វៀតណាម ចិន ឡាវ មីយ៉ាន់ម៉ា បើកយុទ្ធនាការទ្រង់ទ្រាយធំរួមគ្នា ដើម្បីបង្ក្រាបបទល្មើសគ្រឿងញៀន

ក្នុងបរិបទដែលបទល្មើសគ្រឿងញៀនឆ្លងដែនបន្តមានការវិវត្តន៍យ៉ាងស្មុគស្មាញនៅក្នុងតំបន់ ការដាក់ឱ្យអនុវត្តយុទ្ធនាការទ្រង់ទ្រាយធំរួមគ្នា ត្រូវបានវាយតម្លៃថាជាជំហានឈានជើងដ៏មានសារៈសំខាន់ សំដៅបង្កើនការសម្របសម្រួលជាក់ស្តែងរវាងកម្លាំងមានសមត្ថកិច្ចនានា ទន្ទឹមនឹងនោះបង្ហាញពីការប្តេជ្ញាចិត្តនយោបាយយ៉ាងមុតមាំរបស់បណ្តាប្រទេសនៅក្នុងការឆ្លើយតបទៅនឹងបញ្ហាប្រឈមសន្តិសុខមិនមែនប្រពៃណី។

ថ្លែងមតិនៅក្នុងសន្និសីទ នាយឧត្តមសេនីយ៍ទោ Nguyen Van Long អនុរដ្ឋមន្ត្រីក្រសួងនគរបាល បានសង្កត់ធ្ងន់ថា ជាមួយលក្ខណៈពិសេសជាបណ្តាប្រទេសជិតខាងដែលមានខ្សែបន្ទាត់ព្រំដែនរួមគ្នា និងរក្សាតួនាទីយុទ្ធសាស្ត្រដ៏មានសារៈសំខាន់នៅក្នុងតំបន់ វៀតណាម ចិន ឡាវ និងមីយ៉ាន់ម៉ា កំពុងទទួលរងនូវផលប៉ះពាល់ដោយផ្ទាល់ពីសកម្មភាពរបស់បណ្តាបណ្តាញបទល្មើសគ្រឿងញៀនឆ្លងដែន។

សន្និសីទដាក់ឱ្យអនុវត្តយុទ្ធនាការទ្រង់ទ្រាយធំក្នុងការឃោសនា និងសម្របសម្រួលវាយប្រហារ បង្ក្រាបបទល្មើសគ្រឿងញៀន រវាងវៀតណាម ចិន ឡាវ និងមីយ៉ាន់ម៉ា។

តាមប្រសាសន៍របស់ នាយឧត្តមសេនីយ៍ទោ Nguyen Van Long វៀតណាមតែងតែកំណត់ថា ការបង្ការ ទប់ស្កាត់គ្រឿងញៀន គឺជាភារកិច្ចនយោបាយមានសារៈសំខាន់ជាពិសេស ទាំងបន្ទាន់ និងយូរអង្វែង ព្រមទាំងជាការទទួលខុសត្រូវរបស់ប្រព័ន្ធនយោបាយទាំងមូល និងសង្គមទាំងមូលផងដែរ។ វៀតណាមទន្ទឹមនឹងនោះក៏តែងតែយកចិត្តទុកដាក់ខ្ពស់ចំពោះទំនាក់ទំនងមិត្តភាពប្រពៃណី សាមគ្គីភាព និងកិច្ចសហប្រតិបត្តិការគ្រប់ជ្រុងជ្រោយជាមួយចិន ឡាវ និងមីយ៉ាន់ម៉ា ដោយវាយតម្លៃខ្ពស់ចំពោះការសម្របសម្រួល និងការជួយជ្រោមជ្រែងយ៉ាងសកម្មរបស់បណ្តាប្រទេសនៅក្នុងការងារបង្ការ ទប់ស្កាត់គ្រឿងញៀនក្នុងរយៈពេលកន្លងមក។

«ជាមួយការប្តេជ្ញាចិត្តនយោបាយខ្ពស់របស់រដ្ឋាភិបាល និងកម្លាំងអនុវត្តច្បាប់នៃបណ្តាប្រទេស រួមជាមួយស្មារតីទទួលខុសត្រូវ ភាពជឿជាក់ និងការសម្របសម្រួលយ៉ាងជិតស្និទ្ធរវាងភាគីនានា យុទ្ធនាការទ្រង់ទ្រាយធំឆ្នាំ ២០២៦ នឹងសម្រេចបាននូវលទ្ធផលជាក់ស្តែងជាច្រើន រួមចំណែករក្សានូវសន្តិសុខ សណ្តាប់ធ្នាប់ និងការពារជីវភាពរស់នៅប្រកបដោយសេចក្តីសុខសាន្តរបស់ប្រជាពលរដ្ឋនៃប្រទេសនីមួយៗ» នេះជាការបញ្ជាក់របស់អនុរដ្ឋមន្ត្រី Nguyen Van Long។

