ពលរដ្ឋអ៊ីតាលី ដែលកំពុងសម្ងំក្នុងផ្ទះ ក្រោមបម្រាមដើរហើរ ដើម្បីកាត់បន្ថយការឆ្លងវីរុសកូរ៉ូណាបានបង្វែរភាពភ័យខ្លាច ដោយការអើតតាមបង្អួច និងខ្លះឈររាំច្រៀងនៅរានហាលមុខផ្ទះយ៉ាងស្រុះគ្នា។ សកម្មភាពសប្បាយរំសាយទុក្ខធំរបស់ពួកគេត្រូវបានថតវីដេអូ នឹងមានចំនួនទស្សនារាប់សិបពាន់ដងលើអនឡាញ។
ប្រជាជនអ៊ីតាលីខ្លះយករានហាល ជាទីច្រៀងរាំរំសាយអារម្មណ៍តានតឹង (រូបថត AFP)
ចាប់តាំងពីសប្ដាហ៍មុន រដ្ឋាភិបាលអ៊ីតាលីបានកម្រិតការដើរហើររបស់ពលរដ្ឋ ដោយអនុញ្ញាតឲ្យចេញក្រៅផ្ទះតែក្នុងករណីចាំបាច់ប៉ុណ្ណោះ។ ខណៈព្រឹត្តិការណ៍ទាំងអស់ត្រូវបានផ្អាក ហើយអាជីកម្មជាច្រើនបានបិទទ្វារ តារាសិល្បៈនៅអ៊ីតាលីនាំគ្នាសម្ដែងតាមអនឡាញ ដើម្បីផ្ដល់ការកម្សាន្តដល់ទស្សនិកជននៅផ្ទះ។
ទំនោរនេះត្រូវបានយកទៅអនុវត្តបន្ត ដោយពលរដ្ឋនៅតាមផ្ទះមួយចំនួនបានយកមាត់បង្អួច ធ្វើជាទីរាំច្រៀងកម្សាន្តបន្ធូរអារម្មណ៍។ វីដេអូមួយដែលត្រូវបានថតនៅក្រុង Tuscan មានចំនួនទស្សនាតាមបណ្ដាញ Twitter ជិត ១ លានដង។ ពលរដ្ឋខ្លះនាំគ្នាច្រៀងបទប្រពៃណី Canto della Verbena បង្ហើរសំនៀងតាមមាត់បង្អួច ដោយមានអ្នកជិតខាងច្រៀងបន្ទរស្រុះគ្នា។
ប្រជាជនអ៊ីតាលីខ្លះយករានហាល ជាទីច្រៀងរាំរំសាយអារម្មណ៍តានតឹង (រូបថត AFP)
រីឯតារាចម្រៀងអ៊ីតាលី Andrea Sannino បានបង្ហោះកម្រងវីដេអូពលរដ្ឋអ៊ីតាលីនៅទីក្រុងភាគខាងត្បូង Naples ជាស្រុកកំណើតរបស់លោក ដោយសរសេរថា៖ «ថ្ងៃណាមួយ ខ្ញុំនឹងប្រាប់កូនចៅរបស់ខ្ញុំថា យើងធ្លាប់ឆ្លងវេលានេះ ដែលធ្វើឲ្យខ្ញុំស្រក់ទឹកភ្នែកជោរជន់»។
វីដេអូមួយទៀតដែលត្រូវបានថតនៅអគារអាផាតមិនទីក្រុងភាគខាងជើង Turin បានបង្ហាញសកម្មភាពប្រជាជនអ៊ីតាលីឈរនៅរានហាលមុខផ្ទះ ហើយនាំគ្នាច្រៀងរាំយ៉ាងរន្ថាន់តាមបទអេស្ប៉ាញដ៏ល្បីល្បាញ ម៉ាការ៉េណ យ៉ាងស្រុះគ្នាតែម្ដង។ ពលរដ្ឋមួយចំនួនមានចងទង់ជាតិអ៊ីតាលី និងខ្លះទៀតអមដោយគំនូរ ព្រមទាំងសំណេរកូនក្មេងសិស្សសាលា ដែលតម្រូវឲ្យនៅផ្ទះ ខណៈបណ្ដាសាលារៀននានាបិទទ្វារ។ គិតត្រឹមចុងសប្ដាហ៍ ប្រទេស អ៊ីតាលី មានករណីឆ្លងជាង ២៤ ០០០ និងចំនួនមនុស្សស្លាប់បាត់បង់ជីវិតប្រមាណ ១ ៨០០ នាក់៕
（ហេង វុធ្ធី）
（ប្រភពព័ត៌មាន: postkhmer.com）
មតិពីមិត្តអ្នកអាន