យុគសម័យ - នៅរសៀលថ្ងៃទី ១ ខែតុលា កុមារាកុមារីដើមកំណើតវៀតណាមនៅក្រុងព្រះសីហនុខេត្តព្រះសីហនុប្រទេសកម្ពុជា បានប្រមូលផ្តុំគ្នានៅទីស្នាក់ការស្ថានអគ្គកុងស៊ុលវៀតណាមប្រចាំនៅខេត្តព្រះសីហនុ ដើម្បីចូលរួមក្នុងពិធីបុណ្យសែនព្រះខែដែលរៀបចំឡើងដោយស្ថានអគ្គកុងស៊ុលវៀតណាមសហការជាមួយសមាគមខ្មែរ - វៀតណាមប្រចាំនៅកម្ពុជានិងសាខាក្រុមហ៊ុនមិត្តហ្វូនខេត្តព្រះសីហនុ រួមទាំងសប្បុរសជនក្នុងស្រុកផងដែរ។
ភរិយារបស់អគ្គកុងស៊ុល លោកស្រី Do Quynh Nga ប្រគល់អំណោយដល់ក្មេងៗ។ រូបថត៖ VNA
ក្នុងពិធីនេះ តំណាងអគ្គកុងស៊ុលបានអានលិខិតអបអរសាទររបស់លោកអគ្គលេខាបក្ស ប្រធានរដ្ឋវៀតណាម Nguyen Phu Trong ទៅកាន់ក្មេងៗនិងក្មេងជំទង់ទាំងក្នុងនិងក្រៅប្រទេស។ ទន្ទឹមនឹងនេះដែរ អគ្គកុងស៊ុលលោក Vu Ngoc Ly ក៏បានបង្ហាញជំនឿថាការរៀបចំពិធីបុណ្យសែនព្រះខែមិនត្រឹមតែជួយបង្រួបបង្រួមកុមារនៅក្នុងសហគមន៍វៀតណាមនៅក្រុងព្រះសីហនុប៉ុណ្ណោះទេតែថែមទាំងជួយពួកគេឱ្យមានការយល់ដឹងច្បាស់អំពីអត្តសញ្ញាណវប្បធម៌វៀតណាមផងដែរ។
ក្នុងឱកាសនេះដែរ លោក សុខជា (SokChea) ប្រធានសមាគមខ្មែរ - វៀតណាមខេត្តព្រះសីហនុនិងអ្នកគ្រូ Nguyen Thi Suong (អាយុ ៦៨ ឆ្នាំ ដែលមានបទពិសោធន៍ខាងបង្រៀនភាសាវៀតណាមអស់រយៈពេលជាច្រើនឆ្នាំដោយស្ម័គ្រចិត្ត សម្រាប់កូនៗរបស់ប្រជាជនដើមកំណើតវៀតណាមដែលរស់នៅនៅទីក្រុងព្រះសីហនុ) បានអះអាងថាដោយមានការយកចិត្តទុកដាក់និងការគាំទ្ររបស់អគ្គកុងស៊ុល ហើយការចូលរួមរបស់កុមារនៅក្នុងព្រឹត្តិការណ៍វប្បធម៌ដែលរៀបចំឡើងដោយអគ្គកុងស៊ុលគឺជាកម្លាំងចលករដ៏ល្អ ដើម្បីជួយឲ្យពួកគេថែរក្សាអត្តសញ្ញាណវប្បធម៌និងភាសាវៀតណាម ព្រមទាំងរួមគ្នាឆ្ពោះទៅរកមាតុភូមិដែលជាស្រុកកំណើតដ៏ពិសិដ្ឋ។
កុមារដើមកំណើតវៀតណាមនៅកម្ពុជាប្រារព្ធពិធីបុណ្យសែនព្រះខែឆ្នាំ២០២០
ក្នុងឱកាសនេះអគ្គកុងស៊ុលសហការជាមួយម្ចាស់ជំនួយ បានប្រគល់អំណោយជាង ៥០ កញ្ចប់ដល់កុមារាកុមារី និងរួមទាំងរៀបចំពិធីជប់លៀងក្នុងឱកាសបុណ្យសែនព្រះខែឆ្នាំ២០២០នេះ ពោរពេញទៅដោយភាពកក់ក្តៅនិងសប្បាយរីករាយផងដែរ៕(បកប្រែដោយ ហេង វុធ្ធី)
(ប្រភពព័ត៌មាន: thoidai.com.vn)
មតិពីមិត្តអ្នកអាន