ការទាក់ទាញធនធានមនុស្សឆ្នើមផ្នែកបច្ចេកវិទ្យាយុទ្ធសាស្ត្រ៖ មិនត្រឹមតែតាមរយៈប្រាក់បៀវត្សរ៍ប៉ុណ្ណោះទេ ប៉ុន្តែតាមរយៈសិទ្ធិអំណាច និងបរិយាកាសការងារ

ចាំបាច់ត្រូវទាក់ទាញ និងរក្សាទុកនូវបណ្តាអគ្គវិស្វករ អ្នកជំនាញ និងអ្នកវិទ្យាសាស្ត្រ ដែលមានសមត្ថភាពគ្រប់គ្រាន់ក្នុងការទទួលបន្ទុកបណ្តាភារកិច្ចបច្ចេកវិទ្យាយុទ្ធសាស្ត្រ។

នៅក្នុងការប្រកួតប្រជែងបច្ចេកវិទ្យាសកល បណ្តាប្រទេសមិនត្រឹមតែប្រណាំងប្រជែងគ្នាអំពីទុន និងហេដ្ឋារចនាសម្ព័ន្ធប៉ុណ្ណោះទេ ប៉ុន្តែថែមទាំងប្រកួតប្រជែងគ្នាយ៉ាងស្វិតស្វាញដើម្បីទាក់ទាញមនុស្សដែលមានសមត្ថភាពបង្កើតបច្ចេកវិទ្យាស្នូល រៀបចំក្រុមស្រាវជ្រាវ និងដឹកនាំគម្រោងចាប់ពីគំនិតរហូតដល់ផលិតផលសម្រេច។

វៀតណាមក៏កំពុងឈរនៅចំពោះមុខតម្រូវការនេះផងដែរ។ ការបណ្តុះបណ្តាលបន្ថែមវិស្វករ អ្នកស្រាវជ្រាវ គឺជាភារកិច្ចយូរអង្វែង ប៉ុន្តែចំពោះមុខគឺចាំបាច់ត្រូវទាក់ទាញ និងរក្សាទុកនូវបណ្តាអគ្គវិស្វករ អ្នកជំនាញ និងអ្នកវិទ្យាសាស្ត្រ ដែលមានសមត្ថភាពគ្រប់គ្រាន់ក្នុងការទទួលបន្ទុកបណ្តាភារកិច្ចបច្ចេកវិទ្យាយុទ្ធសាស្ត្រ។

យោងតាមសាស្ត្រាចារ្យ បណ្ឌិត Tran Tuan Anh អនុប្រធានរាជបណ្ឌិត្យសភាវិទ្យាសាស្ត្រ និងបច្ចេកវិទ្យាវៀតណាម ការលំបាកនាពេលបច្ចុប្បន្នមិនត្រឹមតែស្ថិតនៅលើប្រាក់ចំណូលប៉ុណ្ណោះទេ។ ការវិនិយោគសម្រាប់ការស្រាវជ្រាវនៅមានកម្រិតទាប និងបែកខ្ញែក ខ្វះខាតកម្មវិធីធំៗដែលអូសបន្លាយពី ១០ ទៅ ២០ ឆ្នាំ ដើម្បីរក្សាស្ថិរភាពនៃក្រុមស្រាវជ្រាវខ្លាំងៗ។

ហេដ្ឋារចនាសម្ព័ន្ធស្រាវជ្រាវក៏ជាគន្លឹះស្ទះមួយដែរ។ បន្ទប់ពិសោធន៍គន្លឹះជាច្រើនត្រូវបានវិនិយោគតាំងពីយូរយារណាស់មកហើយ ដោយខ្វះឧបករណ៍ទំនើប និងថវិកាសម្រាប់ដំណើរការ ថែទាំ លើកកម្ពស់គុណភាព។ យោងតាមលោក Tran Tuan Anh ប្រសិនបើមិនដោះស្រាយនូវចំណុចកម្រិតទាំងនេះទេ វៀតណាមនឹងពិបាកក្នុងការអនុវត្តបណ្តាកម្មវិធីវិទ្យាសាស្ត្រធំៗ ដែលជាមូលដ្ឋានគ្រឹះសម្រាប់បណ្តាបច្ចេកវិទ្យាយុទ្ធសាស្ត្រនាពេលអនាគត។

