ពណ៌សម្បុរវប្បធម៌វៀតណាមនៅចំកណ្តាលបេះដូងអូស្ត្រាលី

ពណ៌សម្បុរវប្បធម៌វៀតណាមនៅចំកណ្តាលបេះដូងអូស្ត្រាលី

ទិវាវប្បធម៌វៀតណាមឆ្នាំ ២០២៦ ត្រូវបានស្ថានអគ្គកុងស៊ុល វៀតណាម ប្រចាំនៅ Perth សហការជាមួយបណ្តាញអ្នកមានទេពកោសល្យ វៀតណាម - អូស្ត្រាលី (AVTN) និងអង្គការតភ្ជាប់ពាណិជ្ជកម្មសកល (Global Trade Connection) រៀបចំឡើងនៅកណ្តាលទីក្រុង Perth រដ្ឋ Western Australia។

ព្រឹត្តិការណ៍នេះមានការចូលរួមពីសំណាក់អភិបាលក្រុង Perth លោក Bruce Reynolds តំណាងរដ្ឋាភិបាលរដ្ឋ គណៈប្រតិភូតំណាងកុងស៊ុល បណ្តាសមាគម អង្គការ អាណិកជនយ៉ាងច្រើនកុះករ ប្រជាពលរដ្ឋក្នុងតំបន់ និងភ្ញៀវទេសចរអន្តរជាតិ។

ថ្លែងនៅក្នុងពិធីបើក អគ្គកុងស៊ុល វៀតណាម ប្រចាំនៅ Perth លោក Pham Hai Anh បានសង្កត់ធ្ងន់លើតួនាទីនៃវប្បធម៌ក្នុងការថែរក្សាអត្តសញ្ញាណជាតិ ពង្រឹងសាមគ្គីភាព និងការតភ្ជាប់សហគមន៍ជនជាតិវៀតណាមនៅក្រៅប្រទេស។

ដោយរំលឹកឡើងវិញនូវពាក្យទូន្មានរបស់លោកប្រធាន Ho Chi Minh «វប្បធម៌បំភ្លឺផ្លូវឱ្យប្រជាជាតិដើរ» លោកអគ្គកុងស៊ុលបានអះអាងថា វប្បធម៌គឺជាគ្រឹះស្មារតី ជាកម្លាំងផ្ទៃក្នុងនៃប្រជាជាតិ ព្រមទាំងជាស្ពានតភ្ជាប់នាំយករូបភាពប្រទេសជាតិ និងប្រជាជន វៀតណាម ឱ្យកាន់តែកៀកជិតនឹងមិត្តភក្តិអន្តរជាតិ។

ទិវាបុណ្យនេះត្រូវបានរៀបចំឡើងក្នុងឱកាសរំលឹកខួបលើកទី ៨០ នៃសន្និសីទវប្បធម៌ទូទាំងប្រទេសលើកទីមួយ (ថ្ងៃទី ២៤ ខែវិច្ឆិកា ឆ្នាំ ១៩៤៦) និងឆ្ពោះទៅកាន់ទិវាវប្បធម៌វៀតណាមលើកដំបូង (ថ្ងៃទី ២៤ ខែវិច្ឆិកា ឆ្នាំ ២០២៦)។

នៅក្នុងព្រឹត្តិការណ៍នេះ លោកអគ្គកុងស៊ុល Pham Hai Anh បានលើកឡើងនូវទិសដៅចំនួនបីក្នុងការលើកកម្ពស់តម្លៃវប្បធម៌ជាតិ។ ក្នុងនោះ សហគមន៍ជនជាតិវៀតណាមចាំបាច់ត្រូវបន្តថែរក្សាភាសាវៀតណាម ប្រពៃណីគ្រួសារ និងតម្លៃល្អប្រសើរនានា ចូលរួមយ៉ាងសកម្មក្នុងការឧទ្ទេសនាមវប្បធម៌ វៀតណាម ទៅកាន់មិត្តភក្តិអន្តរជាតិ ព្រមទាំងលើកកម្ពស់ការច្នៃប្រឌិត រួមផ្សំគ្នាយ៉ាងចុះសម្រុងរវាងកត្តាប្រពៃណី និងសម័យទំនើប។

លោកក៏បានអះអាងផងដែរថា សហគមន៍ជនជាតិវៀតណាមនៅក្រៅប្រទេសគឺជាផ្នែកមួយដែលមិនអាចកាត់ផ្តាច់បាននៃប្រជាជាតិ ដោយដើរតួនាទីជា «ស្ពានមានជីវិត» តភ្ជាប់ វៀតណាម ជាមួយពិភពលោក។

ចំណុចលេចធ្លោនៃកម្មវិធី គឺការសម្តែងសិល្បៈនានាដោយសិល្បករ សិល្បការិនី និងតារាចម្រៀងមកពី វៀតណាម និងមូលដ្ឋានជាច្រើននៅ អូស្ត្រាលី ដែលបាននាំមកនូវលំហផ្លាស់ប្តូរវប្បធម៌ចម្រុះពណ៌នៅចំកណ្តាលបេះដូងទីក្រុង Perth។

