នាព្រឹកថ្ងៃទី៨ ខែកុម្ភៈ នៅទីស្នាក់ការរដ្ឋាភិបាល លោក Tran Luu Quang ឧបនាយករដ្ឋមន្ត្រី ប្រធានគណៈកម្មាធិការដឹកនាំកិច្ចសហប្រតិបត្តិការទ្វេភាគីវៀតណាម និងចិនបានទទួលជួបលោក Xiong Bo ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតចិនប្រចាំវៀតណាម។
លោក Tran Luu Quang ឧបនាយករដ្ឋមន្ត្រី ប្រធានគណៈកម្មាធិការដឹកនាំកិច្ចសហប្រតិបត្តិការទ្វេភាគីវៀតណាម និងចិនបានទទួលជួបលោក Xiong Bo ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតចិនប្រចាំវៀតណាម (រូបថត៖ Chinhphu.vn) |
នៅក្នុងជំនួបនេះ ភាគីទាំងពីរបានវាយតម្លៃខ្ពស់ចំពោះវឌ្ឍនភាពជាវិជ្ជមានក្នុងទំនាក់ទំនងរវាងបក្សទាំងពីរ និងរដ្ឋទាំងពីរក្នុងរយៈពេលកន្លងមក ជាពិសេសការជួបប្រាស្រ័យជាទៀងទាត់ និងកិច្ចសហប្រតិបត្តិការសំខាន់ៗក្នុងវិស័យសេដ្ឋកិច្ច ពាណិជ្ជកម្ម និងវិនិយោគបន្តស៊ីជម្រៅ។ ដោយសង្កត់ធ្ងន់លើសារៈសំខាន់ពិសេសនៃដំណើរទស្សនកិច្ចផ្លូវការនៅប្រទេសចិននាពេលថ្មីៗនេះរបស់លោកអគ្គលេខាបក្ស Nguyen Phu Trong ចំពោះទំនាក់ទំនងទ្វេភាគីនោះ ភាគីទាំងពីរបានចាត់ទុកថា ភារកិច្ចសំខាន់របស់អាជ្ញាធរគ្រប់លំដាប់ថ្នាក់ និងគ្រប់វិស័យនៃប្រទេសទាំងពីរនាពេលខាងមុខគឺរួមគ្នាអនុវត្តប្រកបដោយប្រសិទ្ធភាពនូវសេចក្តីថ្លែងការណ៍រួម និងកិច្ចព្រមព្រៀងសហប្រតិបត្តិការដែលបានចុះហត្ថលេខាក្នុងអំឡុងដំណើរទស្សនកិច្ចនេះ។
លោក Tran Luu Quang សង្ឃឹមថា ភាគីទាំងពីរបន្តជំរុញការផ្លាស់ប្តូរ គណៈប្រតិភូនិងរៀបចំកិច្ចប្រជុំលើកទី ១៥ នៃគណៈកម្មាធិការដឹកនាំកិច្ចសហប្រតិបត្តិការទ្វេភាគីរវាងវៀតណាម និងចិន សកម្មភាពផ្លាស់ប្តូរយោបល់ររវាងបក្សទាំងពីរ និងរវាងស្ថាប័ន ក្រសួង អង្គការមហាជននិងមូលដ្ឋាននៃប្រទេសទាំងពីរ។ អំពីកិច្ចសហប្រតិបត្តិការលើវិស័យផ្សេងៗ ឧបនាយករដ្ឋមន្ត្រីបានស្នើឱ្យភាគីទាំងពីររក្សាកំណើនពាណិជ្ជកម្មទ្វេភាគីតាមទិសដៅប្រកបដោយតុល្យភាពនិងនិរន្តរភាព; បង្កើនទំហំនិងគុណភាពនៃកិច្ចសហប្រតិបត្តិការវិនិយោគ; សម្របសម្រួលយ៉ាងជិតស្និទ្ធដើម្បីពន្លឿនការដោះស្រាយរាល់បញ្ហានៅគម្រោង សហប្រតិបត្តិការមួយចំនួន; ត្រៀមរៀបចំឱ្យបានល្អដើម្បីស្តារកិច្ចសហប្រតិបត្តិការទេសចរណ៍ឡើងវិញក្នុងពេលឆាប់ៗនេះ បន្ទាប់ពីផ្អាកជិត ៣ ឆ្នាំ ដោយសារជំងឺកូវីដ-១៩។
ដោយយល់ស្របនឹងការលើកឡើងរបស់លោក Tran Luu Quang លោកឯកអគ្គរដ្ឋទូតចិន Xiong Bo បានសំដែងថា ស្ថានទូតនឹងបន្តលើកកំពស់តួនាទីជាស្ពានសហប្រតិបត្តិការរវាងក្រសួង ស្ថាប័ន និងមូលដ្ឋាននៃប្រទេសទាំងពីរជំរុញកិច្ចព្រមព្រៀងនិងការយោគយល់គ្នារវាងប្រទេសទាំងពីរអនុវត្តប្រកបដោយប្រសិទ្ធភាព។ រួមចំណែកដល់ការអភិវឌ្ឍន៍ទំនាក់ទំនងភាពជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយចិន-វៀតណាម។
លោកឯកអគ្គរដ្ឋទូត Xiong Bo បានអះអាងថា ចិនគាំទ្រវៀតណាមក្នុងការកសាងសេដ្ឋកិច្ចឯករាជ្យ ខ្លួនទីពឹងខ្លួន ការអភិវឌ្ឍន៍ប្រកបដោយគុណភាពខ្ពស់ ការធ្វើសមាហរណកម្មអន្តរជាតិយ៉ាងទូលំទូលាយនិងត្រៀមខ្លួនសហការជាមួយវៀតណាម ដើម្បីជំរុញកិច្ចសហប្រតិបត្តិការសេដ្ឋកិច្ច-ពាណិជ្ជកម្ម និងវិស័យផ្សេងៗទៀតរវាងប្រទេសទាំងពីរកាន់តែជាក់ស្តែងនិងមានប្រសិទ្ធភាព៕
មតិពីមិត្តអ្នកអាន