តភ្ជាប់អ្នកជំនាញ AI វៀតណាមទូទាំងសកលលោក ដើម្បីដោះស្រាយបញ្ហាបច្ចេកវិទ្យាស្នូលនានា

រូបភាពឧទាហរណ៍។

នៅក្នុងការប្រកួតប្រជែងលើវិស័យបញ្ញាសិប្បនិម្មិត (AI) ការវិនិយោគលើហេដ្ឋារចនាសម្ព័ន្ធ ទិន្នន័យ និងបច្ចេកវិទ្យា គឺជាលក្ខខណ្ឌដ៏សំខាន់ ប៉ុន្តែកត្តាមនុស្សនៅតែដើរតួនាទីសម្រេចក្នុងការបង្រួមគម្លាតចំណេះដឹង និងសមត្ថភាពម្ចាស់ការលើបច្ចេកវិទ្យា។

ផ្អែកលើតម្រូវការនោះ ក្រសួងវិទ្យាសាស្ត្រ និងបច្ចេកវិទ្យាបានអនុវត្តបណ្តាញអ្នកជំនាញ AI វៀតណាមទូទាំងសកលលោក ដោយសំដៅតភ្ជាប់ប្រភពធនធានបញ្ញារបស់ជនជាតិវៀតណាមដែលកំពុងធ្វើការ និងស្រាវជ្រាវនៅកន្លែងជាច្រើនលើពិភពលោក ឱ្យក្លាយទៅជាសហគមន៍មួយដែលមានសមត្ថភាពចូលរួមដោយផ្ទាល់ក្នុងបណ្តាភារកិច្ចជាក់ស្តែងរបស់ប្រទេសជាតិ។

បណ្តាញនេះត្រូវបានកសាងឡើងតាមគោលការណ៍បើកចំហ បត់បែន និងស្ម័គ្រចិត្ត។ អ្នកជំនាញអាចចូលរួមទៅតាមបញ្ហាចោទនីមួយៗ ភារកិច្ច គម្រោង ឬកម្មវិធី ដោយផ្ទាល់ ឬតាមប្រព័ន្ធអនឡាញ អាស្រ័យលើជំនាញឯកទេស និងលក្ខខណ្ឌផ្ទាល់ខ្លួនរបស់មនុស្សម្នាក់ៗ។

តភ្ជាប់អ្នកជំនាញជាមួយតម្រូវការជាក់ស្តែង

ចំណុចគួរឱ្យកត់សម្គាល់នៃគំរូនេះ គឺមិនត្រឹមតែឈប់នៅត្រឹមការប្រមូលផ្តុំបញ្ជីឈ្មោះអ្នកជំនាញ AI ប៉ុណ្ណោះទេ ប៉ុន្តែសំដៅកសាងយន្តការតភ្ជាប់ទ្វេទិសរវាងប្រភពធនធានបញ្ញវន្ត និងតម្រូវការជាក់ស្តែង។

ចេញពីបញ្ហាចោទនានាដែលបានដាក់ចេញនៅតាមមូលដ្ឋាន និងសហគ្រាស បណ្តាញអាចបូកសរុបតម្រូវការ ស្វែងរកអ្នកជំនាញដែលសមស្រប និងបង្កើតជាក្រុមស្រាវជ្រាវ ក្រុមប្រឹក្សាយោបល់អន្តរវិស័យ និងអន្តរស្ថាប័ន។

សាស្ត្រាចារ្យរង បណ្ឌិត Nguyen Tuan Hung សាស្ត្រាចារ្យនៃសាកលវិទ្យាល័យ Tohoku ប្រទេសជប៉ុន បានយល់ឃើញថា៖ «ការបង្កើតបណ្តាញអ្នកជំនាញ AI គឺជាជំហានមួយដ៏ចាំបាច់បំផុតក្នុងដំណាក់កាលបច្ចុប្បន្ន។ អ្វីដែលសំខាន់មិនត្រឹមតែជាការតភ្ជាប់អ្នកដែលធ្វើការលើវិស័យ AI ប៉ុណ្ណោះទេ ប៉ុន្តែគឺការបង្កើតយន្តការមួយដើម្បីរួមគ្នាដោះស្រាយបញ្ហាចោទធំៗរបស់វៀតណាមនាពេលបច្ចុប្បន្ន»។

យោងតាមលោក Nguyen Tuan Hung បណ្តាញនេះសម្លឹងឆ្ពោះទៅកាន់ ៤ គោលដៅ៖ តភ្ជាប់អ្នកជំនាញក្នុង និងក្រៅប្រទេសដើម្បីបង្កើតជាក្រុមស្រាវជ្រាវតាមវិស័យនីមួយៗ ចែករំលែកទិន្នន័យ ហេដ្ឋារចនាសម្ព័ន្ធ និងបទពិសោធន៍ស្រាវជ្រាវ កសាងបណ្តាគម្រោងអន្តរវិស័យរវាង AI ជាមួយវិស័យដទៃទៀត ព្រមទាំងគាំទ្រដល់ការបណ្តុះបណ្តាលអ្នកស្រាវជ្រាវវ័យក្មេង និងនិស្សិត តាមរយៈយន្តការរួមគ្នាតម្រង់ទិសការស្រាវជ្រាវ។

