នារសៀលថ្ងៃទី២៥ ខែតុលា នៅទីស្នាក់ការគណៈកម្មាធិការបក្សខេត្ត Gia Lai គណៈប្រតិភូមន្ត្រីមកពីខេត្តរតនគិរី ដឹកនាំដោយលោក ញ៉ែម សំអឿន អភិបាលខេត្តរតនគិរី បានជួបសម្ដែងការគួរសមជាមួយគណៈអចិន្ត្រៃយ៍នៃគណៈកម្មាធិការបក្សខេត្ត Gia Lai។ លោក Ho Van Nien លេខាគណៈកម្មាធិការបក្សខេត្ត ប្រធានក្រុមប្រឹក្សាប្រជាជនខេត្ត Gia Lai ទទួលស្វាគមន៍លោក ញ៉ែម សំអឿន។
 |
| លោក Ho Van Nien លេខាគណៈកម្មាធិការបក្សខេត្ត Gia Lai ទទួលជួបអភិបាលខេត្តរតនគិរី |
ក្នុងជំនួបនេះ លោក ញ៉ែម សំអឿន សង្ឃឹមថា ថ្នាក់ដឹកនាំខេត្ត Gia Lai នឹងបន្តយកចិត្តទុកដាក់ បង្កើតលក្ខខណ្ឌអំណោយផល និងជួយខេត្តរតនគិរី ក្នុងការអភិវឌ្ឍលើគ្រប់វិស័យ ក៏ដូចជាពង្រឹងកិច្ចសហប្រតិបត្តិការ និងរួមគ្នាកសាងទំនាក់ទំនងរវាងខេត្តទាំងពីរឲ្យកាន់តែរឹងមាំ។
លោក ញ៉ែម សំអឿន បានសម្ដែងបំណងថា ថ្នាក់ដឹកនាំខេត្ត Gia Lai នឹងបង្កើតលក្ខខណ្ឌអំណោយផលសម្រាប់ប្រជាជនកម្ពុជា ក្នុងការនាំចេញ និងនាំចូលកសិផលតាមច្រកទ្វារព្រំដែនជាតិ Le Thanh។ ខេត្តរតនគិរី ក៏បង្កើតលក្ខខណ្ឌអំណោយផលសម្រាប់ធុរកិច្ចខេត្ត Gia Lai ក្នុងការវិនិយោគ ផលិតកម្ម អាជីវកម្ម និងអភិវឌ្ឍន៍សេដ្ឋកិច្ចក្នុងខេត្តរតនគិរី។
ថ្លែងមតិក្នុងជំនួបនេះ លោក Ho Van Nien បានសង្កត់ធ្ងន់ថា ខេត្ត Gia Lai ជានិច្ចកាលយកចិត្តទុកដាក់ និងវាយតំលៃខ្ពស់ចំពោះការជួយឧបត្ថម្ភដែលខេត្តរតនគិរីផ្ដល់ដល់កម្លាំងខេត្ត Gia Lai ក្នុងការបំពេញភារកិច្ចស្វែងរក និងប្រមូលអដ្ឋិធាតុរបស់កងទ័ពស្ម័គ្រចិត្ត និងអ្នកជំនាញវៀតណាម ដែលពលីជីវិតក្នុងសម័យសង្គ្រាមនៅកម្ពុជា។ លោក Ho Van Nien ក៏បានស្នើឲ្យថ្នាក់ដឹកនាំខេត្តរតនគិរីយកចិត្តទុកដាក់ គាំទ្រ និងបង្កើតលក្ខខណ្ឌអំណោយផលសម្រាប់ប្រជាពលរដ្ឋវៀតណាមដែលរស់នៅតាមតំបន់ព្រំដែនរវាងប្រទេសទាំងពីរមានសកម្មភាពចូល-ចេញកាន់តែងាយស្រួល។
ជំនួបនេះស្ថិតក្នុងឱកាសដែលគណៈប្រតិភូខេត្តរតនគិរី ចូលរួមកិច្ចប្រជុំបូកសរុបលទ្ធផលនៃកម្មវិធីសហការរវាងរណសិរ្សមាតុភូមិ និងអង្គការនយោបាយសង្គមខេត្ត Gia Lai ជាមួយរណសិរ្សសាមគ្គីអភិវឌ្ឍន៍មាតុភូមិ និងអង្គការសង្គមនានានៃខេត្តរតនគិរី (ដំណាក់កាល ២០១៨ - ២០២២) និងចុះហត្ថលេខាលើកម្មវិធីសហការ (ដំណាក់កាល ២០២៣ - ២០២៥) នៅខេត្ត Gia Lai៕
មតិពីមិត្តអ្នកអាន