យោងតាមលោក Nguyen Huy Tang ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសង្គមនិយមវៀតណាមប្រចាំនៅកម្ពុជា ទំនាក់ទំនងវៀតណាម-កម្ពុជានៅឆ្នាំ២០២៤ និងឆ្នាំបន្តបន្ទាប់ទៀតនឹងបន្តអភិវឌ្ឍយ៉ាងខ្លាំងក្លាលើគ្រប់វិស័យ។
 |
| ឯកអគ្គរដ្ឋទូតវៀតណាមប្រចាំនៅកម្ពុជាលោក Nguyen Huy Tang៖ ទំនាក់ទំនងវៀតណាម-កម្ពុជា នឹងបន្តអភិវឌ្ឍខ្លាំងនៅឆ្នាំ២០២៤ |
លោកឯកអគ្គរដ្ឋទូត Nguyen Huy Tang បានឲ្យដឹងថា ដោយផ្តើមចេញពីភូមិសាស្ដ្រ តួនាទី និងសារៈសំខាន់នៃទំនាក់ទំនងវៀតណាម-កម្ពុជា និងផ្អែកលើមូលដ្ឋាននៃសមិទ្ធផលដែលសម្រេចបានក្នុងរយៈពេលកន្លងមក និងក្រោមការដឹកនាំរបស់ថ្នាក់ដឹកនាំជាន់ខ្ពស់នៃប្រទេសទាំងពីរ ការចូលរួមចំណែករបស់ក្រសួង ស្ថាប័ន និងមូលដ្ឋាននានានៃប្រទេសទាំងពីរ ទំនាក់ទំនងវៀតណាម-កម្ពុជាក្នុងឆ្នាំ២០២៤ និងឆ្នាំបន្តបន្ទាប់ទៀតនឹងបន្តអភិវឌ្ឍយ៉ាងខ្លាំងក្លាលើគ្រប់វិស័យ។ លោកឯកអគ្គរដ្ឋទូត Nguyen Huy Tang បានរំលឹកឡើងវិញនូវលទ្ធផលលេចធ្លោក្នុងទំនាក់ទំនងវៀតណាម-កម្ពុជាឆ្នាំ២០២៣។
ទំនាក់ទំនងនយោបាយនិងកិច្ចការបរទេសត្រូវបានពង្រឹង និងពង្រីកតួនាទីជាតម្រង់ទិសសម្រាប់កិច្ចសហប្រតិបត្តិការគ្រប់ជ្រុងជ្រោយរវាងប្រទេសទាំងពីរ។ ដោយបន្តនូវព្រឹត្តិការណ៍ជាបន្តបន្ទាប់នៅក្នុងឆ្នាំមិត្តភាពវៀតណាម-កម្ពុជាឆ្នាំ ២០២២ ទំនាក់ទំនងនយោបាយឆ្នាំ ២០២៣ បន្តត្រូវបានពង្រឹងនិងពង្រីកយ៉ាងខ្លាំងក្លាលើបណ្តាញបក្ស រដ្ឋាភិបាល ក្រសួង ជាមួយនឹងការផ្លាស់ប្ដូរគណៈប្រតិភូ (ប្រមាណ ៦០ ដំណើរទស្សនកិច្ច) ដែលក្នុងនោះ មានគណៈប្រតិភូជាន់ខ្ពស់ចំនួន ៤៖ ជំនួបជាន់ខ្ពស់រវាងបក្សកុម្មុយនិស្តវៀតណាម និងគណបក្សប្រជាជនកម្ពុជា (ខែកុម្ភៈ ឆ្នាំ ២០២៣), ជំនួបរវាងថ្នាក់ដឹកនាំជាន់ខ្ពស់នៃបក្សកុម្មុយនិស្តវៀតណាម និងគណបក្សប្រជាជនកម្ពុជា និងគណបក្សប្រជាជនបដិវត្តន៍ឡាវ (ខែកញ្ញា ឆ្នាំ ២០២៣) ជាពិសេសដំណើរទស្សនកិច្ចផ្លូវការលើកទីមួយទៅកាន់ប្រទេសវៀតណាមរបស់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា (ថ្ងៃទី៣០ ខែវិច្ឆិកា ដល់ថ្ងៃទី២ ខែធ្នូ) និងរបស់សម្តេចនាយករដ្ឋមន្ត្រី ហ៊ុន ម៉ាណែត (ថ្ងៃទី ១១ ដល់ថ្ងៃទី ១២ ខែធ្នូ) ក្នុងតួនាទីថ្មីបន្ទាប់ពីកម្ពុជាបង្កើតរដ្ឋសភានិងរាជរដ្ឋាភិបាលថ្មី ប្រការនេះបានបង្ហាញពីការយកចិត្ដទុកដាក់យ៉ាងខ្លាំងនិងការអាទិភាពរបស់បក្ស រដ្ឋ និងរដ្ឋាភិបាលនៃភាគីទាំងពីរចំពោះទំនាក់ទំនងជិតស្និទ្ធ ហើយជាមូលដ្ឋានដ៏រឹងមាំសម្រាប់ជំរុញការអភិវឌ្ឍបន្ថែមទៀតនូវទំនាក់ទំនងប្រពៃណីដ៏យូរអង្វែងរវាងប្រទេសទាំងពីរវៀតណាមនិងកម្ពុជា។
យន្តការទ្វេភាគីត្រូវបានរក្សា និងលើកកម្ពស់ប្រកបដោយប្រសិទ្ធភាព រួមទាំងគណៈកម្មាធិការចម្រុះវៀតណាម-កម្ពុជា និងកិច្ចប្រជុំស្តីពីកិច្ចសហប្រតិបត្តិការ និងការអភិវឌ្ឍខេត្តជាប់ព្រំដែន។ តាមរយៈដំណើរទស្សនកិច្ច និងយន្តការសហប្រតិបត្តិការ ភាគីទាំងពីរបានអះអាងថា ទំនាក់ទំនងវៀតណាម - កម្ពុជា កាន់តែមានការអភិវឌ្ឍន៍ស៊ីជម្រៅនិងជាក់ស្តែងលើគ្រប់វិស័យ បង្កើតយន្ដការសហប្រតិបត្ដិការថ្មី ព្រមទាំងដោះស្រាយការលំបាកនិងឧបសគ្គ បន្តដោះស្រាយបញ្ហានៅសេសសល់។ ជំរុញការផ្លាស់ប្តូរព័ត៌មាន និងបទពិសោធន៍រវាងក្រសួង ស្ថាប័ន និងខេត្ត និងក្រុង ហើយឯកសារមួយចំនួនត្រូវបានចុះហត្ថលេខា ដែលធ្វើជាមូលដ្ឋានសម្រាប់ការអនុវត្តកិច្ចសហប្រតិបត្តិការលើគ្រប់វិស័យរវាងប្រទេសទាំងពីរ។
អំពីកិច្ចការបរទេសការពារជាតិ និងសន្តិសុខកាន់តែស៊ីជម្រៅ ជាក់ស្តែងនិងមានប្រសិទ្ធភាព ជាសសរស្តម្ភមួយដ៏សំខាន់នៃទំនាក់ទំនងនៃប្រទេសទាំងពីរ។ ភាគីទាំងពីរបានសហការរក្សាស្ថិរភាពនយោបាយ ការពារជាតិ-សន្តិសុខ និងបរិយាកាសសន្តិភាពសម្រាប់ការអភិវឌ្ឍនៃប្រទេសនីមួយៗ អនុវត្តឱ្យបានល្អនូវពិធីសារ និងផែនការសហប្រតិបត្តិការប្រចាំឆ្នាំ ២០២៣ រវាងក្រសួងការពារជាតិទាំងពីរនិងក្រសួងនគរបាលវៀតណាម និងក្រសួងមហាផ្ទៃកម្ពុជា។
