ឯកអគ្គរាជទូត ម៉ាឡេស៊ីប្រចាំនៅកម្ពុជា បានលើកទឹកចិត្តដល់ប្រជាជនកម្ពុជាយកចិត្តទុកដាក់ថែរក្សាការពារសុខភាពឲ្យល្អ ដើម្បីប្រយុទ្ធប្រឆាំងជំងឺកូវីដ-១៩ ឲ្យបាត់ពីពិភពលោក។
ពិធីប្រគល់អំណោយ។
កាលពីព្រឹកថ្ងៃទី២៧ ខែមេសា ឆ្នាំ២០២០ លោក Eldeen Husaini Bin Mohd Hashim ឯកអគ្គរាជទូតនៃស្ថានទូតម៉ាឡេស៊ីប្រចាំព្រះរាជាណាចក្រកម្ពុជា បានកោតសរសើរចំពោះរាជរដ្ឋាភិបាល នៃព្រះរាជាណាចក្រកម្ពុជា ចំពោះវិធីសាស្ត្រ និងគោលនយោបាយនានា ដែលកំពុងតែអនុវត្តក្នុងការដោះស្រាយនូវមេរោគរាតត្បាតមួយនេះទាន់ពេលវេលា។
លោកទូត ក៏បានសរសើរផងដែរ ដល់ប្រជាជនកម្ពុជា មានការគោរព អនុវត្តតាមច្បាប់ និងបទបញ្ជាដែលរាជរដ្ឋាភិបាលបានកំណត់ ដើម្បីកុំឲ្យមានការរាតត្បាតពីមេរោគនេះជាទ្រង់ទ្រាយធំ។
លោកទូតបានបន្ថែមថា «បុគ្គលម្នាក់ៗ អាចប្រឆាំងនឹងជំងឺនេះបាន ប៉ុន្តែយើងមិនអាចផ្ដួលវាបានទេ ប្រសិនបើយើងគ្រប់គ្នាមិនបោះបង់ចោលនូវទម្លាប់ភាពរើសអើង ហើយងាកមករួបរួមសាមគ្គីគ្នាវិញទេនោះ។ យើងព្យាយាមឲ្យមនុស្សទាំងអស់គ្នាយល់ថា បើទោះបីជាយើងមានសាសនា ឬក៏ជំនឿខុសពីគ្នាក៏ពិតមែន តែជំងឺនេះ វាមិនបានកើតឡើងខុសភាពគ្នារវាងអ្នកមាន ឬអ្នកក្រ សុខភាពល្អ ឬមិនល្អទេ តែវាគឺជាសត្រូវរបស់យើងម្នាក់ៗ»។
គួរបញ្ជាក់ថា កម្មវិធី “យើងយកចិត្តទុកដាក់ យើងចែករំលែក” ដែលផ្ដួចផ្ដើមឡើងដោយស្ថានទូតម៉ាឡេស៊ីប្រចាំព្រះរាជាណាចក្រកម្ពុជា មានការចូលរួមសហការដោយក្រុមប្រឹក្សាផ្សព្វផ្សាយទេសចរណ៍ម៉ាឡេស៊ី ដើម្បីបង្ហាញពីភាពសាមគ្គីគ្នា រវាងស្ថាប័នសុខាភិបាល និងសហគមន៍ នៅព្រះរាជាណាចក្រកម្ពុជា ក្នុងការចូលរួមចំណែកប្រយុទ្ធប្រឆាំងទប់ស្កាត់ជំងឺកូវីដ-១៩ ក៏ដូចជា ដើម្បីបង្ហាញ និងគាំទ្រ ចំពោះការខិតខំ ប្រឹងប្រែង របស់ក្រុមគ្រូពេទ្យស្ម័គ្រចិត្ត និងបុគ្គលិកដទៃ ដែលបានខិតខំបំពេញភារកិច្ច ដោយគ្មានការឈប់សម្រាក។
ជាក់ស្តែងនៅថ្ងៃទី២៦ និងថ្ងៃទី២៧ ខែមេសា ឆ្នាំ២០២០ ឯកអគ្គរាជទូត នៃស្ថានទូតម៉ាឡេស៊ី បានចូលរួមសួរសុខទុក្ខ និងជូនអំណោយដល់ស្ថាប័នជាច្រើនកន្លែងមានដូចជា ៖ អង្គភាពប្រយុទ្ធប្រឆាំងជំងឺកូវីដ-១៩ នៅមន្ទីរពេទ្រមិត្តភាព ខ្មែរ-សូវៀត, មជ្ឈមណ្ឌលជាតិផ្តល់ឈាម, មន្ទីរពេទ្យកុមារ គន្ធបុប្ផា និងវិទ្យាស្ថានប៉ាស្ទ័រកម្ពុជា ដើម្បីចូលរួមគាំទ្រ លើកទឹកចិត្តដល់រដ្ឋាភិបាលកម្ពុជា ក្នុងយុទ្ធនាការផ្សព្វផ្សាយអប់រំ និងប្រយុទ្ធប្រឆាំងជំងឺកូវីដ-១៩ ក្នុងប្រទេសកម្ពុជា។
លោក ឯកអគ្គរាជទូត នៃស្ថានទូតម៉ាឡេស៊ី បានមានប្រសាសន៍ថា នៅក្រោមកម្មវិធី “យើងយកចិត្តទុកដាក់ យើងចែករំលែក” មានន័យថា យើងយកចិត្តទុកដាក់ចំពោះអ្នកគ្រប់គ្នាដែលអាចជួយបាន, ដូចដែលជ្រាបហើយថា ប្រទេសម៉ាឡេស៊ី ក៏ដូចជាប្រទេសកម្ពុជាដែរ ប្រជាជនមានជំនឿ និងគោរពសាសនាផ្សេងៗគ្នា។ កម្មវិធីរបស់យើង បានបង្កើតឡើងដើម្បីបង្ហាញដល់ប្រជាជនដែលគោរពជំនឿខុសៗគ្នាយល់ដឹងពីមិត្តភាពម៉ាឡេស៊ី។
លោកទូតបានបន្ថែមថា «យើងនៅទីនេះជាមួយគ្នា, ការរួបរួមគ្នា នឹងអាចកម្ចាត់មេរោគនេះបាន ហើយវាក៏ជាសារចែករំលែកដែលយើងកំពុងតែអនុវត្តតាមរយៈកម្មវិធីសប្បុរសធម៌នានានេះផងដែរ»៕
（ប្រភពព័ត៌មាន: kampucheathmey）
មតិពីមិត្តអ្នកអាន