ការផ្តល់អនុសាសន៍ដើម្បីឱ្យប្រភពធនធានជនជាតិវៀតណាមនៅបរទេសហូរចូលមកកាន់រដ្ឋធានីយ៉ាងពិតប្រាកដ

ឯកអគ្គរដ្ឋទូត Nguyen Phu Binh អតីតអនុរដ្ឋមន្ត្រីក្រសួងការបរទេស និងជាប្រធានសមាគមទំនាក់ទំនងជនជាតិវៀតណាមនៅបរទេស៖

ការដាក់ចេញ "ប្រធានបទ" ជាក់លាក់ដើម្បីតភ្ជាប់ប្រភពធនធានជនជាតិវៀតណាមនៅបរទេស

ឯកអគ្គរដ្ឋទូត Nguyen Phu Binh អតីតអនុរដ្ឋមន្ត្រីក្រសួងការបរទេស និងជាប្រធានសមាគមទំនាក់ទំនងជនជាតិវៀតណាមនៅបរទេស។

ជនជាតិវៀតណាមនៅបរទេស គឺជាផ្នែកមួយដែលមិនអាចកាត់ផ្តាច់បាននៃប្រជាជាតិវៀតណាម ហើយទន្ទឹមនឹងនោះ ក៏ជាប្រភពធនធានដ៏សំខាន់សម្រាប់ការអភិវឌ្ឍប្រទេសជាតិ និងជាកត្តារួមចំណែកជំរុញទំនាក់ទំនងមិត្តភាព កិច្ចសហប្រតិបត្តិការរវាងវៀតណាមជាមួយបណ្តាប្រទេសនានា។ ហេតុដូច្នេះហើយ ប្រសិនបើចង់ទាក់ទាញបងប្អូនជនរួមជាតិឱ្យឆ្ពោះមកកាន់ស្រុកកំណើត មុនដំបូងបង្អស់ គឺចាំបាច់ត្រូវយកចិត្តទុកដាក់ឱ្យបានពេញលេញបន្ថែមទៀតចំពោះសិទ្ធិផលប្រយោជន៍ជាក់ស្តែង ផលប្រយោជន៍ស្របច្បាប់ និងការផ្សារភ្ជាប់ជិតស្និទ្ធយូរអង្វែងរបស់សហគមន៍ជាមួយនឹងប្រទេសជាតិ។

ការតភ្ជាប់នោះ មិនមែនស្ថិតនៅលើតែមនោសញ្ចេតនាឫសគល់ ខ្សែលោហិត ឬវប្បធម៌ប៉ុណ្ណោះទេ ប៉ុន្តែក៏ចាំបាច់ត្រូវតែពង្រឹងដោយផលប្រយោជន៍ និងមូលដ្ឋានគតិយុត្តដ៏សមស្របផងដែរ។ ចាំបាច់ត្រូវបង្កើតលក្ខខណ្ឌអំណោយផលដើម្បីឱ្យពួកគេទទួលបាននូវសិទ្ធិផលប្រយោជន៍ស្របច្បាប់នានាស្របតាមបទប្បញ្ញត្តិនៃច្បាប់ ចាប់តាំងពីសញ្ជាតិ ការទទួលមរតក ការវិនិយោគ ការធ្វើអាជីវកម្ម រហូតដល់បណ្តាបញ្ហាពាក់ព័ន្ធនានានៅពេលត្រឡប់មកប្រកបជីវភាពរស់នៅ ធ្វើការងារ ឬលះបង់រួមចំណែកដល់ប្រទេសជាតិ។ នៅពេលដែលត្រូវបានទទួលស្គាល់ និងប្រព្រឹត្តចំពោះដូចជាផ្នែកមួយនៃសហគមន៍ប្រជាជាតិ នោះស្មារតីនៃការផ្សារភ្ជាប់ និងការទទួលខុសត្រូវក្នុងការរួមចំណែករបស់បងប្អូនជនរួមជាតិចំពោះប្រទេសវៀតណាម នឹងកាន់តែមានភាពជ្រាលជ្រៅថែមទៀត។

