កិច្ចសន្ទនាយុទ្ធសាស្ត្របើកបន្ថែមនូវកម្លាំងចលករសម្រាប់ទំនាក់ទំនង វៀតណាម - សិង្ហបុរី

សូមឯកអគ្គរដ្ឋទូតមេត្តាជម្រាបជូនអំពីអត្ថន័យ និងខ្លឹមសារសំខាន់ៗនៅក្នុងដំណើរទស្សនកិច្ចនៅ សិង្ហបុរី លើកនេះរបស់ថ្នាក់ដឹកនាំជាន់ខ្ពស់វៀតណាម?

ដំណើរទស្សនកិច្ចជាផ្លូវការនៅ សិង្ហបុរី របស់សមមិត្ត Tran Cam Tu សមាជិកការិយាល័យនយោបាយ សមាជិកប្រចាំការនៃគណៈលេខាមជ្ឈិមបក្ស ចាប់ពីថ្ងៃទី ២៤-២៥ ខែសីហា មានអត្ថន័យយ៉ាងសំខាន់ ដែលប្រព្រឹត្តទៅក្នុងកាលៈទេសៈដែលទំនាក់ទំនង វៀតណាម - សិង្ហបុរី កំពុងមានការអភិវឌ្ឍយ៉ាងខ្លាំងក្លាលើគ្រប់វិស័យ។

ជាពិសេស ដំណើរទស្សនកិច្ចនេះប្រព្រឹត្តទៅបន្ទាប់ពីប្រទេសទាំងពីរបានលើកកម្ពស់ទំនាក់ទំនងទៅជាដៃគូយុទ្ធសាស្ត្រគ្រប់ជ្រុងជ្រោយកាលពីខែមីនា ឆ្នាំ ២០២៥ និងបន្ទាប់ពីដំណើរទស្សនកិច្ចថ្នាក់រដ្ឋរបស់អគ្គលេខាបក្ស ប្រធានរដ្ឋ To Lam ទៅកាន់ សិង្ហបុរី កាលពីខែឧសភា ឆ្នាំ ២០២៦។

ចំណុចគួរឱ្យកត់សម្គាល់នៃដំណើរទស្សនកិច្ចលើកនេះ គឺការដែលជាលើកដំបូង បក្សកុម្មុយនីស្តវៀតណាម និងគណបក្សសកម្មភាពប្រជាជនសិង្ហបុរី បានរៀបចំកិច្ចសន្ទនាយុទ្ធសាស្ត្រ។ យន្តការនេះត្រូវបានបង្កើតឡើងកាលពីខែឧសភា ឆ្នាំ ២០២៦ សំដៅផ្លាស់ប្តូរយោបល់លើខ្លឹមសារសំខាន់ៗក្នុងការកសាងបក្ស ការអភិវឌ្ឍប្រទេសជាតិ អភិបាលកិច្ចជាតិ ក៏ដូចជាការបណ្តុះបណ្តាល និងការផ្លាស់ប្តូរកម្មាភិបាលវ័យក្មេង ព្រមទាំងកម្មាភិបាលដឹកនាំដែលមានសក្តានុពល។

ខ្ញុំយល់ឃើញថា ចំណុចស្នូលនៃដំណើរទស្សនកិច្ច គឺការបន្តពង្រឹងទំនុកចិត្តខាងនយោបាយ ចែករំលែកបទពិសោធន៍នៃការអភិវឌ្ឍ និងអភិបាលកិច្ច ព្រមទាំងបង្កើតបន្ថែមនូវកម្លាំងចលករខាងនយោបាយ ដើម្បីអនុវត្តទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយឱ្យកាន់តែជាក់ស្តែង។

សមាជិកប្រចាំការនៃគណៈលេខាមជ្ឈិមបក្ស Tran Cam Tu បំពេញទស្សនកិច្ចជាផ្លូវការនៅ សិង្ហបុរី។

បណ្តាញទំនាក់ទំនងបក្សបង្កើតមូលដ្ឋានគ្រឹះនយោបាយសម្រាប់កិច្ចសហប្រតិបត្តិការពហុជាន់

តើឯកអគ្គរដ្ឋទូតវាយតម្លៃយ៉ាងដូចម្តេចអំពីកិច្ចសហប្រតិបត្តិការតាមបណ្តាញបក្សរវាងប្រទេសទាំងពីរនាពេលកន្លងមក និងតួនាទីនៃបណ្តាញនេះចំពោះការនាំយកទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ វៀតណាម - សិង្ហបុរី ឱ្យមានការអភិវឌ្ឍកាន់តែស៊ីជម្រៅ និងជាក់ស្តែងជាងមុន?

