យុគសម័យ - ក្រសួងពាណិជ្ជកម្មកម្ពុជាបានសហការជាមួយក្រសួងឧស្សាហកម្មនិងពាណិជ្ជកម្មនៃសាធារណរដ្ឋសង្គមនិយមវៀតណាមនឹងរៀបចំពិព័រណ៍ពាណិជ្ជកម្មមិត្តភាពកម្ពុជា-វៀតណាមឆ្នាំ ២០១៩ ដែលនឹងប្រព្រឹត្តទៅចាប់ពីថ្ងៃទី ២៤ ដល់ ២៦ ខែ ធ្នូ ឆ្នាំ ២០១៩។
វៀតណាមកម្ពុជាគ្រោងនឹងបើកសម្ពោធផ្សារដានៅខេត្តត្បូងឃ្មុំតាមបណ្តោយព្រំដែននៃប្រទេសទាំងពីរនៅចុងខែនេះ (រូបថត៖ Vnews)
ក្រសួងពាណិជ្ជកម្មកម្ពុជាបានសហការជាមួយក្រសួងឧស្សាហកម្មនិងពាណិជ្ជកម្មនៃសាធារណរដ្ឋសង្គមនិយមវៀតណាមនឹងរៀបចំពិព័រណ៍ពាណិជ្ជកម្មមិត្តភាពកម្ពុជា-វៀតណាមឆ្នាំ ២០១៩ ដែលនឹងប្រព្រឹត្តទៅចាប់ពី ២៤ ដល់ ២៦ ខែ ធ្នូ ឆ្នាំ ២០១៩។ នេះបើតាមសេចក្តីប្រកាសព័ត៌មានរបស់ក្រសួងពាណិជ្ជកម្ម។ សេចក្តីប្រកាសព័ត៌មានឲ្យដឹងថា ការរៀបចំពិព័រណ៍ពាណិជ្ជកម្មនេះធ្វើឡើងក្នុងគោលបំណងអបអរសាទរពិធីសម្ពោធ និងពិធីប្រគល់ទទួលផ្សារគំរូព្រំដែនកម្ពុជា «ផ្សារដារ» ដែលមានតាំងបង្ហាញទំនិញរវាងប្រទេសទាំង ២ ជាច្រើនមុខ។ ផ្សារព្រំដែនកម្ពុជា-វៀតណាមដំបូងដែលវិនិយោគទឹកប្រាក់ ២ លានដុល្លារ ពីរដ្ឋាភិបាលវៀតណាមស្ថិតនៅស្រុកមេមត់ ខេត្តត្បូងឃ្មុំនៅលើផ្ទៃដីប្រហែល ២ ហិកតា ចម្ងាយប្រហែល ១ គីឡូម៉ែត្រ ពីព្រំដែនរវាងប្រទេសទាំង ២។
វៀតណាមកម្ពុជាគ្រោងនឹងបើកសម្ពោធផ្សារដានៅខេត្តត្បូងឃ្មុំតាមបណ្តោយព្រំដែននៃប្រទេសទាំងពីរនៅចុងខែនេះ (រូបថត៖ postkhmer)
លោក ជាម ច័ន្ទសោភ័ណ អភិបាលខេត្តឲ្យដឹងថា ការតាំងពិព័រណ៍នេះនឹងមានស្តង់ទំនិញសរុបរវាងកម្ពុជា និងវៀតណាមចន្លោះពី ១០០ ទៅ ២០០ ស្តង់ដែលនឹងតាំងបង្ហាញទំនិញចម្រុះ។ លោកថ្លែងថា៖ «ខ្ញុំគិតថា ផ្សារព្រំដែននេះ ជាកាលានុវត្តភាពថ្មីមួយទៀតសម្រាប់ប្រជាពលរដ្ឋ និងពាណិជ្ជករវាងប្រទេសទាំង ២ ដែលវានឹងជួយជំរុញពាណិជ្ជកម្មតាមព្រំដែនថែមទៀត»។
ទំហំពាណិជ្ជកម្មកម្ពុជា-វៀតណាម មានទឹកប្រាក់ ៤,៧ ពាន់លានដុល្លារ កាលពីឆ្នាំ ២០១៨ កើន ២៤ ភាគរយ បៀបនឹងឆ្នាំ ២០១៧ ខណៈរយៈពេល ៦ ខែឆ្នាំនេះមាន ២,៧២ ពាន់លានដុល្លារ ដោយរំពឹងនឹងកើនដល់ ៥ ពាន់លានដុល្លារនៅដំណាច់ឆ្នាំ ២០១៩ នេះ៕
（ហេង វុធ្ធី）
មតិពីមិត្តអ្នកអាន