ទីក្រុង Ho Chi Minh ចែករំលែកបទពិសោធន៍អភិបាលកិច្ច និងការបំប្លែងឌីជីថល ជាមួយថ្នាក់ដឹកនាំវ័យក្មេង វៀតណាម - ឡាវ - កម្ពុជា

គណៈប្រតិភូថ្នាក់ដឹកនាំគណៈកម្មាធិការបក្ស និងរដ្ឋអំណាចទីក្រុង Ho Chi Minh ដឹកនាំដោយលោកស្រី Van Thi Bach Tuyet អនុលេខាគណៈកម្មាធិការបក្សទីក្រុង Ho Chi Minh បានជួបពិភាក្សាការងារជាមួយគណៈប្រតិភូថ្នាក់ដឹកនាំវ័យក្មេងនៃគណបក្សទាំងបី វៀតណាម - ឡាវ - កម្ពុជា ដែលកំពុងស្ថិតក្នុងដំណើរទស្សនកិច្ច និងចុះស្វែងយល់ជាក់ស្តែងនៅទីក្រុង។

គណៈប្រតិភូថ្នាក់ដឹកនាំវ័យក្មេងនៃបក្សកុម្មុយនីស្តវៀតណាម ដឹកនាំដោយលោក Nguyen Minh Triet លេខាប្រចាំការនៃមជ្ឈិមសម្ព័ន្ធយុវជនកុម្មុយនីស្ត Ho Chi Minh។

ទិដ្ឋភាពនៃជំនួបពិភាក្សាការងារ។

គណៈប្រតិភូថ្នាក់ដឹកនាំវ័យក្មេងនៃគណបក្សប្រជាជនបដិវត្តន៍ឡាវ ដឹកនាំដោយលោក Bounthavy Sorsoukanh អនុលេខាគណៈកម្មាធិការបក្សខេត្ត Phongsaly; គណៈប្រតិភូថ្នាក់ដឹកនាំវ័យក្មេងនៃគណបក្សប្រជាជនកម្ពុជា ដឹកនាំដោយលោក ឃុត ចាន់ដារ៉ា អគ្គលេខាធិការរងនៃគណៈចាត់តាំងមហាជន សមាជិកអចិន្ត្រៃយ៍នៃគណៈយុវជនមជ្ឈិមគណបក្សប្រជាជនកម្ពុជា និងជាតំណាងរាស្ត្រ។

សាស្ត្រាចារ្យរង បណ្ឌិត Nguyen Manh Hung នាយករងនៃបណ្ឌិត្យសភានយោបាយជាតិ Ho Chi Minh អនុប្រធានក្រុមប្រឹក្សាទ្រឹស្តីមជ្ឈិម ព្រមទាំងតំណាងស្ថាប័នមជ្ឈិមមួយចំនួន បានចូលរួមក្នុងជំនួបពិភាក្សាការងារនេះ។

បង្កើនការតភ្ជាប់រវាងជំនាន់ថ្នាក់ដឹកនាំវ័យក្មេងនៃប្រទេសទាំងបី

តាងនាមថ្នាក់ដឹកនាំទីក្រុង Ho Chi Minh លោកស្រី Van Thi Bach Tuyet បានសម្តែងការស្វាគមន៍ និងវាយតម្លៃខ្ពស់ចំពោះគណៈចាត់តាំងមជ្ឈិម បណ្ឌិត្យសភានយោបាយជាតិ Ho Chi Minh និងក្រសួងការបរទេស ដែលបានសហការជាមួយស្ថាប័នពាក់ព័ន្ធនានា រៀបចំកម្មវិធីបំប៉នថ្នាក់ដឹកនាំវ័យក្មេងនៃគណបក្សទាំងបី វៀតណាម - ឡាវ - កម្ពុជា លើកទី ៤។