តាមការយល់ឃើញរបស់ខ្ញុំ កិច្ចសហប្រតិបត្តិការតាមបណ្តាញបក្សរវាង វៀតណាម និង សិង្ហបុរី នាពេលកន្លងមកសម្រេចបាននូវជំហានអភិវឌ្ឍន៍ជាវិជ្ជមានយ៉ាងខ្លាំង ហើយកាន់តែប្រែក្លាយជាផ្នែកមួយដ៏សំខាន់នៅក្នុងទំនាក់ទំនងជារួមនៃប្រទេសទាំងពីរ។

នៅក្នុងដំណើរការលើកកម្ពស់ទំនាក់ទំនងទៅជាដៃគូយុទ្ធសាស្ត្រគ្រប់ជ្រុងជ្រោយកាលពីខែមីនា ឆ្នាំ ២០២៥ ភាគីទាំងពីរបានឯកភាពបង្កើនការពង្រឹងកិច្ចសហប្រតិបត្តិការតាមបណ្តាញបក្ស សំដៅពង្រឹងជំនឿទុកចិត្ត និងមូលដ្ឋានគ្រឹះនយោបាយ ព្រមទាំងសិក្សាស្រាវជ្រាវបង្កើតយន្តការសន្ទនាបក្សជាប្រចាំ។

ត្រឹមតែជាងមួយឆ្នាំក្រោយមក កិច្ចសន្ទនាយុទ្ធសាស្ត្ររវាងបក្សកុម្មុយនីស្តវៀតណាម និង PAP ត្រូវបានបង្កើតឡើងជាផ្លូវការ។ បញ្ហានេះបានបង្ហាញឱ្យឃើញថាល្បឿននៃការធ្វើឱ្យទំនាក់ទំនងនយោបាយរវាងបក្សទាំងពីរទៅជាស្ថាប័នប្រព្រឹត្តទៅយ៉ាងឆាប់រហ័ស ដែលឆ្លុះបញ្ចាំងពីកម្រិតនៃជំនឿទុកចិត្តកាន់តែខ្ពស់ឡើងជាលំដាប់។

ដំណើរទស្សនកិច្ចនៅ សិង្ហបុរី របស់អគ្គលេខាបក្ស ប្រធានរដ្ឋ To Lam កាលពីខែឧសភា ឆ្នាំ ២០២៦ ក៏បានបង្កើតបន្ថែមនូវកម្លាំងចលករយ៉ាងខ្លាំងក្លាសម្រាប់ទំនាក់ទំនងរវាងប្រទេសទាំងពីរ និងបក្សទាំងពីរផងដែរ។

តាមការយល់ឃើញរបស់ខ្ញុំ តម្លៃដ៏ធំបំផុតនៃបណ្តាញទំនាក់ទំនងបក្ស គឺការបង្កើតបន្ថែមនូវបណ្តាញផ្លាស់ប្តូរយោបល់ប្រកបដោយលក្ខណៈយុទ្ធសាស្ត្រ និងយូរអង្វែង ជួយឱ្យភាគីទាំងពីរយល់កាន់តែស៊ីជម្រៅអំពីទិសដៅនៃការអភិវឌ្ឍ អាទិភាពនៃគោលនយោបាយ និងបញ្ហាទាំងឡាយដែលប្រទេសនីមួយៗយកចិត្តទុកដាក់។

ចាប់ពីចំណុចនោះ បណ្តាញទំនាក់ទំនងបក្សអាចរួមចំណែកតម្រង់ទិស បង្កើតមូលដ្ឋានគ្រឹះនយោបាយ និងបើកផ្លូវដើម្បីឱ្យកិច្ចសហប្រតិបត្តិការរវាងរដ្ឋ សហគ្រាស និងប្រជាជននៃប្រទេសទាំងពីរ មានការអភិវឌ្ឍកាន់តែមានប្រសិទ្ធភាព។

