នារសៀលថ្ងៃទី១៣ ខែមីនា នៅរាជធានីភ្នំពេញ លោក Nguyen Huy Tang ឯកអគ្គរដ្ឋទូតវៀតណាមប្រចាំព្រះរាជាណាចក្រកម្ពុជា បានទទួលជួបគណៈប្រតិភូថ្នាក់ដឹកនាំសមាគមអតីតនិស្សិតកម្ពុជា មកពីប្រទេសវៀតណាម អញ្ជើញចូលជួបសម្តែងការគួរសម។
 |
| លោកឯកអគ្គរដ្ឋទូត Nguyen Huy Tang ថ្លែងមតិក្នុងជំនួប |
ថ្លែងមតិក្នុងជំនួបនេះ លោកឯកអគ្គរដ្ឋទូត Nguyen Huy Tang បានអបអរសាទរចំពោះសមាគមអតីតនិស្សិតកម្ពុជាមកពីប្រទេសវៀតណាម ដែលត្រូវបានទទួលស្គាល់ជាផ្លូវការដោយរាជរដ្ឋាភិបាលកម្ពុជា។ លោកឯកអគ្គរដ្ឋទូតក៏បានសម្តែងនូវសេចក្តីរីករាយដោយបានឃើញអតីតនិស្សិតកម្ពុជាមកពីប្រទេសវៀតណាម ជាច្រើននាក់ឥឡូវនេះបានកាន់មុខតំណែងសំខាន់ៗក្នុងស្ថាប័ន អង្គការ និងធុរកិច្ចនៅកម្ពុជា រួមចំណែកយ៉ាងសកម្មក្នុងការអភិវឌ្ឍប្រទេសក្រោមការដឹកនាំរបស់រាជរដ្ឋាភិបាលកម្ពុជា រួមចំណែកពូនជ្រំចំណងសាមគ្គីភាព និងមិត្តភាពរវាងវៀតណាម និងកម្ពុជា។
ចំណែកលោកអនុបណ្ឌិត អ៊ុច លាង អនុប្រធាននាយកដ្ឋានសិក្សាអាស៊ី អាហ្វ្រិក និងមជ្ឈិមបូព៌ា នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា ប្រធានគណៈកម្មការប្រតិបត្តិនៃសមាគមអតីតនិស្សិតកម្ពុជាមកពីប្រទេសវៀតណាមបានឲ្យដឹងថា ក្រសួងមហាផ្ទៃ បានសម្រេចចុះឈ្មោះសមាគមអតីតនិស្សិតកម្ពុជា មកពីប្រទេសវៀតណាម ក្នុងបញ្ជីសមាគមនៅក្រសួងមហាផ្ទៃនៅថ្ងៃទី៣១ ខែមករា ឆ្នាំ២០២៤។ សមាគមមានគោលបំណងផ្លាស់ប្តូរ សហប្រតិបត្តិការ និងគាំទ្រ និងជួយដល់និស្សិតដែលបាន និងកំពុងសិក្សានៅប្រទេសវៀតណាម ក៏ដូចជាបន្តជំរុញទំនាក់ទំនងល្អរវាងប្រជាជនកម្ពុជា និងវៀតណាម ក្រោមពាក្យស្លោកថា “ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការលើគ្រប់ជ្រុងជ្រោយ ស្ថិតស្ថិរយូរអង្វែង”។
បន្ទាប់ពីការបើកដំណើរការអស់រយៈពេលជាងមួយខែមក សមាគមមានសមាជិកជាង ៦០០ នាក់និងកំពុងខិតខំប្រឹងប្រែងពង្រីកចំនួនសមាជិក។ ក្នុងរយៈពេល ៣០ ឆ្នាំកន្លងមកនេះ ចំនួនអតីតនិស្សិតកម្ពុជាដែលបានសិក្សានៅប្រទេសវៀតណាមតាមរយៈកម្មវិធីអាហារូបករណ៍របស់ក្រសួងអប់រំនៃប្រទេសទាំងពីរត្រូវបានប៉ាន់ប្រមាណថាមានចំនួនជាង ៤០០០ នាក់ដោយមិនរាប់បញ្ចូលនិស្សិតដែលសិក្សានៅតាមក្របខ័ណ្ឌ និងបណ្តាញផ្សេងៗ។
មតិពីមិត្តអ្នកអាន