យុគសម័យ- អញ្ជើញចូលរួក្នុងសម័យប្រជុំលើកទី ៧៣ នៃមហាសន្និបាតអង្គការសុខភាពពិភពលោក (WHO) ( បានរៀបតាមរយៈបណ្តាញអនឡាញ ក្នុងរយៈពេលពីរថ្ងៃចាប់ពីថ្ងៃទី ១៨ ដល់ថ្ងៃទី១៩ ខែឧសភា) រួមមាន ថ្នាក់ដឹកនាំវិស័យសុខាភិបាលចំនួន ១៥០ ប្រទេស និងភ្ញៀវកត្តិយសជាថ្នាក់ដឹកនាំចំនួន ១៥ នាក់ដែលមកពី ១៥ ប្រទេស។
លោកនាយរដ្ឋមន្ត្រី Nguyen Xuan Phuc អញ្ជើញចូលរួក្នុងសម័យប្រជុំលើកទី ៧៣ នៃមហាសន្និបាតអង្គការសុខភាពពិភពលោក។ (រូបថត៖ Thong Tin Chinh phu)
ដោយសមិទ្ធិផលវិជ្ជមានដែលទទួលបានក្នុងការប្រយុទ្ធប្រឆាំងនឹងជំងឺរាតត្បាត COVID-19 ក៏ដូចជាតួនាទីជាប្រធានអាស៊ាន ២០២០ និងសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ២០២០-២០២១ លោកនាយករដ្ឋមន្ត្រី Nguyen Xuan Phuc គឺជាមេដឹកនាំម្នាក់ ក្នុងចំណោម មេដឹកនាំពីរបីនាក់ដែលបានអញ្ជើញ ដោយលោកអគ្គនាយកអង្គការសុខភាពពិភពលោក ដើម្បីថ្លែងសន្ទរកថា នៅឯមហាសន្និបាតអង្គការសុខភាពពិភពលោក នៅឆ្នាំនេះ។
លោកនាយករដ្ឋមន្រ្តីបានអធ្យាស្រ័យនិងចែករំលែកយ៉ាងជ្រាលជ្រៅដល់រដ្ឋាភិបាលនិងប្រជាជននៃបណ្តាប្រទេស ចំពោះការបាត់ បង់ដ៏ធំធេងដែលបណ្តាលមកពីជំងឺរាតត្បាត Covid-19 ។ សូមថ្លែងអំណរគុណ ចំពោះគ្រូពេទ្យទាំងអស់ អ្នកធ្វើការនៅជួរមុខប្រឆាំងនឹងការរីករាលដាលដើម្បីសុខភាពនិងសុវត្ថិភាពរបស់ប្រជាជនទាំងអស់។
លោកនាយករដ្ឋមន្រ្តី Nguyen Xuan Phuc បានចែករំលែកថា រដ្ឋាភិបាល វៀតណាមបានដឹងអំពី គ្រោះថ្នាក់នៃការរីករាលដាលនៃជំងឺរាតត្បាត Covid-19 នៅពេលឆាប់ៗនិងមានសកម្មភាពតាមទិសស្លោក“ ប្រយុទ្ធប្រឆាំងនឹងជំងឺរាតត្បាតដូចជាការប្រយុទ្ធប្រឆាំងនឹងសត្រូវ” ការប្រមូលផ្តុំការចូលរួមរបស់អាជ្ញាធរគ្រប់លំដាប់ថ្នាក់និងប្រព័ន្ធសុខាភិបាលជាត អ្នកវិទ្យាសាស្ត្រការគាំទ្ររបស់យោធា ... រួមគ្នា ដើម្បីអនុវត្តវិធានការដាក់ឲ្យនៅដាច់ដោយឡែកប្រកបដោយម៉ត់ចត់ រួមបញ្ចូលការគ្រប់គ្រងប្រភពចម្លងជំងឺ រកឃើញអ្នកដែលប៉ះផ្ទាល់នឹងអ្នកជំងឺ ធ្វើតេស្តនិងការព្យាបាលជំងឺ។
រដ្ឋាភិបាលបាន “ លះបង់ប្រយោជន៍សេដ្ឋកិច្ចក្នុងរយៈពេលខ្លី ដើម្បីការពារសុខភាពនិងសុវត្ថិភាពប្រជាជន” ។ គោលនយោបាយនិងវិធានការប្រឆាំងនឹងជំងឺ COVID-19 របស់រដ្ឋាភិបាលបានគាំទ្រដោយសាធារណជន។
រហូតមកដល់ពេលនេះប្រទេសវៀតណាមគឺជាប្រទេសមួយដែលមានប្រជាជនជិត ១០០ លាននាក់ ហើយបានធ្វើសមាហរណកម្មយ៉ាងទូលំទូលាយក្នុងតំបន់និងពិភពលោក ក៏តែមានតែករណីឆ្លងជាង ៣២០ ករណីហើយគ្មានអ្នកស្លាប់នៅឡើយ។ ហើយថ្ងៃនេះគឺជាថ្ងៃទី ៣៣ ជាប់ៗគ្នា ដែលប្រទេសវៀតណាមមិនបានកត់ត្រាករណីថ្មីនៅក្នុងសហគមន៍។