ដូច្នេះ ការតភ្ជាប់អ្នកជំនាញមិនមែនជាគោលដៅចុងក្រោយនោះទេ ប៉ុន្តែជាវិធីសាស្ត្រដើម្បីបង្កើតឱ្យមានក្រុមសហប្រតិបត្តិការ គម្រោងស្រាវជ្រាវ និងលទ្ធផលជាក់ស្តែង។

លោក Tran Phu Thuan អនុប្រធាន និងជាអគ្គលេខាធិការសហភាពសមាគមជនជាតិវៀតណាមប្រចាំសហព័ន្ធរុស្ស៊ី បានវាយតម្លៃខ្ពស់ចំពោះវិធីសាស្ត្រកសាងបណ្តាញតាមជំនាញឯកទេសជាក់លាក់នីមួយៗ។

លោក Tran Phu Thuan បានចែករំលែកថា៖ «ចំណុចមួយដែលយើងខ្ញុំពេញចិត្តយ៉ាងខ្លាំងនោះ គឺការកសាងប្រព័ន្ធអេកូឡូស៊ីអាណិកជនវៀតណាមនៅលើពិភពលោកទាំងមូល។ ការផ្លាស់ប្តូរនេះគឺជាចំណុចស្នូល ដែលជួយបង្កើតបណ្តាញអាណិកជនទូទាំងសកលលោកទៅតាមជំនាញឯកទេសច្បាស់លាស់។ តាមរយៈនោះ អាចទាក់ទាញអ្នកវិទ្យាសាស្ត្រ សហគ្រាស សមាជិកសភា យុវជនជំនាន់ក្រោយ អ្នកវិទ្យាសាស្ត្រ ហើយនឹងរៀបចំតាមប្រធានបទជាក់លាក់នីមួយៗ»។

ពីប្រភពធនធានបញ្ញវន្ត ទៅជាសមត្ថភាពបច្ចេកវិទ្យាក្នុងប្រទេស

ក្នុងបរិបទដែលគម្លាតភូមិសាស្ត្រលែងសូវជាឧបសគ្គទៀតហើយនោះ ការរួមចំណែករបស់បញ្ញវន្តអាណិកជនមិនចាំបាច់ត្រូវចាប់ផ្តើមតែពីការវិលត្រឡប់មកវៀតណាមដើម្បីបំពេញការងារយូរអង្វែងនោះទេ។

តាមរយៈបណ្តាញនេះ អ្នកជំនាញអាចចូលរួមក្នុងការបណ្តុះបណ្តាល ការផ្ទេរចំណេះដឹង ការប្រឹក្សាយោបល់ ការរិះគន់ស្ថាបនា ការគាំទ្រនវានុវត្តន៍ និងការអនុវត្ត AI នៅក្នុងសាលារៀន សហគ្រាស ក៏ដូចជាបណ្តាវិស័យអាទិភាពនានា។

អ្នកជំនាញក៏អាចចូលរួមដោះស្រាយបញ្ហាចោទធំៗ អន្តរវិស័យ រយៈពេលវែង ឬមានសារៈសំខាន់ចំពោះប្រទេសជាតិ តាមរយៈនោះរួមចំណែកលើកកម្ពស់សមត្ថភាពស្រាវជ្រាវ អភិវឌ្ឍន៍ និងម្ចាស់ការលើបច្ចេកវិទ្យា AI យុទ្ធសាស្ត្រ។

បណ្ឌិត Nguyen Quang Phuoc ប្រធានគណៈប្រតិបត្តិនៃបណ្តាញនវានុវត្តន៍វៀតណាមប្រចាំនៅកូរ៉េខាងត្បូង បានយល់ឃើញថា ចាំបាច់ត្រូវផ្លាស់ប្តូរផ្នត់គំនិតពីការឧបត្ថម្ភថវិកាសម្រាប់ប្រធានបទស្រាវជ្រាវ ទៅជាការវិនិយោគដើម្បីដោះស្រាយបញ្ហាជាក់លាក់ និងបង្កើតផលិតផលដែលអាចចូលទៅកាន់ទីផ្សារបាន។

លោក Nguyen Quang Phuoc បានសង្កត់ធ្ងន់ថា៖ «វៀតណាមត្រូវផ្លាស់ប្តូរពីផ្នត់គំនិតផ្តល់ជំនួយសម្រាប់ប្រធានបទស្រាវជ្រាវ ទៅជាផ្នត់គំនិតវិនិយោគដើម្បីដោះស្រាយបញ្ហាចោទមួយ និងបង្កើតផលិតផលដែលមានទីផ្សារ។ នៅពេលកំណត់ភារកិច្ចស្រាវជ្រាវមួយ យើងគួរតែចោទជា ៣ សំណួរតាំងពីដំបូង៖ តើនរណាត្រូវការបច្ចេកវិទ្យានេះ តើនរណានឹងប្រើប្រាស់វា និងតើនរណាមានលទ្ធភាពនាំយកវាទៅកាន់ទីផ្សារ។ ប្រសិនបើឆ្លើយតបសំណួរទាំង ៣ នេះបានតាំងពីដំបូង នោះគម្លាតរវាងការស្រាវជ្រាវ និងការធ្វើពាណិជ្ជកម្មកម្មនឹងត្រូវបានបង្រួមឱ្យខ្លី»។

