ទាញយកផលជាអតិបរមានូវទំហំលំហកំណើន បង្កើតកម្លាំងជំរុញសម្រាប់កំណើនពីរខ្ទង់

នាយករដ្ឋមន្ត្រី Le Minh Hung បានអញ្ជើញជាអធិបតីក្នុងសម័យប្រជុំរដ្ឋាភិបាលជាប្រក្រតីប្រចាំខែកញ្ញា ឆ្នាំ ២០២៦ និងកិច្ចប្រជុំតាមប្រព័ន្ធអនឡាញជាមួយបណ្តាក្រសួង ស្ថាប័ន និងមូលដ្ឋាន នាថ្ងៃទី ៣ ខែតុលា។

បន្ទាប់ពីរយៈពេល ៩ ខែមក សេដ្ឋកិច្ចវៀតណាមនៅតែបន្តរក្សាបាននូវសន្ទុះកំណើនជាវិជ្ជមាន។ ទោះជាយ៉ាងណាក៏ដោយ ដំណាក់កាលដែលនៅសេសសល់នៃឆ្នាំនេះ បានដាក់ចេញនូវតម្រូវការខ្ពស់ជាងមុន នៅពេលដែលទំហំលំហលើវិស័យផលិតកម្ម ការវិនិយោគ ការប្រើប្រាស់ ការនាំចេញ និងការវិនិយោគសាធារណៈ ចាំបាច់ត្រូវតែទាញយកផលឱ្យបានលឿន និងប្រកបដោយប្រសិទ្ធភាពជាងមុន។

នៅក្នុងសម័យប្រជុំរដ្ឋាភិបាលជាប្រក្រតីប្រចាំខែកញ្ញា និងសន្និសីទអនឡាញរបស់រដ្ឋាភិបាលជាមួយបណ្តាក្រសួង ស្ថាប័ន និងមូលដ្ឋាន នាថ្ងៃទី ៣ ខែតុលា នាយករដ្ឋមន្ត្រី Le Minh Hung បានតម្រូវឱ្យមូលដ្ឋាននានាធ្វើការត្រួតពិនិត្យ និងកំណត់ឱ្យបានពេញលេញនូវកម្លាំងចលករ និងទំហំលំហដែលអាចបន្តទាញយកផលបាន ជាពិសេសគឺបណ្តាផ្នែក វិស័យ និងគម្រោងនានាដែលមានលទ្ធភាពបង្កើតតម្លៃបន្ថែម។

តម្រូវការនេះត្រូវបានដាក់ចេញក្នុងបរិបទដែលបីខែចុងឆ្នាំមានអត្ថន័យសម្រេចចំពោះការសម្រេចបាននូវបណ្តាគោលដៅសេដ្ឋកិច្ចសង្គមក្នុងឆ្នាំ ២០២៦។

ត្រីមាសទី IV ត្រូវតែបង្កើតជំហានលោតផ្លោះ

GDP រយៈពេល ៩ ខែ នៃឆ្នាំ ២០២៦ កើនឡើង ៩,០១% ដោយឡែកត្រីមាសទី III កើនឡើង ៩,៩៥%។ យោងតាមរដ្ឋាភិបាល ដើម្បីសម្រេចបាននូវគោលដៅកំណើនពីរខ្ទង់ក្នុងពេញមួយឆ្នាំ GDP ត្រីមាសទី IV ត្រូវតែកើនឡើងលើសពី ១២,៥%។

គម្លាតរវាងលទ្ធផលបច្ចុប្បន្ន និងគោលដៅចុងឆ្នាំ បានបង្ហាញពីសម្ពាធយ៉ាងធំធេងចំពោះដំណើរការរៀបចំអនុវត្តនៅក្នុងបណ្តាខែដែលនៅសេសសល់។

