តំបន់ភ្នំម្រេចកង្កែបដែលស្ថិតនៅជ្រលងអារ៉ែង ស្ថិតក្នុងឃុំជំនាប់ ស្រុកថ្មបាំង ខេត្តកោះកុង នឹងក្លាយជាតំបន់ទេសចរណ៍ផ្សេងព្រេងដ៏ ទាក់ទាញបំផុតនាពេលខាងមុខ ។ នេះបើយោង តាមការថ្លែងឲ្យដឹងពីមន្ត្រីជាន់ខ្ពស់ក្រសួងទេសចរណ៍ ។
ភ្នំម្រេចកង្កែបនៃជ្រលងអារ៉ែង
ម្រេចកង្កែប ជាតំបន់ទេសចរណ៍ផ្សងព្រេងមួយ កំពុងមានភាពល្បីល្បាញយ៉ាងខ្លាំងនូវសម្រស់ដ៏ស្រស់ត្រកាល អមដោយដើមឈើតូច ធំៗ បង្កើតជាម្លប់ដ៏ត្រជាក់កាយាសម្រាប់ភ្ញៀវទេសចរ គយគន់ទេសភាពពពកកកពាសពេញខាងដើមឈើ ប្រៀបបាននឹងគំនូធម្មជាតិរស់រវើក។ ភ្ញៀវទេសចរ ភាគច្រើនចូលចិត្តឡើងភ្នំម្រេចកង្កែប ជាក្រុម និងសម្រាកលើភ្នំម្រេចកង្កែប ដោយបោះតង់ តាមរយៈសេវាកម្មរបស់សហគមន៍ទេសចរណ៍ជនជាតិដើមភាគតិចជង ដែលមានមគ្គុទេសក៏ទេសចរណ៍សម្រាប់នាំផ្លូវ ព្រមទាំងមានអាហារពេលព្រឹក និងកាហ្វេ សម្រាប់ភ្ញៀវទេសចរ។
តំបន់ភ្នំម្រេចកង្កែបស្ថិតនៅជ្រលងអារ៉ែង ក្នុងឃុំជំនាប់ ស្រុកថ្មបាំង ខេត្តកោះកុង។ ភ្ញៀវទេសចរ អាចធ្វើដំណើដោយមធ្យោបាយ ម៉ូតូ ដោយត្រូវចំណាយពេលប្រហែល៥០នាទី និងឡើងភ្នំដោយថ្មើរជើង ត្រូវចំណាយពេលប្រមាណ ២ម៉ោង ដើម្បីឡើងដល់កំពូលភ្នំម្រេចកង្កែប។ ភ្នំម្រេចកង្កែប មានចម្ងាយជិតស្នាក់ការសហគមន៍ជាងគេប្រមាណ១០ គីឡូម៉ែត្រពីស្នាក់ការសហគមន៍អេកូទេសចរណ៍តំបន់ស្ទឹងអារ៉ែង។
ភ្នំម្រេចកង្កែបនៃជ្រលងអារ៉ែង
បន្ទាប់ពីបញ្ចប់វគ្គបណ្តុះបណ្តាលស្តីពីការរៀបចំតំបន់ទេសចរណ៍ផ្សងព្រេង(Jungle Trekking AdventureTourism) នៅសហគមន៍អេកូទេសចរណ៍តំបន់ស្ទឹងអារ៉ែងលោកតុប សុភ័ក អនុរដ្ឋលេខាធិការក្រសួងទេសចរណ៍ បានដឹកនាំក្រុមការងារនាយកដ្ឋានអភិវឌ្ឍផលិតផលទេសចរណ៍ ធ្វើដំណើរទស្សនកិច្ចឈ្វេងយល់តំបន់ទេសចរណ៍ផ្សងព្រេងនៃភ្នំម្រេចកង្កែបនៃជ្រលងអារ៉ែង។
