ជនជាតិវៀតណាមមានចំនួនជាង ៧៥% នៃពលករជំនាញជាក់លាក់លេខ ២ នៅជប៉ុន

យោងតាមទិន្នន័យពីការិយាល័យអន្តោប្រវេសន៍ និងស្នាក់នៅជប៉ុន (ISA) ដែលបានប្រកាសកាលពីថ្ងៃទី ២៩ ខែកញ្ញា គិតត្រឹមដំណាច់ខែមិថុនា ឆ្នាំ ២០២៦ ប្រទេសជប៉ុនមានពលករបរទេសចំនួន ៤៤៤.២៥៦ នាក់ ស្ថិតក្នុងកម្មវិធីសម្រាប់ពលករមានជំនាញ កើនឡើង ១៣,៨% ត្រឹមតែក្នុងរយៈពេលកន្លះឆ្នាំ និងសម្រេចបានកម្រិតខ្ពស់បំផុតមិនធ្លាប់មានពីមុនមក។

គួរកត់សម្គាល់ថា នៅក្នុងក្រុមជំនាញជាក់លាក់លេខ ២ មានចំនួន ១៨.២៩៥ នាក់ ក្នុងនោះ ១៣.៧៦១ នាក់មានសញ្ជាតិវៀតណាម ដែលស្មើនឹងជាង ៧៥%។

ពីពលករមានកំណត់ពេលវេលា ឈានទៅរកឱកាសធ្វើការងាររយៈពេលវែង

យោងតាម Jiji Press និង Nippon.com ដើម្បីប្តូរទៅកាន់ទិដ្ឋាការជំនាញជាក់លាក់លេខ ២ ពលករត្រូវតែបំពេញតាមលក្ខខណ្ឌតម្រូវខ្ពស់ជាងមុនអំពីកម្រិតជំនាញ និងបទពិសោធន៍វិជ្ជាជីវៈ។

ខុសប្លែកពីក្រុមពលករជំនាញធម្មតាដែលត្រូវបានកម្រិតពេលវេលាធ្វើការងារអតិបរមា ៥ ឆ្នាំ បុគ្គលដែលស្ថិតក្នុងកម្មវិធីជំនាញជាក់លាក់លេខ ២ អាចបន្តសុពលភាពនៃរយៈពេលស្នាក់នៅបានច្រើនដង។ ប្រសិនបើបំពេញតាមលក្ខខណ្ឌកំណត់ ពួកគេក៏អាចនាំយកស្វាមី/ភរិយា និងកូនៗទៅរស់នៅក្នុងប្រទេសជប៉ុនបានផងដែរ។

ពលការិនីជនជាតិវៀតណាមម្នាក់ ដែលទទួលបានទិដ្ឋាការ «ជំនាញជាក់លាក់» ក្នុងវិស័យកសិកម្ម កំពុងធ្វើការបែងចែកប្រភេទបន្លែស្ពៃពួយឡេង (Bina) នៅកសិដ្ឋានមួយ ដើម្បីរៀបចំវេចខ្ចប់ នៅក្នុងទីប្រជុំជន Kitahiroshima ខេត្ត Hiroshima។

ការដែលជនជាតិវៀតណាមមានចំនួនជាង ៧៥% នៃក្រុមនេះ បានបង្ហាញឱ្យឃើញនូវការផ្លាស់ប្តូរនៅក្នុងកម្លាំងពលកម្មវៀតណាមនៅជប៉ុន។ ទន្ទឹមនឹងក្រុមដែលទៅបំពេញការងារក្នុងរយៈពេលកំណត់ណាមួយ ក៏កាន់តែមានពលករជាច្រើនបានសន្សំបទពិសោធន៍ លើកកម្ពស់កម្រិតជំនាញវិជ្ជាជីវៈ និងឈានចូលទៅក្នុងក្រុមដែលអាចបំពេញការងាររយៈពេលវែងនៅក្នុងទីផ្សារនេះ។

នៅក្នុងក្រុមជំនាញជាក់លាក់លេខ ១ ជនជាតិវៀតណាមក៏ឈរនៅលំដាប់ថ្នាក់លេខមួយអំពីចំនួនក្នុងចំណោមសញ្ជាតិនានា លើសពីប្រទេសឥណ្ឌូណេស៊ី និងមីយ៉ាន់ម៉ា។