មិនត្រឹមតែរក្សានូវបណ្តាកម្លាំងចលករដែលមានស្រាប់ប៉ុណ្ណោះទេ ធនធាននានាដែលបានត្រៀមទុក ប៉ុន្តែមិនទាន់ប្រែក្លាយទៅជាបរិមាណផលិតផល ការវិនិយោគ ការប្រើប្រាស់ និងតម្លៃបន្ថែម ក៏ចាំបាច់ត្រូវតែដាក់បញ្ចូលទៅក្នុងខឿនសេដ្ឋកិច្ចឱ្យបានលឿនជាងមុនផងដែរ។

គោលដៅកំណើនខ្ពស់នៃឆ្នាំ ២០២៦ ក៏ផ្សារភ្ជាប់ជាមួយនឹងទិសដៅអភិវឌ្ឍន៍រយៈពេលវែង។

រដ្ឋមន្ត្រីក្រសួងហិរញ្ញវត្ថុ Ngo Van Tuan បានសង្កត់ធ្ងន់ថា៖ «គោលដៅកំណើន ២ ខ្ទង់ គឺជាគោលដៅប្រកបដោយការប្រឈមយ៉ាងខ្លាំង ប៉ុន្តែគឺជាមាគ៌ាមិនអាចខ្វះបាន និងគ្មានមាគ៌ាណាផ្សេងទៀតដើម្បីឱ្យយើងសម្រេចបាននូវគោលដៅអភិវឌ្ឍន៍ប្រទេសជាតិ សំដៅឆ្ពោះទៅកាន់ខួប ១០០ ឆ្នាំ នៃការបង្កើតបក្ស ខួប ១០០ ឆ្នាំ នៃការបង្កើតរដ្ឋ និងឈានដល់ឆ្នាំ ២០៤៥ វៀតណាមក្លាយជាប្រទេសអភិវឌ្ឍន៍ មានឧស្សាហកម្មទំនើបនោះឡើយ។ យើងមានទិសដៅច្បាស់លាស់ មាគ៌ាច្បាស់លាស់ ជួរកងទ័ពមានរបៀបរៀបរយត្រឹមត្រូវ ឥឡូវនេះត្រូវប្តេជ្ញាចិត្តអនុវត្តយ៉ាងប្តូរផ្តាច់ និងប្រកបដោយប្រសិទ្ធភាព ដើម្បីសម្រេចបាននូវគោលដៅដែលបានកំណត់»។

ដូច្នេះហើយ បញ្ហាចោទនៃបីខែចុងឆ្នាំ មិនត្រឹមតែស្ថិតនៅលើការបន្ថែមប៉ុន្មានភាគរយនៃកំណើននោះទេ ប៉ុន្តែអ្វីដែលសំខាន់ជាងនេះទៅទៀត គឺការកំណត់ឱ្យបានត្រឹមត្រូវនូវបណ្តាប្រភពធនធានដែលនៅមានទំហំលំហកំណើន ហើយប្រែក្លាយធនធានទាំងនោះឱ្យទៅជាលទ្ធផលជាក់ស្តែងយ៉ាងឆាប់រហ័ស។

លើកកម្ពស់តួនាទីនៃបណ្តាប៉ូលកំណើន

ទំហំលំហកំណើនក្នុងត្រីមាសទី IV ស្ថិតនៅក្នុងវិស័យជាច្រើន ចាប់ពីផលិតកម្ម ការវិនិយោគ ការប្រើប្រាស់ ការនាំចេញ រហូតដល់ការបញ្ចេញទុនវិនិយោគសាធារណៈ និងការទាក់ទាញការវិនិយោគឯកជន។

នៅក្នុងសន្និសីទនេះ នាយករដ្ឋមន្ត្រី Le Minh Hung បានតម្រូវឱ្យមូលដ្ឋាននានា ជាពិសេសគឺប៉ូលកំណើនដែលមានទំហំសេដ្ឋកិច្ចធំ ត្រូវលើកកម្ពស់ឱ្យកាន់តែខ្លាំងក្លានូវតួនាទីដឹកមុខ និងការសាយភាយឥទ្ធិពល។