លោកតុប សុភ័ក ឲ្យដឹងថា ក្រុមការងារបានធ្វើដំណើរដោយថ្មើរជើងឡើងភ្នំម្រេចកង្កែបនេះ ដោយមានការរៀបចំ និងឧទ្ទេសនាមដោយលោកទូច សុផានី ប្រធានគម្រោងអេកូទេសចរណ៍ជីផាត និងអារ៉ែងលោកទិត្យ លី ប្រធានសហគមន៍អេកូទេសចរណ៍តំបន់ស្ទឹងអារ៉ែង និងសមាជិកសហគមន៍ដែលជាមគ្គុទេសក៏ និងចុងភៅព្រៃ ។
ភ្នំម្រេចកង្កែបនៃជ្រលងអារ៉ែង
លោកអនុរដ្ឋលេខាធិការក្រសួងទេសចរណ៍បញ្ជាក់ថាភ្នំម្រេចកង្កែប ជាភ្នំមួយដែលភ្ញៀវទេសចរបែបផ្សងព្រេងមិនដែលរំលងពេលទៅកម្សាន្តនៅតំបន់អារ៉ែង ។ ភ្នំនេះជាជួរភ្នំមួយដែលមានទីតាំងស្ថិតនៅក្នុងភូមិសាស្ត្រតំបន់អារ៉ែងក្នុងឃុំជំនាប់ ស្រុកថ្មបាំង ខេត្តកោះកុង និងមានទីតាំងមិនឆ្ងាយប៉ុន្មានពីភូមិជំនាប់ទេ ភ្ញៀវទេសចរអាចធ្វើដំណើរប្រហែល២ទៅ៣ម៉ោងដោយថ្មើរជើង លើផ្លូវប្រមាណជា៦គីឡូម៉ែត្រ និងត្រូវឡើងតាមជម្រៀលភ្នំ ។
ភ្នំម្រេចកង្កែបនៃជ្រលងអារ៉ែង
ភ្ញៀវទេសចរអាចសម្រាកនៅលើភ្នំជាលក្ខណៈបោះតង់ ឬគេងអង្រឹង បរិភោគអាហារជុំវិញភ្នក់ភ្លើងដែលចំអិនដោយចុងភៅព្រៃរបស់សហគមន៍ អង្គុយបណ្តែតអារម្មណ៍ជាមួយធម្មជាតិ គយគន់ថ្ងៃរះជាមួយអ័ព្ទនាពេលព្រឹកព្រលឹម ជាពិសេសទៅទៀតនោះ គឺការងូតទឹកស្ទឹងដ៏ត្រជាក់នៅលើកំពូលភ្នំតែម្តង រួមជាមួយបរិយាកាសរមណីយដែលពិបាកពណ៌នាឲ្យអស់សេចក្តី ។
លោកតុប សុភ័ក ថ្លែងថាកន្លងមក ក្រុមការងារក្រសួងទេសចរណ៍ បានសហការជាមួយមន្ទីរទេសចរណ៍ខេត្តកោះកុង និងសហគមន៍អេកូទេសចរណ៍តំបន់ស្ទឹងអារ៉ែងរៀបចំប្រែក្លាយតំបន់នេះជាតំបន់ទេសចរណ៍ផ្សងព្រេងដ៏ទាក់ទាញសម្រាប់ភ្ញៀវទេសចរដែលស្រលាញ់ការផ្សងព្រេង និងធម្មជាតិ ។ លោកតុប សុភ័ក អំពាវនាវដល់ភ្ញៀវទេសចរជាតិ និងអន្តរជាតិ ទៅកម្សាន្តនៅសហគមន៍អេកូទេសចរណ៍តំបន់ស្ទឹងអារ៉ែង រួមជាមួយការទទួលបានបទពិសោធន៍ ថ្មីៗនៃការឡើងភ្នំម្រេចកង្កែបនេះ ប្រកបដោយភាពរីករាយ ៕
（សរុបដោយ ហេង វុធ្ធី）
（ប្រភពព័ត៌មាន: kohsantepheapdaily និង thmeythmey25.com）
មតិពីមិត្តអ្នកអាន