នៅក្នុងសន្និសីទ តំណាងនៃប្រទេសទាំងបួនបានឯកភាពគ្នាអនុម័តលើផែនការសកម្មភាពរួម ដើម្បីដាក់ឱ្យអនុវត្តយុទ្ធនាការទ្រង់ទ្រាយធំក្នុងការឃោសនា និងសម្របសម្រួលវាយប្រហារ បង្ក្រាបបទល្មើសគ្រឿងញៀនឆ្នាំ ២០២៦ ជាមួយខ្លឹមសារជាក់លាក់ជាច្រើន។

យោងតាមនោះ ភាគីនានានឹងបង្កើនការវាយតម្លៃ និងត្រួតពិនិត្យលើស្ថានភាពផលិត ជួញដូរ និងដឹកជញ្ជូនគ្រឿងញៀន និងសារធាតុគីមីផ្សំដោយខុសច្បាប់ តាមរយៈការរឹតបន្តឹងការគ្រប់គ្រងនៅតាមតំបន់ព្រំដែន ច្រកទ្វារព្រំដែន ខ្សែផ្លូវគោក ផ្លូវទឹក ផ្លូវសមុទ្រ និងផ្លូវអាកាស។ ទន្ទឹមនឹងនោះ កម្លាំងមានសមត្ថកិច្ចនានានឹងសម្របសម្រួលគ្នាដើម្បីវាយប្រហារលើបណ្តាសំណុំរឿងជំនាញរួម ដោយផ្តោតសំខាន់លើបណ្តាញគ្រឿងញៀនឆ្លងដែន និងបណ្តាភូមិសាស្ត្រឆ្លងកាត់គន្លឹះៗ។

នាយឧត្តមសេនីយ៍ទោ Nguyen Van Long អនុរដ្ឋមន្ត្រីក្រសួងនគរបាល។

ខ្លឹមសារគួរឱ្យកត់សម្គាល់មួយទៀតនោះគឺ បណ្តាប្រទេសនឹងសម្របសម្រួលគ្នាក្នុងការត្រួតពិនិត្យឡើងវិញនូវបណ្តាមុខសញ្ញាដែលត្រូវតាមប្រមាញ់ ដែលសង្ស័យថាបានលួចលាក់គេចខ្លួននៅលើទឹកដីនៃប្រទេសមួយទៀត ដើម្បីធ្វើការផ្ទៀងផ្ទាត់ តាមចាប់ខ្លួន និងប្រគល់ជូនស្របតាមបទប្បញ្ញត្តិ។ ផ្អែកលើស្ថានភាពជាក់ស្តែង ភាគីនានាក៏នឹងសិក្សាស្រាវជ្រាវអំពីយន្តការចាត់តាំងបញ្ជូនកម្មាភិបាលទៅកាន់ប្រទេសម្ចាស់ផ្ទះ ក្រោមការយល់ព្រមពីប្រទេសទទួល ដើម្បីសម្របសម្រួលស៊ើបអង្កេតពង្រីកបណ្តាសំណុំរឿងគ្រឿងញៀនឆ្លងដែន តាមស្វែងរកមុខសញ្ញាជាមេខ្លោង និងបង្ក្រាបឱ្យបានទាំងស្រុងនូវបណ្តាញប្រព្រឹត្តបទល្មើសទាំងមូល។

ទន្ទឹមនឹងនោះដែរ បណ្តាប្រទេសបានឯកភាពគ្នាបង្កើនការគ្រប់គ្រងយ៉ាងតឹងរ៉ឹងលើបណ្តាសកម្មភាពស្របច្បាប់ដែលពាក់ព័ន្ធនឹងគ្រឿងញៀន ជាពិសេសគឺការត្រួតពិនិត្យលើបណ្តាសហគ្រាសនាំចេញ-នាំចូលសារធាតុគីមីផ្សំ និងសារធាតុគីមី ដើម្បីទប់ស្កាត់ហានិភ័យនៃការកេងប្រវ័ញ្ចយកទៅប្រើប្រាស់សម្រាប់សកម្មភាពផលិតគ្រឿងញៀនខុសច្បាប់។

