ប្រភពស្និទនឹងប្រធានាធិបតីបារាំង លោក អែមម៉ានុយអែល ម៉ាក្រុង បានឱ្យដឹងថាសហភាពអឺរ៉ុប ទំនងជានឹងយល់ព្រមពន្យារពេលការចាកចេញពីសហភាពអឺរ៉ុប ឬ Brexit របស់ចក្រភពអង់គ្លេស រហូតដល់ ថ្ងៃទី៣១ ខែមករា ឆ្នាំ២០២០។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅថ្ងៃចន្ទ ទី២៨ ខែតុលា ឆ្នាំ២០១៩។
សហភាពអឺរ៉ុប អាចនឹងយល់ព្រមពន្យារពេល Brexit ជាលើកទី៣, នេះបើតាមប្រភពស្និទនឹងប្រធានាធិបតីបារាំង។
សេចក្ដីរាយការណ៍ខាងលើកើតមានឡើង នៅមុនពេលមន្ត្រីការទូតនៃប្រទេសជាសមាជិកសហភាពអឺរ៉ុបចំនួន២៧ ត្រូវជួបប្រជុំគ្នានៅព្រឹកថ្ងៃចន្ទនេះ (ម៉ោងនៅព្រុចសែល) ដើម្បីពិភាក្សា និងធ្វើការសម្រេចចិត្តលើ Brexit។ ប្រភព ស្និទនឹងលោក ម៉ាក្រុង បានឱ្យដឹងដូច្នេះថា៖«វាទំនងជានឹងមានកិច្ចព្រមព្រៀងមួយនៅព្រឹកថ្ងៃចន្ទនេះ រវាងបណ្ដាប្រទេសជាសមាជិកសភាពអឺរ៉ុបទាំង២៧ ស្ដីពីការពន្យារពេល Brexit រហូតដល់ថ្ងៃទី៣១ ខែមករា ឆ្នាំ២០២០»។
គួរបញ្ជាក់ថា បើសិនជាមានកិច្ចព្រមព្រៀងមែន នោះវានឹងក្លាយជាការពន្យារពេល Brexit ជាលើកទី៣ តែបើគ្មាន វិញ អង់គ្លេសនឹងចាកចេញពីសហភាពអឺរ៉ុបតាមការគ្រោងទុកនៅថ្ងៃទី៣១ ខែតុលានេះដោយគ្មានកិច្ចព្រមព្រៀង៕
（ប្រភព៖ Fresh News）
មតិពីមិត្តអ្នកអាន