នាយករដ្ឋមន្ត្រីបានគូសបញ្ជាក់យ៉ាងច្បាស់ថា៖ «បណ្តាមូលដ្ឋានដែលជាប៉ូលកំណើនមានទំហំសេដ្ឋកិច្ចធំ ដូចជា Ha Noi ទីក្រុង Ho Chi Minh, Hai Phong, Quang Ninh, Dong Nai, Bac Ninh ត្រូវតែខិតខំប្រឹងប្រែងឱ្យបានខ្ពស់ជាងនេះ និងទាញយកផលឱ្យកាន់តែខ្លាំងក្លានូវបណ្តាទំហំលំហកំណើន ជាមួយនឹងដំណោះស្រាយដែលអាចអនុវត្តបានភ្លាមៗ ដូចជាការជំរុញផលិតកម្ម ការវិនិយោគ ការប្រើប្រាស់ ការនាំចេញ ការបញ្ចេញទុនវិនិយោគសាធារណៈ ការទាក់ទាញការវិនិយោគឯកជន និងការលើកកម្ពស់តួនាទីដឹកមុខ ការសាយភាយឥទ្ធិពល រួមចំណែកឱ្យបានកាន់តែច្រើនសម្រាប់កំណើនទូទាំងប្រទេស»។

ចំពោះបណ្តាមូលដ្ឋានដែលមានអត្រាកំណើននៅទាបជាងគោលដៅ ជាពិសេសកន្លែងដែលត្រូវបានប៉ាន់ប្រមាណថាមិនទាន់សម្រេចបានតាមផែនការពេញមួយឆ្នាំ នាយករដ្ឋមន្ត្រីបានតម្រូវឱ្យវាយតម្លៃឱ្យបានហ្មត់ចត់នូវទំហំលំហដែលនៅសេសសល់ និងអនុវត្តភ្លាមៗនូវរាល់ដំណោះស្រាយដ៏ខ្លាំងក្លា ប្តូរផ្តាច់ ជាក់ស្តែង និងប្រកបដោយប្រសិទ្ធភាព ដើម្បីខិតខំសម្រេចឱ្យបានលទ្ធផលខ្ពស់បំផុត។

ដូច្នេះហើយ មូលដ្ឋាននីមួយៗចាំបាច់ត្រូវទាញយកផលពីគុណសម្បត្តិ និងលក្ខខណ្ឌដោយឡែករៀងៗខ្លួន ដើម្បីបង្កើតបន្ថែមនូវទំហំលំហកំណើន។

Bac Ninh គឺជាឧទាហរណ៍មួយ។ ជាមួយនឹងអត្រាកំណើន GRDP សម្រេចបាន ១១,៨១% ក្នុងរយៈពេល ៩ ខែ មូលដ្ឋាននេះឈរនៅលំដាប់ទី ៤ ទូទាំងប្រទេស និងស្ថិតក្នុងក្រុមដែលសម្រេចបានអត្រាកំណើនពីរខ្ទង់។

យោងតាមលោក Nguyen Dinh Hieu ប្រធានមន្ទីរហិរញ្ញវត្ថុខេត្ត Bac Ninh តម្រូវការអភិវឌ្ឍន៍នាពេលបច្ចុប្បន្ន មិនត្រឹមតែស្ថិតនៅលើការរក្សាបាននូវល្បឿនកំណើនប៉ុណ្ណោះទេ ប៉ុន្តែថែមទាំងត្រូវលើកកម្ពស់ទំហំ គុណភាព និងចីរភាពផងដែរ។

