សញ្ញាសម្គាល់ថ្មីនៃការប្រឡងសមត្ថភាពភាសាវៀតណាមនៅជប៉ុន

ការប្រឡងត្រូវបានរៀបចំឡើងជាលក្ខណៈសាកល្បង ដោយមានបន្ទប់ប្រឡងលើកុំព្យូទ័រមួយ សម្រាប់បេក្ខជនចំនួន ២៥ នាក់ដែលបានចុះឈ្មោះគ្រប់កម្រិត ចាប់ពីកម្រិតទី ១ ដល់កម្រិតទី ៦ យោងតាមក្របខ័ណ្ឌសមត្ថភាពភាសាវៀតណាមសម្រាប់ជនបរទេស។

ដោយត្រូវបានបង្កើតឡើងយោងតាមក្របខ័ណ្ឌសមត្ថភាពភាសាវៀតណាម ៦ កម្រិត សម្រាប់ជនបរទេស ដែលចេញផ្សាយដោយក្រសួងអប់រំ និងបណ្តុះបណ្តាល ការប្រឡងនេះមានគោលបំណងវាយតម្លៃលើគ្រប់ជ្រុងជ្រោយនូវសមត្ថភាពប្រើប្រាស់ភាសាវៀតណាមរបស់អ្នកសិក្សាស្របតាមស្តង់ដារជាតិ បម្រើឱ្យតម្រូវការសិក្សា ស្រាវជ្រាវ ធ្វើការងារ និងការប្រាស្រ័យទាក់ទងវប្បធម៌។

ការរៀបចំការប្រឡងវាយតម្លៃសមត្ថភាពភាសាវៀតណាមនៅក្រៅប្រទេសតាមទម្រង់ប្រឡងលើកុំព្យូទ័រជាលើកដំបូងបង្អស់នេះ បានកត់សម្គាល់នូវជំហានវិវឌ្ឍថ្មីមួយនៅក្នុងសកម្មភាពបង្រៀន ការប្រឡង និងការផ្សព្វផ្សាយភាសាវៀតណាមទៅកាន់ពិភពលោក នៅក្នុងបរិបទដែលភាសាវៀតណាមកាន់តែទទួលបានការចាប់អារម្មណ៍នៅតាមបណ្តាប្រទេសជាច្រើន។

ការប្រឡងត្រូវបានសាកលវិទ្យាល័យគរុកោសល្យហាណូយទទួលបន្ទុកផ្នែកជំនាញ ក្រោមការឧបត្ថម្ភគាំទ្រពីស្ថានអគ្គកុងស៊ុលវៀតណាមប្រចាំនៅ Osaka សហការជាមួយមជ្ឈមណ្ឌលវៀតណាមវិទ្យាចំណុះសមាគមជំរុញកិច្ចសហប្រតិបត្តិការសេដ្ឋកិច្ចវៀតណាម - ជប៉ុន រៀបចំឡើង។

ការប្រឡងនៅ Osaka មានភាពចម្រុះនៃវ័យ និងសញ្ជាតិរបស់បេក្ខជន។ អ្នកដែលមានវ័យក្មេងជាងគេ គឺប្អូន Kayano Emiko (Le Tra My) អាយុ ៨ ឆ្នាំ ជនជាតិវៀតណាមដែលកំពុងរស់នៅប្រទេសជប៉ុន។ បេក្ខជនដែលមានវ័យចំណាស់ជាងគេ គឺលោក Imagawa Hiroshi សញ្ជាតិជប៉ុន។

ទ្រង់ទ្រាយបេក្ខជនចំនួន ២៥ នាក់នៃការប្រឡងសាកល្បង មិនត្រឹមតែសំដៅត្រួតពិនិត្យវិធីសាស្ត្រប្រឡងលើកុំព្យូទ័រប៉ុណ្ណោះទេ ថែមទាំងជួយវាយតម្លៃ និងកែលម្អនីតិវិធី បង្កើតជាបុព្វបទដើម្បីឱ្យការប្រឡងអាចត្រូវបានពង្រីកទៅកាន់បណ្តាប្រទេស និងតំបន់ដែនដីជាច្រើននាពេលខាងមុខ។

