យុគសម័យ- ក្រុមហ៊ុន Vina T&T Group នឹងនាំចេញដូងស្រស់ចំនួន ២០,០០០ ផ្លែទៅកាន់ទីផ្សារចក្រភពអង់គ្លេស ក្រូចថ្លុងចំនួន ១២ តោនទៅកាន់ប្រទេសអាឡឺម៉ង់និងផ្លែស្រកានាគចំនួន ៣ តោនទៅកាន់ទីផ្សារប្រទេសហូឡង់ តាមកិច្ចព្រមព្រៀង EVFTA ។
ប្រតិភូត្រួតពិនិត្យការដឹកជញ្ជូន មុនពេលនាំចេញ។ (រូបថត៖ ទីភ្នាក់ងារសារព័ត៌មានវៀតណាម)
នារសៀលថ្ងៃទី ១៧ ខែកញ្ញា នៅរោងចក្រវេចខ្ចប់ Vina T&T Group ស្រុក Chau Thanh ខេត្ត Ben Tre ក្រសួងកសិកម្មនិងអភិវឌ្ឍន៍ ជនបទបានសហការជាមួយគណៈកម្មាធិការប្រជាជនខេត្ត Ben Tre រៀបចំពិធីប្រកាស ការនាំចេញផលិតផលផ្លែឈើដំបូងរបស់វៀតណាមទៅកាន់ទីផ្សារអឺរ៉ុប តាមកិច្ចព្រមព្រៀងពាណិជ្ជកម្មសេរីវៀតណាម - សហភាពអ៊ឺរ៉ុប (EVFTA) ។
លោក Nguyen Dinh Tung អគ្គនាយកក្រុមហ៊ុន Vina T&T Group បានមានប្រសាសន៍ថា បន្ទាប់ពីការចរចាជាងមួយខែ ក្រុមហ៊ុននេះនឹងនាំចេញដូងស្រស់ចំនួន ២ ម៉ឺនផ្លែទៅទីផ្សារចក្រភពអង់គ្លេស ក្រូចថ្លុងចំនួន ១២ តោនទៅកាន់ទីផ្សារអាឡឺម៉ង់ និងផ្លែស្រកានាគចំនួន៣ តោនទៅកាន់ទីផ្សារហូឡង់ដោយផ្លូវអាកាស ។ ជាពិសេស ចាប់តាំងពីកិច្ចព្រមព្រៀង EVFTA បានចុះហត្ថលេខា ក្រុមហ៊ុនទទួលបានការបញ្ជាទិញជាច្រើនពីបណ្តាប្រទេសអ៊ឺរ៉ុប ប៉ុន្តែដោយសារឥទ្ធិពលនៃការរីករាលដាលនៃជំងឺ COVID-19ក្រុមហ៊ុនបាននាំចេញតែផលិតផលផ្លែឈើក្នុងកម្រិតមធ្យម។
ថ្លែងនៅក្នុងពិធីនេះអនុរដ្ឋមន្រ្តីក្រសួងកសិកម្មនិងអភិវឌ្ឍន៍ជនបទលោក Le Quoc Doanh បានមានប្រសាសន៍ថា កិច្ចព្រមព្រៀង EVFTA បានបើកចេញឱកាសដ៏ល្អសម្រាប់កសិផលជាទូទៅនិងសម្រាប់ផ្លែឈើជាពិសេសនៅក្នុងប្រទេសវៀតណាម។
យោងតាមស្ថិតិរបស់ក្រសួងកសិកម្មនិងអភិវឌ្ឍន៍ជនបទ បន្ទាប់ពីរយៈពេលជាងមួយខែ កិច្ចព្រមព្រៀង EVFTA បានចូលជាធរមាននិងត្រូវបានអនុវត្ត ផលិតផលនាំចេញរបស់វៀតណាមជាច្រើនដែលមានការផ្លាស់ប្តូរជាវិជ្ជមាននៅក្នុងទីផ្សារសហភាពអឺរ៉ុប។ ក្នុងនោះកសិផលមួយចំនួនត្រូវបាននាំចេញទៅសហភាពអ៊ឺរ៉ុប ដូចជា បង្គានៅខេត្ត Ninh Thuan កាហ្វេ ផ្លែផាសិននៅខេត្ត Gia Lai។
បច្ចុប្បន្ននេះ មានបន្លែនិងផ្លែឈើវៀតណាមប្រមាណ ៤០ ប្រភេទដែលត្រូវបាននាំចេញទៅកាន់ប្រទេសនិងដែនដីចំនួន ៦០។ ក្រៅពីទីផ្សារប្រពៃណី ផ្លែឈើវៀតណាមបានបញ្ជាក់ជាបណ្តើរ ៗ នូវគុណភាពរបស់ខ្លួន ដោយដណ្តើមទីផ្សារដែលលំបាក ដូចជាសហរដ្ឋអាមេរិក សហភាពអឺរ៉ុប ប្រទេសជប៉ុ នប្រទេសកាណាដា ប្រទេសអូស្ត្រាលីនិងប្រទេសនូវែលសេឡង់។
កែច្នៃនិងវេចខ្ចប់ដូងសម្រាប់ការនាំចេញ។ (រូបថត៖ ទីភ្នាក់ងារសារព័ត៌មានវៀតណាម)
គួរកត់សម្គាល់ថា ផ្លែឈើគឺជាមុខទំនិញនាំចេញសំខាន់មួយរបស់វៀតណាម នៅទីផ្សារអឺរ៉ុប។ តាមនោះក្នុងរយៈពេល ៧ ខែដើមឆ្នាំ ២០២០ ការនាំចេញផ្លែឈើបានកើនឡើងដល់ ៥៩,១៨ លានដុល្លារអាមេរិក (ស្មើនឹង ៧៣.៥៤% នៃតម្លៃនាំចេញបន្លែផ្លែឈើសរុបទៅសហភាពអឺរ៉ុប) ។ គេរំពឹងថា ការនាំចេញផ្លែឈើរបស់វៀតណាមទៅកាន់សហភាពអ៊ឺរ៉ុប ចាប់ពីពេលនេះដល់ដំណាច់ឆ្នាំ ២០២០ នឹងបន្តកើនឡើងបើទោះបីមានផលប៉ះពាល់ពីការរីករាលដាលនៃ COVID-១៩ ក៏ដោយ./.
（បកប្រែដោយឌីណា）
មតិពីមិត្តអ្នកអាន