ចូលឆ្នាំចិន​៣ថ្ងៃ អ្នកដើរកម្សាន្ត​មានជិត១លាននាក់ ភាគច្រើននៅភ្នំពេញ បាត់ដំបង ព្រះសីហនុ កំពត និង​សៀមរាប

កំពត កែប និងតាកែវ នៅតែជាទិសដៅទេសចរណ៍សំខាន់ក្នុងបរិបទកូវីដ-១៩

ព្រះសីហនុ គឺជាខេត្តអាទិភាព ក្នុងការចាក់វ៉ាក់សាំងជូនប្រជាពលរដ្ឋ ក្នុងនោះមានស្ថានអគ្គកុងស៊ុលវៀតណាមប្រចាំនៅខេត្តនេះ

យោងតាមរបាយការណ៍ពីក្រសួងទេសចរណ៍ ថ្ងៃបុណ្យចូលឆ្នាំចិនដំបូង ត្រូវនឹងថ្ងៃទី១កុម្ភៈ ទេសចរដើរលេងទូទាំងប្រទេសមានជាង ៣៣ម៉ឺននាក់។ ថ្ងៃទី២នៃពិធីបុណ្យចូលឆ្នាំចិន មានទេសចរជាង ៣៥ម៉ឺននាក់ និងថ្ងៃទី៣ មានទេសចរដើរកម្សាន្តជាង ៣០ម៉ឺននាក់។

បើតាមលោក តុប សុភ័ក អ្នកនាំពាក្យ និងជារដ្ឋលេខាធិការក្រសួងទេសចរណ៍ ទិន្នន័យភ្ញៀវដើរកម្សាន្តក្នុងពិធីបុណ្យចូលឆ្នាំចិនសម្រាប់ឆ្នាំ២០២២ កើនឡើងជាង ៦ភាគរយ បើធៀបនឹងឆ្នាំ២០២១។ លោក តុប សុភ័ក កត់សម្គាល់ថា ភាគច្រើនភ្ញៀវទេសចរដើរកម្សាន្តនៅតំបន់ទេសចរណ៍វប្បធម៌ និង សមុទ្រ។​

រដ្ឋលេខាធិការក្រសួងទេសចរណ៍រូបនេះ បញ្ជាក់ប្រាប់សារព័ត៌មានThmeyThmey25 តាមបណ្ដាញ តេឡេក្រាមដូច្នេះ៖ « ទេសចរទៅលេងរាជធានីភ្នំពេញ និងបាត់ដំបងច្រើន។ ជាមួយគ្នានោះខេត្តសៀមរាបតំបន់ប្រាសាទ​មានទេសចរទៅលេងច្រើន។ ដោយឡែកខេត្តជាប់តំបន់ឆ្នេរដូចជាកែប កំពត ព្រះសីហនុ មានទេសចរទៅកម្សាន្តច្រើន »។

ចាប់ពីថ្ងៃទី១ដល់ថ្ងៃទី៣កុម្ភៈ រាជធានីភ្នំពេញ មានទេសចរដើរកម្សាន្តចំនួន ២៥៨ ០៦៩នាក់, ខេត្តបាត់ដំបងមានទេសចរចំនួន ១៩៣ ៥៦៧នាក់, ខេត្តព្រះសីហនុមានទេសចរ ៩៧ ៥៤២នាក់, ខេត្តកំពតមានទេសចរ ៦៦ ៥៣៤នាក់ ខណៈខេត្តសៀមរាបមានទេសចរ ៥៨ ៩៥៣នាក់។ នេះបើតាមរបាយការណ៍ភ្ញៀវទេសចរក្នុងពិធីបុណ្យចូលឆ្នាំចិន។

ដោយឡែកខេត្តនៅតំបន់ឦសាន ក៏មានទេសចរទៅកម្សាន្តច្រើនដែរ។ ខេត្តមណ្ឌលគិរីមានទេសចរ ២២ ៨៩៤នាក់, ខេត្តរតនគិរីមានទេសចរចំនួន ១៣ ៥៥៩នាក់, ខេត្តក្រចេះមានទេសចរ ១១ ០០៣ និង ខេត្តស្ទឹងត្រែងទទួលបានទេសចរចំនួន ៦ ២៦០នាក់។

គួរបញ្ជាក់ផងដែរថា កាលពីចុងសប្តាហ៍ទី៤នៃខែមករា ទេសចរដើរលេងទូទាំងប្រទេសមាន ២១៤ ៦៣៣នាក់ ក្នុងនោះទេសចរបរទេសផ្ទៃក្នុង ១១ ៩២៩២នាក់។ ជាមួយគ្នានោះខេត្តព្រះសីហនុ រាជធានីភ្នំពេញ ពោធិ៍សាត់ បាត់ដំបង និងសៀមរាប មានទេសចរដើរកម្សាន្តច្រើនជាងគេ៕

ហេង វុធ្ធី

Thmeythmey/cambodianess