កម្មវិធីនេះមានការចូលរួមពីសិក្ខាកាមចំនួន ៥០ នាក់ ដែលជាកម្មាភិបាលដឹកនាំវ័យក្មេងឆ្នើម មកពីស្ថាប័នមជ្ឈិម និងមូលដ្ឋាននៃប្រទេសទាំងបី។

យោងតាមលោកស្រី Van Thi Bach Tuyet សកម្មភាពនេះបានបង្កលក្ខខណ្ឌឱ្យសិក្ខាកាមស្វែងយល់អំពីគោលមាគ៌ា មាគ៌ានយោបាយ និងបទពិសោធន៍អភិវឌ្ឍន៍របស់វៀតណាម លើកកម្ពស់ចំណេះដឹង សមត្ថភាពសម្រាប់ជួរកម្មាភិបាលដឹកនាំវ័យក្មេង ព្រមទាំងជួយឱ្យជំនាន់ថ្នាក់ដឹកនាំនាពេលអនាគតនៃប្រទេសទាំងបី ផ្លាស់ប្តូរយោបល់ដោយផ្ទាល់ ចែករំលែកបទពិសោធន៍ បង្កើនការយល់ដឹង និងកសាងទំនាក់ទំនងជិតស្និទ្ធយូរអង្វែង។

តាមរយៈនោះ កម្មវិធីបានរួមចំណែកពូនជ្រុំចំណងមិត្តភាពប្រពៃណី និងអនុវត្តការយល់ឃើញរួមរបស់ថ្នាក់ដឹកនាំជាន់ខ្ពស់នៃគណបក្សទាំងបី និងប្រទេសទាំងបី។

អនុលេខាគណៈកម្មាធិការបក្សទីក្រុង Ho Chi Minh បានសង្កត់ធ្ងន់ថា វៀតណាម ឡាវ និងកម្ពុជា ជាប្រទេសជិតខាងដ៏ជិតស្និទ្ធទាំងបី ដែលមានប្រវត្តិទំនាក់ទំនងដ៏យូរអង្វែង ជោគវាសនាផ្សារភ្ជាប់យ៉ាងស្អិតរមួត និងបានឆ្លងកាត់រួមគ្នានូវប៉ុន្មានឆ្នាំនៃការតស៊ូដ៏លំបាកលំបិន ដើម្បីដណ្តើម និងរក្សាឱ្យបានរឹងមាំនូវឯករាជ្យជាតិ។

សមិទ្ធផលបដិវត្តន៍ទាំងឡាយដែលគណបក្សទាំងបី និងប្រទេសទាំងបី សម្រេចបាននៅថ្ងៃនេះ សុទ្ធសឹងតែមានការរួមចំណែក ការលះបង់ និងការបូជាជីវិតរបស់ថ្នាក់ដឹកនាំជំនាន់មុនៗ កម្មាភិបាល និងប្រជាជននៃប្រទេសទាំងបីជាច្រើនជំនាន់។

ថ្នាក់ដឹកនាំទីក្រុង Ho Chi Minh និងថ្នាក់ដឹកនាំគណៈប្រតិភូថ្នាក់ដឹកនាំវ័យក្មេងនៃគណបក្សទាំង ៣ ថតរូបអនុស្សាវរីយ៍បន្ទាប់ពីជំនួបពិភាក្សាការងារ។

លោកស្រី Van Thi Bach Tuyet បានអះអាងថា បក្ស រដ្ឋ និងប្រជាជនវៀតណាម ក្នុងនោះមានគណៈកម្មាធិការបក្ស រដ្ឋអំណាច និងប្រជាជនទីក្រុង Ho Chi Minh តែងតែយកចិត្តទុកដាក់ជាចម្បង និងផ្តល់អាទិភាពខ្ពស់បំផុតដល់ការពង្រឹង និងអភិវឌ្ឍទំនាក់ទំនងអ្នកជិតខាងល្អ មិត្តភាព សាមគ្គីភាពពិសេស និងកិច្ចសហប្រតិបត្តិការគ្រប់ជ្រុងជ្រោយ វៀតណាម - ឡាវ - កម្ពុជា។

