យុគសម័យ - នាថ្ងៃទី២៨ខែតុលា លោកស្រី Truong Thi Mai សមាជិកការិយាល័យនយោបាយមជ្ឈិមបក្ស លេខាមជ្ឈិមបក្ស និងជាប្រធានគណៈចលនាមហាជនមជ្ឈិមបក្សកុម្មុយនីស្តវៀតណាម បានបញ្ចប់ប្រកបដោយជោគជ័យនូវដំណើរទស្សនកិច្ចនៅព្រះរាជាណាចក្រកម្ពុជា ចាប់ពីថ្ងៃទី២៥ដល់ថ្ងៃទី២៨ខែតុលា តាមការអញ្ជើញរបស់គណៈកម្មាធិការកណ្តាលនៃគណៈបក្សប្រជាជនកម្ពុជា។
សម្តេច សាយឈុំ អញ្ជើញទទួលជួបជាមួយលោកស្រី Truong Thi Mai នៅវិមានព្រឹទ្ធសភា
ទិដ្ឋភាពនៃជំនួប
គណៈប្រតិភូថតរូបអនុស្សាវរីយ៍
ក្នុងក្របខ័ណ្ឌនៃដំណើរទស្សនកិច្ចនេះ នាព្រឹកថ្ងៃទី២៧ ខែតុលា ឆ្នាំ២០១៨ ប្រធានព្រឹទ្ធសភានៃព្រះរាជាណាចក្រកម្ពុជា សម្តេចវិបុលសេនាភក្តី សាយ ឈុំបានអញ្ជើញទទួលជួបជាមួយ លោកស្រី Truong Thi Mai នៅវិមានព្រឹទ្ធសភាផងដែរ។
នារសៀលថ្ងៃទីដដែល លោកស្រី Truong Thi Mai អញ្ជើញជួបសំណេះសំណាលនិងពិភាក្សាការងារជាមួយ លោកស្រី មាន សំអាន ប្រធានគណៈកម្មការទី៨ និងលោកជំទាវ ស៊ឹង ស៊ីយុត លេខាធិការគណៈកម្មការទី៧ព្រឹទ្ធសភា ជាមួយនឹងអាជ្ញាធរខេត្តសៀមរាបដឹកនាំឯកឧត្តម អ៉ឹង ហឿន ប្រធានស្តីទីក្រុមប្រឹក្សា នៅខេត្តសៀមរាបផងដែរ។
នាព្រឹកថ្ងៃទី២៨ ខែតុលា ឆ្នាំ២០១៨ លោកស្រី Truong Thi Mai និងគណប្រតិភូជាន់ខ្ពស់បក្សវៀតណាម បានអញ្ជើញទៅទស្សនាប្រាសាទតាព្រហ្ម ប្រាសាទបាយ័ន និងប្រាសាទអង្គរតូច នៅខេត្តសៀមរាប។
នាល្ងាចថ្ងៃដដែល គណៈប្រតិភូជាន់ខ្ពស់បក្សវៀតណាម ដឹកនាំដោយលោកស្រី Truong Thi Mai សមាជិកការិយាល័យនយោបាយមជ្ឈិមបក្ស លេខាមជ្ឈិមបក្ស និងជាប្រធានគណៈចលនាមហាជនមជ្ឈិមបក្សកុម្មុយនីស្តវៀតណាម បានបញ្ចប់ប្រកបដោយជោគជ័យនូវដំណើរទស្សនកិច្ចនៅព្រះរាជាណាចក្រកម្ពុជា៕
（យោងតាម FB Senate Spokesperson អ្នកនាំពាក្យព្រឹទ្ធសភា）
មតិពីមិត្តអ្នកអាន