នាព្រឹកថ្ងៃទី ២៤ មិថុនា នៅទីស្នាក់ការក្រសួងការពារប្រទេស លោកនាយឧត្តមសេនីយ៍ Phan Van Giang រដ្ឋមន្ត្រីក្រសួងការពារប្រទេសវៀតណាមបានទទួលជួបលោកស្រី Robyn Mudie ឯកអគ្គរដ្ឋទូតអូស្ត្រាលីប្រចាំវៀតណាម ក្នុងឱកាសលោកស្រីបញ្ចប់បេសកកម្មការទូតនៅវៀតណាម។
 ថាមពលស្អាតនៅលើកោះ ផានវិញ (Phan Vinh) (ស្រុកកោះ ទ្រឿងសា) |
 សក្តិសមជាកងទ័ពរបស់ប្រជាជនជានិច្ច |
 |
| លោកនាយឧត្តមសេនីយ៍ Phan Van Giang ទទួលជួបលោកស្រីឯកអគ្គរដ្ឋទូត Robyn Mudie |
នៅក្នុងជំនួបនេះ លោកនាយឧត្តមសេនីយ៍ Phan Van Giang បានវាយតំលៃខ្ពស់ចំពោះការរួមវិភាគទានរបស់លោកស្រីឯកអគ្គរដ្ឋទូតក្នុងការជំរុញទំនាក់ទំនងភាពជាដៃគូយុទ្ធសាស្ត្រវៀតណាម - អូស្ត្រាលី ឲ្យកាន់តែអភិវឌ្ឍលើវិស័យជាច្រើន រួមទាំងកិច្ចសហប្រតិបត្តិការការពារជាតិផងដែរ។
លោកនាយឧត្តមសេនីយ៍ Phan Van Giang បានសង្កត់ធ្ងន់ថា ទោះបីជារងផលប៉ះពាល់ដោយជំងឺរាតត្បាត Covid-19 ក៏ដោយក៏ទំនាក់ទំនងកិច្ចសហប្រតិបត្តិការការពារជាតិរវាងប្រទេសទាំងពីរនៅតែអនុវត្តដូចការគ្រោងទុក។ ភាគីទាំងពីរបន្តរក្សាការផ្លាស់ប្ដូរយោបល់តាមរយៈការសន្ទនាតាមទូរស័ព្ទរវាងរដ្ឋមន្ត្រីការពារជាតិទាំងពីរ, កិច្ចសន្ទនាគោលនយោបាយការពារជាតិថ្នាក់អនុរដ្ឋមន្ត្រីក្រសួងការពារជាតិតាមប្រព័ន្ធវីដេអូ។ ជំរុញកិច្ចសហប្រតិបត្តិការលើវិស័យបណ្ដុះបណ្ដាល ការរក្សាសន្តិភាពរបស់អង្គការសហប្រជាជាតិ និងការជំនះផលវិបាកនៃសង្គ្រាម...។
អំពីទិសដៅនៃកិច្ចសហប្រតិបត្តិការនាពេលខាងមុខ ក្រៅពីរក្សាបានប្រសិទ្ធភាពនូវខ្លឹមសារនៃកិច្ចសហប្រតិបត្តិការដែលមានស្រាប់ លោកនាយឧត្តមសេនីយ៍ Phan Van Giang បានឲ្យដឹងថា ក្រសួងការពារជាតិទាំងពីរនឹងបន្តសិក្សាស្រាវជ្រាវនិងពង្រីកកិច្ចសហប្រតិបត្តិការលើវិស័យដែលមានសក្តានុពលដូចជា៖ សន្តិសុខតាមអុីនធឺណិត ពាណិជ្ជកម្មយោធា ការស្រាវជ្រាវការពារជាតិ ជំនួយមនុស្សធម៌-ជួយសង្គ្រោះគ្រោះមហន្តរាយ សន្តិភាព និងសន្តិសុខ...។
រីឯខ្លួនវិញ លោកស្រីឯកអគ្គរដ្ឋទូត Robyn Mudie បានវាយតម្លៃថា កិច្ចសហប្រតិបត្តិការក្នុងការរក្សាសន្តិភាពរបស់អង្គការសហប្រជាជាតិជាចំណុចលេចធ្លោក្នុងទំនាក់ទំនងកិច្ចសហប្រតិបត្តិការការពារជាតិរវាងប្រទេសទាំងពីរ។ នាពេលខាងមុខ លោកស្រីសង្ឃឹមថា ភាគីទាំងពីរនឹងបន្តបង្កើនការជួបប្រាស្រ័យនិងកិច្ចសហប្រតិបត្តិការក្នុងបរិបទដែលស្ថានភាពជំងឺរាតត្បាត Covid-19 ត្រូវបានគ្រប់គ្រង៕
មតិពីមិត្តអ្នកអាន