គិតត្រឹមដំណាច់ខែមិថុនា ឆ្នាំ ២០២៦ ជប៉ុនមានពលករបរទេសចំនួន ៤២៥.៩៦១ នាក់ ស្ថិតក្នុងក្រុមនេះ ក្នុងនោះមានជនជាតិវៀតណាមចំនួន ១៦៣.១៥៤ នាក់។

បូកផ្សំជាមួយចំនួន ១៣.៧៦១ នាក់ ស្ថិតក្នុងក្រុមជំនាញជាក់លាក់លេខ ២ ចំនួនសរុបនៃពលករវៀតណាមដែលបំពេញការងារនៅប្រទេសជប៉ុនតាមកម្មវិធីពលករជំនាញ សម្រេចបាន ១៧៦.៩១៥ នាក់។

ពលករវៀតណាមប្រមូលផ្តុំនៅក្នុងវិស័យទាំងឡាយដែលប្រទេសជប៉ុនកំពុងខ្វះខាតកម្លាំងពលកម្ម ដូចជា ការផលិតឧស្សាហកម្ម ការកែច្នៃចំណីអាហារ សំណង់ ភោជនីយដ្ឋាន កសិកម្ម និងការថែទាំមនុស្សចាស់។

ជិត ១/៤ នៃពលករបរទេសនៅជប៉ុន គឺជាជនជាតិវៀតណាម

ប្រសិនបើគិតនៅលើទីផ្សារពលករបរទេសទាំងមូលនៅជប៉ុន ជនជាតិវៀតណាមក៏កំពុងតែកាន់កាប់សមាមាត្រយ៉ាងច្រើនផងដែរ។

យោងតាមទិន្នន័យរបស់ក្រសួងសុខាភិបាល ពលកម្ម និងសុខុមាលភាពជប៉ុន ដែលត្រូវបាន Nippon.com ចងក្រង គិតត្រឹមខែតុលា ឆ្នាំ ២០២៥ ប្រទេសជប៉ុនមានពលករបរទេសប្រមាណ ២,៦ លាននាក់ ដែលជាកម្រិតខ្ពស់បំផុតជាកំណត់ត្រា។

ពលករជនជាតិវៀតណាមចំនួន ៣ នាក់ កំពុងបំពេញការងារនៅរោងជាងនៃក្រុមហ៊ុនផលិតកប៉ាល់ Innoshima Tekko។ ពួកគេបានមកកាន់ប្រទេសជប៉ុនក្រោមទិដ្ឋាការ «ជំនាញជាក់លាក់លេខ ១» សម្រាប់អ្នកដែលមានបទពិសោធន៍កម្មសិក្សាពី ៣ ឆ្នាំឡើងទៅ និងត្រូវបានអនុញ្ញាតឱ្យធ្វើការងាររយៈពេលអតិបរមា ៥ ឆ្នាំ។

ក្នុងចំណោមចំនួននេះ ប្រមាណ ៦១០.០០០ នាក់ គឺជាជនជាតិវៀតណាម ស្មើនឹង ២៣,៦%។ ដូចនេះ ពលករបរទេសជិត ១/៤ នៅប្រទេសជប៉ុន គឺជាជនជាតិវៀតណាម។

បច្ចុប្បន្ន វៀតណាមគឺជាប្រភពពលករបរទេសធំបំផុតរបស់ជប៉ុន ដោយឈរលើប្រទេសចិន និងហ្វីលីពីន។

ចំពោះទំហំប្រជាជន សហគមន៍ជនជាតិវៀតណាមនៅជប៉ុនក៏សម្រេចបានប្រមាណ ៦៨១.១០០ នាក់ នៅដំណាច់ឆ្នាំ ២០២៥ ដែលធំជាងគេលំដាប់ទីពីរក្នុងចំណោមសហគមន៍ជនបរទេសនៅប្រទេសនេះ បន្ទាប់ពីប្រទេសចិន។

ការប្រកួតប្រជែងប្រភពកម្លាំងពលកម្មកាន់តែកើនឡើង

ទោះបីជាជនជាតិវៀតណាមនៅតែបន្តកាន់កាប់សមាមាត្រធំក្តី កម្លាំងពលកម្មមកពីប្រទេសមួយចំនួនទៀតនៅអាស៊ីអាគ្នេយ៍កំពុងតែកើនឡើងយ៉ាងឆាប់រហ័ស។