យោងតាមផែនការ យុទ្ធនាការទ្រង់ទ្រាយធំនេះនឹងត្រូវដាក់ឱ្យអនុវត្តនៅតាមបណ្តាខេត្ត-ក្រុងដែលជាប់ព្រំដែនរវាង វៀតណាម - ឡាវ, វៀតណាម - ចិន, ចិន - ឡាវ, ឡាវ - មីយ៉ាន់ម៉ា, ចិន - មីយ៉ាន់ម៉ា រួមជាមួយភូមិសាស្ត្រគន្លឹះៗជាច្រើនទៀតនៅក្នុងប្រទេសទាំងបួន។

បណ្តាតំណាងទស្សនាពិព័រណ៍ស្តីពីការបង្ការ ទប់ស្កាត់គ្រឿងញៀន។

យោងតាមរបាយការណ៍ឆ្នាំ ២០២៥ របស់ការិយាល័យអង្គការសហប្រជាជាតិទទួលបន្ទុកគ្រឿងញៀន និងបទល្មើស (UNODC) តំបន់អាស៊ីបូព៌ា អាស៊ីអាគ្នេយ៍ និងប៉ាស៊ីហ្វិក បានកត់ត្រាបរិមាណគ្រឿងញៀនសំយោគដែលត្រូវបានរឹបអូស កើនឡើង ១៨% បើធៀបនឹងឆ្នាំ ២០២៤។ អ្វីដែលគួរឱ្យកត់សម្គាល់នោះគឺ តំបន់ត្រីកោណមាស នៅតែបន្តជាប្រភពផ្គត់ផ្គង់ដ៏ធំសម្រាប់គ្រឿងញៀនសំយោគជាច្រើនប្រភេទ។

នៅប្រទេសវៀតណាម ក្នុងឆ្នាំ ២០២៥ កម្លាំងនគរបាលស៊ើបអង្កេតបទល្មើសគ្រឿងញៀនទូទាំងប្រទេស បានវាយប្រហារបង្ក្រាបដោយជោគជ័យនូវសំណុំរឿងចំនួន ២១,៩៩៨ ករណី ចាប់ខ្លួនមុខសញ្ញាប្រព្រឹត្តបទល្មើសគ្រឿងញៀនចំនួន ៤៤,៣៥៤ នាក់; រឹបអូសបានហេរ៉ូអ៊ីន ចំនួន ២៧៦ គីឡូក្រាម, កញ្ឆាចំនួន ១,២៨០ គីឡូក្រាម, គ្រឿងញៀនសំយោគចំនួន ៤,៣៩៦ គីឡូក្រាម រួមជាមួយគ្រាប់គ្រឿងញៀនសំយោគចំនួន ២,០៩៦,២៥៩ គ្រាប់។

ដោយឡែក នៅក្នុងត្រីមាសទី ១ ឆ្នាំ ២០២៦ កម្លាំងមានសមត្ថកិច្ចនានាបានរកឃើញ និងចាត់ការលើករណីចំនួន ៧,៤២៤ ករណី ជាមួយមុខសញ្ញាចំនួន ១៤,៨១៣ នាក់; រឹបអូសបានហេរ៉ូអ៊ីនជាង ៥២ គីឡូក្រាម, កញ្ឆាចំនួន ១២៥.៩ គីឡូក្រាម, គ្រឿងញៀនសំយោគចំនួន ៤២៥.៩ គីឡូក្រាម, គ្រាប់គ្រឿងញៀនសំយោគជាង ៣៤៥,០០០ គ្រាប់ រួមជាមួយគ្រឿងញៀនប្រភេទផ្សេងៗទៀតចំនួន ៥១.៣ គីឡូក្រាម។

ពាក់ព័ន្ធនឹងកត្តាបរទេស ក្នុងឆ្នាំ ២០២៥ កម្លាំងមានសមត្ថកិច្ចវៀតណាមបានរកឃើញចំនួន ៧៧ ករណី ចាប់ខ្លួនមុខសញ្ញាជាជនបរទេសប្រព្រឹត្តបទល្មើសគ្រឿងញៀនចំនួន ៩៨ នាក់។