«Bac Ninh ក្លាយជាទីក្រុងចំណុះមជ្ឈិម បានដាក់ចេញនូវតម្រូវការអភិវឌ្ឍន៍កាន់តែខ្ពស់អំពីទំហំ គុណភាព និងចីរភាព។ ខេត្តបានកំណត់ការផ្លាស់ប្តូរយ៉ាងខ្លាំងក្លាពីគំរូកំណើនផ្អែកលើដើមទុន កម្លាំងពលកម្ម និងការពង្រីកផលិតកម្ម ទៅជាការផ្អែកលើវិទ្យាសាស្ត្រ-បច្ចេកវិទ្យា និងនវានុវត្តន៍ ការធ្វើបរិវត្តកម្មឌីជីថល ផលិតភាព និងតម្លៃបន្ថែម។ ដើម្បីរក្សាបាននូវកំណើន ២ ខ្ទង់ Bac Ninh ត្រូវតែបង្កើតកម្លាំងចលករថ្មីៗបន្ថែមទៀតពីឧស្សាហកម្មបច្ចេកវិទ្យាខ្ពស់ ឧស្សាហកម្ម semiconductor បញ្ញាសិប្បនិម្មិត ភស្តុភារកម្ម សេវាកម្មទីក្រុង និងសេដ្ឋកិច្ចឌីជីថល» លោក Nguyen Dinh Hieu បានឱ្យដឹង។

កំណើនខ្ពស់ត្រូវតែដើរទន្ទឹមគ្នាជាមួយគុណភាព

ចាប់ពីកម្លាំងចលករប្រពៃណីរហូតដល់កម្លាំងចលករថ្មីៗ បញ្ហាដែលបានដាក់ចេញមិនត្រឹមតែជាការបង្កើនល្បឿនប៉ុណ្ណោះទេ ប៉ុន្តែថែមទាំងត្រូវលើកកម្ពស់គុណភាពនៃកំណើនផងដែរ។

នៅពេលដែលទំហំនៃខឿនសេដ្ឋកិច្ចកាន់តែធំឡើងៗ ទំហំលំហកំណើនដែលផ្អែកតែលើការពង្រីកដើមទុន កម្លាំងពលកម្ម និងផលិតកម្ម ក៏ទាមទារឱ្យមានការផ្លាស់ប្តូរផងដែរ។

លោក Bui Minh Giap អ្នកជំនាញសេដ្ឋកិច្ចចម្បងនៃធនាគារអភិវឌ្ឍន៍អាស៊ី (ADB) ប្រចាំនៅវៀតណាម បានយល់ឃើញថា៖ «បញ្ហាប្រឈមខាងគោលនយោបាយរបស់វៀតណាមនាពេលបច្ចុប្បន្ន គឺការរក្សាកំណើនខ្ពស់ ប៉ុន្តែនៅតែត្រូវលើកកម្ពស់គុណភាពនៃកំណើន។ យើងមានគ្រឹះកំណើនល្អប្រសើរណាស់។ ប៉ុន្តែដើម្បីឱ្យមានកំណើនប្រកបដោយចីរភាព ចាំបាច់ត្រូវតែផ្លាស់ប្តូរយ៉ាងខ្លាំងក្លាពីការពង្រីកកត្តាធាតុចូល ទៅជាការលើកកម្ពស់ផលិតភាព គុណភាព និងសមត្ថភាពធន់រឹងមាំនៃខឿនសេដ្ឋកិច្ចក្នុងរយៈពេលមធ្យម និងវែង»។

ការណ៍នេះបានដាក់ចេញនូវតម្រូវការទន្ទឹមគ្នានៅក្នុងដំណាក់កាលបោះពួយចុងក្រោយ៖ ទាំងការទាញយកផលជាអតិបរមានូវទំហំលំហដែលអាចបង្កើតលទ្ធផលបានភ្លាមៗ ទាំងការបង្កើតកម្លាំងចលករកំណើនរយៈពេលវែងបន្ថែមទៀត ដោយផ្អែកលើវិទ្យាសាស្ត្រ-បច្ចេកវិទ្យា នវានុវត្តន៍ ការធ្វើបរិវត្តកម្មឌីជីថល ផលិតភាព និងតម្លៃបន្ថែម។