ភាគីទាំងពីរបានផ្លាស់ប្តូរព័ត៌មានជាប្រចាំ ចែករំលែកបទពិសោធន៍ សម្របសម្រួលដើម្បីទប់ស្កាត់ល្បិចកល និងឧបាយកលនិងសកម្មភាពបំផ្លិចបំផ្លាញរបស់កម្លាំងអរិភាព ក្រៅពីនេះពង្រឹងការសម្របសម្រួលល្បាតរួម រក្សាសន្តិសុខ សណ្តាប់ធ្នាប់តាមតំបន់ព្រំដែនគោក និងសមុទ្រ; សហការប្រយុទ្ធប្រឆាំងនឹងឧក្រិដ្ឋកម្មឆ្លងដែនខុសច្បាប់ និងដោះស្រាយបញ្ហាដែលកើតឡើង និងគ្រប់គ្រងខ្សែព្រំដែន។ ភាគីទាំងបន្តរុករក ប្រមូលនិងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្ត និងអ្នកជំនាញវៀតណាម ដែលពលីជីវិតកាលពីសម័យសង្គ្រាមនៅកម្ពុជា។
អំពីកិច្ចសហប្រតិបត្តិការលើវិស័យសេដ្ឋកិច្ច និងពាណិជ្ជកម្មមានការផ្លាស់ប្ដូរខ្លាំង រួមចំណែកដល់កំណើនសេដ្ឋកិច្ចនៃប្រទេសនីមួយៗ។ ទោះបីជារងផលប៉ះពាល់នៃការរាតត្បាត Covid-19 ក៏ដោយក៏ទំហំពាណិជ្ជកម្មទ្វេភាគីនៅតែកើនឡើងគួរឱ្យកត់សម្គាល់។ បច្ចុប្បន្ននេះ វៀតណាមមានគម្រោងវិនិយោគចំនួន ២០៥ នៅកម្ពុជា ដែលមានដើមទុនចុះបញ្ជីសរុបចំនួន ២.៩៥ ពាន់លានដុល្លារអាមេរិក ដែលជាប់ចំណាត់ថ្នាក់ទី ១ ក្នុងតំបន់អាស៊ាន និងជាប្រទេសកំពូលទាំង ៥ ដែលមានការវិនិយោគផ្ទាល់ច្រើនជាងគេនៅកម្ពុជា។
ការយកចិត្តទុកដាក់ និងបង្កលក្ខណៈងាយស្រួលរបស់រដ្ឋាភិបាលទាំងពីរ គឺជាមូលដ្ឋានមួយសម្រាប់ជំរុញកិច្ចសហប្រតិបត្តិការសេដ្ឋកិច្ច និងវិនិយោគរវាងប្រទេសទាំងពីរមានការអភិវឌ្ឍយ៉ាងខ្លាំងក្នុងរយៈពេលប៉ុន្មានឆ្នាំកន្លងមក។ ភាគីទាំងពីរក៏បានរៀបចំវេទិកាធុរកិច្ចវៀតណាម-កម្ពុជា កិច្ចប្រជុំជំរុញវិនិយោគវៀតណាម-កម្ពុជា ហើយអាជ្ញាធរមូលដ្ឋានជាប់ព្រំដែនបានបង្កើតលក្ខខណ្ឌអំណោយផលសម្រាប់ធុរកិច្ចវិនិយោគ និងធ្វើអាជីវកម្មនៅតំបន់ព្រំដែន ផ្តល់អាទិភាពនិងបង្កលក្ខណៈងាយស្រួលសម្រាប់ការដឹកទំនិញឆ្លងកាត់ព្រំដែន ជំរុញការផ្លាស់ប្ដូរពាណិជ្ជកម្មនៅតំបន់ព្រំដែន រួមចំណែកយ៉ាងសំខាន់ដល់កំណើនសេដ្ឋកិច្ចនៃប្រទេសទាំងពីរ។
