អគារគោរពវិញ្ញាណក្ខន្ធយុទ្ធជនពលីនៃកងទ័ពស្ម័គ្រចិត្តវៀតណាមនៅខេត្តបាត់ដំបង៖ គម្រោងនៃចំណងសាមគ្គីភាពរវាងវៀតណាម និងកម្ពុជា

ជួបប្រាស្រ័យររវាងគ្រួសារវៀតណាមជាមួយនិស្សិតឡាវ និងកម្ពុជា

ជំរុញការចែករំលែកបទពិសោធន៍ក្នុងសកម្មភាពមិត្តភាពរវាងវៀតណាម និងកម្ពុជា

ពិធីបើកការដ្ឋានសាងសង់អគារគោរពវិញ្ញាណក្ខន្ធយុទ្ធជនពលី នៃកងទ័ពស្ម័គ្រចិត្តវៀតណាម នៅខេត្តបាត់ដំបង ព្រះរាជាណាចក្រកម្ពុជា

បន្ទាប់ពីត្រឡប់មកប្រទេសវៀតណាមប៉ុន្មានថ្ងៃមក លោកវរសេនីយ៍ឯកបំរុង Tran Chi Cong និងយុទ្ធមិត្ត បានធ្វើដំណើរនាពេលយប់ ដើម្បីត្រៀមសាងសង់អគារគោរពវិញ្ញាណក្ខន្ធយុទ្ធជនពលីនៃកងទ័ពស្ម័គ្រចិត្តវៀតណាមនៅខេត្តបាត់ដំបង។ យប់ងងឹត ភ្លៀងធ្លាក់ខ្លាំង ធ្វើឲ្យមនុស្សទាំងអស់ព្រួយបារម្ភពីការងារ។ ទោះជាយ៉ាងនេះក្តី ពេលទៅដល់កន្លែងសាងសង់ នាយទាហាន និងពលទាហាន នៃតំបន់ប្រតិបត្តិករសឹករងបាត់ដំបង មិនខ្លាចការលំបាកទេ ដោយបានជួយគាំទ្រលើគ្រប់ជ្រុងជ្រោយទាំងអស់។ ធ្វើការទាំងថ្ងៃត្រង់ ញើសស្រក់ពេញឯកសណ្ឋាន ប៉ុន្តែនាយទាហាន និងពលទាហាននៃតំបន់ប្រតិបត្តិករសឹករងបាត់ដំបង នៅតែប្រញាប់ប្រញាល់ឈូសឆាយដីជាបន្ទាន់ រៀបចំតង់ រៀបចំតុ និងកៅអី ដើម្បី​ពិធីបើការដ្ឋានសាងសង់បានប្រព្រឹត្តទៅដោយរលូន។

នៅក្នុងពិធីបើកការដ្ឋាននេះ មនុស្សគ្រប់ៗគ្នារំភើបចិត្តយ៉ាងខ្លាំង នៅពេលស្តាប់លោកឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក និងជាមេបញ្ជាការ យោធភូមិភាគទី៥ នៃកងយោធពលខេមរភូមិន្ទ និយាយអំពីការលះបង់ដ៏អង់អាចក្លាហានរបស់កងទ័ពស្ម័គ្រចិត្តវៀតណាម ក្នុងការជួយសង្គ្រោះប្រទេសកម្ពុជាចេញផុតពីរបបប្រល័យពូជសាសន៍ ប៉ុល ពត។ រូបភាពនៃកងទ័ពស្ម័គ្រចិត្តវៀតណាម គឺជានិមិត្តសញ្ញាដ៏ថ្លៃថ្នូនៃស្មារតីអន្តរជាតិដ៏ស្មោះត្រង់។ លោកឧត្តមសេនីយ៍ឯក ឯក សំអូន បានបញ្ជាក់ថា "រាជរដ្ឋាភិបាល និងប្រជាជនកម្ពុជា នឹងមិនភ្លេចមនោសញ្ចេតនារបស់ប្រទេសវៀតណាមដែលផ្តល់ចំពោះប្រជាជនកម្ពុជាឡើយ។ កងទ័ពស្ម័គ្រចិត្តវៀតណាមបានពលីជីវិតនៅទឹកដីកម្ពុជាគឺដើម្បីធ្វើឲ្យរស់ឡើងវិញប្រជាជាតិមួយ និងដើម្បីធ្វើឲ្យប្រទេសកម្ពុជាមួយស្រស់ស្អាតដូចសព្វថ្ងៃនេះ។ ដូច្នេះហើយ យើងតែងតែសហការយ៉ាងសកម្មជាមួយក្រុម K71, K72, និង K73 នៅក្នុង​តំបន់ នៃយោធភូមិភាគទី៥ ដើម្បីស្វែងរក ប្រមូលផ្តុំ និងធ្វើមាតុភូមិនិវត្តន៍អដ្ឋិធាតុយុទ្ធជនពលីនៃកងទ័ពស្ម័គ្រវៀតណាម។ អគារគោរពវិញ្ញាណក្ខន្ធយុទ្ធជនពលីនៃកងទ័ពស្ម័គ្រចិត្តវៀតណាម នឹងក្លាយជាកន្លែងសម្រាប់ការអប់រំប្រពៃណីសម្រាប់នាយទាហាន នាយទាហានរង ពលទាហាន នៃកងកម្លាំងប្រដាប់អាវុធ និងប្រជាជនកម្ពុជា ឲ្យបានយល់ដឹងកាន់តែជ្រាលជ្រៅថែមទៀតអំពីមនោសញ្ចេតនា និងការលះបង់ដ៏ថ្លៃថ្លារបស់កងទ័ពស្ម័គ្រចិត្ត និងអ្នកជំនាញការវៀតណាម"។