ទីក្រុង Ho Chi Minh តែងតែត្រៀមខ្លួនជាស្រេចក្នុងការចែករំលែកបទពិសោធន៍ ចំណេះដឹង ទ្រឹស្តី និងការអនុវត្តជាក់ស្តែងស្តីពីការអភិវឌ្ឍសេដ្ឋកិច្ច - សង្គម កំណើនប្រកបដោយចីរភាព ជួយគាំទ្រដល់ឡាវ និងកម្ពុជាក្នុងការបណ្តុះបណ្តាល បំប៉ន និងលើកកម្ពស់សមត្ថភាពកម្មាភិបាល ដោយចាត់ទុកការអភិវឌ្ឍ និងជោគជ័យរបស់ឡាវ និងកម្ពុជា ក៏ជាជោគជ័យ និងជាសេចក្តីរីករាយរបស់ខ្លួនផងដែរ។

ចែករំលែកបទពិសោធន៍ស្តីពីអភិបាលកិច្ចទីក្រុង និងការបំប្លែងឌីជីថល

នៅក្នុងជំនួបពិភាក្សាការងារ អនុប្រធានគណៈកម្មាធិការប្រជាជនទីក្រុង Ho Chi Minh លោក Nguyen Loc Ha បានជម្រាបជូននូវលក្ខណៈទូទៅមួយចំនួនអំពីស្ថានភាពនៃការអភិវឌ្ឍសេដ្ឋកិច្ច - សង្គមរបស់ទីក្រុងនាពេលកន្លងមក។

លោកក៏បានចែករំលែកនូវលទ្ធផលជំហានដំបូងក្នុងការងារគ្រប់គ្រង ការដឹកនាំបញ្ជា និងការរៀបចំក្បាលម៉ាស៊ីន ចាប់តាំងពីដំណើរការគំរូរដ្ឋបាលមូលដ្ឋានពីរថ្នាក់ ព្រមទាំងការលំបាក បញ្ហាប្រឈមចម្បងៗមួយចំនួន និងទិសដៅការងាររបស់ទីក្រុងនាពេលខាងមុខ។

តំណាងគណៈកម្មាធិការបក្ស រដ្ឋអំណាចទីក្រុង Ho Chi Minh និងសមាជិកនៃគណៈប្រតិភូថ្នាក់ដឹកនាំវ័យក្មេងនៃគណបក្សទាំងបី បានផ្លាស់ប្តូរយោបល់លើបញ្ហាជាច្រើនដែលជាផលប្រយោជន៍រួម ក្នុងនោះមានការអភិវឌ្ឍប្រភពធនធានមនុស្សថ្នាក់ដឹកនាំវ័យក្មេងនៅក្នុងយុគសម័យឌីជីថល ការលើកកម្ពស់សមត្ថភាពអភិបាលកិច្ចទីក្រុងទំនើប ការលើកកម្ពស់សមត្ថភាពឌីជីថល ការបំប្លែងឌីជីថលសម្រាប់កម្មាភិបាលទីក្រុង និងការងារពង្រីកសមាជិកបក្សនៅថ្នាក់មូលដ្ឋាន។

តាងនាមគណៈប្រតិភូថ្នាក់ដឹកនាំវ័យក្មេងនៃគណបក្សទាំងបីនៃប្រទេសទាំងបី លោក Bounthavy Sorsoukanh អនុលេខាគណៈកម្មាធិការបក្សខេត្ត Phongsaly ប្រធានគណៈប្រតិភូថ្នាក់ដឹកនាំវ័យក្មេងឡាវ បានថ្លែងអំណរគុណចំពោះគណៈចាត់តាំងដែលបានបង្កលក្ខខណ្ឌឱ្យគណៈប្រតិភូមកទស្សនកិច្ចនៅស្ថាប័នមជ្ឈិម និងមូលដ្ឋានមួយចំនួនរបស់វៀតណាម តាមរយៈនោះទទួលបាននូវបទពិសោធន៍ដ៏មានប្រយោជន៍ជាច្រើន។