យោងតាម Nippon.com ក្នុងឆ្នាំ ២០២៥ ចំនួនពលករមីយ៉ាន់ម៉ានៅជប៉ុនបានកើនឡើង ៤២,៥% ពលករឥណ្ឌូណេស៊ីកើនឡើង ៣៤,៦% ខណៈដែលពលករវៀតណាមកើនឡើង ៦,២%។

ក្នុងបរិបទដែលប្រទេសជប៉ុនមានភាពចាស់ជរានៃចំនួនប្រជាជន និងកង្វះខាតកម្លាំងពលកម្មក្នុងវិស័យជាច្រើន ចាប់ពីរោងចក្រ ការដ្ឋានសំណង់ ភោជនីយដ្ឋាន រហូតដល់មូលដ្ឋានថែទាំមនុស្សចាស់ តម្រូវការទទួលយកប្រភពពលកម្មពីខាងក្រៅ ជាពិសេសពីតំបន់អាស៊ីអាគ្នេយ៍ នៅតែបន្តកើនឡើង។

នៅក្នុងចរន្តនៃការផ្លាស់ប្តូរនោះ ពលករវៀតណាមបច្ចុប្បន្នកាន់កាប់តួនាទីគួរឱ្យកត់សម្គាល់នៅប្រទេសជប៉ុន៖ ជិត ១/៤ នៃចំនួនពលករបរទេសសរុប និងជាង ៧៥% នៃចំនួនអ្នកស្ថិតក្នុងកម្មវិធីជំនាញជាក់លាក់លេខ ២។

តួលេខទាំងនេះក៏បានបង្ហាញឱ្យឃើញផងដែរថា ផ្នែកមួយនៃកម្លាំងពលកម្មវៀតណាមនៅជប៉ុន កំពុងផ្លាស់ប្តូរជាបណ្តើរៗពីការធ្វើការងារមានកំណត់ពេលវេលា ឈានទៅរកការលើកកម្ពស់ជំនាញ បទពិសោធន៍វិជ្ជាជីវៈ និងតម្រង់ឆ្ពោះទៅរកលទ្ធភាពផ្សារភ្ជាប់ទំនាក់ទំនងការងាររយៈពេលវែងជាងមុន ជាមួយទីផ្សារពលកម្មនៃប្រទេសនេះ៕

បង្កើតប្រព័ន្ធអេកូឡូស៊ីថែរក្សា និងផ្សព្វផ្សាយភាសាវៀតណាមក្នុងសហគមន៍ជនជាតិវៀតណាមនៅឯបរទេស យុគសម័យ - នាថ្ងៃទី ១២ ខែសីហា នៅ Ha Noi គណៈកម្មាធិការរដ្ឋទទួលបន្ទុកជនជាតិវៀតណាមនៅឯបរទេស ក្រសួងការបរទេស បានសហការជាមួយបណ្តាក្រសួង ស្ថាប័ន មូលដ្ឋាន និងបណ្តាទីភ្នាក់ងារតំណាងវៀតណាមនៅឯបរទេស រៀបចំពិធីបូកសរុបទិវាលើកតម្កើងភាសាវៀតណាមក្នុងសហគមន៍ជនជាតិវៀតណាមនៅឯបរទេស ឆ្នាំ ២០២៦ ដោយមានការចូលរួមពីប្រតិភូប្រមាណ ៨០ នាក់នៅ Ha Noi និងជាង ១០០ ចំណុចតភ្ជាប់នៅលើពិភពលោក។

សហគមន៍ជនជាតិវៀតណាមនៅ Kumamoto ផ្លាស់ប្តូរការផ្តោតសំខាន់ពីការសង្គ្រោះបន្ទាន់ទៅជាការស្តារឡើងវិញក្រោយគ្រោះរញ្ជួយដី យុគសម័យ - គណៈប្រតិភូការងារនៃសហភាពសមាគមជនជាតិវៀតណាមប្រចាំនៅជប៉ុន (VUAJ) ទើបតែបានបំពេញការងារនៅខេត្ត Kumamoto សួរសុខទុក្ខប្រជាជនវៀតណាមដែលរងផលប៉ះពាល់ដោយគ្រោះរញ្ជួយដី ពិនិត្យឡើងវិញនូវសកម្មភាពសង្គ្រោះបន្ទាន់ និងផ្លាស់ប្តូរយោបល់អំពីផែនការគាំទ្រសហគមន៍ក្នុងដំណាក់កាលស្តារជីវភាពរស់នៅឡើងវិញ។

សុវណ្ណា