ក្នុងបរិយាកាសដ៏ឱឡារិកនៃពិធីនេះ មនុស្សម្នាក់ៗបានអុជធូប គោរពវិញ្ញាណក្ខន្ធយុទ្ធជនពលីនៃកងទ័ពស្ម័គ្រចិត្តវៀតណាម។ ទប់អារម្មណ៍មិនបាន ទឹកភ្នែករបស់ប្រតិភូម្នាក់ៗក៏ហូរចុះមក។ លោកវរសេនីយ៍ឯកបំរុង Tran Chi Cong ប្រធានក្រុម K73 និយាយយ៉ាងរំភើបចិត្តថា "បំណងប្រាថ្នារបស់កម្មាភិបាល និងយុទ្ធ​ជន​នៃក្រុម K73 បានសម្រេចហើយ។ នៅក្នុងការស្វែងរក ប្រមូលអដ្ឋិធាតុនា​លើកក្រោយ ក្រុម K73 មានកន្លែងធំទូលាយសម្រាប់គោរពបូជាយុទ្ធជនពលីហើយ"។

លោក Nguyen Huy Tang ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសង្គមនិយមវៀតណាមប្រចាំកម្ពុជា បានសង្កត់ធ្ងន់ថា៖ “ការងារស្វែងរក ប្រមូល និងធ្វើមាតុភូមិនិវត្តន៍អដ្ឋិធាតុ​យុទ្ធជនពលីនៃកងទ័ព​ស្ម័គ្រ​​ចិត្ត​វៀតណាម គឺជាការងារសំខាន់ណាស់ ដែលបង្ហាញពីការដឹងគុណរបស់បក្ស និងរដ្ឋាភិបាលវៀតណាម ក៏ដូចជារាជរដ្ឋាភិបាល និងប្រជាជនកម្ពុជា។ ពេលវេលាកន្លងផុតទៅ ហើយសណ្ឋានដី ភូមិសាស្រ្ត បានផ្លាស់ប្តូរយ៉ាងខ្លាំង សាក្សីក៏តិចជាងមុន ដូច្នេះការស្វែងរកអដ្ឋិធាតុ​យុទ្ធជន​ពលី​នឹងជួបការលំបាកជាច្រើន។ យ៉ាងណាមិញ ការសាងសង់អគារគោរពវិញ្ញាណក្ខន្ធយុទ្ធជនពលីនៃកងទ័ពស្ម័គ្រចិត្តវៀតណាមនៅខេត្តបាត់ដំបង ជាការងារដ៏មានអត្ថន័យ និងជា​ទង្វើដ៏ថ្លៃថ្លា។ អាស្រ័យហេតុនេះ រួម​ចំណែក​ពង្រឹងទំនាក់ទំនងមិត្តភាព និងសាមគ្គីភាពរវាងប្រទេសទាំងពីរ ប្រជាជននៃប្រទេស​ទាំងពីរវៀតណាម និងកម្ពុជា ឲ្យ​កាន់តែរឹងមាំ និង​រីកចម្រើន​ថែម​ទៀត៕