វៀតណាមបានដាក់ក្តីសង្ឃឹមខ្ពស់ចំពោះការនាំអង្ករចេញក្នុងឆ្នាំ ២០២១ ដោយសារទីផ្សារនាំចេញធំៗ ដូចជា ហ្វីលីពីន និងអាហ្វ្រិកបន្តចុះកិច្ចសន្យាទទួលទិញអង្ករពីប្រទេសនេះ ខណៈទីផ្សារនាំចេញផ្សេងៗទៀតមានតម្រូវការខ្ពស់សម្រាប់ប្រភេទអង្ករក្រអូប និងអង្ករដំណើប។
វៀតណាមរំពឹងខ្ពស់លើការនាំចេញអង្ករកើនឡើងក្នុងឆ្នាំនេះ
សមាគមស្បៀងវៀតណាមបានឱ្យដឹងថា កិច្ចព្រមព្រៀងពាណិជ្ជកម្មសេរីទ្វេភាគី និងពហុភាគីរវាងវៀតណាម និងប្រទេសដទៃ ដូចជា ជាមួយអឺរ៉ុបនិងអង់គ្លេស ដោយមានពន្ធអនុគ្រោះ នឹងបង្កើតលក្ខខណ្ឌគាំទ្រសម្រាប់អង្ករវៀតណាម ដើម្បីប្រកួតជាមួយប្រទេសនាំចេញអង្ករផ្សេងទៀត។
យោងតាមកុងស៊ុលពាណិជ្ជកម្មវៀតណាមប្រចាំប្រទេសអង់គ្លេស លោក Nguyen Canh Cuong ការនាំចេញអង្ករទៅកាន់ប្រទេសនេះក្នុងឆ្នាំនេះនឹងកើនឡើងខ្ពស់ធៀបឆ្នាំ២០២០។
លោកបានបន្តថា ក្រុមហ៊ុនអង់គេ្លសច្រើននឹងទិញអង្ករវៀតណាមតាមរយៈកិច្ចព្រមព្រៀងពាណិជ្ជកម្មសេរី អង់គ្លេស-វៀតណាម បង្កើតនូវឱកាសសម្រាប់អង្ករវៀតណាម ដើម្បីពង្រីកចំណែកទីផ្សារនៅអង់គ្លេសក្នុងឆ្នាំនេះ។
ក្នុងឆ្នាំ ២០១៩ ការនាំចេញអង្ករពីប្រទេសវៀតណាម ទៅកាន់អង់គ្លេសមានកំណើនខ្ពស់រហូតដល់ទៅ ៣៧៦ ភាគរយ ដែលអង់គ្លេសជាទីផ្សារមានសក្តានុពលខ្លាំងសម្រាប់អង្ករវៀតណាម។
អ្នកជំនាញបានលើកឡើងថា ប្រសិនបើវៀតណាមចង់រក្សាកំណើននាំចេញអង្ករក្នុងឆ្នាំ ២០២១ វៀតណាមត្រូវការផ្តោតលើការកសាងនូវច្រវាក់តម្លៃអង្ករពេញលេញ និងគ្រប់គ្រងគុណភាពផលិតកម្ម ការកែច្នៃ និងការចែកចាយ។
វៀតណាមនាំចេញអង្ករ ៦,១៥ តោន ដែលមានតម្លៃ ៣,០៧ ពាន់លានដុល្លារ កាលពីឆ្នាំ ២០២០ ធ្លាក់ចុះបរិមាណ ៣,៥ ភាគរយ ប៉ុន្តែចំណូលបានកើនឡើង ៩,៣ ភាគរយធៀបនឹងរយៈពេលដូចគ្នា៕
（ប្រភពព័ត៌មាន: postkhmer）
មតិពីមិត្តអ្នកអាន