ចំពោះទីក្រុងហាណូយ ប្រសិនបើចង់ពង្រីកប្រសិទ្ធភាពនៃបណ្តាញទំនាក់ទំនងជនជាតិវៀតណាមនៅបរទេស អ្វីដែលសំខាន់នោះគឺទីក្រុងចាំបាច់ត្រូវដាក់ចេញនូវ «ប្រធានបទ» ឱ្យបានជាក់លាក់បំផុត។ តើទីក្រុងហាណូយត្រូវការអ្នកជំនាញការនៅក្នុងវិស័យណា ត្រូវការតភ្ជាប់ទីផ្សារសម្រាប់មុខទំនិញណា ត្រូវការជំនួយជ្រោមជ្រែងវិនិយោគលើគម្រោងណា ត្រូវការផ្សព្វផ្សាយភាសាវៀតណាម ឬផ្សព្វផ្សាយវប្បធម៌តាមទិសដៅណា - រាល់តម្រូវការទាំងនោះកាន់តែច្បាស់លាស់ នោះបណ្តាអង្គការជនជាតិវៀតណាមនៅបរទេស សមាគមទំនាក់ទំនង និងស្ថាប័នតំណាងវៀតណាមនៅបរទេស កាន់តែមានមូលដ្ឋានដើម្បីតភ្ជាប់បានចំមនុស្ស និងចំការងារ។

ជាក់ស្តែងបានបង្ហាញឱ្យឃើញថា ប្រភពធនធានជាច្រើនអាចកៀរគរបាន ប្រសិនបើមានការសម្របសម្រួលគ្នាបានល្អ ចាប់តាំងពីការបង្រៀនភាសាវៀតណាម ការជួយជ្រោមជ្រែងផ្នែកគតិយុត្ត ការផ្តល់ប្រឹក្សាផ្នែកសញ្ជាតិ ការទទួលមរតក ការវិនិយោគ ការធ្វើអាជីវកម្ម រហូតដល់ការតភ្ជាប់អ្នកជំនាញការ ទីផ្សារ និងគម្រោងនានា។ សមាគមទំនាក់ទំនងជាមួយជនជាតិវៀតណាមនៅបរទេសមានបណ្តាញទំនាក់ទំនងយ៉ាងទូលំទូលាយ ដែលអាចធ្វើជាស្ពានចម្លងជាមួយបណ្តាសមាគមជនជាតិវៀតណាមនៅបរទេស ស្ថាប័នតំណាងវៀតណាមនៅបរទេស និងបណ្តាបុគ្គលឆ្នើមៗនៅក្នុងសហគមន៍។ ទោះជាយ៉ាងណាក៏ដោយ ដើម្បីឱ្យការតភ្ជាប់នោះឈានចូលទៅរកភាពជាក់ស្តែង ទីក្រុងហាណូយចាំបាច់ត្រូវម្ចាស់ការលើកឡើងនូវតម្រូវការ កំណត់ឱ្យបានច្បាស់លាស់នូវវិស័យអាទិភាព និងកសាងយន្តការសម្របសម្រួលជាប្រចាំរវាងភាគីនានា។

សាស្ត្រាចារ្យ បណ្ឌិត Nguyen Lan Trung អនុប្រធាន និងជាអគ្គលេខាធិការសមាគមទំនាក់ទំនងជាមួយជនជាតិវៀតណាមនៅបរទេស៖

ការកសាងទិន្នន័យស្តីពីជនជាតិវៀតណាមនៅបរទេស

សាស្ត្រាចារ្យ បណ្ឌិត Nguyen Lan Trung អនុប្រធាន និងជាអគ្គលេខាធិការសមាគមទំនាក់ទំនងជនជាតិវៀតណាមនៅបរទេស។

