អ្នកនាំពាក្យក្រសួងការបរទេសចិន លោក លូ កាំង (Lu Kang )បាននិយាយកាលពីថ្ងៃអង្គារទី២១ឧសភាថាក្រុមហ៊ុននិងអ្នកវិនិយោគទុនបរទេសនៅតែមានសុទិដ្ឋិនិយមអំពីទីផ្សារចិនទោះបីជាមានការគំរាមកំហែងជាបន្តរបស់សហរដ្ឋអាមេរិកក្នុងការដំឡើងពន្ធលើទំនិញរបស់ចិនក៏ដោយ។
អ្នកនាំពាក្យក្រសួងការបរទេសចិន លោក លូ កាំង
ការថ្លែងកត់សម្គាល់នេះបានកើតឡើងនៅពេលដែលលោក លូ កាំង បានឆ្លើយតបនឹងសំណួរមួយអំពីការអះអាងរបស់ប្រធានាធិបតីអាមេរិក លោក ដូណាល់ ត្រាំដែលថាការយកពន្ធលើទំនិញរបស់ចិនបានធ្វើឱ្យក្រុមហ៊ុនជាច្រើនផ្លាស់ប្តូរការផលិតផលរបស់ពួកគេ ដោយចេញពីប្រទេសចិន ហើយទៅកាន់ប្រទេសផ្សេងៗទៀត។
លោក លូ កាំង បាននិយាយនៅសន្និសីទកាសែតមួយថា ចាប់តាំងពីការចាប់ផ្តើមជម្លោះពាណិជ្ជកម្មចិន-អាមេរិកអស់ពេលជាងមួយឆ្នាំមកនោះ សហរដ្ឋអាមេរិកបានចេញផ្សាយព័ត៌មានជាច្រើនទៅតាមតំរូវការនយោបាយ ហើយពេលខ្លះមិនអើពើថាតើព័ត៌មាននេះស្របតាមការពិតឬយ៉ាងណានោះទេ។
លោកបាននិយាយថា “ការរំលោភលើច្បាប់ពាណិជ្ជកម្មរបស់សហរដ្ឋអាមេរិកបានធ្វើឱ្យមានការរំខានដល់ទីផ្សារអន្តរជាតិ ដោយរួមទាំងប្រទេសចិននិងសហរដ្ឋអាមេរិកប៉ុន្តែ នៅទីបញ្ចប់នោះសហគ្រាសណាមួយក៏ដោយនឹងធ្វើការជ្រើសរើសគោលនយោបាយអំពីការវិនិយោគរបស់ខ្លួនដោយផ្អែកលើការវាយតម្លៃជាយុទ្ធសាស្ត្ររបស់ខ្លួននៃទស្សនវិស័យសេដ្ឋកិច្ច ” ។
លោកបានបន្លែមថា ” ជាការពិតបើទោះបីជាសហរដ្ឋអាមេរិចបានគំរាមបង្កើនពន្ធលើផលិតផលរបស់ចិនអស់រយៈពេលជាងមួយឆ្នាំមកហើយក៏ដោយក៏ការចាប់អារម្មណ៍របស់វិនិយោគិនបរទេសក្នុងការវិនិយោគនៅក្នុងប្រទេសចិនគឺនៅតែមានកម្រិតខ្ពស់ ហើយពួកគេនៅតែមានសុទិដ្ឋិនិយមអំពីទីផ្សារប្រទេសចិន។
លោកបានលើកឡើងពីការកើនឡើងថ្មីៗនៃការវិនិយោគនៅក្នុងប្រទេសចិនដោយ ក្រុមហ៊ុន Exxon Mobil ក្រុមហ៊ុនTesla ក្រុមហ៊ុនBASF ក្រុមហ៊ុនBMWនិងក្រុមហ៊ុនល្បីថ្មីៗនៅលើពិភពលោក មួយចំនួនទៀត ៕
((ប្រភព៖ rasmeinews.com សរុបព័ត៌មានដោយសមុទ្រ)
មតិពីមិត្តអ្នកអាន