ការបង្កើតឡើងនូវ «ប្រព័ន្ធអេកូឡូស៊ីសន្ទនាពហុជាន់»

កិច្ចសន្ទនាយុទ្ធសាស្ត្រ វៀតណាម - សិង្ហបុរី លើកទីមួយ ត្រូវបានរំពឹងទុកយ៉ាងខ្លាំង។ តើឯកអគ្គរដ្ឋទូតយល់ឃើញយ៉ាងដូចម្តេចអំពីតួនាទីនៃយន្តការនេះ ចំពោះ «ផ្លូវដែក» នៃកិច្ចសហប្រតិបត្តិការទ្វេភាគីនាពេលខាងមុខ?

ខ្ញុំយល់ឃើញថា ចាំបាច់ត្រូវមើលកិច្ចសន្ទនាលើកនេះដូចជា «ផ្លូវដែកយុទ្ធសាស្ត្រ» ថ្មីមួយ ដែលជួយឱ្យទំនាក់ទំនង វៀតណាម - សិង្ហបុរី ដំណើរការកាន់តែស៊ីសង្វាក់គ្នា មានទិសដៅយូរអង្វែងជាងមុន និងបង្កើតចេញនូវលទ្ធផលជាក់ស្តែងកាន់តែច្រើន។

បច្ចុប្បន្ន ប្រទេសទាំងពីរមានយន្តការសន្ទនាជាច្រើនជាន់បំពេញបន្ថែមឱ្យគ្នាទៅវិញទៅមក។ នៅថ្នាក់ខ្ពស់បំផុត គឺការផ្លាស់ប្តូរយោបល់រវាងថ្នាក់ដឹកនាំនៃប្រទេសទាំងពីរ មានកិច្ចប្រជុំប្រចាំឆ្នាំរវាងនាយករដ្ឋមន្ត្រីទាំងពីរ យន្តការពិគ្រោះយោបល់រវាងបណ្តាក្រសួង ស្ថាប័ន ហើយបច្ចុប្បន្នមានបន្ថែមនូវកិច្ចសន្ទនាយុទ្ធសាស្ត្ររវាងបក្សទាំងពីរ។

ឯកអគ្គរដ្ឋទូតវៀតណាមប្រចាំនៅ សិង្ហបុរី Tran Phuoc Anh។

សិង្ហបុរី និង វៀតណាម ក៏បានចុះហត្ថលេខាលើអនុស្សរណៈនៃការយោគយល់គ្នា (MOU) រវាងស្ថាប័នទាំងពីរដែលទទួលបន្ទុកកិច្ចការមុខងារសាធារណៈ ដោយមានគោលដៅផ្លាស់ប្តូរយោបល់ថ្នាក់ជាន់ខ្ពស់ស្តីពីការអភិវឌ្ឍជាតិ អភិបាលកិច្ច រដ្ឋបាលសាធារណៈ និងការបំប្លែងជាឌីជីថល។

ដូចនេះ ប្រទេសទាំងពីរកំពុងបង្កើតឡើងជាជំហានៗនូវប្រព័ន្ធអេកូឡូស៊ីសន្ទនាពហុជាន់ ចាប់ពីថ្នាក់បក្ស ថ្នាក់ដឹកនាំរដ្ឋ រដ្ឋាភិបាល រហូតដល់បណ្តាស្ថាប័នជំនាញ។

ការសន្ទនារវាងបក្សទាំងពីរមានតម្លៃពិសេសលើលទ្ធភាពនៃការផ្លាស់ប្តូរយោបល់លើបញ្ហាយុទ្ធសាស្ត្រ និងយូរអង្វែង មិនត្រឹមតែអំពីទំនាក់ទំនងទ្វេភាគីប៉ុណ្ណោះទេ ប៉ុន្តែថែមទាំងអំពីការកសាងបក្ស ការអភិវឌ្ឍប្រទេសជាតិ និងអភិបាលកិច្ចជាតិទៀតផង។