សហគមន៍ជនជាតិវៀតណាមនៅបរទេសដែលមានចំនួនជាង ៦,៥ លាននាក់ ក្នុងនោះមានបញ្ញវន្ត អ្នកជំនាញការ និងសហគ្រិនរាប់សែននាក់ គឺជាប្រភពធនធានដ៏ធំធេងសម្រាប់ព្រឹត្តិការណ៍អភិវឌ្ឍន៍របស់ប្រទេសជាតិ ក៏ដូចជារដ្ឋធានីហាណូយផងដែរ។ ទោះជាយ៉ាងណាក៏ដោយ ដើម្បីឱ្យប្រភពធនធាននេះត្រូវបានពង្រីកពង្រឹងយ៉ាងពិតប្រាកដ អ្វីដែលសំខាន់ដំបូងបង្អស់គឺត្រូវកសាងឱ្យបាននូវប្រព័ន្ធទិន្នន័យដ៏ពេញលេញមួយស្តីពីជនជាតិវៀតណាមនៅបរទេសដែលមានបំណងប្រាថ្នា សមត្ថភាព និងលក្ខខណ្ឌក្នុងការរួមចំណែកដល់ទីក្រុងហាណូយ។

ទិន្នន័យទាំងនោះមិនគួរកម្រិតត្រឹមតែអ្នកដែលមានដើមកំណើតនៅហាណូយនោះឡើយ ប៉ុន្តែចាំបាច់ត្រូវពង្រីកទៅដល់ជនជាតិវៀតណាមនៅបរទេសទាំងឡាយណាដែលមានមនោសញ្ចេតនា ការផ្សារភ្ជាប់ ឬមានបំណងចង់វិនិយោគ និងសហប្រតិបត្តិការជាមួយរដ្ឋធានី។ នៅពេលដែលមានប្រព័ន្ធទិន្នន័យដែលមានរបៀបរៀបរយ ទីក្រុងហាណូយនឹងម្ចាស់ការក្នុងការតភ្ជាប់ កៀរគរ និងប្រមូលផ្តុំបាននូវបណ្តាអ្នកជំនាញការ អ្នកវិទ្យាសាស្ត្រ និងសហគ្រិននៅក្នុងវិស័យជាក់លាក់នីមួយៗនៅពេលចាំបាច់។

ទន្ទឹមនឹងការស្រាវជ្រាវអំពីសក្តានុពលរបស់សហគមន៍ជនជាតិវៀតណាមនៅបរទេស ទីក្រុងហាណូយក៏ចាំបាច់ត្រូវស្រាវជ្រាវឱ្យបានហ្មត់ចត់អំពីបណ្តាវិស័យដែលកំពុងមានតម្រូវការទាក់ទាញប្រភពធនធានពីជនជាតិវៀតណាមនៅបរទេសផងដែរ។ ជំនួសឱ្យការឆ្ពោះទៅរកតែបណ្តាគម្រោងដែលមានទ្រង់ទ្រាយធំខ្លាំង ទីក្រុងអាចកសាងបញ្ជីឈ្មោះនៃកាលានុវត្តភាពវិនិយោគដ៏ជាក់ស្តែង សមស្របទៅនឹងសមត្ថភាពរបស់អាណិកជនភាគច្រើន ដូចជា ការអភិវឌ្ឍភូមិរបរប្រពៃណី ផលិតផល OCOP ទេសចរណ៍វប្បធម៌ សហគ្រាសធុនតូចនិងមធ្យម ឬបណ្តាគម្រោងនវានុវត្តន៍។

កត្តាមួយដែលមានសារៈសំខាន់មិនចាញ់គ្នានោះដែរ គឺការងារគមនាគមន៍។ ជនជាតិវៀតណាមនៅបរទេសជាច្រើនរូបតែងតែឆ្ពោះទៅរកស្រុកកំណើត ប៉ុន្តែមិនទាន់ទទួលបានព័ត៌មានពេញលេញអំពីទិសដៅអភិវឌ្ឍន៍ តម្រូវការសហប្រតិបត្តិការ ឬកាលានុវត្តភាពវិនិយោគនានារបស់ទីក្រុងហាណូយនៅឡើយទេ។ ហេតុដូច្នេះហើយ ចាំបាច់ត្រូវកសាងបណ្តាញព័ត៌មានជាប្រចាំ តភ្ជាប់ជាមួយស្ថាប័នតំណាងវៀតណាមនៅបរទេស និងបណ្តាសមាគមជនជាតិវៀតណាមនៅបរទេស ដើម្បីផ្សព្វផ្សាយព័ត៌មានឱ្យបានទូលំទូលាយ ជួយឱ្យអាណិកជនយល់ដឹងកាន់តែច្បាស់ថា តើពួកគេអាចរួមចំណែកអ្វីខ្លះសម្រាប់ការអភិវឌ្ឍរបស់រដ្ឋធានី។