ដូច្នេះហើយ បីខែចុងឆ្នាំ គឺជាពេលវេលាដើម្បីប្រែក្លាយបណ្តាប្រភពធនធានដែលនៅកប់ទុកឱ្យទៅជាកម្លាំងស្ទុះងើបឡើងជាក់ស្តែង។

ការបើកច្រកការស្ទះ ពន្លឿនចរន្តដើមទុនចូលទៅក្នុងខឿនសេដ្ឋកិច្ច ការជំរុញផលិតកម្ម ការប្រើប្រាស់ ការនាំចេញ ការបញ្ចេញទុនវិនិយោគសាធារណៈ ការទាក់ទាញការវិនិយោគឯកជន និងការលើកកម្ពស់តួនាទីនៃបណ្តាប៉ូលកំណើន នឹងកំណត់អំពីលទ្ធភាពសម្រេចបាននូវជំហានលោតផ្លោះនៅក្នុងត្រីមាសទី IV។

គោលដៅកំណើនពីរខ្ទង់គឺជាបញ្ហាប្រឈមធំធេងមួយ ប៉ុន្តែក៏បានដាក់ចេញនូវតម្រូវការផ្លាស់ប្តូរកាន់តែខ្លាំងក្លានៅក្នុងវិធីសាស្ត្រទាញយកផលពីប្រភពធនធានផងដែរ។ នៅពេលដែលទំហំលំហដែលមានស្រាប់ត្រូវបានប្រើប្រាស់ប្រកបដោយប្រសិទ្ធភាព ហើយកម្លាំងចលករថ្មីៗត្រូវបានជំរុញឱ្យដំណើរការទាន់ពេលវេលា ទើបកំណើនខ្ពស់អាចដើរទន្ទឹមគ្នាជាមួយគុណភាព និងបង្កើតបានជាគ្រឹះសម្រាប់ការអភិវឌ្ឍនៅក្នុងបណ្តាឆ្នាំបន្ទាប់៕

នាយករដ្ឋមន្ត្រី៖ ការប្រឡងប្រណាំងត្រូវតែក្លាយជាកម្លាំងចលករជំរុញសកម្មភាព សម្រាប់គោលដៅកំណើនសេដ្ឋកិច្ចមានតួលេខពីរខ្ទង់ យុគសម័យ - នាយករដ្ឋមន្ត្រី បានអំពាវនាវដល់គ្រប់ថ្នាក់ គ្រប់វិស័យ គ្រប់មូលដ្ឋាន បងប្អូនប្រជាពលរដ្ឋ និងសហគមន៍អាជីវកម្ម ត្រូវបន្តពង្រីកឱ្យបានខ្ពស់បំផុតនូវប្រពៃណីស្នេហាជាតិ ស្មារតីប្រឡងប្រណាំងស្នេហាជាតិ និងកម្លាំងសាមគ្គីភាពនៃប្លុកមហាសាមគ្គីជាតិទាំងមូល។

វៀតណាមចំពោះមុខកាលានុវត្តភាពកំណើនពីរខ្ទង់៖ កម្លាំងផ្ទៃក្នុង ការកែទម្រង់ និងសេចក្តីប្រាថ្នាចង់ឈានឡើង យុគសម័យ - នៅក្នុងបរិបទដែលខឿនសេដ្ឋកិច្ចពិភពលោកបន្តប្រឈមមុខនឹងភាពមិនប្រាកដប្រជា និងការប្រឈមជាច្រើន សហគមន៍សហគ្រាសអន្តរជាតិបានវាយតម្លៃថា វៀតណាមកំពុងក្តោបក្តាប់នូវប្រៀបខ្លាំងលេចធ្លោ «មេឃអំណោយផល ដីមានលក្ខណៈល្អ មនុស្សមានការឯកភាពចិត្ត» ដើម្បីធ្វើឱ្យគោលដៅកំណើនលឿន និងចីរភាពនៅក្នុងដំណាក់កាល ២០២៦-២០៣០ ក្លាយជាការពិត។

ឌឿងង្វៀន