លោកក៏បានថ្លែងអំណរគុណចំពោះថ្នាក់ដឹកនាំទីក្រុង Ho Chi Minh ដែលបានចែករំលែកព័ត៌មានជាច្រើនយ៉ាងត្រង់ទៅត្រង់មក និងឆ្លើយតបនូវរាល់សំណួររបស់សមាជិកគណៈប្រតិភូ ជួយឱ្យប្រតិភូទាំងឡាយយល់កាន់តែច្បាស់បន្ថែមទៀតនូវបទពិសោធន៍ដែលអាចយកទៅអនុវត្តក្នុងដំណើរការអភិវឌ្ឍមូលដ្ឋាន និងប្រទេសជាតិរបស់ខ្លួន។

យោងតាមលោក Bounthavy Sorsoukanh កម្មវិធីបំប៉នលើកនេះបានបំពេញសម្រេចភារកិច្ចដែលថ្នាក់ដឹកនាំនៃគណបក្សទាំងបី និងរដ្ឋទាំងបីបានប្រគល់ជូន មិនត្រឹមតែបង្កើតឱកាសផ្លាស់ប្តូរជំនាញវិជ្ជាជីវៈប៉ុណ្ណោះទេ ប៉ុន្តែថែមទាំងរួមចំណែករឹតចំណងនៃការយល់ដឹង ពង្រឹង និងអភិវឌ្ឍសាមគ្គីភាព មិត្តភាពរវាងគណបក្សទាំងបី រដ្ឋទាំងបី និងប្រជាជននៃប្រទេសទាំងបី តាមរយៈនោះ បង្កើនទំនាក់ទំនងគ្រប់ជ្រុងជ្រោយរវាង វៀតណាម ឡាវ និងកម្ពុជា រួមគ្នាអភិវឌ្ឍក្នុងសន្តិភាព មិត្តភាព និងវិបុលភាព៕

ទីក្រុងហូជីមិញ៖ ទិវាបុណ្យ “គ្រួសារវៀតណាម - ឡាវ - កម្ពុជា” ផ្សព្វផ្សាយទូលំទូលាយនូវចំណងមិត្តភាព យុគសម័យ - នាថ្ងៃទី ២៨ ខែមិថុនា នៅអន្តេវាសិកដ្ឋាននិស្សិតឡាវ - កម្ពុជា (ទីក្រុងហូជីមិញ) គណៈអចិន្ត្រៃយ៍នៃសហភាពយុវជនកុម្មុយនិស្តហូជីមិញទីក្រុងហូជីមិញ បានសហការជាមួយគណៈប្រធានអន្តេវាសិកដ្ឋាន រៀបចំចាត់តាំងទិវាបុណ្យ “គ្រួសារវៀតណាម - ឡាវ - កម្ពុជា” ឆ្នាំ ២០២៦។

បន្តជំរុញការស្វែងរក និងប្រមូលផ្តុំអដ្ឋិធាតុយុទ្ធជនពលីវៀតណាមដែលបានពលីជីវិតនៅប្រទេសឡាវ យុគសម័យ - រដូវប្រាំង ២០២៥ - ២០២៦ បណ្តាក្រុមប្រមូលផ្តុំរបស់ វៀតណាម បានស្វែងរក និងប្រមូលផ្តុំបានអដ្ឋិធាតុយុទ្ធជនពលីចំនួន ១៧៣ អដ្ឋិធាតុ នៃកងទ័ពស្ម័គ្រចិត្ត និងអ្នកជំនាញការវៀតណាម ដែលបានពលីជីវិតនៅ ឡាវ នាបណ្តាសម័យកាលសង្គ្រាម។

ឌឿងង្វៀន