យុគសម័យ - សម្តេចតេជោ នាយករដ្ឋមន្ត្រី ហ៊ុន សែន បានប្រកាសនៅយប់ថ្ងៃទី១៥ ខែមករានេះថា ប្រទេសចិន បានសម្រេចផ្តល់ឲ្យកម្ពុជានូវវ៉ាក់សាំងកូវីដ១៩ ចំនួន ១លានដូស សម្រាប់ចាក់ឲ្យប្រជាជនកម្ពុជា ដោយឥតគិតថ្លៃ ចំនួន ៥០ម៉ឺននាក់។ អ្នក ដែលត្រូវចាក់វ៉ាក់សាំងចិនមុនគេ គឺអ្នកនៅជុំវិញសម្តេចផ្ទាល់ ជុំវិញព្រះមហាក្សត្រ ប្រធានព្រឹទ្ធសភា និងប្រធានរដ្ឋសភា ជាដើម។
កម្ពុជា ទទួលយកវ៉ាក់សាំងកូវីដ១៩ របស់ចិន ១លានដូស
បន្ទាប់មក សម្តេចថា ខ្សែត្រៀមជួរមុខ គឺក្រុមគ្រូពេទ្យ គ្រូបង្រៀន កងកម្លាំងគ្រប់ប្រភេទ មន្ត្រីយុត្តិធម៌ អ្នកបោសសម្អាត គ្រូបង្រៀន អ្នករត់ម៉ូតូឌុប ម៉ូតូកង់បី និងអ្នករត់តាក់ស៊ី នឹងត្រូវទទួលបានវ៉ាក់សាំង ដោយឥតគិតថ្លៃ និងដោយស្ម័គ្រចិត្ត។
សម្តេចតេជោ ហ៊ុន សែន បានលើកឡើងថា កន្លងមក សម្តេចបានប្រកាសថា កម្ពុជាទទួលយកតែវ៉ាក់សាំងណា ដែលអង្គការសុខភាពពិភពលោក ប្រកាសទទួលស្គាល់ប៉ុណ្ណោះ។ ប៉ុន្តែមកដល់ពេលនេះ សម្តេចបញ្ជាក់ថា អង្គការសុខភាពពិភពលោក មិនទាន់ប្រកាសទទួលស្គាល់វ៉ាក់សាំងរបស់ក្រុមហ៊ុនណាមួយនៅឡើយទេ។
ដូច្នេះនៅពេលនេះ សម្តេចតេជោ ហ៊ុន សែន បានបញ្ជាក់ថា កម្ពុជាមានភាចាំបាច់ ត្រូវតែទទួលយកវ៉ាក់សាំងកូវីដ១៩ របស់ក្រុមហ៊ុនចិន គឺស៊ីណូហ្វាម ដើម្បីចាក់ជូនប្រជាជនកម្ពុជា ខណៈដែលវ៉ាក់សាំងរបស់ចិននេះ ត្រូវបានចាក់នៅប្រទេសជាច្រើនរួចមកហើយ ក្នុងនោះ មានទាំងមេដឹកនាំចិន និងមេដឹកនាំប្រទេសឥណ្ឌូនេស៊ី ជាដើម។
សម្តេចតេជោ ហ៊ុន សែន បានបញ្ជាក់ថា «យើងមិនអាចរង់ចាំតទៅទៀតទេ ដោយសារតែភាពចាំបាច់ក្នុងកិច្ចការពារប្រជាជនកម្ពុជាយើង។ ប៉ុន្មានថ្ងៃនេះ មានឆ្លងច្រើន គឺកាលពីម្សិលមិញ ឆ្លង ១៥នាក់ ហើយនៅថ្ងៃនេះ ពលករមកពីថៃ ឆ្លង ១០នាក់ទៀត»។
សម្តេចតេជោ បន្តថា វ៉ាក់សាំងចិន គឺងាយស្រួលក្នុងការរក្សាទុក ក៏ងាយស្រួលក្នុងការដឹកនាំជញ្ជូនពីចិន មកកម្ពុជា៕
（ប្រែសម្រួលដោយ ហេង វុធ្ធី）
（ប្រភពព័ត៌មាន: vov.vn）
