នាព្រឹកថ្ងៃទី១៥ ខែមករា នៅវិមានរដ្ឋសភាអូស្រ្តាលី សម្តេចអគ្គមហាពញាចក្រី ហេង សំរិន ប្រធានរដ្ឋសភាកម្ពុជាបានទទួលជួបសវនាការជាមួយលោកជំទាវ Tong Thi Phong អនុប្រធានរដ្ឋសភា នៃសាធារណរដ្ឋសង្គមនិយមវៀតណាម បន្ទាប់ពីបានចូលរួមកិច្ចប្រជុំប្រចាំឆ្នាំ នៃវេទិកាសភាអាស៊ី-ប៉ាស៊ីហ្វិក(APPF) លើកទី២៨ នៅប្រទេសអូស្ត្រាលី។
លោកជំទាវ Tong Thi Phong និង សម្តេចអគ្គមហាពញាចក្រី ហេង សំរិន។ (ប្រភព៖ AKP)
បើយោងតាមរដ្ឋសភាកម្ពុជាបានឱ្យដឹងថា ក្នុងជំនួបនេះ លោកជំទាវ Tong Thi Phong អនុប្រធានរដ្ឋសភាវៀតណាម ក៏បានគោរពអញ្ជើញសម្តេចប្រធានរដ្ឋសភាកម្ពុជា ទៅបំពេញទស្សនកិច្ចនិងចូលរួមកិច្ចប្រជុំមួយចំនួនដែលសភាវៀតណាមរៀបចំធ្វើនៅក្នុងឆ្នាំ២០២០នេះ គឺមានកិច្ចប្រជុំសមាជិកសភាស្រ្តីវៀតណាម និងកម្ពុជា មហាសន្និបាតអន្តរសភាអាស៊ាន លើកទី៤១ និងកិច្ចប្រជុំទល់មុខអាស៊ានអាយប៉ា។ លោកជំទាវអនុប្រធានរដ្ឋសភាវៀតណាម ក៏បានអញ្ជើញសមាជិសភាកម្ពុជា ចូលរួមកិច្ចប្រជុំមួយចំនួនទៀត នៅក្នុងឆ្នាំ២០២០ នោះដែរ មានកិច្ចប្រជុំស្តីពី វប្បធម៌ និងអប់រំ សេដ្ឋកិច្ចជាដើម។ លោកជំទាវ អនុប្រធានរដ្ឋសភាវៀតណាម បានកើតសរសើរចំពោះការ រៀបចំកិច្ចប្រជុំប្រចំាឆ្នាំលើកទី២៧ នៃវេទិកាសភាអាស៊ីប៉ាស៊ីហ្វិក(APPF) របស់សភាកម្ពុជា កាលពីឆ្នាំ២០១៩ មានលក្ខណៈល្អណាស់ គឺល្អទំាងខ្លឹមសារនិងការរៀបចំកិច្ចប្រជុំ។
សម្តេចអគ្គមហាពញាចក្រី ហេង សំរិន បានទទួលយកសំណើរបស់ភាគីវៀតណាម ដោយបានប្រគល់ភារកិច្ចជូនក្រុមការងារដើម្បីធ្វើការទំនាក់ទំនងជាមួយភាគីវៀតណាមបន្ត។សម្តេចប្រធានបានសម្តែងក្តីរីករាយចំពោះកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងវិនិយោគ ប្រទេសទំាងពីរ មានការរីកចម្រើនជាលំដាប់ ដែលមកដល់ពេលនេះ ឈានជិតដល់ទំហំទឹកប្រាក់ ៥ពាន់លានដុល្លារនោះ។ ចំពោះកិច្ចសហប្រតិបត្តិការសភាប្រទេសទំាងពីរវិញ មានលក្ខណៈល្អប្រសើរណាស់។ សម្ដេចប្រធានរដ្ឋសភាក៏បានលើកឡើងដែរថា សភាកម្ពុជានិងវៀតណាម បានគំាទ្រគ្នាទៅវិញទៅមក នៅលើឆាកអន្តរជាតិ ដូចជាការចូលរួមកិច្ចប្រជុំAPPF ក្នុងប្រទេសអូស្រ្តាលីនេះជាដើម៕
（សរុបដោយវិច្ឆិកា）
មតិពីមិត្តអ្នកអាន