មហាសន្និបាតតំណាងទូទាំងប្រទេសលើកទី ៦ នៃសម្ព័ន្ធសមាគមអង្គការមិត្តភាពវៀតណាម បានប្រារព្ធយ៉ាងមហោឡារិកនៅទីក្រុងហាណូយ

ឯកអគ្គរដ្ឋទូត លោកស្រី Nguyen Phuong Nga ប្រធានសម្ព័នសមាគមអង្គការមិត្តភាពវៀតណាម អញ្ជើញថ្លែងក្នុងមហាសន្និបាត (រូបថតៈ Thoidai)

អញ្ជើញថ្លែងសុន្ទរកថាបើក ឯកអគ្គរដ្ឋទូត លោកស្រី Nguyen Phuong Nga ប្រធានសម្ព័នសមាគមអង្គការមិត្តភាពវៀតណាម បានសង្កត់ធ្ងន់ថា មហាសន្និបាតលើកទី ៦ នេះ ត្រូវបានរៀបចំឡើងក្នុងបរិបទនៃពិភពលោកនិងតំបន់កំពុងមានបម្រែបម្រួលយ៉ាងស្មុគស្មាញណាស់។ ម្យ៉ាងវិញទៀត វៀតណាមកំពុងឈានចូលដំណាក់កាលអភិវឌ្ឍន៍ថ្មីជាមួយកម្លាំងចលករនិងឱកាសថ្មី។ ថ្វីត្បិតដូច្នេះក៏ដោយ បរិបទនៃស្ថានភាពថ្មី​ ក៏បានដាក់ចេញនូវតម្រូវការថ្មីសម្រាប់ការងារកិច្ចការបរទេសរបស់ប្រជាជននិងសម្ព័ន្ធសមាគមអង្គការមិត្តភាពវៀតណាម ដែលជាកម្លាំងស្នូលនៃកិច្ចការបរទេសរបស់ប្រជាជនផងដែរ។

លោក Tran Quoc Vuong អចិន្រ្តៃយ៍គណៈលេខាមជ្ឈឹមបក្សកុម្មុយនិស្តវៀតណាម បានអញ្ជើញប្រគល់មេដាយការងារថ្នាក់ទីមួយដល់សម្ព័ន្ធសមាគមអង្គការមិត្តភាពវៀតណាម (រូបថតៈ Thoidai)

ជាមួយនឹងការរំពឹងទុកអំពីអាណត្តិថ្មីមួយ ជាមួយនឹងភាពរឹងមាំថ្មី ឆ្ពោះទៅរកខួបលើកទី ៧០ នៃទិវាប្រពៃណីនៃសម្ព័ន្ធអង្គការមិត្តភាព (ថ្ងៃ១៧ វិច្ឆិកា ១៩៥០ - ថ្ងៃទី ១៧ ខែវិច្ឆិកា ២០២០) ក្នុងនាមប្រធានគណៈអធិបតី និងជាប្រធានសម្ព័ន្ធសមាគមអង្គការមិត្តភាពវៀតណាម លោកស្រី Nguyen Phuong Nga បានអំពាវនាវនិងស្នើឱ្យប្រតិភូទាំងអស់លើកកម្ពស់ស្មារតីទទួលខុសត្រូវ រួមចំណែករបស់ខ្លួនចំពោះទិសដៅនៃប្រតិបត្តិការនិងបង្កើតដំណោះស្រាយជាក់ស្តែង ដើម្បីឱ្យសហភាពអាចបន្តប្រពៃណីសក្តិសមនៃកិច្ចការការបរទេសរបស់ប្រជាជនវៀតណាម។ លើសពីនេះទៅទៀត ចូលរួមចំណែកជាវិជ្ជមានដល់ការសម្រេចគោលបំណងរួមនៃកិច្ចការបរទេសដើម្បីថែរក្សាបរិយាកាសប្រកបដោយសន្តិភាពនិងស្ថេរភាព ដើម្បីកៀរគរការគាំទ្រពីប្រភពធនធានអន្តរជាតិ ជាអតិបរមាក្នុងការបម្រើដល់ការកសាងនិងការពារជាតិ ក៏ដូចជា បង្កើនឋានៈអន្តរជាតិរបស់វៀតណាមនិងរួមចំណែកដល់ចលនាប្រជាជនពិភពលោក ដើម្បីសន្តិភាព យុត្តិធម៌ប្រជាធិបតេយ្យនិងវឌ្ឍនភាពសង្គម។

គណៈអធិបតីនៃមហាសន្និបាត (រូបថតៈ Thoidai)

របាយការណ៍នយោបាយរបស់គណៈអធិបតីនៃសម្ព័ន្ធសមាគមអង្គការមិត្តភាពវៀតណាម បានដាក់ជូនអង្គមហាសន្និ បាត លើកទី ៦ បង្ហាញដោយអនុប្រធានសម្ព័ន្ធអង្គការមិត្តភាពវៀតណាមលោក Bach Ngoc Chien បានបញ្ជាក់ថា៖ ដោយមានបាវចនាថា “ម្ចាស់ការ មានភាពបត់បែន ច្នៃប្រឌិតនិងប្រសិទ្ធភាព” សហភាពមិត្តភាពនិងអង្គការជាសមាជិកនានា បានខិតខំប្រឹងប្រែង ក្នុងការអនុវត្តន៍នូវសកម្មភាពយ៉ាងទូលំទូលាយ ដើម្បីជំរុញកិច្ចសហប្រតិបត្តិការនិងមិត្តភាព ជាមួយដៃគូបរទេស ជាពិសេស បង្កើតទំនាក់ទំនងជាមួយដៃគូថ្មីៗជាច្រើនថែមទៀត៕

（ដោយ ស្រីព្រេជ）

（ដោយ ស្រីព្រេជ）