ក្នុងឱកាសដែលវៀតណាម ឡាវ និងកម្ពុជា នឹងរៀបចំជំនួបប្រាស្រ័យមិត្តភាពការពារជាតិព្រំដែនវៀតណាម-ឡាវ-កម្ពុជា ជាលើកដំបូង នៅពាក់កណ្តាលខែធ្នូនេះ អ្នកយកព័ត៌មាន នៃកាសែតកងទ័ពប្រជាជន បានជួបសម្ភាសន៍ជាមួយលោកវរសេនីយ៍ឯក រ៉ែម កាន់ នាយការិយាល័យអនុព័ន្ធយោធាកម្ពុជាប្រចាំវៀតណាម ដើម្បីមានការយល់ឃើញបន្ថែមទៀតអំពីព្រឹត្តិការណ៍ដ៏សំខាន់នេះ។
រក្សាទំនាក់ទំនងជាមួយបណ្ដាប្រទេសមិត្ដជាប្រពៃណីជាការរួមចំណែកដល់បរិយាកាសសន្ដិភាពសម្រាប់ខ្លួនឯង និងក្នុងតំបន់ |
វៀតណាមជួយឧបត្ថម្ភដល់សហគ្រាស បង្កើនការនាំចេញទៅកាន់ទីផ្សារកម្ពុជា |
លោកវរសេនីយ៍ឯក រ៉ែម កាន់ នាយការិយាល័យអនុព័ន្ធយោធាកម្ពុជាប្រចាំវៀតណាម |
អ្នកយកព័ត៌មាន៖ តើលោកវាយតម្លៃទំនាក់ទំនងភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការលើគ្រប់វិស័យ និងស្ថិតស្ថិរយូរអង្វែងរវាងវៀតណាម និងកម្ពុជា យ៉ាងដូចម្តេច?
លោកវរសេនីយ៍ឯក រ៉ែម កាន់ ៖ វៀតណាម និងកម្ពុជា គឺជាប្រទេសជិតខាងគ្នាយ៉ាងជិតស្និទ្ធ និងមានទំនាក់ទំនងជាប្រពៃណីយូរអង្វែង ទំនាក់ទំនងនេះ ត្រូវបានថ្នាក់ដឹកនាំជាច្រើនជំនាន់ និងប្រជាជននៃប្រទេសទាំងពីរបានខិតខំកសាង ហើយជាទ្រព្យសម្បត្តិរួមមិនអាចកាត់ថ្លៃបានរបស់ប្រជាជនយើងទាំងពីរ។ ក្នុងដំណើរប្រវត្តិសាស្ត្រជាងកន្លះសតវត្ស ចាប់តាំងពីការបង្កើតទំនាក់ទំនងការទូតជាផ្លូវការ ទោះបីជាមានការលំបាក បញ្ហាប្រឈម និងការធ្លាក់ចុះជាច្រើនក៏ដោយ ក៍ទំនាក់ទំនងកម្ពុជា-វៀតណាម ត្រូវបានពង្រឹង និងអភិវឌ្ឍន៍ ដោយឥតឈប់ឈរ រួមចំណែកជាក់ស្តែងក្នុងការកសាងប្រទេសអភិវឌ្ឍន៍ប្រកបដោយវិបុលភាព ហើយទន្ទឹមនឹងនោះ រួមចំណែកយ៉ាងសកម្មដល់សន្តិភាព ស្ថិរភាព និងកិច្ចសហប្រតិបត្តិការក្នុងតំបន់ និងពិភពលោក។
អ្នកយកព័ត៌មាន៖ តាមគំនិតរបស់លោក តើកិច្ចសហប្រតិបត្តិការលើវិស័យការពារជាតិទ្វេភាគី នាពេលថ្មីៗនេះបានរួមចំណែកដល់ទំនាក់ទំនងវៀតណាម-កម្ពុជាយ៉ាងដូចម្តេច? តើលោកវាយតម្លៃពីសក្តានុពលនៃកិច្ចសហប្រតិបត្តិការរវាងប្រទេសទាំងពីរនេះដោយរបៀបណា?