បញ្ហានោះបានបង្ហាញឱ្យឃើញថា អ្នកជំនាញម្នាក់អាចត្រូវបានទាក់ទាញដោយរបបឧបត្ថម្ភដ៏ទាក់ទាញ ប៉ុន្តែពិបាកក្នុងការលើកកម្ពស់សមត្ថភាព ប្រសិនបើខ្វះខាតបន្ទប់ពិសោធន៍ ប្រភពធនធានប្រកបដោយស្ថិរភាព និងកម្មវិធីមួយដែលមានរយៈពេលវែងគ្រប់គ្រាន់ដើម្បីបន្តអនុវត្ត។ បញ្ហាមិនត្រឹមតែជាការនាំមនុស្សពូកែមកកាន់វៀតណាមប៉ុណ្ណោះទេ ប៉ុន្តែថែមទាំងត្រូវបង្កើតបរិយាកាសដើម្បីឱ្យពួកគេអាចធ្វើការបានយូរអង្វែងផងដែរ។

មនុស្សពូកែត្រូវការច្រើនជាងប្រាក់បៀវត្សរ៍មួយកម្រិត

ចេញពីការអនុវត្តជាក់ស្តែងនៃសហគ្រាស ប្រធាន និងជាអគ្គនាយក Viettel លោក Tao Duc Thang ធ្លាប់បានស្នើនូវគោលនយោបាយគាំទ្រលំនៅឋាន ការលើកទឹកចិត្តពន្ធលើប្រាក់ចំណូល អនុញ្ញាតឱ្យអ្នកជំនាញកាន់កាប់កម្មសិទ្ធិ ឬសហកម្មសិទ្ធិលើលទ្ធផលស្រាវជ្រាវ ការរកឃើញថ្មី ការច្នៃប្រឌិត និងមានភាគហ៊ុននៅក្នុងសហគ្រាសដែលត្រូវបានបង្កើតឡើងចេញពីលទ្ធផលស្រាវជ្រាវ។

Viettel ក៏បានដាក់ចេញនូវគោលដៅទាក់ទាញធនធានមនុស្សឆ្នើមចំនួន ៥០ នាក់បន្ថែមទៀតមកបម្រើការងារ។ នៅពីក្រោយតួលេខនេះ គឺជាតម្រូវការជាក់ស្តែងរបស់សហគ្រាសមួយដែលកំពុងចូលរួមក្នុងវិស័យបច្ចេកវិទ្យាសំខាន់ៗ៖ ប្រសិនបើចង់ដោះស្រាយបញ្ហាធំៗ គឺត្រូវតែមានមនុស្សដែលមានសមត្ថភាពគ្រប់គ្រាន់ក្នុងការដឹកនាំ។

ទោះជាយ៉ាងណាក៏ដោយ អ្វីដែលសហគ្រាសត្រូវការ មិនត្រឹមតែជាធនធានមនុស្សដែលមានសញ្ញាបត្រ ឬស្នាដៃស្រាវជ្រាវប៉ុណ្ណោះទេ។ គម្រោងបច្ចេកវិទ្យាយុទ្ធសាស្ត្រទាំងឡាយ ទាមទារឱ្យមានមនុស្សដែលមានបទពិសោធន៍ជាក់ស្តែង យល់ច្បាស់ពីដំណើរការអភិវឌ្ឍផលិតផល មានសមត្ថភាពសមាហរណកម្មវិស័យជាច្រើន និងទទួលខុសត្រូវចំពោះលទ្ធផលចុងក្រោយ។

ដើម្បីប្រកួតប្រជែងជាមួយមជ្ឈមណ្ឌលបច្ចេកវិទ្យាអន្តរជាតិនានា គោលនយោបាយក៏មិនអាចត្រឹមតែឈប់នៅត្រឹមកម្រិតប្រាក់បៀវត្សរ៍ខ្ពស់នោះឡើយ។ មនុស្សពូកែនៅយកចិត្តទុកដាក់ចំពោះឱកាសស្រាវជ្រាវ សិទ្ធិស្វ័យភាព សមត្ថភាពក្នុងការជ្រើសរើសសហការី និងចំណែកតម្លៃដែលពួកគេទទួលបាន នៅពេលបច្ចេកវិទ្យាត្រូវបានផ្ទេរ និងធ្វើពាណិជ្ជកម្ម។