ខ្ញុំរំពឹងទុកថា យន្តការនេះនឹងរួមចំណែកផ្លាស់ប្តូរពី «ការចែករំលែកបទពិសោធន៍» ទៅជា «ការរួមគ្នារៀបចំការរចនា និងដាក់ឱ្យដំណើរការនូវគំនិតផ្តួចផ្តើមនៃកិច្ចសហប្រតិបត្តិការ»។

វិស័យទាំងឡាយដូចជា ការតភ្ជាប់វិទ្យាសាស្ត្របច្ចេកវិទ្យា ការផ្លាស់ប្តូរថ្មីប្រកបដោយភាពច្នៃប្រឌិត ការបំប្លែងជាឌីជីថល ការអភិវឌ្ឍធនធានមនុស្សដែលមានទេពកោសល្យ ហិរញ្ញវត្ថុអន្តរជាតិ ភស្តុភារកម្ម និងកំណើនបៃតង គឺពិតជាអាចប្រែក្លាយទៅជាកម្មវិធីសហប្រតិបត្តិការជាក់ស្តែងបាន។

បញ្ហានេះមានភាពសមស្របទៅនឹងសសរស្តម្ភទាំង ៦ នៃទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ រួមមាន សន្តិភាព - សន្តិសុខ សេដ្ឋកិច្ច ថាមពល និងកំណើនបៃតង ការអភិវឌ្ឍប្រភពធនធានមនុស្ស និងការតភ្ជាប់ប្រជាជន ការបំប្លែងជាឌីជីថល និងបច្ចេកវិទ្យាថ្មី ការសម្របសម្រួលនៅឯវេទិកាតំបន់ និងអន្តរជាតិ។

គោលដៅចុងក្រោយនៃកិច្ចសន្ទនាមិនមែនគ្រាន់តែដើម្បីឱ្យមានបន្ថែមយន្តការមួយទៀតនោះឡើយ ប៉ុន្តែគឺដើម្បីជួយឱ្យយន្តការដែលមានស្រាប់តភ្ជាប់គ្នាកាន់តែមានប្រសិទ្ធភាព និងបង្កើតចេញនូវលទ្ធផលជាក់ស្តែងកាន់តែច្រើនសម្រាប់ការអភិវឌ្ឍរបស់ប្រទេសទាំងពីរ។

សំដៅទៅរក «ឆ្នាំនៃការរួមសហការជាយុទ្ធសាស្ត្រ» ២០២៧

នៅឆ្នាំ ២០២៧ វៀតណាម ធ្វើជាម្ចាស់ផ្ទះរៀបចំកិច្ចប្រជុំ APEC រីឯ សិង្ហបុរី ទទួលតំណែងជាប្រធានអាស៊ាន។ យោងតាមឯកអគ្គរដ្ឋទូត តើប្រទេសទាំងពីរមានកាលានុវត្តភាពនៃការសម្របសម្រួលបែបណាខ្លះ ដើម្បីបំពេញភារកិច្ចពហុភាគីដ៏សំខាន់ៗទាំងនេះឱ្យបានល្អ?

ខ្ញុំយល់ឃើញថា ឆ្នាំ ២០២៧ នឹងជាឆ្នាំដ៏ពិសេសមួយសម្រាប់ទំនាក់ទំនង វៀតណាម - សិង្ហបុរី ក៏ដូចជាសម្រាប់កិច្ចសហប្រតិបត្តិការ អាស៊ាន - អាស៊ីប៉ាស៊ីហ្វិក។

ប្រទេសទាំងពីរទទួលបន្ទុកភារកិច្ចពហុភាគីដ៏សំខាន់ៗចំនួនពីរក្នុងពេលដំណាលគ្នា៖ វៀតណាម ធ្វើជាម្ចាស់ផ្ទះ APEC 2027 រីឯ សិង្ហបុរី ដើរតួនាទីជាប្រធានអាស៊ាន 2027។

