ជកម្មទេសចរណ៍ខ្នាតធំ ទាក់ទាញការយកចិត្តទុកដាក់ពីបណ្តាដៃគូ សហគ្រាស និងប្រព័ន្ធផ្សព្វផ្សាយទាំងក្នុងស្រុក និងអន្តរជាតិ។
លោកស្រី Ngoc Lan បានមានប្រសាសន៍ថា៖ “នេះមិនត្រឹមតែជាសកម្មភាព B2B ឯកទេសប៉ុណ្ណោះទេ ប៉ុន្តែក៏ជាលំហនៃការជួបជុំ ការតភ្ជាប់ និងការបំផុសគំនិតសម្រាប់ការអភិវឌ្ឍវិស័យទេសចរណ៍វៀតណាមផងដែរ។ ដើម្បីសម្រេចបាននូវជោគជ័យនៃកម្មវិធីនេះ យើងខ្ញុំបានរៀបចំ និងផ្តោតលើការអនុវត្តយ៉ាងសស្រាក់សស្រាំ ដើម្បីនាំមកនូវកិច្ចសហប្រតិបត្តិការ និងការតភ្ជាប់កម្រិតខ្ពស់បំផុតសម្រាប់បណ្តាដៃគូ និងសហគមន៍សហគ្រាស”។
 |
| បណ្តាស្តង់នៅពិព័រណ៍ទេសចរណ៍អន្តរជាតិ VITM ២០២៦។ |
អនុប្រធានអចិន្ត្រៃយ៍នៃសមាគមទេសចរណ៍ ក៏បានឱ្យដឹងផងដែរថា វៀតណាមប្តេជ្ញានឹងបន្តរៀបចំ និងបង្កើតគ្រប់លក្ខណៈងាយស្រួល ដើម្បីឱ្យកម្មវិធីតភ្ជាប់ពាណិជ្ជកម្ម B2B រវាងសហគ្រាសទេសចរណ៍អន្តរជាតិ និងវៀតណាម ក្លាយជាសកម្មភាពប្រចាំឆ្នាំ ដែលត្រូវបានរៀបចំឡើងក្នុងខ្នាតកាន់តែធំ និងមានប្រសិទ្ធភាពកាន់តែខ្ពស់ រួមចំណែកយ៉ាងសកម្មក្នុងការលើកកម្ពស់សមត្ថភាពប្រកួតប្រជែង និងលទ្ធភាពធ្វើសមាហរណកម្មអន្តរជាតិនៃសហគ្រាសទេសចរណ៍វៀតណាម។
កម្មវិធីតភ្ជាប់ពាណិជ្ជកម្ម B2B បើកឡើងនូវឱកាសកិច្ចសហប្រតិបត្តិការថ្មីៗ រួមគ្នាស្ថាបនាវិស័យទេសចរណ៍វៀតណាមឱ្យមានការអភិវឌ្ឍប្រកបដោយចីរភាព វិជ្ជាជីវៈ និងធ្វើសមាហរណកម្មអន្តរជាតិយ៉ាងស៊ីជម្រៅ។
 |
| ពិព័រណ៍នេះត្រូវបានរំពឹងថានឹងមានស្តង់ប្រមាណ ៤៥០ ដោយទាក់ទាញការចូលរួមពីបណ្តាស្ថាប័នជំរុញទេសចរណ៍ទាំងក្នុង និងក្រៅប្រទេស។ |
| សមាគមទេសចរណ៍វៀតណាម រៀបចំពិព័រណ៍ទេសចរណ៍អន្តរជាតិវៀតណាម – VITM 2026 ក្រោមប្រធានបទ៖ “ការផ្លាស់ប្តូរឌីជីថល និងការរីកចម្រើនបៃតង – លើកកម្ពស់ទេសចរណ៍វៀតណាម” (Digital Transformation & Green Growth – Elevating Vietnam Tourism) ដែលប្រព្រឹត្តទៅចាប់ពីថ្ងៃទី០៩ ដល់ថ្ងៃទី១២ ខែមេសា ឆ្នាំ២០២៦ នៅមជ្ឈមណ្ឌលពិព័រណ៍អន្តរជាតិ ICE ហាណូយ (វិមានវប្បធម៌មិត្តភាព លេខ៩១ ផ្លូវ Tran Hung Dao ទីក្រុងហាណូយ)។ ពិព័រណ៍នេះ ត្រូវបានរំពឹងថានឹងមានស្តង់ប្រមាណ ៤៥០ ដោយទាក់ទាញការចូលរួមពីបណ្តាស្ថាប័នជំរុញទេសចរណ៍ទាំងក្នុង និងក្រៅប្រទេស បណ្តាក្រុមហ៊ុនអាកាសចរណ៍ អង្គការទេសចរណ៍អន្តរជាតិ ព្រមទាំងសហគ្រាសទេសចរណ៍ជាង ៦០០ ទៀតផង៕ |
 សមាគមសហគ្រិនវ័យក្មេងវៀតណាមលើកកំពស់សមត្ថភាពប្រកួតប្រជែងឈានដល់កម្រិតតំបន់ និងអន្តរជាតិ នារសៀលថ្ងៃទី ២៧ វិច្ឆិកា នៅទីក្រុងហាណូយ នាយករដ្ឋមន្ត្រីវៀតណាមលោក Pham Minh Chinh បានអញ្ជើញចូលរួមពិធីរំលឹកខួបលើកទី ៣០ នៃចលនាសហគ្រិនវ័យក្មេងវៀតណាម។ |
 ផ្សព្វផ្សាយរូបភាពយិនស៊ិន Ngoc Linh និងប្រជាជន Nam Tra My ដល់មិត្តក្នុងស្រុក និងអន្តរជាតិ នាយប់ថ្ងៃទី ១ ខែសីហា នៅស្រុក Nam Tra My (ខេត្ត Quang Nam) ពិធីរំលឹកខួបលើកទី ២០ នៃការបង្កើតស្រុក Nam Tra My ឡើងវិញ (ថ្ងៃទី ១ ខែសីហា ឆ្នាំ ២០២៣ ដល់ថ្ងៃទី ១ ខែសីហា ... |
មតិពីមិត្តអ្នកអាន