ដើម្បីឱ្យការប្រឡងត្រូវបានរៀបចំឡើង បណ្តាស្ថាប័ន និងអង្គភាពពាក់ព័ន្ធបានឆ្លងកាត់ដំណើរការនៃការត្រៀមរៀបចំ និងការសម្របសម្រួល។ ជាពិសេស នៅខែមេសា ឆ្នាំ ២០២៦ បន្ទាប់ពីក្រសួងអប់រំ និងបណ្តុះបណ្តាលបានធ្វើវិសោធនកម្ម បំពេញបន្ថែមនូវបទប្បញ្ញត្តិនានា និងចេញផ្សាយឯកសារអនុញ្ញាតឱ្យរៀបចំការប្រឡងវាយតម្លៃសមត្ថភាពភាសាវៀតណាមនៅក្រៅប្រទេស មូលដ្ឋានគតិយុត្តិត្រូវបានបង្កើតឡើងដើម្បីនាំយកការប្រឡងវាយតម្លៃសមត្ថភាពភាសាវៀតណាមកម្រិតជាតិចេញទៅក្រៅដែនដីវៀតណាមជាលើកដំបូង។

ចំពោះអ្នកដែលចូលរួមដោយផ្ទាល់ក្នុងការងារអភិវឌ្ឍភាសាវៀតណាមនៅក្រៅប្រទេស ការប្រឡងនេះថែមទាំងបង្កប់នូវអត្ថន័យផ្នែកវប្បធម៌ និងសហគមន៍ផងដែរ។

លោកស្រី Le Thuong សមាជិកក្រុមប្រឹក្សាប្រឡងនៅជប៉ុន នាយិកាមជ្ឈមណ្ឌលវៀតណាមវិទ្យា បានយល់ឃើញថា ការរៀបចំប្រកបដោយជោគជ័យនូវការប្រឡងនេះ ភ្លាមៗបន្ទាប់ពីការិយាល័យនយោបាយបានចេញផ្សាយសេចក្តីសម្រេចចិត្តលេខ 23-NQ/TW គឺជាសេចក្តីរីករាយ និងជាកម្លាំងចលករដ៏ធំធេងចំពោះអ្នកដែលកំពុងបំពេញការងារអភិវឌ្ឍភាសាវៀតណាមនៅក្រៅប្រទេស។

យោងតាមលោកស្រី សេចក្តីសម្រេចចិត្តបានអះអាងនូវតួនាទីរបស់ភាសាវៀតណាមក្នុងការថែរក្សាអត្តសញ្ញាណវប្បធម៌ជាតិ និងពង្រឹងប្លុកមហាសាមគ្គីទូទាំងប្រជាជាតិ។ ហេតុដូច្នោះហើយ ការប្រឡងមិនត្រឹមតែសំដៅវាយតម្លៃសមត្ថភាពភាសាប៉ុណ្ណោះទេ ប៉ុន្តែថែមទាំងរួមចំណែកផ្សព្វផ្សាយក្តីស្រឡាញ់ភាសាវៀតណាម បង្កើតកម្លាំងចលករដើម្បីឱ្យបណ្តាជំនាន់ជនជាតិវៀតណាមនៅក្រៅប្រទេស និងមិត្តភក្តិអន្តរជាតិបន្តរៀនសូត្រ ប្រើប្រាស់ និងផ្សារភ្ជាប់ជាមួយភាសាវៀតណាម។

«យើងខ្ញុំរំពឹងទុកថា ចេញពីសញ្ញាសម្គាល់នៅ Osaka គំរូនេះនឹងបន្តត្រូវបានពង្រីកទៅកាន់ប្រទេសជាច្រើន រួមចំណែកនាំយកភាសាវៀតណាមឱ្យកាន់តែឈានទៅឆ្ងាយនៅលើឆាកអន្តរជាតិ» លោកស្រី Le Thuong បានចែករំលែក។