នេះជាកាលានុវត្តភាពដ៏ធំធេងក្នុងការបង្កើតការបំពេញបន្ថែម និងការរួមសហការរវាង អាស៊ាន និង APEC។ វៀតណាម អាចចូលរួមចំណែកនាំសំឡេងរបស់អាស៊ានទៅកាន់បញ្ហានានារបស់ APEC ខណៈដែល សិង្ហបុរី ជាមួយនឹងតួនាទីជាប្រធានអាស៊ាន អាចជំរុញអាទិភាពនានារបស់អាស៊ានឱ្យសមស្របទៅនឹងរបៀបវារៈកាន់តែទូលំទូលាយនៃតំបន់អាស៊ី - ប៉ាស៊ីហ្វិក។

តាមការយល់ឃើញរបស់ខ្ញុំ គឺមានទិសដៅសម្របសម្រួលធំៗយ៉ាងតិចចំនួនបី។

ចូលរួមនិងថ្លែងមតិដឹកនាំនៅក្នុងសន្និសីទការទូតលើកទី ៣៣ សមាជិកការិយាល័យនយោបាយ សមាជិកប្រចាំការនៃគណៈលេខាមជ្ឈិមបក្ស Tran Cam Tu បានសង្កត់ធ្ងន់ថា កិច្ចការបរទេសរបស់បក្សសម្រេចបាននូវការបំបែកភាពទាល់ច្រកក្នុងការបើកទូលាយ និងអភិវឌ្ឍន៍ទំនាក់ទំនងឱ្យកាន់តែស៊ីជម្រៅ អះអាងពីតួនាទីដ៏សំខាន់ និងជាការសម្រេចចិត្តក្នុងការពង្រឹងមូលដ្ឋានគ្រឹះនយោបាយ តម្រង់ទិស និងដឹកនាំទំនាក់ទំនងផ្នែករដ្ឋជាមួយនឹងបណ្តាប្រទេស។

ទីមួយ គឺការសម្របសម្រួលលើខ្លឹមសារ និងគំនិតផ្តួចផ្តើម។ ប្រទេសទាំងពីរអាចរួមគ្នាជំរុញបញ្ហាទាំងឡាយដែលមានផលប្រយោជន៍រួម ដូចជា ពាណិជ្ជកម្ម និងការវិនិយោគបើកចំហ កំណើនបៃតង ការបំប្លែងជាឌីជីថល AI ការផ្លាស់ប្តូរថ្មីប្រកបដោយភាពច្នៃប្រឌិត សមត្ថភាពធន់នៃខ្សែច្រវាក់ផ្គត់ផ្គង់ និងការអភិវឌ្ឍប្រកបដោយបរិយាបន្ន។ ទាំងនេះក៏ជាអាទិភាពទាំងឡាយដែល វៀតណាម កំពុងត្រៀមរៀបចំសម្រាប់ APEC 2027 ផងដែរ។

ទីពីរ គឺការពង្រឹងការតភ្ជាប់ អាស៊ាន - APEC។ វៀតណាម និង សិង្ហបុរី សុទ្ធតែមានផលប្រយោជន៍ក្នុងការពង្រឹងតួនាទីមជ្ឈភាពរបស់អាស៊ាន ជំរុញសំឡេងឯកភាពគ្នារបស់អាស៊ាននៅឯ APEC និងបង្កើនលក្ខណៈបំពេញបន្ថែមរវាងយន្តការតំបន់នានា។ សេចក្តីថ្លែងការណ៍រួមស្តីពីភាពជាដៃគូយុទ្ធសាស្ត្រគ្រប់ជ្រុងជ្រោយ ក៏បានកំណត់ថា ប្រទេសទាំងពីរនឹងធ្វើការសម្របសម្រួលនៅឯ អាស៊ាន APEC អង្គការសហប្រជាជាតិ និងវេទិកាអន្តរជាតិដទៃទៀត។

ទីបី គឺការទាញយកផលប្រយោជន៍ពីឆ្នាំ ២០២៧ ដើម្បីជំរុញកម្មវិធីសហប្រតិបត្តិការទ្វេភាគីនានា ដែលមានលក្ខណៈជានិមិត្តរូប និងបង្កើតឥទ្ធិពលរីកសាយភាយនៅក្នុងតំបន់។

