មន្ត្រីព័ត៌មានកម្ពុជា ដែលបានទទួលការបណ្តុះបណ្តាលពីរបៀបសរសេរព័ត៌មាន បែប ស៊ើបអង្កេតនៅទីក្រុងហូជីមិញ ប្រទេសវៀតណាម ដែលមានរយៈពេល៥ថ្ងៃនេះ បានអះអាងថា ពួកគេពិតជាទទួលបានចំណេះដឹងថ្មីៗពីរបៀបសរសេរព័ត៌មានស៊ើប អង្កេតពីអ្នកជំនាញការវៀតណាមសម្រាប់ យកទៅអនុវត្តន៍នៅអង្គភាពរបស់ខ្លួនវិញ។
លោក អ៊ុង ភក្តី មន្ត្រីមន្ទីរព័ត៌មានខេត្តស្វាយរៀង ផ្នែកការិយាល័យទូរទស្សន៍បានលើកឡើងក្នុងថ្ងៃបិទវគ្គបណ្តុះបណ្តាលនេះថា លោកទទួលបានចំណេះដឹងច្រើន នូវវិធីសាស្ត្រថ្មីៗពីរបៀបស៊ើបអង្កេតព័ត៌មាននីមួយៗ ដែលលោកគ្រូ អ្នកគ្រូបានចែករំលែកពីស្ថានភាពជាក់ស្តែង ដែលបានជួបប្រទះនិងដកពិសោធន៍ផ្ទាល់ខ្លួនកន្លងមកជាពិសេសវិធីដោះស្រាយនិងវិធីការពារខ្លួន។
លោកបានបញ្ជាក់ថា «សម្រាប់ខ្ញុំផ្ទាល់ធ្លាប់មានបទពិសោធន៍យកព័ត៌មានស្រាប់ផង បន្ទាប់ពីវគ្គបណ្តុះបណ្តាលនៅទីក្រុងហូជីមិញ ទទួលបានចំណេះដឹងបន្ថែម សង្ឃឹមថា អាចអនុវត្តន៍បាន ធ្វើព័ត៌មានស៊ើបអង្កេតបាន៧០ទៅ៨០ភាគរយ»។
កញ្ញា សម សារឿន អនុប្រធានការិយាល័យព័ត៌មាននៃ វិទ្យុFM៩៦នៃក្រសួងព័ត៌មាន ក៏បានលើកឡើងថា ប្រធានបទនៃវគ្គបណ្តុះបណ្តាល បែបព័ត៌មានស៊ើបអង្កេតនេះប្លែក ព្រោះថាកន្លងមកកញ្ញាធ្លាប់ចូលរួមបណ្តុះបណ្តាលវគ្គផ្សេងៗដែរ ប៉ុន្តែមិនមានប្រធានបទបែបព័ត៌មានស៊ើបងអង្កេតទេ។ម្យ៉ាងទៀតនៅខ្មែរកញ្ញាក៏មិនសូវបានឃើញមានការបណ្តុះបណ្តាលបែបនេះដែរ ។
កញ្ញាបានតាំងចិត្តថា «ខ្ញុំនឹងយកនូវរាល់ចំណុចដែលលោកគ្រូអ្នកគ្រូខាងវៀតណាម បានចែករម្លែកយើង យកធ្វើជាគោលមួយសម្រាប់ធ្វើព័ត៌មានឱ្យកាន់តែល្អនៅ ក្នុងអង្គភាពរបស់យើង»។
ឯកឧត្តម ជ្រីម ឆេងលីម ទីប្រឹក្សា និងជាអគ្គនាយករងនៃអគ្គនាយកដ្ឋានរដ្ឋបាល និងហិរញ្ញវត្ថុនៃក្រសួងព័ត៌មានបានមានប្រសាសន៍ក្នុងពិធីបិទវគ្គនៅថ្ងៃទី២៣ ខែសីហា ឆ្នាំ២០១៩នេះដោយបង្ហាញក្តីសង្ឃឹមជឿជាក់យ៉ាងមុតមាំថា នៅពេល ត្រលប់ទៅវិញសិក្ខាកាមទាំងអស់នឹងយកចំណេះដឹងបទពិសោធន៍ដែលបានសិក្សានៅ ទីនេះទៅបម្រើអង្គភាព និងជួយចែករំលែកជាមួយមន្ត្រីក្នុងអង្គភាពខ្លួនឱ្យកាន់តែមានសមត្ថភាពប្រសើរឡើងបន្ថែមទៀត បន្ទាប់ពីបានដឹង បានយល់បន្ថែមអំពីការងារចុះស្រាវជ្រាវ ស៊ើបអង្កេតករណីកើតឡើងដើម្បីប្រមូលបានព័ត៌មានពិត ការសរសេរប្រកបដោយវិជ្ជាជីវៈ ដែលជាវិធីសាស្ត្រដ៏ល្អជួយឱ្យមិត្តរួមអាជីពអ្នកកាសែតអាចរក្សាបាននូវ សុខសុវត្ថិភាព ក្នុងបេសកកម្មការងារ រក្សាបាននូវទំនុកចិត្តជាមួយមិត្តអ្នកអាន រក្សាបាននូវសុវត្ថិភាព ជូនប្រភពព័ត៌មានទាំងភស្តុតាង និងសាក្សី ដែលជាមាគ៌ាដ៏ល្អនាំឱ្យការងាររបស់អ្នក សារព័ត៌មានទទួលបានជោគជ័យ ហើយនាំមកនូវសុក្រឹតភាពក្នុងវិជ្ជាជីវៈម្យ៉ាងវិញទៀតជៀសវាងបាននូវបញ្ហាប្រឈមក្នុងផ្លូវច្បាប់។
លោក Dang Khac Loi អគ្គនាយករង នៃអគ្គនាយកដ្ឋានសារព័ត៌មាន ក្រសួងព័ត៌មាននិងទូរគមនាគម នៃសាធារណរដ្ឋសង្គមនិយមវៀតណាមបាន មានប្រសាសន៍ថា ជោគជ័យនៃវគ្គបណ្តុះបណ្តាលនេះគឺជាចំណងនៃកិច្ចសហ ប្រត្តិបត្តិការមិត្តភាពរវាងប្រទេសទាំងពីរកម្ពុជា-វៀតណាមដែលបានចុះអនុស្សារ ណៈ នៃការយោគយល់គ្នារវាងក្រសួងព័ត៌មានកម្ពុជានិងក្រសួងព័ត៌មាននិងទូរគមនាគម នៃសាធារណរដ្ឋសង្គមនិយមវៀតណាមសម្រាប់ឆ្នាំ២០១៦ដល់២០២០។
តាមរយៈ អនុស្សរណៈនៃការយោគយល់គ្នានេះវៀតណាមនឹងផ្តល់ ការបណ្តុះបណ្តាលមន្ត្រីព័ត៌មានកម្ពុជា ១ ឆ្នាំ ២ដងដោយម្តងចំនួន៣០នាក់៕
（ប្រភព៖ akp.gov.kh）
មតិពីមិត្តអ្នកអាន