បេក្ខជនបំពេញនីតិវិធីមុនពេលចូលបន្ទប់ប្រឡង។

នៅក្នុងសហគមន៍ជនជាតិវៀតណាមនៅក្រៅប្រទេស ភាសាវៀតណាមមិនត្រឹមតែជាឧបករណ៍ទំនាក់ទំនងប៉ុណ្ណោះទេ ថែមទាំងជាផ្នែកមួយនៃអត្តសញ្ញាណ និងការតភ្ជាប់ជាមួយស្រុកកំណើតផងដែរ។ ចំពោះជនបរទេសដែលស្រឡាញ់ចូលចិត្តវៀតណាម ការរៀនភាសាវៀតណាមជួយឱ្យពួកគេមានឱកាសបន្ថែមទៀតក្នុងការស្វែងយល់អំពីវប្បធម៌ ប្រវត្តិសាស្ត្រ និងមនុស្សវៀតណាម។

ការនាំយកការប្រឡងភាសាវៀតណាមស្របតាមស្តង់ដារជាតិទៅកាន់អ្នកសិក្សានៅក្រៅប្រទេស ហេតុដូច្នោះហើយ មិនត្រឹមតែឈប់ត្រឹមកម្រិតសកម្មភាពប្រឡងប៉ុណ្ណោះទេ ថែមទាំងរួមចំណែកកសាងបរិយាកាសសិក្សាប្រកបដោយបទដ្ឋាន លើកទឹកចិត្តអ្នកសិក្សាឱ្យបន្តរៀនភាសាវៀតណាមយូរអង្វែង និងបោះជំហានបង្កើតសហគមន៍អ្នកប្រើប្រាស់ភាសាវៀតណាមនៅក្រៅប្រទេស។

អត្ថន័យនោះត្រូវបានបង្ហាញតាមរយៈរឿងរ៉ាវជាក់ស្តែងរបស់បណ្តាបេក្ខជននៅ Osaka។

ចំពោះ Le Tra My បេក្ខជនដែលមានវ័យក្មេងជាងគេ ការប្រឡងនេះគឺជាបទពិសោធន៍ដ៏គួរឱ្យចងចាំមួយ។ ប្អូនបានឱ្យដឹងថារីករាយយ៉ាងខ្លាំងនៅពេលបានចូលរួម ហើយមានបំណងចង់រៀនភាសាវៀតណាមឱ្យបានពូកែ ដើម្បីអាចជជែកលេងជាមួយលោកជីដូនលោកជីតា អានសៀវភៅភាសាវៀតណាម និងយល់ដឹងកាន់តែច្បាស់អំពីមាតុភូមិវៀតណាម។

បេក្ខជនបំពេញនីតិវិធីមុនពេលចូលបន្ទប់ប្រឡង។

«ក្មួយសង្ឃឹមថានឹងមានមិត្តភក្តិតូចៗជាច្រើននៅជប៉ុនរួមគ្នារៀន និងស្រឡាញ់ភាសាវៀតណាមដូចជាក្មួយដែរ» Tra My បានចែករំលែក។

ទន្ទឹមនឹងនោះ កម្លាំងចលកររៀនភាសាវៀតណាមរបស់លោក Sakai Norihiro មានប្រភពចេញពីក្តីស្រឡាញ់ចំពោះប្រទេសជាតិ និងមនុស្សវៀតណាម។ បុរសជនជាតិជប៉ុនវ័យ ៤៥ ឆ្នាំរូបនេះ ធ្លាប់បានមកកាន់ប្រទេសវៀតណាមជិត ១០០ លើក។ អនុស្សាវរីយ៍នានាតាមរយៈដំណើរនីមួយៗបានធ្វើឱ្យលោកចង់រៀនភាសាវៀតណាម ដើម្បីយល់ដឹងកាន់តែច្បាស់អំពីប្រទេសដែលខ្លួនស្រឡាញ់ចូលចិត្ត។

លោក Sakai Norihiro បានឱ្យដឹងថារីករាយយ៉ាងខ្លាំងនៅពេលបានចូលរួមការប្រឡង ហើយចាត់ទុកថានេះមិនត្រឹមតែជាការប្រឡងភាសាប៉ុណ្ណោះទេ ប៉ុន្តែថែមទាំងជានិមិត្តរូបសម្រាប់ការអភិវឌ្ឍនៃទំនាក់ទំនងមិត្តភាពវៀតណាម - ជប៉ុន ផងដែរ។