រាល់តម្រូវការចេញពីការអនុវត្តជាក់ស្តែងនេះ ត្រូវបានឆ្លុះបញ្ចាំងនៅក្នុងអនុក្រឹត្យលេខ 260/2026/ND-CP ចុះថ្ងៃទី ៣០ មិថុនា ឆ្នាំ ២០២៦ របស់រដ្ឋាភិបាល ដែលកំណត់លម្អិត និងវិធានការអនុវត្តមាត្រាមួយចំនួននៃច្បាប់ស្តីពីបច្ចេកវិទ្យាជាន់ខ្ពស់។

អនុក្រឹត្យបានកំណត់ដោយឡែកនូវបទប្បញ្ញត្តិស្តីពីការទាក់ទាញ និងអភិវឌ្ឍធនធានមនុស្សផ្នែកបច្ចេកវិទ្យាជាន់ខ្ពស់ ការជ្រើសរើស និងការប្រើប្រាស់ឱ្យចំសមត្ថភាពនូវបណ្តាអគ្គវិស្វករ អ្នកជំនាញ និងអ្នកវិទ្យាសាស្ត្រឆ្នើម ដែលផ្ទាល់អនុវត្តភារកិច្ចអភិវឌ្ឍបច្ចេកវិទ្យាយុទ្ធសាស្ត្រ។

មុខសញ្ញាជ្រើសរើសមិនត្រូវបានកំណត់ត្រឹមតែធនធានមនុស្សដែលកំពុងបម្រើការងារនៅក្នុងប្រទេសប៉ុណ្ណោះទេ។ ប្រជាជនវៀតណាម ជនជាតិវៀតណាមរស់នៅឯបរទេស និងជនបរទេស សុទ្ធតែអាចចូលរួមបាន ប្រសិនបើឆ្លើយតបតាមតម្រូវការអំពីកម្រិតវិជ្ជា ជំនាញ និងបទពិសោធន៍ស្រាវជ្រាវ អភិវឌ្ឍ ធ្វើជាម្ចាស់ ផ្ទេរ ឬធ្វើពាណិជ្ជកម្មបច្ចេកវិទ្យា។

វិធីសាស្ត្រនៃការចូលទៅដោះស្រាយនេះបានពង្រីកវិសាលភាពនៃការស្វែងរកធនធានមនុស្សឆ្នើម ព្រមទាំងប្តូរទិសដៅសំខាន់ពីសញ្ញាបត្រទៅជាសមត្ថភាពជាក់ស្តែង។ អ្នកដែលត្រូវបានជ្រើសរើស ត្រូវតែមានសមត្ថភាពចូលរួម ឬដឹកនាំបណ្តាកម្មវិធី គម្រោងស្រាវជ្រាវ អភិវឌ្ឍ ផលិត និងដាក់ពង្រាយបច្ចេកវិទ្យាក្នុងទ្រង់ទ្រាយធំ។

របបឧបត្ថម្ភផ្សារភ្ជាប់ជាមួយភារកិច្ច និងលទ្ធផល

យោងតាមអនុក្រឹត្យលេខ ២៦០ ប្រាក់បៀវត្សរ៍របស់អគ្គវិស្វករ អ្នកជំនាញ និងអ្នកវិទ្យាសាស្ត្រឆ្នើម ត្រូវបានព្រមព្រៀងគ្នានៅក្នុងកិច្ចសន្យាការងារ ដោយធានាថាសមស្របទៅនឹងភារកិច្ច និងស្របតាមកម្រិតប្រាក់បៀវត្សរ៍ទូទៅក្នុងវិស័យដែលត្រូវគ្នានៅលើទីផ្សារ។

ប្រាក់រង្វាន់ប្រចាំឆ្នាំត្រូវបានសម្រេចដោយស្ថាប័ន ឬអង្គការដែលទទួលបន្ទុកដឹកនាំភារកិច្ច ផ្អែកលើមូលដ្ឋាននៃលទ្ធផលនៃការអនុវត្តការងារ ដោយអតិបរិមាស្មើនឹង ៦ ខែនៃប្រាក់បៀវត្សរ៍ដែលបានកត់ត្រានៅក្នុងកិច្ចសន្យា។ អ្នកដែលត្រូវបានជ្រើសរើស ក៏ទទួលបានប្រាក់រង្វាន់ពីការទាញយកផលប្រយោជន៍ ការផ្ទេរ ឬការធ្វើពាណិជ្ជកម្មនូវលទ្ធផលស្រាវជ្រាវ ស្របតាមបទប្បញ្ញត្តិផងដែរ។

