សម្តេចតេជោ ហ៊ុន សែន នៅព្រឹកថ្ងៃទី២៥ ខែមីនានេះ បានប្រកាសថា រាជរដ្ឋាភិបាល កំពុងពិចារណាថា តើនឹងត្រូវមានវិធានការយ៉ាងណាចំពោះអ្នកដែលឆ្លៀតឱកាសលក់ម៉ាសឡើងថ្លៃហួសហេតុ នៅក្នុងគ្រាអាសន្នបែបនេះ ខណៈដែលហាង ឬឱសថស្ថាននោះនឹងត្រូវបិទមិនអោយរកស៊ីមួយជីវិតតែម្តង។
ហាង ឬឱសថស្ថាន នឹងប្រឈមការបិទទ្វារមួយជីវិត បើនៅតែលក់ម៉ាសឡើងថ្លៃ។
សម្តេចបានបន្តថា «រាជរដ្ឋាភិបាល បាននឹងកំពុងពិនិត្យមើលមាត្រា២២នៃរដ្ឋធម្មនុញ្ញ នៃព្រះរាជាណាចក្រកម្ពុជា ដែលបានចែងពីការដាក់ប្រទេសនៅក្នុងគ្រាអាសន្ន បើរាជរដ្ឋាភិបាលទប់ទល់នឹងស្ថានការណ៍ កូវីដ១៩ មិនជាប់។ មួយវិញទៀត រដ្ឋមន្ត្រី ក្រសួងសុខាភិបាល និងពលរដ្ឋ អាចរាយការណ៍មកកាន់ផេកសម្តេចផ្ទាល់ ថាតើមានហាងឬឱសងស្ថានណាខ្លះដែលលក់ម៉ាស ឡើងថ្លៃជ្រុល»។
ការប្រកាសយ៉ាងខ្លាំងក្លាបែបនេះ ក្រោយពេលដែលមានការរិះគន់យ៉ាងចាស់ ពីសាធារណៈជនក្នុងបណ្តាញសង្គមហ្វេសបុក ចំពោះតម្លៃម៉ាស និងសម្ភារៈសម្រាប់ការពារការឆ្លងពីវីរុសកូវីដ១៩ ដែលត្រូវអាជីវករនិងម្ចាស់ឱសថស្ថានមួយចំនួនក្នុងតម្លៃថ្លៃហួសហេតុពេក៕
（សរុបដោយវិច្ឆិកា）
មតិពីមិត្តអ្នកអាន