វិស័យទាំងឡាយដូចជា សេដ្ឋកិច្ចឌីជីថល AI ហិរញ្ញវត្ថុ ភស្តុភារកម្ម ថាមពលបៃតង ការតភ្ជាប់ខ្សែច្រវាក់ផ្គត់ផ្គង់ និងការអភិវឌ្ឍប្រភពធនធានមនុស្ស គឺអាចទាំងបម្រើដល់ផលប្រយោជន៍ទ្វេភាគី ផង និងចូលរួមចំណែកក្នុងរបៀបវារៈរបស់ អាស៊ាន ព្រមទាំង APEC ផងដែរ។

ប្រព័ន្ធតំបន់ឧស្សាហកម្ម វៀតណាម-សិង្ហបុរី (VSIP)។

វៀតណាម កំពុងត្រៀមរៀបចំយ៉ាងសកម្មសម្រាប់ APEC 2027។ ខ្ញុំជឿជាក់ថា វៀតណាម និង សិង្ហបុរី ពិតជាអាចប្រែក្លាយឆ្នាំ ២០២៧ ឱ្យទៅជា «ឆ្នាំនៃការរួមសហការជាយុទ្ធសាស្ត្រ» ដែលក្នុងនោះ APEC 2027 របស់ វៀតណាម និង អាស៊ាន 2027 របស់ សិង្ហបុរី ជួយគាំទ្រគ្នាទៅវិញទៅមក រួមចំណែកដល់អាស៊ានមួយប្រកបដោយសាមគ្គីភាព ភាពធន់ ភាពស្វាហាប់ និងតំបន់អាស៊ី - ប៉ាស៊ីហ្វិក ប្រកបដោយសន្តិភាព ស្ថិរភាព និងវិបុលភាព។

ប្រសិនបើឆ្នាំ ២០២៥ គឺជាឆ្នាំដែលប្រទេសទាំងពីរលើកកម្ពស់ទំនាក់ទំនងទៅជាដៃគូយុទ្ធសាស្ត្រគ្រប់ជ្រុងជ្រោយ ហើយឆ្នាំ ២០២៦ គឺជាឆ្នាំនៃការកសាង និងធ្វើឱ្យយន្តការសហប្រតិបត្តិការថ្មីៗក្លាយជាស្ថាប័ន នោះខ្ញុំរំពឹងទុកថា ឆ្នាំ ២០២៧ នឹងជាឆ្នាំដែលយើងមើលឃើញកាន់តែច្បាស់នូវរាល់លទ្ធផល និងតម្លៃរីកសាយភាយនៃទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ។

សូមថ្លែងអំណរគុណយ៉ាងជ្រាលជ្រៅចំពោះលោកឯកអគ្គរដ្ឋទូត!

អគ្គកុងស៊ុលសិង្ហបុរីប្រចាំនៅទីក្រុងហូជីមិញ លោក Kho Ngee Seng Roy៖ ជានិច្ចកាលខិតខំរួមចំណែកដល់ទំនាក់ទំនងរវាងប្រជាជន និងប្រជាជនវៀតណាម និងសិង្ហបុរី។ យុគសម័យ - នាថ្ងៃទី ៤ មិថុនា នៅទីក្រុងហូជីមិញ (HCMC) សម្ព័ន្ធអង្គការមិត្តភាពទីក្រុងហូជីមិញបានរៀបចំពិធីប្រគល់មេដាយសន្តិភាព និងមិត្តភាពរវាងប្រជាជនជូនលោក Kho Ngee Seng Roy អគ្គកុងស៊ុលសិង្ហបុរីប្រចាំទីក្រុងហូជីមិញ។

ប្រធានសម្ព័ន្ធអង្គការមិត្តភាពវៀតណាម Phan Anh Son ទទួលជួបឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសិង្ហបុរីប្រចាំនៅវៀតណាម យុគសម័យ - នេះជាខ្លឹមសារនៃការផ្លាស់ប្តូររវាងលោក Phan Anh Son ប្រធានសហភាពអង្គការមិត្តភាពវៀតណាម និងលោក Jaya Ratnam ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណៈរដ្ឋសិង្ហបុរីប្រចាំនៅវៀតណាម នាថ្ងៃទី ១៧ ខែមិថុនា នៅទីក្រុងហាណូយ។

សុវណ្ណា