ទន្ទឹមនឹងបណ្តាសកម្មភាពសេដ្ឋកិច្ច ទីក្រុងហាណូយក៏ចាំបាច់ត្រូវយកចិត្តទុកដាក់បន្ថែមទៀតចំពោះការថែរក្សាភាសាវៀតណាម ការផ្សព្វផ្សាយវប្បធម៌ជាតិនៅក្នុងសហគមន៍ជនជាតិវៀតណាមនៅបរទេស ជាពិសេសគឺជំនាន់វ័យក្មេង។ ក្នុងពេលជាមួយគ្នានោះដែរ អាចស្រាវជ្រាវរៀបចំព្រឹត្តិការណ៍ប្រចាំឆ្នាំនានាដែលផ្ទុកនូវអត្តសញ្ញាណដោយឡែករបស់រដ្ឋធានី ដើម្បីក្លាយជាចំណុចណាត់ជួបរបស់ជនជាតិវៀតណាមនៅបរទេសនៅទូទាំងពិភពលោក តាមរយៈនោះពង្រឹងការផ្សារភ្ជាប់ជិតស្និទ្ធយូរអង្វែងរវាងសហគមន៍ជនជាតិវៀតណាមនៅបរទេសជាមួយនឹងទីក្រុងហាណូយ។

លោក Nguyen Quoc Binh ប្រធានសមាគមទំនាក់ទំនងជាមួយជនជាតិវៀតណាមនៅបរទេស ទីក្រុងហាណូយ៖

ការបង្កើតប្រព័ន្ធអេកូឡូស៊ីការងារ

លោក Nguyen Quoc Binh ប្រធានសមាគមទំនាក់ទំនងជនជាតិវៀតណាមនៅបរទេស ទីក្រុងហាណូយ។

ប្រភពធនធានជនជាតិវៀតណាមនៅបរទេស មិនមែនស្ថិតនៅលើតែជួរអ្នកជំនាញការ និងអ្នកវិទ្យាសាស្ត្រដែលទទួលបានជោគជ័យមានឈ្មោះបោះសំឡេងរួចហើយនោះទេ ប៉ុន្តែក៏ស្ថិតនៅលើស្រទាប់បញ្ញវន្តវ័យក្មេង និស្សិតសិក្សានៅបរទេស និងពលករវៀតណាមដែលកំពុងសិក្សា និងធ្វើការនៅតាមបណ្តាប្រទេសជាច្រើននៅលើពិភពលោកផងដែរ។ នេះគឺជាកម្លាំងចលករដែលចាំបាច់ត្រូវយកចិត្តទុកដាក់តាំងពីដំបូងទី ដើម្បីបង្កើតជាប្រភពធនធានមនុស្សប្រកបដោយគុណភាពខ្ពស់សម្រាប់អនាគត។

បទពិសោធន៍របស់ប្រទេសជាច្រើនបានបង្ហាញឱ្យឃើញថា ការទាក់ទាញធនធានខួរក្បាលមិនអាចពឹងផ្អែកតែលើការអំពាវនាវជាទូទៅនោះឡើយ។ អ្វីដែលសំខាន់គឺត្រូវមានយុទ្ធសាស្ត្ររយៈពេលវែងចំពោះជំនាន់វ័យក្មេង បង្កើតលក្ខខណ្ឌអំណោយផលដើម្បីឱ្យពួកគេសន្សំសំចៃនូវចំណេះដឹង បទពិសោធន៍អន្តរជាតិ ហើយបន្ទាប់មកត្រូវមានយន្តការដ៏សមស្របដើម្បីឱ្យពួកគេត្រឡប់មកវិញរួមចំណែកដល់ស្រុកកំណើត។ នេះក៏ជាក្រុមគោលដៅដែលមានសមត្ថភាពចូលរួមដោយផ្ទាល់នៅក្នុងបណ្តាវិស័យវិទ្យាសាស្ត្របច្ចេកវិទ្យា នវានុវត្តន៍ និងការផ្លាស់ប្តូរឌីជីថល ដែលទីក្រុងហាណូយកំពុងផ្តល់អាទិភាពអភិវឌ្ឍន៍។

