ស្នាដៃខ្មែរម្ជូរឆ្ងាញ់សៀមរាប ដែលជាយីហោលក់អស់រយៈពេល១២ឆ្នាំមកហើយ បានពង្រីកសាខារបស់ខ្លួនមួយថ្មីក្នុងរាជធានីភ្នំពេញដោយសន្យាយ៉ាងមុតមាំបង្កើនការលើកស្ទួយចំណីអាហារជាផលិតផលក្នុងស្រុក។
ស្នាដៃខ្មែរម្ជូរឆ្ងាញ់សៀមរាប ដែលល្បីឈ្មោះរាប់ឆ្នាំ
ស្នាដៃខ្មែរម្ជូរឆ្ងាញ់សៀមរាប បានធ្វើពិធីប្រកាសសម្ពោធសាខាថ្មីរបស់ខ្លួនកាលពីថ្ងៃទី២១ ខែវិច្ឆិកា ឆ្នាំ២០២០កន្លងមកនេះ មានទីតាំងស្ថិតនៅលើផ្លូវសុធារសទល់អាគារសាកលវិទ្យាល័យបៀលប្រាយ ដោយបានអញ្ជើញតារាសម្តែងស្រីវ័យក្មេងជាតំណាងកញ្ញា ឈូឈូ និង វ៉ាន់វីតា។
ថ្លែងក្នុងពិធីសម្ពោធសាខាថ្មីលោកស្រី ពៅ ធីតា ម្ចាស់អាជីវកម្មស្នាដៃខ្មែរម្ជូរឆ្ងាញ់សៀមរាបបានឱ្យដឹងថា លោកស្រីបានប្រកបមុខរបបនេះ អស់រយៈពេល១២ឆ្នាំមកហើយក្នុងទឹកដីក្រុងសៀមរាប ហើយយីហោរបស់លោកស្រីមានប្រជាជនជាច្រើនទទួលស្គាល់ និងគាំទ្រ។ ក្រោយទទួលបានការគាំទ្ររហូតមានសុំទិញសិទ្ធអាជីវកម្មបន្ត លោកស្រីពិតជាមិននឹកស្មានសន្ទុះការគាំទ្រ ដោយមានមនុស្សប្រមាណ២០នាក់សុំទិញសិទ្ធបើកហាងនៅកន្លែងៗផ្សេងគ្នា។ ប៉ុន្តែលោកស្រីក្នុងជំហានដំបូង បានធ្វើការសិក្សាលើទីតាំងចំនួន១០សិន ក្នុងគោលដៅពង្រីកយីហាងស្នាដៃរបស់លោកស្រី។ លោកស្រីក៏បានបញ្ជាក់ដែរថា ម្ជូររបស់លោកស្រីបានផ្តល់ការអនុញ្ញាតទិញសិទ្ធបន្តនៅតាមបណ្តាខេត្តនានាផងដែរ។
ម្ចាស់អាជីវកម្មរូបនេះបាននិយាយថា ចំណុចសំខាន់ធំៗរបស់យីហោរបស់លោកស្រីដែលទទួលបានគាំទ្រពីសំណាក់អតិថិជននោះគឺដោយសារតែលោកស្រីរក្សាអនាម័យ គុណភាព និងសេវាកម្ម។ ម្ជូរខ្មែររបស់លោកស្រីមានទឹកជ្រលក់ពិសេសរហូតជាង ៣០មុខ ប្លែកៗ ខុសគ្នា ឆ្ងាញ់ជាប់មាត់។
លោកស្រី ពៅ ធីតា បាននិយាយទៀតថា យីហោរបស់លោកស្រីបានយកផលិតផលរបស់ខ្មែរជាចំបងមកលក់ ហើយស្នាដៃខ្មែរម្ជូរឆ្ងាញ់សៀមរាបមិនត្រឹមតែមានគ្រឿងផ្លែឈើម្ជូរនោះទេ មានចំណីហារញាំលេងជារបស់ក្រៀមៗជាច្រើនរយមុខ ។ លោកស្រីសន្យានៅបន្តយកស្នាដៃចំណីអាហាររបស់អ្នកភូមិនិងក្នុងស្រុកមកលក់បន្ត ក្នុងការគាំទ្រផលិតផលខ្មែរមានវិសាលភាពកាន់តែធំទូទំលាយជាងមុន៕
（តាម sabay）
មតិពីមិត្តអ្នកអាន