កងទ័ពជើងទឹកអាមេរិកបាននិយាយកាលពីថ្ងៃព្រហស្បតិ៍ទី២៣ឧសភាថា នាវាកងទ័ពជើងអាមេរិកច្រើនគ្រឿងបានធ្វើសមយុទ្ធរួមជាមួយកងនាវាចម្បាំងមកពីប្រទេសសម្ពន្ធមិត្តដែលមាន ជប៉ុន អូស្ត្រាលី និងកូរ៉េខាងត្បូងក្នុងការធ្វើសមយុទ្ធរួមគ្នាលើកទីមួយរបស់ពួកគេសមុទ្រប៉ាស៊ីហ្វិកភាគខាងលិច។
អាមេរិក បញ្ជូននាវា៥គ្រឿង និងយន្តហោះច្រើនគ្រឿងសម្រាប់ការធ្វើសមយុទ្ធនេះ
សមយុទ្ធ” ទ័ពជួរមុខប៉ាស៊ីហ្វិក ”( Pacific Vanguard) ដែលធ្វើនៅជិតកោះហ្កាំ(Guam) របស់សហរដ្ឋអាមេរិកនេះ ធ្វើឡើងនៅមុនដំណើរទស្សនកិច្ចរបស់ប្រធានាធិបតីអាមេរិក លោក Donald Trump ទៅកាន់ប្រទេសជប៉ុននៅចុងសប្តាហ៍នេះ ស្របពេលដែលរដ្ឋាភិបាលក្រុងវ៉ាស៊ីនតោន យកចិត្តទុកដាក់លើក្រុមប្រទេសជាសម្ពន្ធមិត្តនៅអាស៊ីដើម្បីជួយទប់ទល់នឹងអំណាចយោធារបស់ចិននៅក្នុងតំបន់។
លោក ហ្វីលីព សរយឺ(Phillip Sawyer) ឧត្តមនាវីរងនៃកងនាវាទី៧អាមេរិកបាននិយាយនៅក្នុងសេចក្តីថ្លែងការណ៍មួយថា ” សមយុទ្ធនេះចូលរួមកម្លាំងទ័ពដែលមកពីប្រទេស៤នៅជិតសមុទ្រ ដែលអាចផ្តល់ការការពារសន្តិសុខនៅទូទាំងសមុទ្រ ឥណ្ឌូ-ប៉ាស៊ីហ្វិកដោយផ្អែកលើតម្លៃរួមនិងផលប្រយោជន៍រួម” ។
សមយុទ្ធដែលមានរយៈពេល៦ថ្ងៃនេះ ត្រូវបានចូលរួមដោយ នាវាពិឃាតជប៉ុន២គ្រឿងនាវាចម្បាំងអូស្ត្រាលី២គ្រឿង និង នាវាពិឃាតមួយគ្រឿងមក ពីកូរ៉េខាងត្បូង ជាមួយនឹងកងទ័ពសរុបទាំងអស់៣.០០០នាក់។
នៅខែនេះនាវាអាមេរិកបានធ្វើសមយុទ្ធជាមួយនាវាបារាំង ជប៉ុន និងអូស្ត្រាលីនៅឈូងសមុទ្រ Bengal ហើយបានធ្វើសមយុទ្ធដាច់ដោយឡែកជាមួយនាវាដឹកឧទ្ធម្ភាគចក្រជប៉ុន និងនាវាចម្បាំងមកពីឥណ្ឌា និងហ្វីលីពីននៅក្នុងសមុទ្រចិនខាងត្បូងដែលមានជម្លោះ។
ចិនទាមទារយកស្ទើរតែទាំងអស់នៃសមុទ្រចិនខាងត្បូងដែលឆ្លងកាត់ប្រហែលមួយភាគបីនៃការធ្វើនាវាចរណ៏លើសមុទ្រ ខណៈដែលប្រទេសប្រ៊ុយណេ ឥណ្ឌូណេស៊ី ម៉ាឡេស៊ី ហ្វីលីពីន តៃវ៉ាន់ និងវៀតណាមបានប្រកួតប្រជែងគ្នាដើម្បីទាមទារពីផ្លូវទឹកមួយនេះផងដែរ ៕
(ប្រភព៖ rasmeinews សរុបព័ត៌មានដោយ សមុទ្រ)
មតិពីមិត្តអ្នកអាន