ដោយចាប់ផ្តើមជាមួយបទចម្រៀង Bonjour Vietnam ដែលត្រូវបានបកស្រាយជាបីភាសា គឺភាសាវៀតណាម អង់គ្លេស និងបារាំង កម្មវិធីបាននាំទស្សនិកជនទៅស្វែងយល់ពីពណ៌សម្បុរវប្បធម៌ពិសេសដោយឡែករបស់ វៀតណាម តាមរយៈតន្ត្រី សិល្បៈសម្តែង និងម៉ូដសម្លៀកបំពាក់។

បណ្តាទំនុកបទចម្រៀងប្រជាប្រិយដែលធ្លាប់ស្គាល់ដូចជា Ly ngua o និង Beo dat may troi ត្រូវបានឧទ្ទេសនាម រួមជាមួយសូររសំឡេងនៃឧបករណ៍ភ្លេង T'rung ដែលនាំមកនូវមនោសញ្ចេតនានៃព្រៃភ្នំ Tay Nguyen និងសិល្បៈច្រៀង Chau van ដ៏សម្បូរទៅដោយតម្លៃជំនឿប្រពៃណី។

ទន្ទឹមនឹងនោះ ការបង្ហាញម៉ូដសម្លៀកបំពាក់ដែលបំផុសគំនិតចេញពីសម្លៀកបំពាក់ប្រពៃណីរបស់បណ្តាជនជាតិវៀតណាម បានរួមចំណែកឧទ្ទេសនាមភាពស្រស់ស្អាតនៃវប្បធម៌ប្រពៃណី តាមរយៈការច្នៃម៉ូដដែលបង្កប់នូវដង្ហើមសម័យទំនើប។

លំហនៃទិវាបុណ្យកាន់តែមានភាពអ៊ូអរ និងរស់រវើកជាមួយនឹងការសម្តែងចម្រៀង និងរបាំសម័យទំនើបនានា ដូចជា Ngan uoc mo Viet Nam, Made in Vietnam, Viet Nam huy hoang, Viet Nam toi និង Di giua troi ruc ro។

ការរួមផ្សំរវាងសិល្បៈប្រពៃណី និងតន្ត្រីសម័យទំនើប បាននាំមកជូនសាធារណជនអូស្ត្រាលីនូវទស្សនវិស័យចម្រុះអំពីវប្បធម៌ វៀតណាម ព្រមទាំងបង្កើតឱកាសដើម្បីឱ្យសិល្បករគ្រប់ជំនាន់បានចូលរួមរួមគ្នាក្នុងការឧទ្ទេសនាមអត្តសញ្ញាណជាតិ។

គួរឱ្យកត់សម្គាល់ ទិវាបុណ្យនេះទទួលបានការរួមចំណែកយ៉ាងសកម្មពីសំណាក់យុវជន និស្សិតអន្តរជាតិ និងអ្នកដើមកំណើតវៀតណាមដែលធំដឹងក្តីនៅ អូស្ត្រាលី។

មិនត្រឹមតែចូលរួមក្នុងនាមជាទស្សនិកជនប៉ុណ្ណោះទេ យុវជនជាច្រើនរូបបានចូលរួមរៀបចំដោយផ្ទាល់ សម្របសម្រួលកម្លាំងអ្នកស្ម័គ្រចិត្ត និងសម្តែងសិល្បៈ។ សកម្មភាពទាំងនេះបានបង្កើតលក្ខខណ្ឌឱ្យយុវជនជំនាន់ក្រោយបានស្វែងយល់ បង្ហាញពីមនោសញ្ចេតនាចំពោះមាតុភូមិ និងឧទ្ទេសនាមវប្បធម៌ វៀតណាម តាមរយៈទម្រង់ដ៏ស្និទ្ធស្នាល និងប្រកបដោយភាពច្នៃប្រឌិត។

ការចូលរួមរបស់សហគមន៍ជនជាតិវៀតណាម ជាពិសេសគឺយុវជនជំនាន់ក្រោយ បានរួមចំណែកពង្រឹងចំណងសាមគ្គីភាពរវាងបណ្តាជំនាន់អាណិកជន ព្រមទាំងផ្សព្វផ្សាយនូវតម្លៃវប្បធម៌ប្រពៃណីនៅក្នុងបរិស្ថានពហុវប្បធម៌នៅ អូស្ត្រាលី។

ទន្ទឹមនឹងកម្មវិធីសិល្បៈ សកម្មភាពឧទ្ទេសនាមម្ហូបអាហារប្រពៃណីវៀតណាមក៏បានទាក់ទាញការចាប់អារម្មណ៍ពីសំណាក់ប្រជាជនក្នុងតំបន់ និងភ្ញៀវទេសចរអន្តរជាតិផងដែរ។

