នៅថ្ងៃទី ២៤ ខែវិច្ឆិកា កិច្ចសន្ទនាស្តីពីគោលនយោបាយការពារជាតិវៀតណាម - សហរដ្ឋអាមេរិកឆ្នាំ ២០២០ បានធ្វើឡើងតាមរយៈប្រព័ន្ធវីដេអូ។ លោកឧត្តមសេនីយ៍ឯក Hoang Xuan Chien អនុរដ្ឋមន្រ្តីក្រសួងការពារប្រទេសវៀតណាម និងលោក David Helvey ជំនួយការរដ្ឋមន្រ្តីក្រសួងការពារជាតិសហរដ្ឋអាមេរិកទទួលបន្ទុកបញ្ហាសន្តិសុខក្នុងតំបន់ឥណ្ឌូ - ប៉ាស៊ីហ្វិក បានអញ្ជើញជាសហអធិបតីក្នុងកិច្ចសន្ទានានេះ។
លោកឧត្តមសេនីយ៍ឯក Hoang Xuan Chien ថ្លែងក្នុងកិច្ចសន្ទនា
នៅឯកិច្ចសន្ទនានេះ លោកឧត្តមសេនីយ៍ឯក Hoang Xuan Chien បានវាយតម្លៃខ្ពស់ចំពោះកិច្ចខិតខំប្រឹងប្រែង និងលទ្ធផលនៃកិច្ចសហប្រតិបត្ដិការដែលភាគីទាំងពីរសម្រេចបានក្នុងការជំនះនូវផលវិបាកក្រោយសង្គ្រាម ជាពិសេសការអនុវត្តគម្រោងនៃការកម្ចាត់សារជាតិគីមី Dioxin នៅអាកាសយានដ្ឋាន Bien Hoa វៀតណាម និងគម្រោងជួយគាំទ្រជនរងគ្រោះដែលរងផលប៉ះពាល់ដោយសារជាតិគីមី Dioxin និងជំនះផលវិបាកដោយសារគ្រាប់បែក និងគ្រាប់មីន និងការស្វែងរកអដ្ឋិធាតុយោធិនដែលបាត់ខ្លួនក្រោយសង្គ្រាម។ ភាគីទាំងពីរសហការគ្នាប្រកបដោយប្រសិទ្ធភាពក្នុងការជួយវៀតណាមក្នុងដំណើរការបំពេញបេសកកម្មរក្សាសន្តិភាពនៃអង្គការសហប្រជាជាតិ និងលើកកម្ពស់លទ្ធភាពសម្រាប់កងឆ្មាំសមុទ្រវៀតណាម។
គណៈប្រតិភូចូលរួមកិច្ចសន្ទនាស្តីពីគោលនយោបាយការពារជាតិវៀតណាម - សហរដ្ឋអាមេរិក
លោក David Helvey បានបញ្ជាក់ថា សហរដ្ឋអាមេរិកយកចិត្តទុកដាក់យ៉ាងខ្លាំងចំពោះទំនាក់ទំនងភាពជាដៃគូគ្រប់ជ្រុងជ្រោយជាមួយវៀតណាម។ លោកមានបំណងចង់ឲ្យប្រទេសវៀតណាមកាន់តែខ្លាំងមាំមួន និងដើរតួនាទីកាន់តែសំខាន់នៅក្នុងតំបន់។ សហរដ្ឋអាមេរិកប្តេជ្ញាបន្តសហប្រតិបត្តិការជាមួយវៀតណាមក្នុងការជំរុញទំនាក់ទំនងការពារជាតិទ្វេភាគី ដូចជាសន្តិសុខតាមសមុទ្រ បេសកកម្មរក្សាសន្ដិភាពនៃអង្គការសហប្រជាជាតិ ជំនួយមនុស្សធម៌ និងគ្រោះមហន្តរាយធម្មជាតិ។ សហរដ្ឋអាមេរិកបន្តយកចិត្តទុកដាក់យ៉ាងខ្លាំងចំពោះកិច្ចសហប្រតិបត្តិការជាមួយប្រទេសវៀតណាមក្នុងការជំនះនូវផលវិបាកនៃសង្គ្រាមនិងកិច្ចសហប្រតិបត្តិការការពារជាតិទ្វេភាគី។ ព្រមទាំងលោកសម្តែងការដឹងគុណចំពោះកិច្ចខិតខំប្រឹងប្រែងរបស់វៀតណាមក្នុងការជួយសហរដ្ឋអាមេរិកក្នុងការស្វែងរកយោធិនដែលបាត់ខ្លួននៅសម័យសង្គ្រាម និងបញ្ជាក់ពីការសន្យាថានឹងជំរុញការអនុវត្ដគម្រោងចសហប្រតិបត្តិការលើវិស័យដែលភាគីទាំងពីរបានឯកភាពគ្នា។
ទិដ្ឋភាពនៃកិច្ចសន្ទនា
លោក David Helvey បានអបអរសាទរចំពោះប្រទេសវៀតណាមដែលទទួលបានជោគជ័យក្នុងតួនាទីជាប្រធានអាស៊ានឆ្នាំ ២០២០ និងជាសមាជិកមិនអចិន្រ្តៃយ៍នៃក្រុមប្រឹក្សាសន្តិសុខអង្គការសហប្រជាជាតិទោះបីជួបបញ្ហាប្រឈមជាច្រើនក៏ដោយ./.
(ប្រភពព័ត៌មាន: kh.qdnd.vn,)
មតិពីមិត្តអ្នកអាន