នៅពេលចាប់ផ្តើមការងារ ពួកគេទទួលបានការគាំទ្រប្រាក់បៀវត្សរ៍មួយខែ ដើម្បីរក្សាស្ថិរភាពកន្លែងស្នាក់នៅ ការធ្វើដំណើរ និងការទិញសម្ភារៈចាំបាច់ ព្រមទាំងត្រូវបានលើកលែងពន្ធលើប្រាក់ចំណូលបុគ្គល ស្របតាមបទប្បញ្ញត្តិនៃច្បាប់ស្តីពីពន្ធដារ។

បណ្តាបទប្បញ្ញត្តិទាំងនេះបានឆ្លើយតបមួយផ្នែកនូវសំណើនានាពីខាងសហគ្រាស អំពីប្រាក់ចំណូល កន្លែងស្នាក់នៅ ពន្ធដារ និងផលប្រយោជន៍របស់អ្នកជំនាញដែលទទួលបានពីសមិទ្ធផលស្រាវជ្រាវ។

ចំណុចគួរឱ្យកត់សម្គាល់នោះគឺ របបឧបត្ថម្ភមិនត្រូវបានរៀបចំឡើងជាប្រាក់ឧបត្ថម្ភថេរនោះឡើយ ប៉ុន្តែត្រូវបានផ្សារភ្ជាប់ជាមួយភារកិច្ច និងលទ្ធផលនៃការអនុវត្ត។

នេះគឺជាការផ្លាស់ប្តូរដ៏ចាំបាច់ ពីព្រោះតម្លៃនៃធនធានមនុស្សផ្នែកបច្ចេកវិទ្យាយុទ្ធសាស្ត្រ មិនអាចគ្រាន់តែត្រូវបានវាស់វែងដោយពេលវេលាធ្វើការងារនោះទេ។ រង្វាស់ដ៏សំខាន់ជាងនេះ គឺបច្ចេកវិទ្យាដែលត្រូវបានធ្វើជាម្ចាស់ បញ្ហាបច្ចេកទេសដែលត្រូវបានដោះស្រាយ និងផលិតផលដែលត្រូវបានបង្កើតឡើង។

ការប្រគល់សិទ្ធិអំណាចដើម្បីផ្សារភ្ជាប់ការទទួលខុសត្រូវ

ខ្លឹមសារគួរឱ្យកត់សម្គាល់មួយទៀតនៅក្នុងអនុក្រឹត្យលេខ ២៦០ គឺលក្ខខណ្ឌ និងសិទ្ធិការងារដែលផ្តល់ជូនសម្រាប់អ្នកត្រូវបានជ្រើសរើស។

អគ្គវិស្វករ អ្នកជំនាញ និងអ្នកវិទ្យាសាស្ត្រឆ្នើម ត្រូវបានសម្រេចលើបញ្ហាបច្ចេកទេស និងបច្ចេកវិទ្យា ម្ចាស់ការក្នុងការអនុវត្តខ្លឹមសារជំនាញវិជ្ជាជីវៈ និងដោះស្រាយបញ្ហាស្មុគស្មាញខាងបច្ចេកទេស នៅក្នុងក្របខ័ណ្ឌនៃភារកិច្ចដែលបានប្រគល់ជូន។

អ្នកទទួលបន្ទុកដឹកនាំ ត្រូវបានជ្រើសរើសធនធានមនុស្សចូលរួម ស្នើស្ថាប័នមានសមត្ថកិច្ចចាត់ចែងបុគ្គលិក រៀបចំផ្នែកជំនួយការ និងស្នើរបបសមស្របទៅនឹងតម្រូវការជំនាញវិជ្ជាជីវៈ នៅក្នុងក្របខ័ណ្ឌថវិកាដែលត្រូវបានអនុម័ត។

នៅពេលចាំបាច់ ពួកគេអាចស្នើទិញបច្ចេកវិទ្យា ឧបករណ៍ ផលិតផលបរទេស និងចំណេះដឹងបច្ចេកវិទ្យា ដើម្បីបម្រើឱ្យការស្រាវជ្រាវ និងការអភិវឌ្ឍបច្ចេកវិទ្យាយុទ្ធសាស្ត្រ។ ថវិកាសម្រាប់ប្រើប្រាស់បន្ទប់ពិសោធន៍គន្លឹះ មូលដ្ឋានស្រាវជ្រាវ និងហេដ្ឋារចនាសម្ព័ន្ធវិទ្យាសាស្ត្រ និងបច្ចេកវិទ្យាដែលរដ្ឋវិនិយោគ ក៏ត្រូវបានធានាផងដែរ។