អំពីកិច្ចសហប្រតិបត្តិការលើវិស័យអប់រំ និងបណ្តុះបណ្តាល អភិវឌ្ឍន៍ធនធានមនុស្ស គឺជាវិស័យដែលភាគីទាំងពីរចាប់អារម្មណ៍យ៉ាងខ្លាំង ដោយចាត់ទុកថានេះជាវិស័យសំខាន់ និងជាកត្តាដែលរួមចំណែកយ៉ាងសកម្មក្នុងការពង្រឹងនិងពង្រីកទំនាក់ទំនងមិត្តភាពយូរអង្វែងរវាងប្រទេសទាំងពីរដើម្បីគោលដៅអភិវឌ្ឍន៍នៃប្រទេសនីមួយៗ។ បច្ចុប្បន្នមាននិស្សិតវៀតណាមជាង ១០០ នាក់កំពុងសិក្សានៅកម្ពុជា និងនិស្សិតកម្ពុជាជាង ២០០០នាក់ កំពុងសិក្សានៅប្រទេសវៀតណាម។ នេះជាប្រភពធនធានមនុស្ស នឹងរួមចំណែកដល់ការសម្រេចបាននូវយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជាអាណត្តិទី៧ និងយុទ្ធសាស្ត្រអភិវឌ្ឍន៍ផ្សេងៗទៀតក្នុងការងារកសាង និងអភិវឌ្ឍន៍ប្រទេសជាតិ។
អំពីកិច្ចសហប្រតិបត្តិការវៀតណាម-កម្ពុជាឆ្នាំ២០២៤។ ដោយផ្តើមចេញពីភូមិសាស្រ្ដ តួនាទី និងសារសំខាន់នៃទំនាក់ទំនងវៀតណាម-កម្ពុជា និងឈរលើមូលដ្ឋាននៃសមិទ្ធិផលដែលសម្រេចបានក្នុងរយៈពេលកន្លងមក និងក្រោមការដឹកនាំរបស់ថ្នាក់ដឹកនាំជាន់ខ្ពស់នៃប្រទេសទាំងពីរ ការយកចិត្តទុកដាក់និងការរួមចំណែករបស់ក្រសួង ស្ថាប័ន និងមូលដ្ឋាននានានៃប្រទេសទាំងពីរ ទំនាក់ទំនងវៀតណាម-កម្ពុជានៅឆ្នាំ២០២៤ និងឆ្នាំបន្តបន្ទាប់ទៀតនឹងបន្តអភិវឌ្ឍយ៉ាងខ្លាំងក្លាលើគ្រប់វិស័យ។
ភាគីទាំងពីរនៅមានសក្ដានុពល និងឱកាសជាច្រើនដើម្បីពង្រីកកិច្ចសហប្រតិបត្តិការលើវិស័យមានសក្តានុពលដែលអាចបំពេញបន្ថែមគ្នាទៅវិញទៅមក ដូចជាការកសាងយន្តការសហប្រតិបត្តិការទេសចរណ៍រវាងប្រទេសទាំងបី កម្ពុជា-ឡាវ-វៀតណាម កិច្ចសហប្រតិបត្តិការលើវិស័យវិទ្យាសាស្ត្រ សេដ្ឋកិច្ចបៃតង សេដ្ឋកិច្ចឌីជីថល សេដ្ឋកិច្ចរាងជារង្វង់ ឧស្សាហកម្មកែច្នៃនាំចេញ បច្ចេកវិទ្យាខ្ពស់ កិច្ចសហប្រតិបត្តិការវេជ្ជសាស្រ្ត។
ជាមួយនឹងគោលនយោបាយកំណែទម្រង់យ៉ាងខ្លាំងក្លា និងទូលំទូលាយរបស់រាជរដ្ឋាភិបាលកម្ពុជាអាណត្តិទី ៧ ការអភិវឌ្ឍសេដ្ឋកិច្ច និងផ្លាស់ប្ដូរពាណិជ្ជកម្មនិងការវិនិយោគនឹងបើកឱកាសថ្មីជាច្រើន។ ក្នុងស្មារតីសកម្ម និងភាពម្ចាស់ការរបស់អាជីវកម្ម និងវិនិយោគិនវៀតណាម ខ្ញុំជឿជាក់ថា ទំនាក់ទំនងសហប្រតិបត្តិការក្នុងឆ្នាំ ២០២៤ នឹងកាន់តែល្អ។ ទំហំពាណិជ្ជកម្មវៀតណាម - កម្ពុជា បន្តរក្សាស្ថិរភាព និងកើនឡើង៕
មតិពីមិត្តអ្នកអាន