ចាំបាច់ត្រូវបង្កើនទំហំពាណិជ្ជកម្មទ្វេភាគីរវាងវៀតណាមនិងសាធារណរដ្ឋឆែក

ទិដ្ឋភាពនៃពិធីនេះ

នារសៀលថ្ងៃទី ២១ ខែតុលានៅវិមានប្រធានាធិបតីនៃសាធារណរដ្ឋឆែកនៅរដ្ឋធានីប្រាក លោកឯកអគ្គរដ្ឋទូតវិសាមញ្ញនិងពេញសមត្ថភាពវៀតណាមប្រចាំសាធារណរដ្ឋឆែក Thai Xuan Dung បានអញ្ជើញជូនសារតាំងទៅលោកប្រធានាធិបតីង្វៀនភូត្រុងជូនប្រធានាធិបតីលោក Miloš Zeman ក្នុងឱកាសចាប់ផ្តើមអាណត្តិបេសកកម្មការទូតថ្មីរបស់ខ្លួន។

នៅក្នុងជំនួបនេះ លោកប្រធានាធិបតី Miloš Zeman បានវាយតម្លៃខ្ពស់ចំពោះការអភិវឌ្ឍដ៏ល្អនៃទំនាក់ទំនងមិត្តភាពជាប្រពៃណីនិងកិច្ចសហប្រតិបត្តិការពហុភាគីរវាងសាធារណរដ្ឋឆែកនិងវៀតណាមក្នុងរយៈពេលប៉ុន្មានឆ្នាំថ្មីៗនេះ។ទន្ទឹមនឹងនេះដែរ លោកប្រធានាធិបតីឆែក Milos Zeman បានសម្តែងការចាប់អារម្មណ៍ចំពោះសមិទ្ធិផលក្នុងការអភិវឌ្ឍន៍សេដ្ឋកិច្ច-សង្គម ក៏ដូចជាទំនាក់ទំនងការបរទេសរបស់វៀតណាម ក្រោយពីរយៈពេលជាង ៣០ ឆ្នាំនៃការផ្លាស់ប្តូរថ្មីនិងរីកចម្រើនផងដែរ។ ទន្ទឹមនឹងនេះ លោក Zeman ក៏បានវាយតម្លៃខ្ពស់ចំពោះការរួមចំណែក របស់សហគមន៍វៀតណាមនាពេលថ្មីៗនេះនៅសាធារណរដ្ឋឆែក ជាពិសេសគឺការជួយឧបត្ថម្ភរបស់សហគមន៍ក្នុងរយៈពេលដែលជំងឺ Covid-19 ផ្ទុះឡើងនៅក្នុងប្រទេសនេះផងដែរ។

ឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋសង្គមនិយមវៀតណាមប្រចាំសាធារណរដ្ឋឆែក លោក Thai Xuan Dung និងប្រធានាធិបតីសាធារណរដ្ឋឆែក លោក​ Milos Zeman

ថ្លែងនៅឯកិច្ចជំនួបនេះដែរ លោកឯកអគ្គរដ្ឋទូត Thai Xuan Dung បានបញ្ជាក់ថាលោកនឹងប្តេជ្ញាចិត្តនិងខិតខំប្រឹងប្រែងឱ្យអស់ពីសមត្ថភាពរបស់ខ្លួន ដើម្បីធ្វើជាស្ពានភ្ជាប់មួយក្នុងការជំរុញនិងលើកកម្ពស់កិច្ចសហប្រតិបត្តិការរវាងប្រទេសទាំងពីរឱ្យឈានដល់កម្ពស់ថ្មីមួយ ដើម្បីផលប្រយោជន៍របស់ប្រជាជននៃប្រទេសទាំងពីរ ក៏ដូចជាដើម្បីសន្តិភាព ស្ថិរភាព កិច្ចសហប្រតិបត្តិការនិងការអភិវឌ្ឍមិនត្រឹមតែនៅប្រទេសទាំងពីរប៉ុណ្ណោះទេ ថែមទាំងសម្រាប់តំបន់និងពិភពលោកទៀតផង ៕

（បកប្រែដោយ ហេងវុធ្ធី）

（ប្រភពព័ត៌មាន: thoidai.com.vn）

（បកប្រែដោយ ហេងវុធ្ធី）