បច្ចុប្បន្ន វៀតណាមមានសហគមន៍ជនជាតិវៀតណាមដែលកំពុងសិក្សា ស្រាវជ្រាវ និងបំពេញការងារនៅតាមមជ្ឈមណ្ឌលវិទ្យាសាស្ត្រ និងបច្ចេកវិទ្យាជាច្រើនលើពិភពលោក។

ប្រភពធនធាននេះអាចបំពេញបន្ថែមដល់ប្រព័ន្ធអេកូឡូស៊ីនវានុវត្តន៍ក្នុងប្រទេស មិនត្រឹមតែដោយចំណេះដឹងឯកទេសប៉ុណ្ណោះទេ ប៉ុន្តែថែមទាំងដោយបទពិសោធន៍ស្រាវជ្រាវ បណ្តាញកិច្ចសហប្រតិបត្តិការ និងលទ្ធភាពទទួលបាននូវនិន្នាការបច្ចេកវិទ្យាថ្មីៗផងដែរ។

ដូច្នេះ អត្ថន័យនៃបណ្តាញអ្នកជំនាញ AI វៀតណាមទូទាំងសកលលោក មិនត្រឹមតែស្ថិតនៅលើការប្រមូលផ្តុំមនុស្សពូកែៗប៉ុណ្ណោះទេ ប៉ុន្តែថែមទាំងនៅលើសមត្ថភាពបង្កើតវិធីសាស្ត្រតភ្ជាប់កាន់តែមានភាពបត់បែនជាងមុនផងដែរ។

ជំនួសឱ្យការកំណត់គោលដៅតែមួយគត់គឺការនាំអ្នកជំនាញត្រឡប់មកប្រទេសវិញ បណ្តាញនេះសម្លឹងឆ្ពោះទៅការនាំយកចំណេះដឹង បទពិសោធន៍ និងបណ្តាញទំនាក់ទំនងរបស់ពួកគេ មកចូលរួមដោះស្រាយបញ្ហាចោទជាក់ស្តែង ដោយបោះជំហានជាបន្តបន្ទាប់ក្នុងការប្រែក្លាយប្រភពធនធានបញ្ញាសកល ឱ្យក្លាយទៅជាសមត្ថភាពបច្ចេកវិទ្យាក្នុងប្រទេស និងបង្កើតជាតម្លៃថ្មីសម្រាប់វៀតណាម៕

នាំកិច្ចសហប្រតិបត្តិការវិទ្យាសាស្ត្រ និងបច្ចេកវិទ្យាអន្តរជាតិឱ្យកាន់តែកៀកជិតនឹងតម្រូវការជាក់ស្តែង យុគសម័យ - កិច្ចសហប្រតិបត្តិការអន្តរជាតិក្នុងការស្រាវជ្រាវវិទ្យាសាស្ត្រ និងការអភិវឌ្ឍបច្ចេកវិទ្យា ចាំបាច់ត្រូវកសាងឡើងចេញពីតម្រូវការជាក់ស្តែងរបស់មូលដ្ឋាន សហគ្រាស និងគ្រឹះស្ថានស្រាវជ្រាវ តាមរយៈនោះតភ្ជាប់ឱ្យចំដៃគូ ធនធាន និងបច្ចេកវិទ្យា ដើម្បីបង្កើតឡើងនូវភារកិច្ចទាំងឡាយណាដែលមានលទ្ធភាពអនុវត្ត និងបង្កើតឥទ្ធិពលជាក់ស្តែង។

រាជបណ្ឌិត្យសភា និង Vingroup បង្កើនកិច្ចសហប្រតិបត្តិការស្រាវជ្រាវបច្ចេកវិទ្យាឈានមុខ យុគសម័យ - នៅថ្ងៃទី ២៥ ខែកញ្ញា នៅ Ha Noi បណ្ឌិត្យសភាវិទ្យាសាស្ត្រ និងបច្ចេកវិទ្យាវៀតណាម និងសម្ព័ន្ធក្រុមហ៊ុន Vingroup បានចុះហត្ថលេខាលើអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យថាមពលកកើតឡើងវិញ សន្តិសុខតាមប្រព័ន្ធអ៊ីនធឺណិត សម្ភារថ្មី និងបច្ចេកវិទ្យាអវកាស សំដៅពង្រឹងការតភ្ជាប់រវាងការស្រាវជ្រាវ ជាមួយនឹងការអនុវត្ត ការអភិវឌ្ឍ និងការផ្ទេរបច្ចេកវិទ្យា។

វ៉ាន់ណាំ