ការចូលរួមសន្និសីទ សិក្ខាសាលា កិច្ចសហប្រតិបត្តិការស្រាវជ្រាវ ការផ្លាស់ប្តូរការសិក្សាស្រាវជ្រាវ និងការងារជំនាញវិជ្ជាជីវៈទាំងក្នុងប្រទេស និងក្រៅប្រទេស ដើម្បីបម្រើដោយផ្ទាល់ដល់ភារកិច្ច ក៏ត្រូវបានទូទាត់ចំណាយស្របតាមបទប្បញ្ញត្តិ។

ដូចគ្នានេះដែរ គោលនយោបាយមិនត្រឹមតែអញ្ជើញមនុស្សពូកែមកទទួលភារកិច្ចប៉ុណ្ណោះទេ ប៉ុន្តែថែមទាំងប្រគល់ឧបករណ៍ឱ្យពួកគេ ដើម្បីអនុវត្តភារកិច្ចទៀតផង។

នេះគឺជាលក្ខខណ្ឌដ៏សំខាន់ ពីព្រោះអ្នកទទួលបន្ទុកដឹកនាំមិនអាចទទួលខុសត្រូវរហូតដល់ទីបញ្ចប់បានឡើយ ប្រសិនបើគ្មានសិទ្ធិជ្រើសរើសសហការី រៀបចំការងារ និងសម្រេចលើផែនការជំនាញវិជ្ជាជីវៈ។

ជាមួយនឹងបណ្តាភារកិច្ចអន្តរវិស័យ និងមានកម្រិតហានិភ័យខ្ពស់ សិទ្ធិម្ចាស់ការនៅជួយកាត់បន្ថយពេលវេលាដោះស្រាយបញ្ហាបច្ចេកទេស។ ជំនួសឱ្យការត្រូវរង់ចាំឆ្លងកាត់ច្រើនជាន់ថ្នាក់ អ្នកទទួលខុសត្រូវអាចធ្វើការសម្រេចចិត្តក្នុងក្របខ័ណ្ឌដែលបានប្រគល់ជូន និងទទួលខុសត្រូវចំពោះការសម្រេចចិត្តនោះ។

បង្កើតដំណើរផ្លូវវែងឆ្ងាយសម្រាប់មនុស្សមានទេពកោសល្យ

ការទាក់ទាញអ្នកជំនាញជួរមុខ និងការបណ្តុះបណ្តាលកម្លាំងបន្តវេន គឺជាពីរផ្នែកនៃបញ្ហាតែមួយ។

សាស្ត្រាចារ្យ បណ្ឌិត Tran Tuan Anh បានចាត់ទុកថា គោលនយោបាយធនធានមនុស្សចាំបាច់ត្រូវតែកសាងឱ្យបានព្រមៗគ្នា ចាប់ពីការអប់រំចំណេះទូទៅ សាកលវិទ្យាល័យ រហូតដល់វិទ្យាស្ថានស្រាវជ្រាវ និងសាកលវិទ្យាល័យ។ អ្នកដែលបន្តការសិក្សាស្រាវជ្រាវវិទ្យាសាស្ត្រ ត្រូវការរបបគ្រប់គ្រាន់ដើម្បីឱ្យមានភាពកក់ក្តៅក្នុងការរៀនសូត្រ ស្រាវជ្រាវ និងមើលឃើញផ្លូវចេញនៃអាជីពការងារ។

អគ្គវិស្វករម្នាក់អាចដឹកនាំភារកិច្ចធំបាន ប៉ុន្តែនៅពីក្រោយត្រូវតែជាក្រុមស្រាវជ្រាវមួយដែលមានភាពរឹងមាំគ្រប់គ្រាន់។ ផ្ទុយទៅវិញ យុវជនត្រូវការបានធ្វើការជាមួយបណ្តាអ្នកជំនាញដែលមានសមត្ថភាពតម្រង់ទិស រៀបចំកម្លាំង និងផ្ទេរបទពិសោធន៍។