ទន្ទឹមនឹងការកំណត់មុខសញ្ញាគោលដៅ ទីក្រុងហាណូយក៏ចាំបាច់ត្រូវកសាងប្រព័ន្ធអេកូឡូស៊ីការងារមួយ សម្រាប់បម្រើដល់បណ្តាអ្នកជំនាញការ អ្នកវិទ្យាសាស្ត្រ និងសហគ្រិនជនជាតិវៀតណាមនៅបរទេស។ ប្រព័ន្ធអេកូឡូស៊ីនោះ មិនត្រឹមតែរួមបញ្ចូលទាំងបរិយាកាសស្រាវជ្រាវ នវានុវត្តន៍ និងកាលានុវត្តភាពសហប្រតិបត្តិការជាក់លាក់ប៉ុណ្ណោះទេ ប៉ុន្តែក៏ចាំបាច់ត្រូវមានស្ថាប័នជាច្រកចេញចូលសម្រាប់តភ្ជាប់ យន្តការជួយជ្រោមជ្រែងផ្នែកនីតិវិធីរដ្ឋបាល និងបណ្តាគោលនយោបាយលក្ខណៈពិសេស ដែលមានសមត្ថភាពប្រកួតប្រជែងគ្រប់គ្រាន់ដើម្បីទាក់ទាញអ្នកមានទេពកោសល្យ។ នៅពេលដែលជនជាតិវៀតណាមនៅបរទេសមើលឃើញពីឱកាសអភិវឌ្ឍន៍អាជីពការងារ បរិយាកាសការងារសមស្រប និងយន្តការច្បាស់លាស់ នោះការកៀរគរប្រភពធនធានមនុស្សប្រកបដោយគុណភាពខ្ពស់សម្រាប់រដ្ឋធានី នឹងក្លាយជាការណ៍ដែលអាចទៅរួច និងមានភាពចីរភាពជាងមុន។

ដើម្បីធ្វើការងារនេះបាន ចាំបាច់ត្រូវមានការចូលរួមចំណែកយ៉ាងស៊ីសង្វាក់គ្នាពីសំណាក់ប្រព័ន្ធនយោបាយទាំងមូល ស្ថាប័នគ្រប់គ្រងនានា សាកលវិទ្យាល័យ វិទ្យាស្ថានស្រាវជ្រាវ សហគ្រាស និងបណ្តាអង្គការសង្គម។ លុះត្រណែនតែបង្កើតបាននូវយន្តការសម្របសម្រួលដ៏ឯកភាពមួយ រួមជាមួយនឹងបណ្តាគោលនយោបាយដែលមានភាពទាក់ទាញគ្រប់គ្រាន់ ទើបទីក្រុងហាណូយអាចពង្រីកប្រសិទ្ធភាពនៃប្រភពធនធានជនជាតិវៀតណាមនៅបរទេស ដើម្បីបម្រើឱ្យការអភិវឌ្ឍរដ្ឋធានីនៅក្នុងដំណាក់កាលថ្មី។

លោកស្រី Le Thu Ha ប្រធានសមាគមមិត្តភាពវៀតណាម - ប៊ុលហ្គារី ទីក្រុងហាណូយ៖

ការបំប្លែងការតភ្ជាប់ជនជាតិវៀតណាមនៅបរទេសឱ្យទៅជាភារកិច្ចផ្លូវការរបស់បណ្តាសមាគមមិត្តភាព