លោកវរសេនីយ៍ឯក រ៉ែម កាន់ ៖ ក្នុងទំនាក់ទំនងរួមរវាងប្រទេសទាំងពីរ កិច្ចសហប្រតិបត្តិការលើវិស័យការពារជាតិវៀតណាម-កម្ពុជា កាន់តែស៊ីជម្រៅ មានប្រសិទ្ធភាព ជាក់ស្តែង និងជាសសរស្តម្ភដ៏សំខាន់មួយ។ ក្នុងរយៈពេលកន្លងមក ស្ថាប័ន និងអង្គភាពនានានៃភាគីទាំងពីរយល់ជ្រួតជ្រាបបទបញ្ជារបស់ថ្នាក់ដឹកនាំក្រសួងការពារជាតិនៃប្រទេសទាំងពីរ ដោយបានសម្របសម្រួលយ៉ាងសកម្ម និងអនុវត្តយ៉ាងពេញលេញនូវខ្លឹមសារកិច្ចសហប្រតិបត្តិការលើវិស័យការពារជាតិដែលបានឯកភាពរវាងក្រសួងការពារជាតិទាំងពីរ លេចធ្លោបណ្ដាវិស័យដូចជា៖ ការផ្លាស់ប្តូរគណៈប្រតិភូ ជាពិសេសគណៈប្រតិភូជាន់ខ្ពស់ កិច្ចសន្ទនាគោលនយោបាយការពារជាតិថ្នាក់អនុរដ្ឋមន្ត្រី ព្រមទាំងបានលើកកម្ពស់យន្តការ និងគំរូកិច្ចសហប្រតិបត្តិការប្រកបដោយប្រសិទ្ធភាពដូចជា៖ ការផ្លាស់ប្តូរព័ត៌មាន ការយាមល្បាតរួមគ្នា កិច្ចប្រជុំប្រចាំឆ្នាំ ការចងសម្ព័ន្ធមេត្រីភាពរវាងយោធាជាមួយប្រជាជន និងការជួបប្រាស្រ័យនាយទាហានវ័យក្មេង ការបណ្ដុះបណ្ដាលធនធានមនុស្ស ការពិនិត្យ និងព្យាបាលជំងឺជូនកងទ័ព និងប្រជាជន...
ទន្ទឹមនឹងនោះ កងកម្លាំងការពារព្រំដែន និងយោធភូមិភាគជាប់ព្រំដែននៃប្រទេសទាំងពីរ បានសហការគ្នាយ៉ាងល្អក្នុងការបង្ក្រាបបទល្មើស និងធានាបាននូវសន្តិសុខ សុវត្ថិភាព សណ្តាប់ធ្នាប់ និងសុវត្ថិភាពសង្គម នៅតាមបណ្តោយខ្សែព្រំដែន នៃប្រទេសទាំងពីរ ។ការងារអប់រំ និងផ្សព្វផ្សាយជូនប្រជាជន និងកងទ័ពនៃប្រទេសទាំងពីរ ជាពិសេសយុវជនជំនាន់ក្រោយ អំពីប្រវត្តិសាស្ត្រ អត្ថន័យ និងសារៈសំខាន់ នៃសាមគ្គីភាព និងការជួយគ្នាទៅវិញទៅមក រវាងប្រទេសទាំងពីរ និងកងទ័ពទាំងពីរ ត្រូវបានយកចិត្តទុកដាក់យ៉ាងខ្លាំង។
ក្នុង “ឆ្នាំមិត្តភាពវៀតណាម - កម្ពុជា ២០២២” ខួបលើកទី ៥៥ នៃការបង្កើតទំនាក់ទំនងការទូតវៀតណាម - កម្ពុជា (២៤ មិថុនា ១៩៦៧ / ២៤ មិថុនា ២០២២) និងខួបលើកទី ៤៥ ទិវានៃការចងចាំដំណើរឆ្ពោះទៅរកការផ្តួលរំលំរបបប្រល័យពូជសាសន៍ ប៉ុល ពត (ថ្ងៃទី២០ ខែមិថុនា ឆ្នាំ១៩៧៧ ថ្ងៃទី២០ ខែមិថុនា ឆ្នាំ២០២២) ក្រសួងការពារជាតិ នៃប្រទេសទាំងពីរបានសម្របសម្រួលរៀបចំសកម្មភាពសំខាន់ៗជាច្រើនដែលមានអត្ថន័យផ្សព្វផ្សាយយ៉ាងសកម្មអំពីចំណងសាមគ្គីភាពរវាងប្រទេសទាំងពីរ វៀតណាម និងកម្ពុជា។ កងទ័ពនៃប្រទេសទាំងពីរក៏បានសម្របសម្រួល និងគាំទ្រគ្នាទៅវិញទៅមកនៅវេទិកាអន្តរជាតិ និងយន្តការពហុភាគី ជាពិសេសយន្តការដែលដឹកនាំដោយអាស៊ាន...
ត្រូវតែបញ្ជាក់ថា កិច្ចសហប្រតិបត្តិការរវាងកងទ័ពប្រជាជនវៀតណាម និងកងយោធពលខេមរភូមិន្ទ រួមចំណែកក្នុងការរឹតបន្តឹងទំនាក់ទំនងរវាងប្រទេសទាំងពីរបន្ថែមទៀត។ ជាមួយនឹងការប្តេជ្ញាចិត្តផ្នែកនយោបាយ និងការខិតខំប្រឹងប្រែងរបស់ភាគីទាំងពីរ ខ្ញុំជឿជាក់ថា កិច្ចសហប្រតិបត្តិការលើវិស័យការពារជាតិវៀតណាម-កម្ពុជា ពិតជានឹងមានការអភិវឌ្ឍន៍ខ្លាំងជាងមុននាពេលខាងមុខ ដោយលើកកំពស់តួនាទីរបស់ខ្លួនក្នុងទំនាក់ទំនងទ្វេភាគី។
អ្នកយកព័ត៌មាន៖ តើលោកយល់យ៉ាងណាចំពោះទំនាក់ទំនងមិត្តភាពជាប្រពៃណី និងសាមគ្គីភាព រវាងប្រទេសទាំងបី វៀតណាម ឡាវ និងកម្ពុជា?