ហេតុដូច្នេះ ភាពទាក់ទាញប្រកបដោយចីរភាពមិនត្រឹមតែចេញមកពីកិច្ចសន្យាការងារមួយប៉ុណ្ណោះទេ។ មនុស្សមានទេពកោសល្យត្រូវការមើលឃើញនូវដំណើរផ្លូវទាំងមូល៖ ត្រូវបានប្រគល់បញ្ហាសំខាន់ មានលក្ខខណ្ឌបន្តការស្រាវជ្រាវ ទទួលបានការទទួលស្គាល់ចេញពីលទ្ធផល និងមានឱកាសកសាងក្រុមការងារបន្តវេន។

យោងតាមលោកស្រី Vu Thi La អនុប្រធាននាយកដ្ឋានបុគ្គលិក និងរៀបចំ ចំណុះក្រសួងវិទ្យាសាស្ត្រ និងបច្ចេកវិទ្យា ប្រព័ន្ធគោលនយោបាយបច្ចុប្បន្នជាមូលដ្ឋានគឺមានភាពពេញលេញសមស្រប បង្កើតភាពទាក់ទាញចាំបាច់ដើម្បីទាក់ទាញ និងរក្សាទុកអ្នកវិទ្យាសាស្ត្រវ័យក្មេង ជាពិសេសគឺបណ្តាអ្នកវិទ្យាសាស្ត្រវ័យក្មេងដែលមានទេពកោសល្យ។

បញ្ហានេះបានបង្ហាញឱ្យឃើញថា គន្លឹះស្ទះកំពុងផ្លាស់ប្តូរបន្តិចម្តងៗពីការខ្វះខាតគោលនយោបាយ ទៅជាសមត្ថភាពក្នុងការនាំយកគោលនយោបាយចូលទៅក្នុងការអនុវត្តជាក់ស្តែង។

ភាពទាក់ទាញចុងក្រោយគឺស្ថិតនៅលើដំណាក់កាលនៃការអនុវត្ត

អនុរដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យា Bui Hoang Phuong បានចាត់ទុកថា ដំណាក់កាលដ៏សំខាន់នាពេលបច្ចុប្បន្ន គឺការរៀបចំអនុវត្តប្រកបដោយប្រសិទ្ធភាព ដើម្បីឱ្យបណ្តាគោលនយោបាយពង្រីកប្រសិទ្ធភាពនៅក្នុងការអនុវត្តជាក់ស្តែង។

យន្តការថ្មីៗជាច្រើនត្រូវការពេលវេលាដើម្បីបង្កើតផលជះ ព្រមទាំងទាមទារឱ្យមានការសម្របសម្រួលរវាងវិស័យវិទ្យាសាស្ត្រ និងបច្ចេកវិទ្យា ហិរញ្ញវត្ថុ ការអប់រំ មហាផ្ទៃ រួមជាមួយបណ្តាក្រសួង ស្ថាប័ន និងមូលដ្ឋាន។

នេះក៏ជាការសាកល្បងមួយចំពោះអនុក្រឹត្យលេខ ២៦០ ផងដែរ។

ប្រសិនបើយន្តការប្រាក់បៀវត្សរ៍តាមការព្រមព្រៀងនៅតែត្រូវបានអនុវត្តដោយស្ទាក់ស្ទើរ សិទ្ធិម្ចាស់ការខាងជំនាញវិជ្ជាជីវៈត្រូវបានរួមតូច បន្ទប់ពិសោធន៍ពិបាកចូលប្រើប្រាស់ ឬនីតិវិធីទិញឧបករណ៍ត្រូវបានអូសបន្លាយ នោះបទប្បញ្ញត្តិជឿនលឿនទាំងឡាយនឹងពិបាកក្លាយជាប្រៀបខ្លាំងប្រកួតប្រជែងណាស់។

ផ្ទុយទៅវិញ ប្រសិនបើអង្គការទទួលបន្ទុកដឹកនាំហ៊ានប្រគល់បញ្ហាធំ ផ្តល់កម្រៃពលកម្មស្របតាមសមត្ថភាព ប្រគល់សិទ្ធិអំណាចស្របគ្នាជាមួយនឹងការទទួលខុសត្រូវ និងធានាប្រភពធនធានស្រាវជ្រាវ នោះវៀតណាមមិនត្រឹមតែអាចទាក់ទាញបុគ្គលឆ្នើមមួយចំនួនប៉ុណ្ណោះទេ ប៉ុន្តែថែមទាំងអាចបង្កើតបានជាបណ្តាក្រុមស្រាវជ្រាវខ្លាំងៗទៀតផង។

