ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ នៅថ្ងៃទី២២ ខែធ្នូ ឆ្នាំ២០២២នេះ បានបោះជំហានទៅមុខយ៉ាងជោគជ័យ ជាមួយនឹងជើងហោះហើរដំបូង រវាងទីក្រុងសៀមរាប និងរដ្ឋធានីហាណូយ ក្រោយពីមានការធូរស្បើយនៃជំងឺកូវីដ-១៩។
 |
| ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ ប្រកាសបើកជើងហោះហើរដំបូងរវាងទីក្រុងសៀមរាប និងរដ្ឋធានីហាណូយ |
សេចក្ដីប្រកាសព័ត៌មានបានបញ្ជាក់ថា ការហោះហើរដំបូងនេះ ដែលមានជើងហោះហើរលេខ K6 852 នៅម៉ោង១៤៖៣០នាទី ដោយប្រើយន្តហោះប្រភេទ Airbus A320 ត្រូវចេញដំណើរពីអាកាសយានដ្ឋានអន្តរជាតិសៀមរាប ហើយចុះចតនៅអាកាសយានដ្ឋានអន្តរជាតិ Noi Bai (រដ្ឋធានីហាណូយ) នៅម៉ោង១៦៖១៥ ជាមួយនឹងអ្នកដំណើរចំនួន ៦៨ នាក់។
សេចក្ដីប្រកាសព័ត៌មាន ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ បានឲ្យដឹងទៀតថា ការត្រឡប់មកកាន់ទីក្រុងសៀមរាបវិញ នៅវេលាម៉ោង១៧៖១៥ និងមកដល់ម៉ោង១៩៖០០ នៅថ្ងៃដដែល ជាមួយនឹងអ្នកដំណើរចំនួន ៨១ នាក់។
ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ បានបញ្ជាក់ឲ្យដឹងថា ចាប់ពីថ្ងៃនេះតទៅ កម្ពុជា អង្គរ អ៊ែរ នឹងធ្វើការហោះហើរជាទៀងទាត់ ៣ ជើងក្នុងមួយសប្តាហ៍ រវាងទីក្រុងសៀមរាប និងរដ្ឋធានីហាណូយ គឺនៅរៀងរាល់ថ្ងៃអង្គារ ថ្ងៃព្រហស្បតិ៍ និងថៃ្ងសៅរ៍។
ក្រៅពីជើងហោះហើរទៅរដ្ឋធានីហាណូយ K6 ក៏នៅមានជើងហោះហើរផ្សេងទៀត ទៅកាន់ប្រទេសវៀតណាម ដូចជា ជើងហោះហើររវាងទីក្រុងសៀមរាប និងទីក្រុងហូជីមិញ ២ជើង/ថ្ងៃ, ទីក្រុងសៀមរាប និងទីក្រុងដាណាំង ១ជើង/ថ្ងៃ, ទីក្រុងភ្នំពេញ និងទីក្រុងហាណូយ ៣ជើង/សប្តាហ៍, ទីក្រុងភ្នំពេញ និងទីក្រុងហូជីមិញ ២ជើង/ថ្ងៃ និងទីក្រុងព្រះសីហនុ និងទីក្រុងហូជីមិញ ១ជើង/ថ្ងៃ ផងដែរ៕
មតិពីមិត្តអ្នកអាន