ការងារបង្កបង្កើនផលស្រូវរដូវប្រាំងនៅទូទាំងប្រទេស ក្នុងឆ្នាំ២០២០នេះ បានបញ្ចប់ហើយ ដោយសម្រេចបានចំនួន៥៩៧,៥០៨ហិកតា ស្មើនឹង១៣០ភាគរយនៃផែនការ។
វាលស្រែមួយកំពុងក្នុងរដូវប្រមូលផលស្រូវ។ (រូបថត៖ thmey thmey.com)
រីឯការប្រមូលផលស្រូវប្រាំងវិញ សម្រេចបានចំនួន ៥៩២,១២៨ ហិកតា និងបានទិន្នផលស្រូវចំនួន ២,៦១៦,២៥៣តោន។ នេះបើយោងតាមរបាយការណ៍ស្ដីពីសភាពការណ៍កសិកម្ម របស់ក្រសួងកសិកម្ម រុក្ខាប្រមាញ់ និងនេសាទ ក្នុងត្រីមាសទី១ ឆ្នាំ២០២០។
តាមរបាយការណ៍ដដែល គិតត្រឹមត្រីមាសទី១ ឆ្នាំ២០២០នេះ ផ្ទៃដីភ្ជួររាស់សម្រេចបានចំនួន ៦០២,៣៣២ ហិកតា ដែលភាគច្រើនប្រើប្រាស់គ្រឿងយន្ត ពោលគឺការភ្ជួររាស់ដោយគោ-ក្របីធ្វើបានតែ ៤, ២៦៦ ហិកតាប៉ុណ្ណោះ។ ចំណែកផ្ទៃដីសាបវិញ សម្រេចបាន៧៤ហិកតាប៉ុណ្ណោះ តិចជាងឆ្នាំមុនចំនួន៩៨ហិកតា។
សូមជម្រាបថា របាយការណ៍ផ្លូវការរបស់លេខាធិការដ្ឋានច្រកចេញចូលតែមួយ សម្រាប់បំពេញបែបបទនាំចេញ បានបញ្ជាក់ថា នៅរយៈពេល ៤ ខែដំបូងដើមឆ្នាំនេះ កម្ពុជានាំចេញអង្ករបានចំនួន៣០ម៉ឺនតោន កើនឡើង៤០ភាគរយ បើធៀបនឹងរយៈពេលដូចគ្នាកាលពីឆ្នាំមុន៕
(បូកសរុបដោយឌីណា)
មតិពីមិត្តអ្នកអាន