រង្វាស់ចុងក្រោយនៃគោលនយោបាយ អាស្រ័យហេតុនេះ មិនមែនស្ថិតនៅលើចំនួនមនុស្សដែលត្រូវបានចុះកិច្ចសន្យា ឬកម្រិតប្រាក់ចំណូលដែលបានទូទាត់នោះឡើយ។

អ្វីដែលសំខាន់ជាងនេះ គឺអ្នកដែលត្រូវបានជ្រើសរើសបានដឹកនាំភារកិច្ចណាខ្លះ ធ្វើជាម្ចាស់លើបច្ចេកវិទ្យាអ្វី កសាងក្រុមការងារយ៉ាងដូចម្តេច និងបង្កើតបានផលិតផលដែលមានសមត្ថភាពអនុវត្តជាក់ស្តែងបែបណា។

អនុក្រឹត្យលេខ ២៦០ បានបង្កើតយន្តការដើម្បីឱ្យមនុស្សមានទេពកោសល្យទទួលបានកម្រៃពលកម្មសមស្រប ប្រើប្រាស់ហេដ្ឋារចនាសម្ព័ន្ធស្រាវជ្រាវ និងមានភាពម្ចាស់ការខាងជំនាញវិជ្ជាជីវៈ។ ចំណែកការងារដែលនៅសេសសល់ គឺការប្រែក្លាយសិទ្ធិទាំងនោះឱ្យទៅជាលក្ខខណ្ឌការងារជាក់ស្តែង ដើម្បីកុំឱ្យមនុស្សពូកែគ្រាន់តែត្រូវបានអញ្ជើញមកប៉ុណ្ណោះ ប៉ុន្តែនៅមានមូលហេតុដើម្បីបន្តស្នាក់នៅ និងបង្កើតតម្លៃបន្ថែមទៀតផង៕

ថ្នាលបណ្តាញសង្គមត្រូវតែម្ចាស់ការទប់ស្កាត់ “សំរាមលើបណ្តាញ” តាំងពីដើមទី យុគសម័យ - លំហអ៊ីនធឺណិតបាននាំមកនូវអត្ថប្រយោជន៍ និងតម្លៃវិជ្ជមានជាច្រើន ប៉ុន្តែក៏កំពុងក្លាយជាបរិយាកាសផ្សព្វផ្សាយខ្លឹមសារពុល ខុសគន្លង ថែមទាំងល្មើសច្បាប់ក្នុងល្បឿនយ៉ាងលឿនទៀតផង។ ទន្ទឹមនឹងការទទួលខុសត្រូវរបស់អ្នកបង្ហោះ និងស្ថាប័នគ្រប់គ្រង បណ្តាថ្នាលបណ្តាញសង្គមត្រូវតែទទួលខុសត្រូវដោយផ្ទាល់ និងជាប្រចាំក្នុងការរកឃើញ ទប់ស្កាត់ និងដោះស្រាយហានិភ័យភ្លាមៗចេញពីប្រព័ន្ធដែលខ្លួនកំពុងដំណើរការ។

ច្បាប់ថ្មីចំនួនពីរ បង្កើតមូលដ្ឋានគ្រឹះកសាងលំហអ៊ីនធឺណិតប្រកបដោយសុវត្ថិភាព និងអរិយធម៌ យុគសម័យ - កាលពីថ្ងៃទី ២១ ខែសីហា នៅ Ha Noi ក្រសួងនគរបាលបានសហការជាមួយសមាគមសន្តិសុខតាមប្រព័ន្ធអ៊ីនធឺណិតជាតិ (NCA) រៀបចំសន្និសីទផ្សព្វផ្សាយ និងណែនាំច្បាប់ស្តីពីសន្តិសុខតាមប្រព័ន្ធអ៊ីនធឺណិត និងច្បាប់ស្តីពីការការពារទិន្នន័យផ្ទាល់ខ្លួន ជូនចំពោះបណ្តាក្រសួង ស្ថាប័ន អង្គការ សហគ្រាសក្នុង និងក្រៅប្រទេស។ សន្និសីទនេះបានរួមចំណែកបញ្ជាក់ឱ្យកាន់តែច្បាស់នូវរាល់តម្រូវការអនុវត្តតាម ការការពារប្រព័ន្ធព័ត៌មាន និងទិន្នន័យផ្ទាល់ខ្លួន នៅក្នុងបរិបទនៃការផ្លាស់ប្តូរឌីជីថលកាន់តែស៊ីជម្រៅ។

ម៉ាញដាត