ការប្រឡងលើកនេះត្រូវបានរៀបចំឡើងតាមទម្រង់សាកល្បង ដោយមានបន្ទប់ប្រឡងលើកុំព្យូទ័រមួយ សម្រាប់បេក្ខជនចំនួន ២៥ នាក់។

«ខ្ញុំសង្ឃឹមថានឹងមានជនជាតិជប៉ុនកាន់តែច្រើនឡើងរៀនភាសាវៀតណាម ដើម្បីយល់ដឹងកាន់តែច្បាស់អំពីវប្បធម៌ និងមនុស្សវៀតណាម» លោក Sakai Norihiro បានសម្តែងនូវចំណាប់អារម្មណ៍។

ចាប់ពីកុមារីជនជាតិវៀតណាមម្នាក់ដែលរស់នៅប្រទេសជប៉ុន រហូតដល់ពលរដ្ឋជប៉ុនម្នាក់ដែលធ្លាប់បានមកកាន់ប្រទេសវៀតណាមជាច្រើនលើក រឿងរ៉ាវនានានៅក្នុងការប្រឡងបានបង្ហាញឱ្យឃើញថា ភាសាវៀតណាមកំពុងត្រូវបានខិតជិតចេញពីកម្លាំងចលករផ្សេងៗគ្នា ប៉ុន្តែសុទ្ធតែបានជួបគ្នាត្រង់ក្តីស្រឡាញ់ ការចង់ដឹងចង់ឃើញ និងបំណងប្រាថ្នាតភ្ជាប់ជាមួយវៀតណាម៕

ការតភ្ជាប់បញ្ញវន្តវៀតណាមនៅតៃវ៉ាន់ ជំរុញកិច្ចសហប្រតិបត្តិការនិងការច្នៃប្រឌិតផ្លាស់ប្តូរថ្មី យុគសម័យ - បណ្តាញច្នៃប្រឌិតផ្លាស់ប្តូរថ្មីនិងបញ្ញវន្តវៀតណាមនៅតៃវ៉ាន់ (VIN Taiwan) នាពេលថ្មីៗនេះបានសហការជាមួយមជ្ឈមណ្ឌលច្នៃប្រឌិតផ្លាស់ប្តូរថ្មីជាតិ (NIC) និងកម្មវិធីអាហារូបករណ៍ INTENSE ចាត់តាំងការជួបជុំសហគមន៍បញ្ញវន្តវៀតណាមនៅតៃវ៉ាន់ (ចិន) ឆ្នាំ ២០២៦ នេះគឺជាព្រឹត្តិការណ៍តភ្ជាប់និងផ្លាស់ប្តូរប្រចាំឆ្នាំខ្នាតធំរបស់សហគមន៍បញ្ញវន្តវៀតណាមដែលកំពុងសិក្សា ស្រាវជ្រាវនិងធ្វើការនៅតៃវ៉ាន់។

Futsal Summer Cup 2026៖ ផ្សព្វផ្សាយនិងពង្រីកស្មារតីសាមគ្គីភាពរបស់ប្រជាជនវៀតណាមនៅប្រទេសកូរ៉េខាងត្បូង យុគសម័យ - នៅទីក្រុង Daegu (ប្រទេសកូរ៉េខាងត្បូង) ព្រឹត្តិការណ៍ប្រកួតកីឡាបាល់ទាត់ Futsal Summer Cup 2026 ទើបតែបានប្រព្រឹត្តទៅប្រកបដោយជោគជ័យជាមួយការចូលរួមរបស់ក្រុមបាល់ទាត់ចំនួន ១៦ ដែលតំណាងឱ្យមូលដ្ឋាននិងសហគមន៍ប្រជាជនវៀតណាមយ៉ាងច្រើនកុះករប្រចាំនៅប្រទេសកូរ៉េខាងត្បូង។

ឌឿងង្វៀន

thoidai.com.vn