លោកវរសេនីយ៍ឯក រ៉ែម កាន់ ៖ យើងជាអ្នកជិតខាងផឹកទឹកទន្លេមេគង្គដូចគ្នា ហើយមានទំនាក់ទំនងស្និទ្ធស្នាលជាប្រពៃណីពីយូរលង់មកហើយ ចាប់តាំងពីមានការដឹកនាំរបស់បក្សកុម្មុយនិស្តឥណ្ឌូចិន ក្រោយមកបក្សកុម្មុយនិស្តវៀតណាម បក្សបដិវត្តន៍ឡាវ និងគណបក្សប្រជាជនកម្ពុជា ទំនាក់ទំនងនោះកាន់តែមានការអភិវឌ្ឍន៍ និងប្រសើរឡើង។
ត្រូវតែបញ្ជាក់ថា ទំនាក់ទំនងជាប្រពៃណី សាមគ្គីភាព មិត្តភាព និងភាពជិតស្និទ្ធរវាងវៀតណាម ឡាវ និងកម្ពុជា គឺជាទ្រព្យសម្បត្តិរួមដែលមិនអាចកាត់ថ្លៃបាន បង្កើតបានទាំងកម្លាំងស្មារតី និងកម្លាំងចិត្ត ដើម្បីប្រទេសទាំងបីតែងតែប្រកៀកស្មាគ្នាក្នុងការតស៊ូដណ្តើមឯករាជ្យកាលពីមុន ក៏ដូចជាការកសាង ការពារ និងអភិវឌ្ឍន៍ប្រទេសនាពេលបច្ចុប្បន្ន។
អ្នកយកព័ត៌មាន៖ វៀតណាម ឡាវ និងកម្ពុជានឹងរៀបចំជំនួបប្រាស្រ័យមិត្តភាពការពារជាតិព្រំដែន វៀតណាម-ឡាវ-កម្ពុជា ជាលើកដំបូងនៅពាក់កណ្តាលខែធ្នូខាងមុខនេះ។ តើលោកវាយតម្លៃព្រឹត្តិការណ៍ នេះយ៉ាងដូចម្តេច?
លោកវរសេនីយ៍ឯក រ៉ែម កាន់ ៖ នាពេលថ្មីៗខាងមុខនេះ កិច្ចសហប្រតិបត្តិការរវាងកងទ័ពនៃប្រទេសទាំងបី វៀតណាម ឡាវ កម្ពុជា តែងតែត្រូវបានយកចិត្តទុកដាក់ និងជំរុញដោយថ្នាក់ដឹកនាំនៃប្រទេសទាំងបី រួមទាំងការផ្តោតការយកចិត្តទុកដាក់លើការសម្របសម្រួល និងអនុវត្តយ៉ាងសកម្មនូវសកម្មភាពជួបប្រាស្រ័យមិត្តភាពការពារជាតិព្រំដែនកម្ពុជា-វៀតណាម - ឡាវ លើកទីមួយ ។
ជាមួយនឹងសកម្មភាពដ៏មានអត្ថន័យជាច្រើនដែលនឹងប្រព្រឹត្តទៅក្នុងក្របខ័ណ្ឌនៃការជំនួបប្រាស្រ័យនេះ ខ្ញុំគិតថាព្រឹត្តិការណ៍នេះនឹងជម្រុញកិច្ចសហប្រតិបត្តិការរវាងកងទ័ពនៃប្រទេសទាំងបី វៀតណាម-ឡាវ-កម្ពុជា ឡើងកម្រិតថ្មីមួយ រួមចំណែកពង្រឹងការជឿទុកចិត្តខាងនយោបាយ កសាងមនោសញ្ចេតនា មិត្តភាព និងសាមគ្គីភាព ជំរុញកិច្ចសហប្រតិបត្តិការជាក់ស្តែងរវាងកងកម្លាំងការពារព្រំដែននៃប្រទេសទាំងបី អាជ្ញាធរមូលដ្ឋាន និងប្រជាជននៅតាមតំបន់ព្រំដែន អាស្រ័យលើនេះ រួមចំណែកកសាងព្រំដែនវៀតណាម ឡាវ កម្ពុជា ប្រកបដោយសន្តិភាព មិត្តភាព ស្ថិរភាព កិច្ចសហប្រតិបត្តិការ និងការអភិវឌ្ឍ និងបង្ហាញនូវសារទៅកាន់ប្រទេសក្នុងតំបន់ និងប្លុកអាស៊ានអំពីចំណងសាមគ្គីភាព មិត្តភាព និងការគាំទ្រគ្នាទៅវិញទៅមករវាងរដ្ឋាភិបាល កងទ័ព និងប្រជាជន នៃប្រទេសទាំងបី៕
មតិពីមិត្តអ្នកអាន