យុគសម័យ - នាថ្ងៃទី ៩ ខែវិច្ឆិកា ឆ្នាំ២០២០ អង្គការ World Vision វៀតណាម បានប្រកាសប្តេជ្ញាថានឹងត្រៀមថវិកាចំនួន ២៧,៧ ពាន់លានដុង (១,២ លានដុល្លារ) ដល់កម្មវិធីឆ្លើយតបបន្ទាន់និងស្តារឡើងវិញបន្ទាប់ពីទឹកជំនន់និងការបាក់ស្រុតដីដ៏ធំមួយដែលបង្កឡើងដោយព្យុះរ៉ាំរ៉ៃ នៅភាគកណ្តាលប្រទេសវៀតណាម។
អង្គការ World Vision វៀតណាមសន្យាជួយឧបត្ថម្ភដល់គ្រួសារចំនួន ១០,០០០ គ្រួសារដែលរងគ្រោះដោយទឹកជំនន់នៅតំបន់ភាគកណ្តាលវៀតណាម
គោលដៅនៃកម្មវិធីនេះ គឺដើម្បីគាំទ្រដល់ប្រជាជននិងរដ្ឋាភិបាល ដើម្បីដោះស្រាយនូវតម្រូវការចាំបាច់ហើយទន្ទឹមនឹងនេះជួយលើកកម្ពស់ការបង្កើតជីវិតរស់នៅឡើងវិញសម្រាប់គ្រួសារងាយរងគ្រោះចំនួន ១ ម៉ឺនគ្រួសារនៅក្នុងខេត្តចំនួន ៣ ដែលរងគ្រោះនិងរងឥទ្ធិពលធ្ងន់ធ្ងរដោយព្យុះនិង ជំនន់ទឹកភ្លៀង រួមមានខេត្ត ក្វាងទ្រី ក្វាងណាម និងកាងង៉ៃ។
កម្មវិធីឆ្លើយតបបន្ទាន់និងស្តារគ្រាអាសន្នរបស់អង្គការ World Vision វៀតណាម នឹងត្រូវអនុវត្តក្នុងរយៈពេលពី ៣ ទៅ ៦ ខែ។ ក្នុងអំឡុងពេលនៃការផ្តល់ជំនួយសង្គ្រោះនេះ អង្គការនេះនឹងជួយទ្រទ្រង់ក្នុងការកសាងនិងជួសជុលផ្ទះ ដែលខូចខាតបន្ទាប់ពីព្យុះនិងចែកចាយស្បៀងអាហារនិងការផ្គត់ផ្គង់ដល់គ្រួសាគោលដៅសម្រាប់គុណភាពទឹកស្អាតនិងអនាម័យ រួមទាំងការពារកុមារនិងការអប់រំ។ រាល់សកម្មភាពនៅក្នុងកម្មវិធីនេះប្រកាន់ខ្ជាប់យ៉ាងតឹងរឹងនូវគោលការណ៍នៃការការពារសុវត្ថិភាពដល់កុមារនិងប្រជាជនជាអ្នកទទួលអំណោយផលទាំងអស់ផងដែរ៕（បកប្រែដោយ ហេង វុធ្ធី）
（ប្រភពព័ត៌មាន: thoidai.com.vn）
មតិពីមិត្តអ្នកអាន