លោកស្រី Le Thu Ha ប្រធានសមាគមមិត្តភាពវៀតណាម - ប៊ុលហ្គារី ទីក្រុងហាណូយ។

នៅក្នុងសកម្មភាពកិច្ចការបរទេសប្រជាជនរបស់ទីក្រុងហាណូយ រយៈពេលជាច្រើនឆ្នាំកន្លងមកនេះ បណ្តាសមាគមមិត្តភាពទ្វេភាគី និងពហុភាគី មិនត្រឹមតែតភ្ជាប់ជាមួយមិត្តភក្តិអន្តរជាតិ បណ្តាអង្គការប្រជាជន និងដៃគូបរទេសប៉ុណ្ណោះទេ ប៉ុន្តែនៅលើជាក់ស្តែង គឺថែមទាំងបានសម្របសម្រួលជាប្រចាំជាមួយសហគមន៍ជនជាតិវៀតណាមនៅក្នុងប្រទេសម្ចាស់ផ្ទះទៀតផង។ ចំពោះរាល់សកម្មភាពផ្លាស់ប្តូរ ប្រតិបត្តិការវប្បធម៌ អប់រំ បណ្តុះបណ្តាល ឬការតភ្ជាប់ប្រជាជននិងប្រជាជន ការសម្របសម្រួលគ្នារវាងសមាគមមិត្តភាព ស្ថាប័នតំណាងវៀតណាមនៅបរទេស សមាគមជនជាតិវៀតណាម និងដៃគូនៃប្រទេសមិត្ត សុទ្ធតែដើរតួនាទីយ៉ាងសំខាន់ក្រៃលែង។

ផ្អែកលើការអនុវត្តជាក់ស្តែងនោះ ការងារចលនា និងតភ្ជាប់ជនជាតិវៀតណាមនៅបរទេស ចាំបាច់ត្រូវតែចាត់ទុកជាភារកិច្ចផ្លូវការមួយរបស់សហភាពបណ្តាអង្គការមិត្តភាពទីក្រុងហាណូយ និងបណ្តាសមាគមជាសមាជិក ជំនួសឱ្យការគ្រាន់តែជាខ្លឹមសារដែលត្រូវបានយកមកអនុវត្តតាមសកម្មភាពជាក់លាក់នីមួយៗ។ នៅពេលដែលមុខសញ្ញាជនជាតិវៀតណាមនៅបរទេស ត្រូវបានកំណត់យ៉ាងច្បាស់លាស់នៅក្នុងមុខងារ និងភារកិច្ច នោះបណ្តាសមាគមមិត្តភាពនឹងមានមូលដ្ឋានដើម្បីម្ចាស់ការជាងមុន ក្នុងការតភ្ជាប់ ផ្លាស់ប្តូរព័ត៌មាន កៀរគរការចូលរួម និងពង្រីកតួនាទីជាស្ពានចម្លងរបស់សហគមន៍។

អ្វីដែលសំខាន់ គឺត្រូវកសាងឱ្យបាននូវយន្តការសម្របសម្រួលដ៏ច្បាស់លាស់មួយ រវាងសហភាពបណ្តាអង្គការមិត្តភាពទីក្រុងហាណូយ សមាគមទំនាក់ទំនងជាមួយជនជាតិវៀតណាមនៅបរទេសទីក្រុងហាណូយ បណ្តាសមាគមមិត្តភាពទ្វេភាគី ស្ថាប័នតំណាងវៀតណាមនៅបរទេស និងបណ្តាសមាគមជនជាតិវៀតណាមនៅបរទេស។ ប្រសិនបើមិនធ្វើការបំភ្លឺឱ្យបានច្បាស់លាស់អំពីស្ថាប័នជាច្រកចេញចូល មុខងារ និង របៀបរបប សម្របសម្រួលទេនោះ បណ្តាសកម្មភាពនឹងងាយរងការបែកខ្ញែក ជាន់គ្នាលើយន្តការការងារ ឬពឹងផ្អែកលើទំនាក់ទំនងដែលកើតឡើងដោយឯកឯងរបស់សមាគមនីមួយៗ និងតំបន់នីមួយៗ។

