ពាណិជ្ជកម្មទ្វេភាគីរវាងវៀតណាម និងហុងគ្រីបានកើនឡើងដល់កម្រិតខ្ពស់បំផុតជាប្រវត្ដិសាស្ដ្រដល់ជាង ១ ពាន់លានដុល្លារអាមេរិកកាលពីឆ្នាំ ២០២០ ដែលឆ្លុះបញ្ចាំងពីការពង្រឹងទំនាក់ទំនងរវាងប្រទេសទាំង ២ ក្នុងរយៈពេលជាច្រើនឆ្នាំថ្មីៗនេះ។
យោងតាមស្ថានទូតវៀតណាមប្រចាំប្រទេសហុងគ្រីវាជាលើកដំបូងដែលពាណិជ្ជកម្មទ្វេភាគីជាប្រវត្តិសាស្ត្របានកើនឡើងដល់ ១,២៩៧ ពាន់លានដុល្លារ កើនឡើង ៧៣,៨៨ ភាគរយធៀបឆ្នាំ ២០១៩។
ក្នុងចំណោមតួលេខនេះ ការនាំចេញរបស់ប្រទេសវៀតណាមទៅប្រទេសហុងគ្រីមានតម្លៃ ៩២៥ លានដុល្លារ កើនឡើង ១២៦,៦៩ ភាគរយ។
ពាណិជ្ជកម្មកើនឡើងខ្ពស់បំផុតជាប្រវត្តិសាស្ដ្រនេះ បង្ហាញថា ទំនាក់ទំនងរវាងប្រទេសទាំង ២ កំពុងរីកចម្រើនខ្លាំងជាងពេលណាៗទាំងអស់ ជាពិសេសចាប់តាំងពីប្រទេសទាំង ២ បានធ្វើឱ្យប្រសើរនូវទំនាក់ទំនងទៅជាភាពជាដៃគូគ្រប់ជ្រុងជ្រោយកាលពីឆ្នាំ ២០១៨។
កាលពីខែសីហា ឆ្នាំ ២០២០ លោក Peter Szijjarto រដ្ឋមន្ដ្រីក្រសួងការបរទេស និងពាណិជ្ជកម្មរបស់ប្រទេសហុងគ្រីបានទៅទស្សនកិច្ចនៅប្រទេសវៀតណាម ក្នុងឱកាសខួបលើកទី ៧០ នៃទំនាក់ទំនងការទូតរបស់ប្រទេសទាំង ២ ដែលជាការឆ្លុះបញ្ចាំងឱ្យឃើញថា ប្រទេសហុងគ្រីបានភ្ជាប់សារៈសំខាន់ខ្លាំងបំផុតចំពោះទំនាក់ទំនងនេះជាមួយប្រទេសវៀតណាម។
ប្រទេសហុងគ្រីក៏ស្ថិតក្នុងចំណោមបណ្ដាប្រទេសដំបូង នៅសហភាពអឺរ៉ុប (EU) ដែលអនុម័តកិច្ចព្រមព្រៀងពាណិជ្ជកម្មសេរីអឺរ៉ុប និងប្រទេសវៀតណាម (EVFTA) និងកិច្ចព្រមព្រៀងការពារការវិនិយោគអឺរ៉ុប និងប្រទេសវៀតណាម (EVIPA) ដើម្បីបង្កើតក្របខ័ណ្ឌការងាររយៈពេលវែង និងប្រកបដោយចីរភាព ដើម្បីកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងការវិនិយោគបន្ថែមទៀតរវាងវៀតណាម និងប្លុកមួយនេះ។
ក្នុងរយៈពេលជាច្រើនឆ្នាំថ្មីៗនេះ ប្រទេសវៀតណាមបាននាំចេញផលិតផលភាគច្រើន រួមមាន កុំព្យូទ័រ ផលិតផលអេឡិចត្រូនិក និងគ្រឿងផ្គុំ គ្រឿងម៉ាស៊ីន និងឧបករណ៍ ទូរស័ព្ទ និងគ្រឿងផ្គុំ និងផលិតផលសម្លៀកបំពាក់ទៅប្រទេសហុងគ្រី។ ផលិតផលនាំចេញសំខាន់ៗរបស់ប្រទេសហុងគ្រីទៅប្រទេសវៀតណាមរួមមានចំណីសត្វ វត្ថុធាតុដើម គ្រឿងម៉ាស៊ីន ឧបករណ៍ និងផលិតផលឱសថ។
ប្រទេសវៀតណាមនៅតំបន់អាស៊ាន និងប្រទេសហុងគ្រីស្ថិតនៅតំបន់អឺរ៉ុបកណ្តាលមានទំហំពាណិជ្ជកម្មទ្វេភាគីសរុបត្រឹមតែតម្លៃ ៦៤៥ លានដុល្លារក្នុងឆ្នាំ ២០១៨៕
(ប្រែសម្រូលដោយវិច្ឆិកា)
មតិពីមិត្តអ្នកអាន