ជាមួយនឹងការគ្រប់គ្រងបានល្អនៃការរីករាលដាលនៃជំងឺរាតត្បាត Covid-19 ប្រទេសវៀតណាមបានឈានចូលទៅក្នុង“ស្ថានភាពធម្មតាតាមបែបថ្មី” ដោយផ្តោតលើការស្តារឡើងវិញការអភិវឌ្ឍសេដ្ឋកិច្ច និងមិនធ្វេសប្រហែសក្នុងការប្រយុទ្ធប្រឆាំងនឹងជំងឺរាតត្បាត Covid-19 ប្រកបដោយប្រសិទ្ធភាព ។ ក្នុងស្មារតីសហប្រតិបត្តិការនិងចែករំលែក ក្នុងគ្រាលំបាក រដ្ឋាភិបាលសហគ្រាសនិងប្រជាជនវៀតណាមបានជួយគាំទ្រយ៉ាងជាក់ស្តែងនិងទាន់ពេលវេលា ម៉ាស់ សម្ភារៈបរិក្ខារពេទ្យដែលផលិតដោយវៀតណាមនិងចែករំលែកនូវបទពិសោធន៍ជាមួយបណ្តាប្រទេសជាច្រើន ជាពិសេសប្រទេសដែលរងផលប៉ះពាល់យ៉ាងធ្ងន់ធ្ងរពីជំងឺរាតត្បាតនេះ។
លោកនាយករដ្ឋមន្រ្តី Nguyen Xuan Phuc បានមានប្រសាសន៍ថាជាងពេលណាៗទាំងអស់ ប្រទេសនានាត្រូវពង្រឹងសាមគ្គីភាពអន្តរជាតិប្រមូលធនធាននិងឆ្លើយតបនឹងជំងឺរាតត្បាតនេះ ប្រកបដោយប្រសិទ្ធភាព ។ ទន្ទឹមនឹងការខិតខំ ដើម្បីដោះស្រាយផលវិបាកធ្ងន់ធ្ងរដែលបណ្តាលមកពីការរីករាលដាលនៃជំងឺ COVID-19 ប្រទេសនានាចាំបាច់ត្រូវមានផែនការអភិវឌ្ឍន៍ក្រោយបញ្ចប់ការរីករាលដាលនៃជំងឺនេះ គាំទ្រដល់សហគ្រាសដើម្បីស្តារផលិតកម្មនិងអាជីវកម្មឡើងវិញ ដែលផ្សារភ្ជាប់ជាមួយការធានាសន្តិសុខសង្គមសម្រាប់ប្រជាជន។ ជាពិសេសគឺប្រជាជនក្រីក្រនិងក្រុមប្រជាជនងាយរងគ្រោះ មិនអាចត្រូវទុកចោលនរណាម្នាក់នៅខាងក្រោយបានទេ។
ក្នុងនាមជាប្រធានអាស៊ាន ២០២០ ប្រទេសវៀតណាមបានអញ្ជើញធ្វើជាអធិបតីនិងចូលរួមក្នុងកិច្ចពិភាក្សាជាច្រើន កិច្ចខិតខំប្រឹងប្រែងដើម្បីស្វែងរកសំលេងរួម និងមានគំនិតផ្តួចផ្តើមនានាដើម្បីជំរុញសកម្មភាពរួមគ្នាក្នុងការបង្ការនិងប្រយុទ្ធប្រឆាំងនឹងជំងឺ COVID-19 ការគាំទ្រ ប្រជាជននិងការងើបឡើងវិញនៃសេដ្ឋកិច្ច ក្រោយបញ្ចប់ការរីករាលដាលនៃជំងឺនេះ។
លោកនាយករដ្ឋមន្រ្តីបានបង្ហាញជំនឿយ៉ាងមុតមាំថា ដោយប្រឈមមុខនឹងបញ្ហាប្រឈមធ្ងន់ធ្ងរបំផុតចាប់តាំងពីការបង្កើតអង្គការសហប្រជាជាតិនិងអង្គការសុខភាពពិភពលោក សហគមន៍អន្តរជាតិនឹងបន្តលើកកម្ពស់ឆន្ទៈនិងកម្លាំងរបស់ប្រជាជាតិនីមួយៗក៏ដូចជាស្មារតីនៃសាមគ្គីភាព
កិច្ចសហប្រតិបត្តិការអន្តរជាតិដ៏រឹងមាំ ដើម្បីជំនះ រួមគ្នាកសាងអនាគតល្អប្រសើរសម្រាប់ប្រទេសនីមួយៗនិងប្រជាជនគ្រប់រូប./.（បកប្រែដោយឌីណា）
មតិពីមិត្តអ្នកអាន