ទន្ទឹមនឹងយន្តការសម្របសម្រួល ទីក្រុងហាណូយចាំបាច់ត្រូវកំណត់ឱ្យបានជាក់លាក់នូវបណ្តាវិស័យ ចំណុចខ្លាំង និងតម្រូវការអភិវឌ្ឍន៍ ដែលទីក្រុងមានបំណងចង់តភ្ជាប់ជាមួយនឹងប្រភពធនធានជនជាតិវៀតណាមនៅបរទេស។ បណ្តាសមាគមមិត្តភាពអាចបញ្ជូនព័ត៌មានប្រកបដោយប្រសិទ្ធភាពទៅកាន់មិត្តភក្តិអន្តរជាតិ និងសហគមន៍ជនជាតិវៀតណាមនៅបរទេស បានលុះត្រណែនតែដឹងច្បាស់ថា តើទីក្រុងហាណូយកំពុងត្រូវការអ្វីខ្លះ បានត្រៀមលក្ខណៈលើយន្តការគោលនយោបាយណាខ្លះ និងបរិយាកាសសហប្រតិបត្តិការយ៉ាងដូចម្តេច។ បណ្តាវិស័យដូចជា ទេសចរណ៍ ភូមិរបរ វិស័យម្ហូបអាហារ វប្បធម៌ អប់រំ និងការបណ្តុះបណ្តាល គឺជាចំណុចខ្លាំងទាំងឡាយដែលអាចក្លាយជាចំណុចតភ្ជាប់ដ៏ជាក់ស្តែងរវាងរដ្ឋធានី ជាមួយនឹងសហគមន៍ជនជាតិវៀតណាមនៅបរទេស។

នៅពេលដែលបណ្តាសមាគមមិត្តភាពត្រូវបានប្រគល់ភារកិច្ចយ៉ាងច្បាស់លាស់ មានស្ថាប័នជាច្រកចេញចូលសម្រាប់សម្របសម្រួលជាក់លាក់ និងទទួលបានការផ្តល់ព័ត៌មានយ៉ាងពេញលេញអំពីបណ្តាតម្រូវការរបស់ទីក្រុងហាណូយ នោះបណ្តាញទំនាក់ទំនងកិច្ចការបរទេសប្រជាជនរបស់រដ្ឋធានី នឹងមានលក្ខខណ្ឌបន្ថែមទៀតដើម្បីពង្រីកប្រសិទ្ធភាពក្នុងការតភ្ជាប់ ការចលនា និងការកៀរគរប្រភពធនធានជនជាតិវៀតណាមនៅបរទេស៕

ការប្រកួតកីឡាបាល់ទាត់សហគមន៍ប្រជាជនវៀតណាមនៅប្រទេសជប៉ុន យុគសម័យ - នាថ្ងៃទី ១៧ ខែឧសភា នៅមជ្ឈមណ្ឌលកីឡាដ្ឋានរួម Kashihara នៃរាជធានីចាស់ Nara (ប្រទេសជប៉ុន) បានប្រព្រឹត្តទៅការប្រកួតកីឡាបាល់ទាត់ចលនាមហាជន របស់សហគមន៍ប្រជាជនវៀតណាម ដែលកំពុងរស់នៅ សិក្សា និងធ្វើការនៅក្នុងតំបន់ Kansai។

ការរៀបចំការប្រឡងសមត្ថភាពភាសាវៀតណាមតាមស្តង់ដារជាតិនៅប្រទេសជប៉ុន យុគសម័យ - នាថ្ងៃទី ១៧ ខែឧសភា នៅទីស្នាក់ការអគ្គកុងស៊ុលវៀតណាមប្រចាំនៅ Osaka (ប្រទេសជប៉ុន) បានប្រព្រឹត្តទៅពិធីប្រកាសបើកឱ្យដំណើរការការប្រឡងវាយតម្លៃសមត្ថភាពភាសាវៀតណាម និងប្រគល់សេចក្តីសម្រេចបង្កើតក្រុមប្រឹក្សាប្រឡងសមត្ថភាពភាសាវៀតណាមនៅប្រទេសជប៉ុន។ ព្រឹត្តិការណ៍នេះបានកត់សម្គាល់ជាលើកដំបូងបង្អស់ ដែលការប្រឡងសមត្ថភាពភាសាវៀតណាមតាមស្តង់ដារជាតិរបស់វៀតណាម ត្រូវបានដាក់ឱ្យអនុវត្តនៅបរទេស។

ឌឹកអាញ់

thoidai.com.vn