ជាមួយនឹងអ្នកចូលរួមជិត ៤.០០០ នាក់ ទិវាវប្បធម៌វៀតណាមឆ្នាំ ២០២៦ នៅ Perth មិនត្រឹមតែជាឱកាសជួបជុំគ្នារបស់សហគមន៍ជនជាតិវៀតណាមប៉ុណ្ណោះទេ ប៉ុន្តែថែមទាំងក្លាយជាលំហផ្លាស់ប្តូររវាងអាណិកជនជាមួយប្រជាជនអូស្ត្រាលី និងមិត្តភក្តិអន្តរជាតិ។

តាមរយៈសកម្មភាពវប្បធម៌ សិល្បៈ និងការផ្លាស់ប្តូរសហគមន៍ ព្រឹត្តិការណ៍នេះបានរួមចំណែកបង្កើនការយល់ដឹងពីគ្នា ចងភ្ជាប់ប្រជាជននៃប្រទេសទាំងពីរ ព្រមទាំងផ្សព្វផ្សាយរូបភាពប្រទេស វៀតណាម មួយដ៏សម្បូរទៅដោយអត្តសញ្ញាណ រស់រវើក និងរួសរាយរាក់ទាក់។

ទិវាបុណ្យនេះក៏បានបង្ហាញឱ្យឃើញពីតួនាទីរបស់សហគមន៍ជនជាតិវៀតណាមនៅ អូស្ត្រាលី ក្នុងការថែរក្សាវប្បធម៌ជាតិ កសាងស្ពានផ្លាស់ប្តូររវាងប្រជាជន និងប្រជាជន ដែលរួមចំណែកពង្រឹងគ្រឹះសង្គមសម្រាប់ទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ វៀតណាម - អូស្ត្រាលី៕

ឯកអគ្គរដ្ឋទូតអូស្ត្រាលី៖ វៀតណាមកំពុងអះអាងនូវតួនាទីជាប្រទេសមធ្យមមួយប្រកបដោយភាពរស់រវើក ជំរុញសណ្តាប់ធ្នាប់អន្តរជាតិព្រមទាំងកំណត់រូបរាងបណ្តាស្ថាប័ន យុគសម័យ - ឆ្លើយតបការសម្ភាសន៍របស់កាសែតពិភពលោកនិងវៀតណាមស្តីពីការដែលវៀតណាមជាលើកដំបូងបង្អស់មានចៅក្រមតុលាការច្បាប់សមុទ្រអន្តរជាតិ (ITLOS) ឯកអគ្គរដ្ឋទូតអូស្ត្រាលីប្រចាំនៅវៀតណាម Gillian Bird បានអះអាងថា នេះគឺមិនត្រឹមតែជាចំណុចរបត់ប្រវត្តិសាស្ត្រមួយចំពោះវៀតណាមនោះទេ គឺថែមទាំងជាការទទួលស្គាល់ចំពោះសមត្ថភាពជំនាញឯកទេសដ៏ឆ្នើមរបស់លោកស្រី ក៏ដូចជាឋានៈអន្តរជាតិកាន់តែត្រូវបានលើកកម្ពស់ជាលំដាប់របស់វៀតណាមទៀតផង។

ដំណើរទស្សនកិច្ចទៅកាន់ប្រទេសអូស្ត្រាលីរបស់អគ្គលេខាធិការ និងជាប្រធានរដ្ឋ To Lam៖ ការរំពឹងទុកក្នុងការជំរុញកិច្ចសហប្រតិបត្តិការវិនិយោគ បច្ចេកវិទ្យា និងធនធានមនុស្ស យុគសម័យ - ពាណិជ្ជកម្ម - ការវិនិយោគ បច្ចេកវិទ្យាយុទ្ធសាស្ត្រ បរិវត្តកម្មបៃតង និងការអភិវឌ្ឍន៍ប្រភពធនធានមនុស្ស គឺជាបណ្តាវិស័យដែលត្រូវបានអ្នកប្រាជ្ញ និងអ្នកជំនាញជាច្រើនរំពឹងថានឹងមានបន្ថែមនូវកម្លាំងចលករចេញពីដំណើរទស្សនកិច្ចផ្លូវរដ្ឋទៅកាន់ប្រទេសអូស្ត្រាលី របស់អគ្គលេខាធិការ និងជាប្រធានរដ្ឋ To Lam។ បណ្តាមតិបានចាត់ទុកថា គ្រឹះស្ថានដៃគូយុទ្ធសាស្ត្រគ្រប់ជ្រុងជ្រោយ រួមជាមួយបណ្តាប្រៀបខ្លាំងបំពេញបន្ថែមឱ្យគ្នាទៅវិញទៅមករវាងប្រទេសទាំងពីរ កំពុងបើកចេញនូវលក្ខខណ្ឌដើម្បីជំរុញបណ្តាកម្មវិធី និងលទ្ធផលកិច្ចសហប្រតិបត្តិការជាក់ស្តែងជាងមុន។

សុវណ្ណា