អ្វីដែលគួរឱ្យកត់សម្គាល់នោះគឺ សំណុំរឿងជំនាញ ១៣៥VL ដែលដឹកនាំដោយនាយកដ្ឋាននគរបាលស៊ើបអង្កេតបទល្មើសគ្រឿងញៀន សហការជាមួយបណ្តាអង្គភាពមានសមត្ថកិច្ចនៃប្រទេសវៀតណាម និងឡាវ ក្នុងការដាក់ឱ្យអនុវត្ត បានបង្ក្រាបដោយជោគជ័យនូវបណ្តាញជួញដូរ និងដឹកជញ្ជូនសារធាតុគីមីផ្សំដោយខុសច្បាប់ពីប្រទេសចិន ឆ្លងកាត់វៀតណាម ឡាវ ទៅកាន់មីយ៉ាន់ម៉ា ដើម្បីផលិតគ្រឿងញៀនសំយោគ។

កម្លាំងមានសមត្ថកិច្ចបានចាប់ខ្លួនមុខសញ្ញាចំនួន ១០ នាក់នៅវៀតណាម, ៦ នាក់នៅឡាវ និងរឹបអូសបានសារធាតុកាហ្វេអ៊ីន ចំនួន ៥០.៧ តោន។ តាមការវាយតម្លៃរបស់ស្ថាប័នមានសមត្ថកិច្ច បរិមាណសារធាតុគីមីផ្សំនេះ ប្រសិនបើត្រូវបានដឹកជញ្ជូនដោយជោគជ័យ គឺអាចយកទៅប្រើប្រាស់ដើម្បីផលិតគ្រឿងញៀនសំយោគជាគ្រាប់បានជាង ១៥០ តោន។ នេះត្រូវបានចាត់ទុកថាជាសំណុំរឿងជំនាញគំរូមួយ នៅក្នុងការងារវាយប្រហារទប់ស្កាត់តាំងពីដើមចមនៃប្រភពសារធាតុគីមីផ្សំ សម្រាប់បម្រើដល់សកម្មភាពផលិតគ្រឿងញៀនខុសច្បាប់៕

ប្រគល់ជិត ៤០០ លានដុង ដើម្បីជួយមីយ៉ាន់ម៉ាស្តារឡើងវិញបន្ទាប់ពីគ្រោះរញ្ជួយដី យុគសម័យ - នៅថ្ងៃទី ១៧ ខែមេសា នៅទីក្រុងហាណូយ គណៈប្រតិភូសមាគមមិត្តភាពវៀតណាម-មីយ៉ាន់ម៉ា (សមាគម) ដឹកនាំដោយឯកឧត្តម Chu Cong Phung ប្រធានសមាគម បានអញ្ជើញទៅកាន់ស្ថានទូតមីយ៉ាន់ម៉ាប្រចាំនៅវៀតណាម ដើម្បីប្រគល់ជូនទឹកប្រាក់ចំនួន ៣៩២,៣៧២,០៨៤ ដុង ក្នុងគោលបំណងជួយប្រជាជនមីយ៉ាន់ម៉ាស្តារឡើងវិញពីផលវិបាកនៃគ្រោះរញ្ជួយដីដ៏ធ្ងន់ធ្ងរដែលបានកើតឡើងនៅថ្ងៃទី ២៨ ខែមីនា កន្លងទៅ។

វៀតណាម៖ សិក្ខាសាលាវិទ្យាសាស្ត្រ «ពង្រឹងចំណងសាមគ្គីភាពនៃប្រទេសទាំងបី វៀតណាម - ឡាវ - កម្ពុជា ក្នុងស្ថានភាពថ្មី» នោះគឺជាប្រធានបទនៃសិក្ខាសាលាវិទ្យាសាស្ត្រថ្នាក់ជាតិ លើកទី ៣ ដែលរៀបចំដោយក្រសួងការពារប្រទេសវៀតណាមនាពេលថ្មីៗនេះ។ គម្រោងនេះ ដោយលោកនាយឧត្តមសេនីយ៍ បណ្ឌិត Phan Van Giang សមាជិកការិយាល័យនយោបាយ អនុលេខាគណៈកម្មាធិការបក្សយោធាមជ្ឈិម រដ្ឋមន្ត្រីក្រសួងការពារប្រទេស ជាប្រធាន។ លោកនាយឧត្តមសេនីយ៍ Nguyen Tan Cuong សមាជិកគណៈកម្មាធិការមជ្ឈិមបក្ស សមាជិកអចិន្ត្រៃយ៍នៃគណៈកម្មាធិការបក្សយោធាមជ្ឈិម ប្រធានអគ្គសេនាធិការនៃកងទ័ពប្រជាជនវៀតណាម អនុរដ្ឋមន្ត្រីក្រសួងការពារប្រទេស អនុប្រធានគម្រោង បានអញ្ជើញជាអធិបតីក្នុងសិក្ខាសាលានេះ

ឌឹកអាញ់

thoidai.com.vn